Marko 15

U̱cu̱b Pilato Ye̱su̱

(Ma̱te̱yo̱ 27:1-2,11-14; Lu̱ka̱ 23:1-5; Jon 18:28-38)

1Ma bali nge̱rre̱t ingani, odolta zin alaata cik olli wawaco Ce̱e̱ze̱ wa Ta̱mu̱ta̱dde̱no̱ ki lo̱ddi̱ki̱re̱, ki de̱me̱zzo̱k wak lo̱ti̱nno̱k wak Musesi, ki lo̱ddi̱ki̱re̱ wak lo̱ki̱ko̱ ko̱ do̱o̱k zoz cinne̱ng. E̱ce̱bi̱t Ye̱su̱ kar zin koot kanycik nonno Pilato ddi̱ki̱ryo̱i̱t ci gaala cik Romi.

2I̱jji̱n zin alaani Pilato Ye̱su̱ izek ne, “E̱e̱ni̱ i̱nna̱ alaan ci Ya̱u̱do̱?”

O̱bo̱de̱k zin Ye̱su̱ nonno, izek ne, “I̱i̱ny, ogon ki i̱yo̱ko̱ ming a̱du̱wa̱ i̱nna̱ ko̱.”

3Ovolongte alaata cik olli wawaco Ce̱e̱ze̱ wa Ta̱mu̱ta̱dde̱no̱ Ye̱su̱ kaale cik meelek giir. 4I̱jji̱n zin bo̱do̱k Pilato nonno izek ne, “I̱llo̱i̱ zoz ci abarizi i̱nna̱ zo̱ze̱ cu? Cin da̱ meele kaala cik arike nege i̱nne̱ta̱.”

5Abarik zin Ye̱su̱ iróng abariz zoz neci, u̱ku̱le̱k zin Pilato nonno.

Ettedik ol Ye̱su̱ daiz

(Ma̱te̱yo̱ 27:15-26; Lu̱ka̱ 23:13-25; Jon 18:39-19:16)

6Ma̱i̱je̱ da̱ gon keere ci adahe Ya̱u̱di̱ kwo̱o̱r ci Va̱rda̱ngi̱nto̱, ooga gon alaani e̱e̱t lagama ming elemtta ol. 7E̱ce̱bje̱ da̱ e̱e̱ti̱ ci een Barabas lagama zo̱ze̱ ci a̱ru̱we̱ enne e̱e̱t zo̱ze̱ ci aburne nege nong ngati gaalau, oyoho ki aciir ku̱ru̱k e̱e̱t ka̱da̱k. 8I̱vi̱ta̱ zin koole, a̱jji̱n Pilato abunna ming ooga e̱e̱t co̱de̱ lagama kiwagon e̱rki̱nya̱i̱.

9I̱jji̱n zin Pilato nogo izek ne, “Orongnyu niga koogaung alaan ci Ya̱u̱do̱?” 10A̱gga̱ alaani Pilato ming eceb alaata cik olli wawaco Ye̱su̱ gaganiko, eci nege emederan nonno. 11Abarik alaata cik olli wawaco ko̱, otomomtek ol do̱o̱k kar ki̱jji̱nne̱t Pilato abunna ming ooga Barabas, kar kutung Ye̱su̱ kecebe.

12I̱jji̱n zin Pilato nogo izek ne, “Ku̱tu̱gu̱ zin nya ngati e̱e̱t ci awuyyu niga kize alaan ci Ya̱u̱do̱ ko̱?”

13Egerenyit nege izeto ne, “Todowek nonno keet ci een ta̱la̱ke̱c!”

14I̱jji̱n zin Pilato nogo, “Nya? Abac enne gi̱i̱ jang ci gerze ko̱?”

Abarik egerenyit oroot, “Todowek nonno keet ci een ta̱la̱ke̱c!”

15Orong Pilato abunna koole ming atalne, oogak zin enne nogo Barabas, kar zin kanyik aciir ki̱be̱ce̱t Ye̱su̱ kar zin vu̱rrta̱ kaanyik nogo koot kotoddoc nonno keete wa een ta̱la̱ke̱c.

Aranne aciiri Ye̱su̱

(Ma̱te̱yo̱ 27:27-30; Jon 19:2-3)

