Lu̱ka̱ 3

Idiman Joni Ba̱ti̱ti̱mo̱ gool

(Ma̱te̱yo̱ 3:1-12; Marko 1:1-8; Jon 1:19-28)

1Baling ize e̱rki̱nya̱ cik abale Tiberiasi alaan ci a̱ddi̱ki̱re̱ Romi ol omoto ki tu̱r, een da̱ Pontius Pilato ddi̱ki̱ryo̱i̱t ci gaala cik Ju̱de̱ya̱, kar zin bo̱do̱k He̱ro̱di̱#3:1 Alaan He̱ro̱d: Awu ol alaan cu azi ne, He̱ro̱d Antipas. Bali vu̱rrta̱ ming okko He̱ro̱d wa A̱ddi̱ki̱re̱ a̱da̱i̱, ize ngerinne He̱ro̱di̱ Antipas alaan. Een enne alaan i̱i̱te̱ne̱ bali a̱gga̱me̱k Joni Ye̱su̱ ba̱ti̱ti̱mo̱ ke̱. IkebMa̱te̱yo̱ 14:1; Marko 6:14; Buk wa To̱ni̱a̱u̱ 4:27. Awu ol He̱ro̱d azi ne, He̱ro̱d wa A̱ddi̱ki̱re̱. Een bali enne alaan koor bali a̱rri̱ta̱i̱ Ye̱su̱ ke̱. IkebMa̱te̱yo̱ 2:1-8; Lu̱ka̱ 1:5. Imma bali vu̱rrta̱ anyak alaan ci een He̱ro̱d Agirippa, ngerrti do̱le̱c ci He̱ro̱d wa A̱ddi̱ki̱re̱. IkebBuk wa To̱ni̱a̱u̱ 12:1-23. kize alaan ci Ga̱li̱li̱, okko gotoniya Vilipi een alaan ci I̱tu̱ri̱a̱ ki Tirikontes, kar Lucano kize alaan ci Abelin, 2kar e̱rki̱te̱ wa aavtte alaata wak a̱ddi̱ki̱re̱ wawaco#3:2 Alaan ci a̱ddi̱ki̱re̱ wawaco: Ommog alaani ci a̱ddi̱ki̱re̱ wawaco ko̱ alaat cik olli wawaco eci een nonno do̱ ṯok ci gon i̱i̱zo̱ Ce̱e̱z wa Ta̱mu̱ta̱dde̱no̱ Ngin wa A̱li̱le̱ Oroot e̱rki̱ta̱ lak co̱de̱. Anyaha enne bi̱ye̱ cik kar kutuny mu̱nye̱n cigge̱k. Aave Ta̱mu̱ta̱dde̱n di̱ngdi̱ngo̱nta̱ Ngin wa A̱li̱le̱ Oroot, zoz zin ci iróng alaani ci a̱ddi̱ki̱re̱ wawaco ko̱ i̱i̱zo̱ ngintu i̱i̱te̱n imma e̱rki̱ta̱. IkebLeviticus 16; I̱bu̱ru̱ 9:1-7. Annasi ki Kaipas, i̱ki̱ya̱k zin zoz ci Ta̱mu̱ta̱dde̱no̱ Jon ngerrti Zakaria balala. 3U̱lu̱c zin enne o̱ro̱gjo̱k cik ojongoz moro ci Jordani veelek, uwahek ol zoz ci a̱gga̱me̱ nege ba̱ti̱ti̱mo̱ kar kutungttek ba̱ci̱nno̱k wagge̱k lo̱o̱c, ki zoz ci alalneke Ta̱mu̱ta̱dde̱n nogo mu̱nye̱n. 4Ki ming e̱he̱rye̱ buwe ci eher a̱ri̱to̱i̱ti̱ ci zoz ci Ta̱mu̱ta̱dde̱no̱ ci een Isaya ko̱:

“Egereny mului ci e̱e̱to̱ balale ci gi̱da̱ngi̱, azi ne,

‘Idimantek Manyi gool,

idimantek nonno gool ci abile ṯop.

5Aanycik lo̱wu̱la̱nge̱t do̱o̱k kibbiztante,

aanycik biyen ki zi̱i̱ryo̱k do̱o̱k ka̱vvu̱to̱ lo̱o̱ta̱.

Okko gool ci a̱lu̱ce̱, okko atin aave ṯop,

okko gool ci gerze, abunna atin ju̱rru̱m.

