Marko 9

1Emena zin Ye̱su̱ zoza a̱nne̱k nogo ne, “Ka̱du̱wa̱kku̱ng zoz ci een de̱de̱, anyak ol u̱gge̱ cik abile ngatu iróng atin atari daiz ming ngen kicinnet ba̱a̱li̱ne̱t ci Ta̱mu̱ta̱dde̱no̱ ming a̱kku̱ doiza.”

Utuhuwe ele ci Ye̱su̱

(Ma̱te̱yo̱ 17:1-13; Lu̱ka̱ 9:28-36)

2Ma baling edeccai i̱i̱nya̱ torkonom ngati edemeze Ye̱su̱ ol, uwe zin enne Peturu ki Je̱mi̱s ki Jon biya ta̱dde̱na̱, ngati aavtte nege do̱. Utuhuwe zin ele ci Ye̱su̱ nginati ngati acine nege do̱o̱k. 3Izeto voore ru̱u̱ma̱ni̱ ciginnek, vooriten ci a̱zze̱ lo̱o̱ta̱ ngatu. 4Kar zin ciko E̱li̱ja̱ ki Muses ki̱ye̱lta̱i̱ ngu̱me̱ cinne̱ng ozozo ki Ye̱su̱.

5A̱nne̱k zin Peturu Ye̱su̱ ne, “De̱me̱zo̱i̱t, abunna ming kaavtte i̱yo̱ko̱ naga do̱o̱k ngatu. Keteehenycek ti̱te̱t i̱i̱yo̱ ngintu, co̱de̱ cunne, co̱de̱ ci Musesi, kar co̱de̱ ci E̱li̱ja̱.” 6Iróng Peturu a̱gga̱ zoz ci kar ku̱du̱wa̱, o̱to̱ngo̱o̱ltte̱ nege lo̱o̱c.

7I̱ki̱ya̱ zin di̱i̱zo̱ci̱ imma kar ku̱bu̱ng nogo, iyowa zin mului di̱i̱zo̱ca̱: “Een necu Ngeranni wa kirezi. Iziyyet zoz cinne!”#2 Peturu 1:17

8Ataman niko, baling ovvo demezyaha acin lo̱o̱c, iróng ngen acin E̱li̱ja̱ ki Muses, ize Ye̱su̱ do̱ niko.

9Ma baling ovvo nege aluccai biya, u̱du̱wa̱k zin Ye̱su̱ nogo zoz ci okkomi, “Ma a̱du̱wa̱k e̱e̱t imma gi̱i̱ ci icinntu niga ko̱ zee kitinga Ngerrti E̱e̱to̱ daiza.” 10Imigtoi zin nege nuyaha de̱de̱ zoz necu, ma̱i̱je̱ ngatu nege do̱ a̱jji̱nno̱, anno ne, “Zoz ucca ci een nya ci ingane wo̱ye̱ e̱e̱ti̱ daiza ko̱?”

11I̱jji̱nne̱t zin nege nonno, “Nya ming azi de̱me̱zzo̱wa̱ wak lo̱ti̱nno̱u̱ ko̱ ne a̱kku̱ arrak E̱li̱ja̱ oowa ngati Ki̱ri̱sto̱?”

12Abariz zin Ye̱su̱ zoz neci: “Een de̱de̱, a̱kku̱ E̱li̱ja̱ arrak, kar kidiman kaal do̱o̱k. Nya zin ming e̱he̱rye̱ azi ne apirna atin Ngerrti E̱e̱to̱, kar kutubure ko̱? 13Abarik ka̱du̱wa̱kku̱ng, i̱ki̱ya̱ E̱li̱ja̱, u̱tu̱gu̱zze̱k nege nonno kaal cik gerzek orong nege ki bali ming e̱he̱rye̱ zoz ci obod ki nonno ko̱.”

Angaru Ye̱su̱ lo̱gu̱t ci anyak kuulo cik lo̱rye̱nta̱k

(Ma̱te̱yo̱ 17:14-20; Lu̱ka̱ 9:37-43a)

14Baling i̱vi̱tta̱k Ye̱su̱ ki Peturu ki Jon ki Je̱mi̱s nuyak balik ungnek nege lo̱o̱c ke̱, icinnet uburuwet koole ci a̱ppwe̱ nogo ki de̱me̱zzo̱k wak lo̱ti̱nno̱u̱ ming adango ki nogo. 15Baling icinnet ol do̱o̱k Ye̱su̱, u̱ku̱lte̱k je̱e̱n kar ki̱vi̱re̱t koot kizzac nonno.

16I̱jji̱n zin Ye̱su̱ demezyak waginnek, “Adangonu niga nya ki nogo?”

17Abarizek zin e̱e̱ti̱ imma orgene ci ollu, “De̱me̱zo̱i̱t, kanyahaki ngeranni ci anyak kuuloc ci lo̱rye̱nto̱ ci anyik nonno kijahe li̱i̱m. 18Ming a̱gga̱m gon kuuloci neci nonno, ovocek lo̱o̱c, kar kutura amut cik a̱du̱ve̱ utuga, arik nyigit kar keṯeran ele. Ki̱jji̱na̱ nuyak cigunnek abunna ming ottok kuulo ne̱ko̱, iróng nege uule.”

