Marko 16

Itinga Ye̱su̱ daiza

(Ma̱te̱yo̱ 28:1-8; Lu̱ka̱ 24:1-12; Jon 20:1-10)

1Baling okko aṯurneke I̱i̱te̱ni̱ wa Yu̱bze̱nto̱ niko, oot Ma̱ri̱ya̱ Madalina ki Salome ki Ma̱ri̱ya̱ wa een e̱e̱ti̱ Je̱mi̱si̱, ovvo uuta keen cik ongooli laala, ocok ol maala abunna ovvo a̱vu̱de̱ ele ci Ye̱su̱ iloma. 2Ma̱i̱je̱ baling edeccai I̱i̱te̱ni̱ wa Yu̱bze̱nto̱ nge̱rre̱t, ingazi nege i̱i̱te̱ne̱ wa een Dominika,#16:2 I̱i̱te̱ne̱ wa een Dominika: Eci ngati olli Ya̱u̱do̱ akane i̱i̱nya̱ cik biranocak ngatinne̱ng i̱i̱te̱ne̱ ci een oo kar kuṯurei i̱i̱te̱ne̱ ci een turgerem biranoca, nonno ci een I̱i̱te̱n wa Yu̱bze̱nto̱. Kovvo naga Tenneti kikeb i̱i̱nya̱ cigga̱c biranocak do̱ ngati olli Ya̱u̱do̱. Kazi naga ne I̱i̱te̱n wa Yu̱bze̱nto̱ ci een i̱i̱te̱n ci een torkonom kar i̱i̱te̱n ci annu I̱i̱te̱n wa Yu̱bze̱nto̱ ko̱ kawu naga kize i̱i̱te̱n turgerem. Kawu naga bo̱do̱k i̱i̱te̱n cinne̱ng oowu ko̱ kize Dominika icima I̱i̱te̱n ci Lawinto ming ka̱a̱da̱ naga i̱i̱te̱n bali ingane Ye̱su̱ daiza. ovvo iloma. 3Imma goola, i̱jji̱nne̱t zin e̱le̱tti̱, “Ngene atidic ci okko a̱pi̱k bee iloma tatuga?”

4Imma baling u̱zu̱cca̱ ilomi, icinnet nege ta̱dde̱n, amuda bee bali a̱ddi̱ki̱re̱ aave iloma tatuga ke̱ ming i̱pi̱ya̱i̱ a̱vvu̱ reena. 5Baling ovvo nege i̱i̱zo̱ ilomi, u̱mu̱dda̱ lo̱gu̱t ci aim ru̱u̱m ci voori ming aave o̱to̱ne̱ ci a̱zzo̱. U̱ku̱lte̱k zin nege je̱e̱n.

6Izek zin lo̱gu̱t neci nogo ne, “Ma a̱ku̱le̱kku̱ je̱e̱n, orongnyu niga Ye̱su̱ wa Nazereti, wa bali ododek ol ta̱la̱ke̱c. Itinga enne daiza, iróng enne aave ngatu. Icinnet ilomi bali abahek ol ele cinne ke̱. 7Abarik oot u̱du̱kta̱k nuyak ciginnek ki Peturu zoz cu: ‘Okko enne o̱o̱we̱ cunno̱ng rok Ga̱li̱li̱. Ovvo atin niga acinnu nonno nginati, ki bali ming u̱du̱wa̱u̱ng enne i̱ge̱ta̱ ke̱.’”

8Baling iyokta zin nege iloma kar zin ki̱vi̱re̱t ngati a̱ma̱li̱ltte̱ nogo o̱o̱tti̱, a̱bba̱ri̱te̱t nege oroot. Iróng zin nege a̱du̱wa̱k e̱e̱t imma zoz necu eci nege o̱to̱ngo̱o̱ltte̱ lo̱o̱c oroot.