6Kar atin ol do̱o̱k ku̱mu̱dda̱ ti̱ri̱ze̱ne̱t ci Ta̱mu̱ta̱dde̱no̱.’”#Isaya 40:3-5

7A̱nne̱k Joni zu̱we̱ ne, iyokta i̱vi̱ta̱ a̱gga̱mi̱t ba̱ti̱ti̱mo̱#3:7 Ba̱ti̱ti̱mo̱: Elemna ol a̱gga̱ma̱ ba̱ti̱ti̱mo̱ kar ki̱ye̱la̱ azi ne, utungtek nege mu̱nye̱n cigge̱k lo̱o̱c kar kunuwet Ta̱mu̱ta̱dde̱n. cinne, “Niga dooli cik uwanyau! Ngene ci a̱du̱wa̱kku̱ng kar i̱vi̱re̱t de̱zi̱ne̱t ci atin a̱kku̱ ke̱? 8U̱tu̱gu̱z kaal cik abunna ming uturtau niga mu̱nye̱n ciggo̱k ko̱. Ma ngen a̱nne̱kku̱ e̱le̱tti̱ ciggo̱k ne, ‘Kanyaka naga Aburaham kize be̱e̱ti̱nna̱ng.’ Eci anna ka̱du̱wa̱kku̱ng i̱yo̱ko̱, adiman wo̱ye̱ Ta̱mu̱ta̱dde̱n dooli cik Aburahami biyene ne̱ko̱. 9Aave meelei egeroi cik keenu, kar keet ci iróng a̱bbi̱re̱ ettedonik atin lo̱o̱c kar ku̱ju̱ko̱zi̱k gwo̱o̱.”

10I̱jji̱nne̱t zin zu̱we̱ Jon, “Ku̱tu̱gu̱z ucca zin naga nya?”

11O̱bo̱de̱k zin Joni nogo, “Ming anyak e̱e̱ti̱ imma ru̱u̱ma̱ni̱ rama, anyik kozol co̱de̱ ki gooni ci i̱llo̱i̱ ru̱u̱m, kar e̱e̱ti̱ ci anyak da̱i̱ne̱t, anyik ku̱tu̱gu̱ bu̱k niko.”

12I̱vi̱ta̱ ol wak alut mucuru olle orong ka̱gga̱mi̱t ba̱ti̱ti̱mo̱. I̱jji̱nto̱ zin nege, “De̱me̱zo̱i̱t, ku̱tu̱gu̱zza̱ wo̱ye̱ naga nya?”

13U̱du̱wa̱k zin enne nogo, “Ma ngen alutanu mucuru cik meelek olle kommogit cik orong alaani.” 14I̱jji̱nne̱t bo̱do̱k aciiri uggak nonno, “Ku̱tu̱gu̱zza̱ wo̱ye̱ naga nya?”

O̱bo̱de̱k zin Joni nogo, “Ma a̱gga̱ma̱nnu̱ ol kaal i̱ba̱ti̱ne̱ kar bo̱do̱k e̱ce̱bi̱t ol volonga, e̱le̱zzo̱ ki kaal cik a̱a̱nyu̱ng gaala ko̱.”

15E̱re̱ye̱ ol de̱de̱ kar kibilet zi̱nze̱tti̱ je̱e̱na̱, ming een Joni bong ucca ci een Ki̱ri̱sto̱. 16Abarizek zin Joni nogo, “Ka̱gga̱me̱kku̱ng anna i̱ge̱ta̱ ba̱ti̱ti̱mo̱ maame. Ma̱i̱je̱ ngatu anyak e̱e̱t co̱de̱ ci ommogja annita, a̱kku̱ atin, iróng anna kuuli kar keceb baru cik caava ciginnek. A̱gga̱me̱kku̱ng atin enne i̱ge̱t ba̱ti̱ti̱mo̱ Vongize ci A̱li̱le̱ ki gwo̱o̱ya̱. 17Anyak enne gi̱i̱ ci aanye ol labi#3:17 Labi ki lotulany: Azi keng ci labinu ne, ol cik elemna Ki̱ri̱sto̱, kar lotulany azi keng cinne ne ol cik abure Ki̱ri̱sto̱. azzine ciginnek kar ki̱ti̱vi̱l nginti a̱ru̱we̱ ol labi kar kulutak labi de̱he̱r, ma̱i̱je̱ atin enne okko atuz lotulany gwo̱o̱ye̱ ci apadpadi udut.” 18Kar ku̱du̱wa̱k Jon ki̱ti̱lo̱ ol zo̱zo̱we̱ cik meelek kar kuwahek nogo kaviyak cik abunna.

19Ma̱i̱je̱ Joni egerenyek alaan He̱ro̱d zo̱ze̱ ci abahe enne Herodias ngaa ci gotononi,#3:19 Herodias ngaa ci gotononi: Ngen bali Vilipi aruge baling okkoye alaani He̱ro̱di̱ ngaa ci gotononi Vilipi, een zara Herodias. ki kaal cik gerzek do̱o̱k u̱tu̱gu̱ enne, 20otorek zin bo̱do̱k He̱ro̱di̱ nogo zoz cu do̱o̱k, baling unyugek enne Jon lagam.

Ba̱ti̱ti̱mo̱ ki biilet co Ye̱su̱

(Ma̱te̱yo̱ 3:13-17; Marko 1:9-11)

21Baling a̱gga̱mto̱zi̱k ol do̱o̱k ba̱ti̱ti̱mo̱, a̱gga̱mo̱zi̱k zin Ye̱su̱ bu̱k ba̱ti̱ti̱mo̱. Kar baling ngen enne alaye, oowe ta̱mu̱-kengi 22kar zin Vongizi ci A̱li̱le̱ kulucak nonno kiwagon lo̱be̱rru̱i̱. Iyowa zin mului ta̱mu̱-kenga ci azi ne, “E̱e̱ni̱ i̱nna̱ Ngeranni wa kirezi anna; katalne anna zo̱ze̱ cunne oroot.”

