Marko 7

Keerani cik olli Varaciso

(Ma̱te̱yo̱ 15:1-9)

1I̱i̱te̱n imma, a̱vvu̱ olli Varacisi ki de̱me̱zzo̱k wak lo̱ti̱nno̱u̱ Jerusalema, u̱lu̱tte̱ uburuktek Ye̱su̱ orgen, 2kar nege kicinnet nuyak cik Ye̱su̱ u̱gge̱ ming adakce ngati ngoronye nogo azzina kiwagon olli Varacisi. 3Iróng gon Varacisi ki olli Ya̱u̱do̱ do̱o̱k adakce runyak ming ngen kutunyet azzin ju̱rru̱m ngati kanuwe keer wanne̱ng ol cik a̱ddi̱ki̱re̱. 4Ming a̱vvu̱ gon nege cuwa, uuny nege arrak kaal ne̱ke̱ ming ngen nege kadait. Azunne nege keerani u̱gge̱ cik meelek, tunyenet uduce cik maamu, ki kaal cik aintak.

5I̱jji̱nne̱t zin Varacisi ki de̱me̱zzo̱k wak lo̱ti̱nno̱u̱ Ye̱su̱, izektek ne, “Nya ming iróng nuyaha cigunnek azunne keer ci ol cik a̱ddi̱ki̱re̱, ngati adaine nege á̱há̱t runyak ko̱?”

6O̱bo̱de̱k zin Ye̱su̱ nogo, “Ilem bali a̱ri̱to̱i̱ti̱ ci zoz ci Ta̱mu̱ta̱dde̱no̱ een Isaya baling a̱du̱wa̱ zoz ci obod ki i̱ge̱t ol wak a̱ru̱kku̱ talaben zo̱ze̱ ci a̱gga̱yyu̱ Ta̱mu̱ta̱dde̱n; e̱he̱rye̱ buwe ci Ta̱mu̱ta̱dde̱no̱, azi ne,

“‘Ireza ol ne̱ke̱ annit u̱tu̱ge̱tti̱ne̱,

ma̱i̱je̱ zi̱nze̱tti̱nne̱ cigge̱k aavtte reena ngatinanni.

7Iróng nege alaya annit de̱de̱;

Een de̱mzi̱ne̱t cinne̱ng, ti̱lo̱wi̱ne̱t ci a̱kku̱ ngati ol cik diirik.’#Isaya 29:13

8Utunget nege ti̱lo̱wi̱ne̱t ci Ta̱mu̱ta̱dde̱no̱, u̱zu̱tte̱ abarik keerani cik ol cik diirik.”

9Emena Ye̱su̱ zoza, izek nogo ne: “Ogonnu niga e̱le̱tti̱ izet ol cik egenyyu ngati odotiku ti̱lo̱wi̱ne̱t ci Ta̱mu̱ta̱dde̱no̱ lo̱o̱c kar u̱zu̱tte̱ keerani cuggo̱k. 10Eci Musesi ba̱li̱ye̱ azi ne, ‘To̱ngo̱o̱lle̱ baatunne ki yaatunne, ming anyak e̱e̱t imma ci ozoz gerzet ngati baatinne icima yaatinne, anyik ol ku̱ru̱we̱t nonno ka̱da̱k.’#Lu̱ge̱z 21:17; Leviticus 20:9 11Ma̱i̱je̱ niga a̱nnu̱ ne ming a̱nne̱k e̱e̱ti̱ imma baatinne icima yaatinne ne, ‘Ming een gi̱i̱ ci keelani anna i̱nne̱t een neci muci ci anyonik Ta̱mu̱ta̱dde̱n.’ 12Iróng zin niga ngen anyikku nonno keela baatinne icima yaatinne. 13Egerzantu niga zoz ci Ta̱mu̱ta̱dde̱no̱ keere cunno̱ng i̱lo̱ti̱kku̱ dooli ko̱. Ogonnu zin niga kaal cik meelek giir ki i̱yo̱ko̱.”

Nya ci aanyik ol kizeto ngoronye

(Ma̱te̱yo̱ 15:10-20)

14Utu zin bo̱do̱k Ye̱su̱ koole ki̱vi̱ta̱k nonno kar kizek ne, “Izikttang, a̱gga̱c zoz ci kozozi anna ko̱ niga do̱o̱k. 15-16I̱llo̱i̱ gi̱i̱ imma ci adak e̱e̱ti̱ ci diiri kar kongoronyan#7:15-16 Ngoronya: A̱du̱wa̱k lo̱ti̱nno̱wa̱ cik Musesi olli Ya̱u̱do̱, azi ne, anyak elegje u̱gge̱ cik iróng een da̱i̱ne̱t, eci nege e̱e̱ggi̱n ngoronye. Iróng wo̱ye̱ nege apak kize wawac. IkebLeviticus 11:1-32. nonno. Abarik gi̱i̱ ci iyowa e̱e̱te̱ ci diiri ci anyike nonno kize ngoronya.”

17Baling utungek enne koole lo̱o̱c uk i̱tto̱ ce̱e̱z, i̱jji̱nne̱t zin nuyaha ciginnek u̱nge̱tti̱ cik zoz necu. 18I̱jji̱n zin Ye̱su̱ nogo a̱nne̱k ne, “Aavtte o̱o̱tti̱ cuggo̱k pad? Iróng niga acinnu i̱llo̱i̱ gi̱i̱ imma ci i̱i̱zo̱ e̱e̱t ci diiri kar kongoronyan nonno? 19Eci iróng gi̱i̱ neci okko zinine cinne, abarik okko kenga kar kiyowa eliye cinne.” Ma baling u̱du̱wa̱ zoz necu, ozorowozik Ye̱su̱ zoz ize ne, “Caale da̱i̱ne̱t do̱o̱k.”