16O̱o̱tte̱ aciiri Ye̱su̱ rok a̱lu̱wa̱ ci een zara pratoriyom ce̱e̱ze̱ ci alaano, kar ku̱tu̱yya̱ aciir cik meelek. 17I̱vi̱ta̱ zin uburucehe Ye̱su̱ ru̱u̱m ci een lo̱ddi̱ng#15:17 Ru̱u̱m ci een lo̱ddi̱ng: Een ru̱u̱ma̱ni̱ ne̱ko̱ cik aim alaata do̱., kar bo̱do̱k ku̱lu̱cca̱ i̱ta̱a̱ ci een biila kar zin kartiye nonno oo. 18Kar zin kadacit nonno kizeto ne, “Eeh, alaan ci Ya̱u̱do̱!” 19Ogowanit zin nege oo ci Ye̱su̱ keeta lak cik meelek giir, kar bo̱do̱k kuturtek amut. A̱ka̱tte̱k u̱zu̱ngtti̱ lo̱o̱c azi ne ko̱ngo̱o̱li̱na̱ alaan cinne̱ng, abarik ette aranne nonno. 20Baling adaccit nege nonno, aarta ru̱u̱m wanai een lo̱ddi̱ng aburceke nege nonno ke̱ kar kuburucek ru̱u̱ma̱ni̱ waginnek. O̱o̱tte̱ zin nonno ovvo ododek keet wa een ta̱la̱ke̱c. 21Imma goola, u̱ru̱mto̱ nege ki e̱e̱t ci azi zar ne Si̱mo̱ne̱ ci orog ci een Cyrene. Een enne be̱e̱ti̱ Alizanduru ki Ruvos. Etted da̱ enne orog abanyca, ommogtek zin nonno ki̱ti̱k ta̱la̱ke̱c.

Otodoyyek aciiri Ye̱su̱ ta̱la̱ke̱c

(Ma̱te̱yo̱ 27:31-44; Lu̱ka̱ 23:27-43; Jon 19:17-27)

22Anyakttak zin nege Ye̱su̱ rok nginti a̱nne̱k ol ne, Gologota, (Azi ungec cinne ne nginti o̱o̱tti̱ cik ol wak a̱da̱i̱to̱). 23Kar zin kanycik Ye̱su̱ merte ci ongotane ki ya̱ni̱#15:23 Merte ci ongotane ki ya̱ni̱: Eela ya̱ni̱ necu e̱e̱t okkoye u̱u̱ce̱z tu̱a̱. ci a̱kku̱ keete ci een zara myrrh, ma̱i̱je̱ enne utubur iróng audi.

24Otodoyyek zin nege nonno ta̱la̱ke̱c. Baling orongit kengerit ru̱u̱ma̱ni̱ ciginnek, a̱rri̱t zin nege bibi kar ki̱tta̱k gon ette e̱e̱t cu ru̱u̱m ru̱u̱ma̱ni̱ne̱ ne̱ke̱. 25Otodoyyek nege nonno nge̱rre̱t i̱i̱we̱ wagon kowane eeza bo̱ngi̱ta̱ ko̱, azi eci gaalau ne, “I̱i̱ torkoc.” 26Eteherit zin nege zoz ci obod ki Ye̱su̱ azi ne: ALAAN CI YA̱U̱DO̱. 27-28Otodoyyek zin nege ogoryak cik een ram bu̱k te̱le̱cwa̱ ki nonno, aave co̱de̱ o̱to̱ne̱ ci a̱zzo̱ okko co̱de̱ aave o̱to̱ne̱ ci angeto.#Isaya 53:12 29Imma ol ne̱k etted goola, atizik Ye̱su̱ oroot, kar zin kadacit kizettek ne, “Eeh! I̱nne̱t ele icu bali azi ne, kegerezani atin Ce̱e̱z wa Ta̱mu̱ta̱dde̱no̱ kar zin bo̱do̱k teheeny ce̱e̱z imma i̱i̱nya̱we̱ cik een i̱i̱yo̱. 30Aara ele keete ci een ta̱la̱ke̱c ko̱ kar ti̱ri̱z ele cunne.”

31Atararte zin bo̱do̱k alaata cik olli wawaco ki de̱me̱zzo̱k wak lo̱ti̱nno̱u̱ nonno bu̱k, kar kizeto ne, “I̱ti̱ri̱z enne ol, abarik iróng wo̱ye̱ enne a̱ti̱ri̱z ele cinne! 32Anyik Ki̱ri̱sto̱ necu, wa een alaan ci olli Israilo, kaara ele cinne ta̱la̱ke̱ca̱ ki̱ki̱ya̱k lo̱o̱c, kar wo̱ye̱ naga kicinnta bak kelemnana nonno.” Ma̱i̱je̱ ol ne̱k odode ki nonno ko̱ odomit bo̱do̱k nonno oroot.

Daiz ci Ye̱su̱

(Ma̱te̱yo̱ 27:45-56; Lu̱ka̱ 23:44-49; Jon 19:28-30)

33Baling ize wazin keng, ize looci ne ri̱ta̱k ki̱ri̱ri̱, kuzuca koor i̱i̱yo̱. 34Baling ize koor i̱i̱yo̱, egereny zin Ye̱su̱ oroot muluwe ci a̱ppwe̱, “Eloi, Eloi, lama sabachthani?” Azi ungec ci zoz necu ne, “Ta̱mu̱ta̱dde̱n wananni ye̱i̱, Ta̱mu̱ta̱dde̱n wananni ye̱i̱, utungeya i̱nna̱ annit lo̱o̱c nya?”#Caliwon 22:1

35Baling iziyyet ol balik abile ojonun ke̱ Ye̱su̱ ming egereny, izeto zin nege ne, “Iziyyet, awu enne E̱li̱ja̱.”