Biilet co Ye̱su̱

(Ma̱te̱yo̱ 1:1-17)

23I̱yo̱ko̱ zin izeto da̱ e̱rki̱nya̱ cik Ye̱su̱ moten i̱i̱yo̱ baling akane enne li̱ngli̱ngo̱n cinne. Een bali enne ngerrti Yosevo, ki bali ming i̱no̱n ol ke̱,

een ngerrti Heli, 24een Heli ngerrti Matta,

okko Matta een ngerrti Le̱vi̱,

imma Le̱vi̱ een ngerrti Melki,

okko Melki een ngerrti Jannai, een Jannai ngerrti Yosevo,

25okko Yosevo een ngerrti Matatiyas, een Matatiyasi ngerrti Amusi,

okko Amusi een ngerrti Nahum, een Nahumi ngerrti Esli,

okko Esli een ngerrti Naggai, 26een Naggai ngerrti Maaz, okko Maazi

een ngerrti Matatiyasi, okko Matatiyasi een ngerrti Semein, okko Semeini een

ngerrti Josech, imma Josechi een ngerrti Joda,

27een Joda ngerrti Joanan, okko Joanani een ngerrti Rhesa, een Rhesa,

ngerrti Zerubbabeli, imma Zerubbabeli een ngerrti Shealtieli, okko Shealtieli,

een ngerrti Neri, 28okko Neri een ngerrti Melki,

okko Melki een ngerrti Addi, een Addi ngerrti Kosami, een Kosami

ngerrti Elmadami, okko Elmadami een ngerrti Er,

29een Eri ngerrti Joshua, okko Joshua een ngerrti Eliezeri, een Eliezeri

ngerrti Jorim, okko Jorimi een ngerrti Matta, een Matta

ngerrti Le̱vi̱, 30okko Le̱vi̱ een ngerrti Si̱mo̱ne̱, okko Si̱mo̱ne̱

een ngerrti Ju̱da̱, een Ju̱da̱ ngerrti Yosevo, okko Yosevo,

een ngerrti Jonami, een Jonami ngerrti Eliakimi,

31een Eliakimi ngerrti Melea, okko Melea een ngerrti Menna, een Menna,

ngerrti Matta, okko Matta een ngerrti Nathan, okko Nathani een

ngerrti Da̱vi̱de̱, 32een Da̱vi̱de̱ ngerrti Jesse, okko Jesse

een ngerrti Obed, okko Obedi een ngerrti Boazi, okko Boazi een

ngerrti Salmone, okko Salmone een ngerrti Nahshon,

33een Nahshoni ngerrti Amminadab, okko Amminadabi een ngerrti Rami, een Rami,

ngerrti Hezron, een Hezroni ngerrti Perez, okko Perezi

een ngerrti Ju̱da̱, 34een Ju̱da̱ ngerrti Ya̱ko̱bo̱, okko Ya̱ko̱bo̱

een ngerrti I̱sa̱ko̱,#3:34 I̱sa̱ko̱: Een enne do̱le̱c ci bali u̱du̱wa̱ Ta̱mu̱ta̱dde̱n azi ne, kanyik Aburaham. IkebKananet 17-35. een I̱sa̱ko̱ ngerrti Aburahami, okko Aburahami

een ngerrti Terah, imma Terah een ngerrti Nahor, 35een Nahori ngerrti Serug, okko Serugi een ngerrti Reu,

een Reu ngerrti Peleg, okko Pelegi een ngerrti Eberi, een Eberi

ngerrti Shelah, 36okko Shelah een ngerrti Kainani, een Kainani

ngerrti Arvacad, okko Arvacadi een ngerrti Shem,

een Shemi ngerrti Nowa, okko Nowa een ngerrti Lamech,

37een Lamechi ngerrti Matasela, okko Matasela een ngerrti Enok,

okko Enoki een ngerrti Jaredi, okko Jaredi een ngerrti Mahalalel,

een Mahalaleli ngerrti Kainani, 38een Kainani ngerrti Enoshi,

okko Enoshi een ngerrti Seth, een Sethi ngerrti Adami,

okko Adami#3:38 Adam: Een bali enne e̱e̱t ci eenyca Ta̱mu̱ta̱dde̱n bali oowa kar bo̱do̱k kize be̱e̱ti̱ ollu do̱o̱k. Okko ngaa cinne Eva een e̱e̱ti̱ ollu do̱o̱k lo̱o̱ta̱ ngatu. IkebKananet 1-5. een ngerrti Ta̱mu̱ta̱dde̱no̱.

Currently Selected:

Lu̱ka̱ 3: tex

Highlight

Copy