19O̱bo̱de̱k zin Ye̱su̱ nogo, “Eehi, i̱ge̱t bu̱u̱l ci iróng anyakku tu̱we̱ne̱t ko̱, kabak wo̱ye̱ anna ki i̱ge̱t u̱u̱mu̱c? Anyaktta lo̱gu̱t necu rok annita.” 20Anyakttak zin nege lo̱gu̱t neci Ye̱su̱. Baling icin kuuloci Ye̱su̱, itivicek zin lo̱gu̱t necu lo̱o̱c kobobor, ku̱du̱v utugi.

21I̱jji̱n zin Ye̱su̱ be̱e̱ti̱ lo̱gu̱t neci, “Akane morizi necu bali vonga?”

O̱bo̱de̱k zin baatinne, “Akane morizi ming ngen enne idica. 22Itimanit kuulo nonno lak cik meelek giir orong ku̱ru̱k ka̱da̱k ngati a̱ju̱ke̱ke̱ gwo̱o̱ icima maam. Imma zin i̱yo̱ko̱ ming amanikan, eelawan ngati ogone gi̱i̱ ci u̱u̱li̱ i̱nna̱.”

23O̱bo̱de̱k zin Ye̱su̱ nonno, “Ming elemi e̱e̱ti̱ Ta̱mu̱ta̱dde̱n, obokce atin kaala do̱o̱k ngati e̱e̱t ci elemi zoz cinne.”

24Ataman niko, egereny be̱e̱ti̱ do̱le̱co̱, “kelemi anna de̱de̱; eelawa kommog kaal cik iróng aanya kelema Ta̱mu̱ta̱dde̱n.”

25Baling icin Ye̱su̱ koole ming a̱vi̱ra̱k nogo, itizik zin enne kuulo cik lo̱rye̱nta̱k. Izek ne, “I̱nna̱ kuuloci ci aditi iin ki utug ko̱, iyowa re̱e̱nu̱n ngati e̱e̱t necu, ma ngen a̱mi̱ro̱ni̱k nonno bo̱do̱k.”

26Egereny zin kuuloci neci lo̱rye̱nto̱ ko̱, kar zin kitivic lo̱gu̱t necu kize ti̱i̱r, kar zin kiyowak tu̱. U̱tu̱gu̱ ele ci do̱le̱co̱ ki e̱e̱ti̱ ci adaha kar ol cik meelek kizeto ne, “A̱da̱k enne.” 27Ma̱i̱je̱ Ye̱su̱ a̱gga̱m lo̱gu̱t neci a̱zzi̱t kar zin enne kibil je̱e̱na̱.

28Baling oot Ye̱su̱ ki nuyak ca̱a̱to̱, i̱jji̱nne̱t zin nonno ngati aavtte nege do̱, a̱nne̱k ne, “Nya ming iróng naga kottok kuulo ne̱ko̱ ko̱?”

29O̱bo̱de̱k zin Ye̱su̱ nogo, a̱nne̱k ne, “Iyowa kuulo cik ogon niko lawinte ci Ta̱mu̱ta̱dde̱no̱ do̱ niko.”

A̱du̱wa̱ bo̱do̱k Ye̱su̱ zoz ci daiz cinne

(Ma̱te̱yo̱ 17:22-23; Lu̱ka̱ 9:43b-45)

30Utungtek nege ngineci lo̱o̱c kar koot kettedit ki orog ci een Ga̱li̱li̱. Iróng Ye̱su̱ orong e̱e̱t imma ka̱gga̱ nginti aavtte nege, 31eci enne edemez nuyak ciginnek. Izek zin enne nogo ne, “Ovvo atin ol adawa Ngerrti E̱e̱to̱ kar kanyozik azzine cik ol cik diirik. A̱ru̱k atin nege nonno, imma i̱i̱nya̱we̱ cik een i̱i̱yo̱ ingazi atin enne daiza.” 32Ma̱i̱je̱ ngatu iróng zoz necu i̱i̱zo̱ nogo o̱o̱tti̱, kar ko̱to̱ngo̱o̱ltte̱ iróng a̱jji̱n nonno ungec ci zoz neci.

Ngene ci a̱ddi̱ki̱re̱ ngatinne̱ng do̱o̱k?

(Ma̱te̱yo̱ 18:1-5; Lu̱ka̱ 9:46-48)

33I̱vi̱tta̱k nege orog ci een Kapernaum. Baling ngen Ye̱su̱ aave ce̱e̱za̱, i̱jji̱n zin enne nogo, “Adangonu niga wanai nya?” 34Abarik ijaktte li̱i̱m ma̱rri̱t goola wanai adangonu ngene ci anyak ddi̱ki̱rze̱t.