36I̱vi̱r e̱e̱ti̱ imma ngatinne̱ng kar kidima ru̱u̱m kocowek merte, aarik keet kar kaanyik Ye̱su̱ kuud. Kar kizek nogo ne, “I̱yo̱ko̱, utunget nonno do̱. Kicinnet da̱ ming a̱kku̱ E̱li̱ja̱ ki̱ki̱ya̱ kaara nonno ta̱la̱ke̱ca̱.”

37U̱tu̱lu̱ Ye̱su̱ oroot, etteda zin zinin.

38Erece zin ru̱u̱m ci enger Ce̱e̱z wa Ta̱mu̱ta̱dde̱no̱ orgena, ta̱dde̱na̱ rok lo̱o̱c.#15:38 Ru̱u̱m ci enger Ce̱e̱z wa Ta̱mu̱ta̱dde̱no̱: Enger ru̱u̱m necu Nginti A̱li̱le̱ oroot ngati aave Ta̱mu̱ta̱dde̱n di̱ngdi̱ngo̱nta̱. I̱i̱zo̱ alaani ci a̱ddi̱ki̱re̱ wawaco ngin neci do̱ lak co̱de̱ e̱rki̱ta̱, kar kanyik wawac Ta̱mu̱ta̱dde̱n abunna unya mu̱nye̱n cik ollu do̱o̱k. IkebLeviticus 16; Ma̱te̱yo̱ 27:51; Lu̱ka̱ 23:45; I̱bu̱ru̱ 6:19-20; 9:1-7. 39Baling izik ddi̱ki̱ryo̱i̱ti̱ ci aciiru#15:39 Ddi̱ki̱ryo̱i̱ti̱ ci aciiru: Een enne ddi̱ki̱ryo̱i̱t ci a̱gga̱m aciir o̱bo̱n co̱de̱. bali abile ojonun ki Ye̱su̱ ko̱ u̱lu̱wa̱ cinne kar bo̱do̱k kicin gool ci a̱da̱he̱ enne, ize ne, “Een e̱e̱ti̱ cu Ngerrti Ta̱mu̱ta̱dde̱no̱ de̱de̱!”

40Anyak ngaai u̱gge̱ cik edenya nogo reena. Imma ngaane ne̱ke̱ aave Ma̱ri̱ya̱ Madalina ki Ma̱ri̱ya̱ e̱e̱ti̱ Je̱mi̱s wa dici ki Yosevo, anyak bo̱do̱k ngaa ci een Salome. 41Imma lo̱o̱ce̱ ci Ga̱li̱li̱ unuwet ngaai ne̱ke̱ nonno kar ki̱ti̱ri̱ze̱t nonno nginati. Aavtte bo̱do̱k da̱ ngaai uggak cik orkora ki Ye̱su̱ Jerusalema.

Dawinet ci Ye̱su̱

(Ma̱te̱yo̱ 27:57-61; Lu̱ka̱ 23:50-56; Jon 19:38-42)

42Een da̱ i̱i̱ neci i̱i̱te̱n ci adimane ol kaal cik I̱i̱te̱n wa Yu̱bze̱nto̱. Ki i̱yo̱ko̱ ize ojon yo̱mo̱n#15:42 Ojon yo̱mo̱n: Akane I̱i̱te̱ni̱ wa Yu̱bze̱nto̱ ming i̱tto̱ i̱i̱ yo̱mo̱na̱. ko̱, 43itinga Yosevo wa orog ci Arimatiya wa bo̱do̱k een e̱e̱t co̱de̱ olle wak een nyakanganete cik Ya̱u̱do̱, kar kize e̱e̱t ci ere ba̱a̱li̱ne̱t ci Ta̱mu̱ta̱dde̱no̱, uk ngati alaan Pilato kar kuk ki̱jji̱n ele ci Ye̱su̱. 44A̱ma̱li̱le̱ Pilato oo baling izik ming a̱da̱k Ye̱su̱ ataman. Utu ddi̱ki̱ryo̱i̱t kar zin ki̱jji̱n nonno ming a̱da̱k Ye̱su̱ de̱de̱. 45Imma baling izik enne ngati ddi̱ki̱ryo̱i̱t azi ne a̱da̱k Ye̱su̱ de̱de̱, aanyik zin Pilato Yosevo kuwe ele ci Ye̱su̱ kuk ka̱da̱. 46Utuwa zin Yosevo ru̱u̱m, aara ele ci Ye̱su̱ kar ku̱lu̱ce̱k ru̱u̱m neci, kar kaarik ilomi ci aave ngi̱lo̱ma̱. Kar koborboranek bee tatug ci ngi̱lo̱mo̱. 47Edenyca Ma̱ri̱ya̱ Madalina ki Ma̱ri̱ya̱ wa een e̱e̱ti̱ Yosevo nginti arike nege ele ci Ye̱su̱.

Currently Selected:

Marko 15: tex

Highlight

Copy