I̱ye̱le̱k Ye̱su̱ nuyak ciginnek ele

(Ma̱te̱yo̱ 28:9-10; Jon 20:11-18)

9Baling okko Ye̱su̱ ingazi daiza i̱i̱te̱ne̱ wa een oo biranoca, i̱ye̱le̱k zin enne ele cinne arrak Ma̱ri̱ya̱ Madalina, wa bali ottowe enne ngatinne kuulo cik lo̱rye̱nta̱k een turgerem ke̱. 10Uk zin Ma̱ri̱ya̱ u̱du̱wa̱k ol cik u̱lu̱wa̱nu̱ balik gon aavtte ki Ye̱su̱ ke̱. 11Baling iziyyet nege ngen Ye̱su̱ aruge, kar Ma̱ri̱ya̱ kicin nonno, iróng nege a̱tu̱ zoz neci.

I̱ki̱ya̱k Ye̱su̱ nuyak ciginnek

(Lu̱ka̱ 24:13-35)

12Imma bo̱do̱k vu̱rrta̱, i̱ye̱le̱k Ye̱su̱ ele cinne nuyak ciginnek rama ngati aave ele cinne do̱, baling owo nege goola. 13I̱mi̱rtte̱ zin nuyaha ne̱ke̱ oot u̱du̱kta̱k nuyak gonoggi, iróng gonoggja elemi zoz cinne̱ng dee.

Kaal cik ogon nuyaha cik Ye̱su̱

(Ma̱te̱yo̱ 28:16-20; Lu̱ka̱ 24:36-49; Jon 20:19-23; Buk wa To̱ni̱a̱u̱ 1:6-8)

14Ma bali vu̱rrta̱ i̱ye̱le̱k Ye̱su̱ ele nuyak ciginnek omoto ki co̱de̱ ngati adaine. Egerenyek zin enne nogo zo̱ze̱ ci iróng nege anyak tu̱we̱ne̱t, kar bo̱do̱k kokkomit nogo o̱o̱tti̱ abure iróng elemi zoz ci ol balik icinnet nonno ngati itingai enne daiza.

15A̱nne̱k zin Ye̱su̱ nogo ne, “Oot lo̱o̱co̱we̱ do̱o̱k uwaktek ol veelek kaviyak cik abunna. 16Ming elemna e̱e̱ti̱ imma kar ka̱gga̱mo̱zi̱k nonno ba̱ti̱ti̱mo̱, a̱ti̱ri̱z atin Ta̱mu̱ta̱dde̱n nonno. Ma̱i̱je̱ e̱e̱ti̱ ci iróng elemi, ettedozik nonno lo̱ki̱ko̱. 17I̱ye̱la̱i̱ atin kaala ciko ngati ol wak elemna zoz cinne: Ottok atin nege kuulo cik lo̱rye̱nta̱k zare cigannik; ozoz atin nege zoz u̱tu̱ge̱tti̱ne̱ cik een jor aavtte do̱ do̱; 18ming ebera nege uwanya azzine nu̱nu̱n; ming aud nege ya̱ni̱ ci a̱ru̱k ol, iróng ogonik nogo gi̱i̱ imma udut; atadek atin nege ol wak omori azzin ngati alawe Ta̱mu̱ta̱dde̱n, ovvo atin zin ol ne̱ke̱ abunna.”

Odonge Ye̱su̱ uk ta̱mu̱-kenga

(Lu̱ka̱ 24:50-53; Buk wa To̱ni̱a̱u̱ 1:9-11)

19Baling ozozek Manyi Ye̱su̱ zoz ki nogo, odonge zin enne uk ta̱mu̱-kenga kar ka̱vvu̱ ngati doizo a̱tte̱ ci Ta̱mu̱ta̱dde̱no̱ a̱zzo̱. 20Oot zin nuyaha uwaktek ol zoz ci Ta̱mu̱ta̱dde̱no̱ lo̱o̱co̱we̱ do̱o̱k. I̱li̱ngli̱ng zin Manyi ki nogo kar kaanyik zoz cinne ku̱tu̱gu̱we̱ go̱o̱le̱ ci ogone nege kaal cik a̱vu̱la̱.

Currently Selected:

Marko 16: tex

Highlight

Copy