35A̱vvu̱ Ye̱su̱ lo̱o̱ta̱ kar kutu demezyak waginnek omoto ki rama kar kizek ne, “Ming orong e̱e̱ti̱ imma ngatinno̱ng kize oo, abunna ming een vu̱rru̱t, kize du̱ca̱i̱t ci ollu do̱o̱k.”

36Idima zin Ye̱su̱ do̱le̱c cidici kar zin kaanyik kibil orgene cinne̱ng. A̱gga̱m do̱le̱c a̱zzi̱t kar kizek nogo ne, 37“Ming ivata e̱e̱ti̱ imma do̱le̱c cidici zare cigannik, ivatana enne annita; ming a̱gga̱ma̱na̱ e̱e̱ti̱ imma annita, iróng a̱gga̱ma̱na̱ annit abarik a̱gga̱ma̱ e̱e̱t bali i̱tto̱na̱na̱ annita ke̱.”

Ming iróng e̱e̱ti̱ emederyet agita, een enne e̱e̱t cinna

(Lu̱ka̱ 9:49-50)

38Ize wazin imma Joni ne, “De̱me̱zo̱i̱t, kicinnta e̱e̱t imma ottok kuulo cik lo̱rye̱nta̱k zare cigunnek, kar naga kizeteyya nonno ne anyik kibil, eci iróng enne een e̱e̱t cinna.”

39A̱nne̱k Ye̱su̱ nogo ne, “Ma abilizzu nonno, i̱llo̱i̱ e̱e̱t imma ci ogon kaal cik a̱vu̱la̱ zare cigannik ci a̱du̱wa̱ zoz ci gerze ngatinanni. 40Eci ming anyak e̱e̱t ci iróng amarinet, een enne e̱e̱t cinna. 41Ka̱du̱wa̱kku̱ng zoz ci een de̱de̱, ming a̱a̱nyu̱ng e̱e̱ti̱ imma maam uduca zare cigannik eci e̱e̱ggi̱nnu̱ niga olli Ki̱ri̱sto̱, amuc atin Ta̱mu̱ta̱dde̱n nonno.”

Zoz ci anyaha mu̱nye̱n

(Ma̱te̱yo̱ 18:6-9; Lu̱ka̱ 17:1-2)

42Azi bo̱do̱k Ye̱su̱ ne, “Ming aanyik e̱e̱ti̱ imma dooli cikidik elemi zoz cinne ko̱ ki̱tto̱zo̱ mu̱nye̱n, agano oroot ming a̱ju̱ko̱ni̱k enne nyatapar ci a̱ddi̱ki̱re̱ ki bee ci a̱ddi̱ki̱re̱ ecebonik i̱nya̱ cinne. 43-44Ming okkoyyi a̱zzi̱ti̱ cunne kar tu̱gu̱ ba̱ci̱, tedak tu̱. Abunna zin ming i̱i̱zo̱ nginti baizo a̱tte̱ co̱de̱, ngati wo̱ye̱ i̱i̱zo̱ nginti baizo azzine do̱o̱k, okko gwo̱o̱ya̱, ngati iróng gwa̱a̱ adite.#9:43-44 Gwo̱o̱ya̱, ngati iróng gwa̱a̱ adite: Een necu gwo̱o̱ ci okko Ta̱mu̱ta̱dde̱n azane ol cik abure nonno. IkebO̱no̱zzo̱k 20:7-15. 45-46Ming aanyi zoci cunne gool ci ogone mu̱nye̱n, ettedak tu̱! Maya abarik ming okko rugeta zoce co̱de̱, ngati abarik okko daiza zone do̱o̱k, ngati a̱ju̱ko̱ni̱k gwo̱o̱ wa alanyit udut. 47Ming aanyi e̱be̱re̱ci̱ cunne tu̱gu̱ mu̱nye̱n, aarak e̱be̱re̱c neci tu̱. Maya abarik ming i̱i̱zo̱ ba̱a̱li̱ne̱t ci Ta̱mu̱ta̱dde̱no̱ e̱be̱re̱ce̱ co̱de̱, ngati weete i̱zo̱we̱ eberene do̱o̱k a̱ju̱ko̱ni̱k nginti gwo̱o̱yo̱, 48lo̱o̱ce̱ ci,

“‘iróng u̱lu̱ta̱ cigge̱k a̱da̱i̱,

iróng gwa̱a̱ ci ngineci adite.’#Isaya 66:24

49Atiman atin Ta̱mu̱ta̱dde̱n ol gwo̱o̱ya̱ ki i̱yo̱ko̱ ming adiman ol balang itala.

50“Abunna mile, ma̱i̱je̱ ming amaktal, adiman wo̱ye̱ e̱e̱ti̱ kize mile bo̱do̱k ku̱? Anyait mediz ci milo e̱le̱tti̱ne̱ cuggo̱k, kar a̱vvu̱t labak ki ol do̱o̱k.”

Currently Selected:

Marko 9: tex

Highlight

Copy