Marko 8

Adaiz Ye̱su̱ ol cik e̱e̱ggi̱n i̱bbo̱nge̱t we̱c (4,000)

(Ma̱te̱yo̱ 15:32-39)

1Imma i̱i̱nya̱we̱ ne̱ke̱ u̱lu̱tte̱ koole ci a̱ppwe̱. Eci i̱llo̱i̱ gi̱i̱ ci adak nege, utu zin Ye̱su̱ nuyak ciginnek kar kizek ne, 2“A̱u̱ce̱ annita zinin zo̱ze̱ ci ol ciko; ka̱vvu̱ta̱ ki nogo gwo̱o̱nya̱ i̱i̱yo̱, i̱llo̱i̱ rok gi̱i̱ ci kadaka. 3Ming ki̱tto̱ni̱ anna nogo koot ce̱e̱zi̱nne̱ magizet, ovvo a̱yu̱we̱ goola, eci ol uggak ngatinne̱ng a̱vvu̱ ngati reeni many.”

4O̱bo̱dde̱k nuyaha nonno, a̱nne̱k ne, “Kamuda wo̱ye̱ da̱i̱ne̱t cik eleno ki ol ne̱ko̱ do̱o̱k nga ngati i̱llo̱i̱ kaal cik tu̱we̱nta̱k ko̱?”

5I̱jji̱n zin Ye̱su̱ nogo, “Anyakku niga umunet izong?”

O̱bo̱dde̱k zin nege, “Turgerem.”

6U̱du̱wa̱k zin Ye̱su̱ koole, anyik ka̱vvu̱to̱ lo̱o̱ta̱. Baling idima enne umunet ne̱k een turgerem ko̱ kar kaanyik Ta̱mu̱ta̱dde̱n zany, u̱du̱l zin kar kaanyik nuyak ciginnek kengertek ol, kar nege kengertek zin. 7Anyak da̱ nege u̱lu̱g u̱gge̱ cikidik bu̱k; anyik zin Ye̱su̱ zany Ta̱mu̱ta̱dde̱n kar kaanyik nuyak ciginnek kengertek ol. 8Adakto ol zee katanyarit. Imma bali vu̱rrta̱, u̱lu̱tta̱ nuyaha do̱ngkwe̱t turgerem cik abbize vu̱rre̱na̱ (da̱i̱ne̱t cik anyigzai). 9E̱e̱ggi̱n da̱ i̱yo̱ko̱ ol ne̱ke̱ i̱bbo̱nge̱t we̱c (4,000). Baling azan Ye̱su̱ nogo, 10ottod zin enne ki nuyak waginnek i̱bo̱ kar koot lo̱o̱ce̱ ci een Dalmanutha.

Baayenit ta̱mu̱-kenga

(Ma̱te̱yo̱ 16:1-4)

11I̱vi̱ta̱ zin olli Varacisi u̱cu̱be̱t Ye̱su̱. Orong kitimanit nonno kar koronggit ku̱tu̱gu̱ Ye̱su̱ gi̱i̱ ci a̱vu̱la̱ ta̱mu̱-kenga. 12U̱vu̱da̱k Ye̱su̱ oroot kar kize ne, “Nya ming a̱jji̱n bu̱u̱l cu kaal cik a̱vu̱la̱ ta̱mu̱-kenga ko̱? Ka̱du̱wa̱kku̱ng zoz ci een de̱de̱, i̱llo̱i̱ atin baayenit ci anyonikkung.”

13Utungek zin enne nogo lo̱o̱c i̱mi̱re̱ uk i̱ba̱ kar zin ketted kuk ti̱ti̱me̱ ci golla ke̱.

I̱lo̱t Ye̱su̱ nuyak kegenyit olle wak een Varacis

(Ma̱te̱yo̱ 16:5-12)

14Erektek da̱ nuyak iróng ngen anyaha ki umunet, anyaktta da̱ umune co̱de̱ ṯok niko. 15A̱nne̱k Ye̱su̱ nogo ne, “U̱zu̱tte̱ e̱le̱tti̱, egenyyit ngati nyigit cik meertak#8:15 Nyigit cik meertak: Ozoz Ye̱su̱ zoz ci nyigit cik meertak kar ki̱ye̱la̱ volong ci Varacisi ki He̱ro̱d. IkebMa̱te̱yo̱ 16:12. Varacisi ki He̱ro̱d.”