20Ozoz zin Ye̱su̱ dee, “Gi̱i̱ ci iyowa ngati e̱e̱t ci diiri ci ongoronyan nonno. 21Eci ecito zinina, iyowa i̱no̱ni̱ ci gerze, a̱li̱ya̱kze̱t, ogor, munyenet ol, rotonet ki ngaai cik ollu, 22elem ci a̱ppwe̱, marnonet ol, lu̱te̱ne̱t ol, dominet, ṯeel, ruwenet ki donginet ele ki tarbalzet. 23Iyowa kaala ne̱k gerzek ko̱ do̱o̱k ecito kar kongoronyan e̱e̱t ci diiri.”

Tu̱we̱ne̱t ci ngaa ci a̱kku̱ o̱rge̱ ci een Syrophoenician

(Ma̱te̱yo̱ 15:21-28)

24Utungek Ye̱su̱ ngin neci lo̱o̱c kar kuk o̱rge̱ ci een Tyre. I̱tto̱ zin enne ce̱e̱z iróng orong e̱e̱t imma ka̱gga̱; i̱vi̱ta̱ ol a̱gga̱c ming aave enne orgato. 25Anyak ngaa imma ci omori buweenyinne anyak kuulo cik lo̱rye̱nta̱k, baling izik enne zoz ci Ye̱su̱, i̱vi̱ra̱ kar ku̱lu̱le̱ ngatinne. 26Een ngaa necu ci Gi̱ri̱yo̱, a̱rri̱ta̱i̱ o̱rge̱ ci een Syria Phoenicia. Ilalek zin Ye̱su̱ kar kottok kuuloc ci lo̱rye̱nto̱ ngati buweenyinne.

27U̱du̱wa̱k zin Ye̱su̱ nonno, izek ne, “Arrak oowa, anyik dooli kadakto, eci iróng abunna ming ka̱gga̱ma̱ á̱há̱t doolinne kar kanycik urzi.#7:27 Dooli ki urzi: Een dooli cik ozoz Ye̱su̱ ngatu ko̱ een olli Ya̱u̱do̱. Ovvo urzi e̱e̱ggi̱n ol wak iróng een Ya̱u̱d. Ibbez olli Ya̱u̱di̱ ol cik e̱e̱ggi̱n i̱do̱ngi̱ kiwagon ming acin urzi.”

28O̱bo̱de̱k zin ngaa neci nonno, “De̱de̱, Manyi, abarik zin gon urzi adak da̱i̱ne̱t wak i̱i̱na̱k lo̱o̱c ngati adaine dooli.”

29U̱du̱wa̱k zin enne ngaa neci izek ne, “Eci zo̱ze̱ ci abarizi i̱nna̱ ko̱, okko wo̱ye̱ i̱nna̱ labak; iyowa kuuloci ci lo̱rye̱nto̱ ngati buweenyunne.”

30Uk zin ngaa neci ce̱e̱za̱ uk urubak buweenyinne ming adunge kwe̱e̱na̱, iyowa kuuloci ci lo̱rye̱nto̱ ngatinne.

Angaru Ye̱su̱ e̱e̱t ci adite iina ki e̱le̱me̱tti̱

31Utungek Ye̱su̱ orog ci een Tyre kar kuk kiyok o̱rge̱ ci een Sidon, kozoro kuk nyatapare ci een Ga̱li̱li̱, kuluce rok o̱ro̱gjo̱k cik een omoto azi zara Dikapolis. 32Imma nginati, anyakttak ol uggak nonno e̱e̱t ci adite iina kar bo̱do̱k iróng ozozi, kar kilaltek nonno abunna atadek a̱zzi̱t cinne e̱e̱t necu.

33Baling amadan Ye̱su̱ e̱e̱t neci orgene ci ollu, uwe abanyca, aarik zin enne vallak iin cik e̱e̱t neci. Kar zin enne bo̱do̱k kuturek amut kar ku̱u̱m a̱ha̱t ci e̱e̱t neci. 34Egelem zin enne ta̱mu̱-keng ngati i̱no̱ne̱ oroot, kar kizek nonno ne, “Ephphatha!” (Azi ungec ci zoz necu ne, “OO”). 35Kar zin ngatu, o̱o̱ye̱ iina cik e̱e̱t neci, umuc zin a̱ha̱tti̱ cinne kar zin kakate kozoz labak.

36Erecanek zin Ye̱su̱ nogo zoz izek ne ma a̱du̱wa̱kku̱ e̱e̱t imma zoz necu udut. Abarik ming erecanek enne nogo ki i̱yo̱ko̱, abarik ozozit zin oroot. 37U̱ku̱lte̱k ol je̱e̱n oroot zo̱ze̱ necu, kar kizeto ne, “U̱tu̱gu̱ enne kaal do̱o̱k ju̱rru̱m. Idiman e̱e̱t ci adite iina kiziyo, angaru e̱e̱t ci aavtte e̱le̱me̱tti̱ pad kozoz.”

Currently Selected:

Marko 7: tex

Highlight

Copy