16Ozozit zin demezyaha nege do̱, anno ne, “Ma̱rri̱t iróng naga kanyak umune.”

17A̱gga̱ Ye̱su̱ zoz ci ozoz nege lo̱mu̱k ko̱, kar ki̱jji̱n nogo izek ne, “Nya ming ozozu zoz ci iróng niga anyakku umune ko̱? Iróng niga bu̱k acinennu icima a̱gga̱yyu̱? Nya ming okkomi i̱ge̱t zi̱nze̱tti̱ ko̱? 18Anyakku niga ebere ma̱i̱je̱ ngatu iróng ngen acinennu. Anyakku iin abarik iróng aziknenu? Iróng niga ngen a̱a̱da̱nnu̱? 19Baling kadaiza anna ol cik e̱e̱ggi̱n i̱bbo̱nge̱t tu̱r (5,000) umunete cik e̱e̱ggi̱n tu̱r, e̱e̱ggi̱n do̱ngkwe̱ta̱ cik anyigzai eberanu niga izong?”

O̱bo̱dde̱k nege nonno, “Een do̱ngkwe̱ta̱ omoto ki ram.”

20“Imma baling kadaiza anna ol i̱bbo̱nge̱t we̱c (4,000) umunete balik een turgerem ke̱, e̱e̱ggi̱n do̱ngkwe̱ta̱ wak anyigzai izong?”

Izektek nege nonno ne, “Kalutana dho̱ngkwe̱t turgerem.”

21Kar zin Ye̱su̱ kizek nogo ne, “Iróng niga ngen a̱gga̱yyu̱ zoz ci kozozi anna ko̱?”

Angaru Ye̱su̱ e̱e̱t ci rubeni o̱rge̱ ci een Betsaida

22I̱vi̱tta̱k zin ciko Ye̱su̱ ki demezyak orog ci een Betsaida, anyakttak zin ol uggak Ye̱su̱ e̱e̱t ci ru̱be̱ni̱ abunna okko enne atadek nonno a̱zzi̱t kar kalawek Ta̱mu̱ta̱dde̱n kangaru nonno. 23A̱gga̱m zin Ye̱su̱ e̱e̱t neci ru̱be̱ni̱ ko̱ a̱zzi̱t kar kuwe orog abanyca. Baling uturek enne amut ebere cik e̱e̱t neci kar katadek nonno azzin, i̱jji̱nno̱ zin Ye̱su̱, “Acinni i̱nna̱ gi̱i̱ imma?”

24Icin zin e̱e̱ti̱ neci ta̱dde̱n kar kize ne, “Kacinni ol, abarik ogon kiwagon keena ming owo.”

25Atadek bo̱do̱k Ye̱su̱ azzin ebere cik e̱e̱t neci. O̱o̱ye̱ zin e̱e̱t neci ebere, kar kicin kaal do̱o̱k ju̱rru̱m. 26I̱tto̱ni̱k zin Ye̱su̱ nonno kuk ce̱e̱za̱, izek ne, “Ma okko orgato.”

U̱du̱wa̱ Peturu li̱ngli̱ngo̱n ci Ye̱su̱

(Ma̱te̱yo̱ 16:13-20; Lu̱ka̱ 9:18-21)

27Oot zin Ye̱su̱ ki nuyak waginnek o̱ro̱gjo̱we̱ cik aavtte Keseriyakte Vilipiakte. Imma goola i̱jji̱n Ye̱su̱ nogo izek ne, “Ma dim ol i̱yo̱ko̱ azi ne ke̱e̱ni̱ anna ngene?”

28O̱bo̱dde̱k zin nege, “Azi uggak ne, e̱e̱ni̱ i̱nna̱ Jon Ba̱ti̱ti̱mo̱; ovvo uggak azi ne e̱e̱ni̱ i̱nna̱ E̱li̱ja̱#8:28 E̱li̱ja̱: Een E̱li̱ja̱ a̱ri̱to̱i̱t ci olli Ya̱u̱do̱ bali okkoye Ta̱mu̱ta̱dde̱n nonno rugetet ta̱mu̱-kenga ke̱. A̱rri̱ta̱i̱ enne ba̱li̱ye̱ e̱rki̱nya̱i̱ cik een obet torkoc (900) baling ngen Ye̱su̱ ki̱ti̱rra̱i̱. Ikeb I Alaat 17-21; 2 Alaat 1-3.; ovvo bo̱do̱k uggak azi ne e̱e̱ni̱ i̱nna̱ a̱ri̱to̱i̱t co̱de̱ a̱ri̱tto̱we̱ cik Ta̱mu̱ta̱dde̱no̱.”

29I̱jji̱n bo̱do̱k Ye̱su̱ nogo, izek ne, “I̱no̱nnu̱ niga ke̱e̱ni̱ anna ngene?”

Abarizek Peturu nonno, “E̱e̱ni̱ i̱nna̱ Ki̱ri̱sto̱ wa atahala Ta̱mu̱ta̱dde̱n.”

30U̱du̱wa̱k zin Ye̱su̱ nogo azi ne, “Ma a̱du̱wa̱kku̱ zoz necu e̱e̱t imma udut.”

Ozoz Ye̱su̱ zoz ci daiz cinne

(Ma̱te̱yo̱ 16:21-28; Lu̱ka̱ 9:22-27)

31Akate zin Ye̱su̱ edemez demezyak zoz ci azi ne apirna atin Ngerrti E̱e̱to̱ kaale cik meelek kar lo̱ddi̱ki̱re̱ kutuburret nonno, alaata cik olli wawaco Ce̱e̱ze̱ wa Ta̱mu̱ta̱dde̱no̱ ki de̱me̱zzo̱k wak lo̱ti̱nno̱u̱, a̱ru̱we̱ atin enne ka̱da̱k kar kitinga daiza kurug i̱i̱nya̱we̱ cik een i̱i̱yo̱. 32Ozoz enne zoz ci daiz cinne ko̱ kiziyet ol do̱o̱k, kar Peturu ku̱tu̱gu̱r nonno kuwe abanyca kar kuk kitizik nonno.

33Abarik baling okko Ye̱su̱ ukce kar kegelem nuyak ciginnek, itizik zin enne Peturu. Izek ne, “Nyehe ngatinanni Sitan, iróng i̱nna̱ i̱no̱ni̱ kaal cik Ta̱mu̱ta̱dde̱no̱, abarik i̱no̱ni̱ i̱nna̱ kaal cik ol cik diirik!”

34Utu zin Ye̱su̱ koole ki nuyak waginnek ki̱vi̱ta̱k nonno kar kizek nogo ne, “Ming orong e̱e̱ti̱ imma kunuwan, abunna ming erehek ele cinne, kar kodong ta̱la̱ke̱c#8:34 Ta̱la̱ke̱c: Ododek olli Romi ol ta̱la̱ke̱c ci een keet abunna ming edez u̱ce̱zi̱ e̱e̱t idic idic zee ka̱da̱k e̱e̱ti̱. cinne kar kunuwan. 35Ming orong e̱e̱ti̱ imma ki̱ti̱ri̱z baiz cinne, okoloz atin, ma̱i̱je̱ e̱e̱ti̱ ci okoloz baiz cinne zo̱ze̱ cinanni ki kaviyak cik abunna, azunne atin. 36Nya ci abunna ming amuda e̱e̱ti̱ kaal cik lo̱o̱tu̱ do̱o̱k imma ngatu okoloz ruget cinne? 37Icima, adima wo̱ye̱ e̱e̱ti̱ ci diiri nya karagiz ruget cinne? 38Ming adak e̱e̱ti̱ a̱li̱ya̱ni̱ zo̱ze̱ cinanni lo̱o̱ce̱ ci alawe ol kaal cik lo̱o̱tu̱ ko̱ ki bu̱u̱l cik mu̱nye̱nu̱ ko̱, adak atin a̱li̱ya̱ni̱ Ngerrti E̱e̱to̱ bu̱k zo̱ze̱ cinne ming okko enne a̱kku̱ di̱ngdi̱ngo̱nte̱ ci Baatinne ki anjilonya ciginnek a̱li̱le̱.”

Currently Selected:

Marko 8: tex

Highlight

Copy