Lu̱ka̱ 2

Ti̱ra̱ne̱t ci Ye̱su̱

(Ma̱te̱yo̱ 1:18-25)

1Okko e̱rki̱te̱ neci abale Agusto alaan ci a̱ddi̱ki̱re̱ Romi#2:1 Alaan ci a̱ddi̱ki̱re̱ Romi: Een enne alaan ci a̱ddi̱ki̱rne̱ alaat cik lo̱o̱cco̱k u̱gge̱ ki bo̱do̱k Ju̱de̱ya̱ ki Ga̱li̱li̱ lo̱o̱ce̱ ci Ya̱u̱do̱. Awu olli Romi alaan ci a̱ddi̱ki̱re̱ kize Kesari. ke̱ lo̱o̱c, i̱tto̱n zin enne zoz ci ovvoye olli Romi do̱o̱k te̱he̱ri̱ne̱t zar o̱ro̱gjo̱we̱. 2Akane ol te̱he̱ri̱ne̱t zar e̱rki̱te̱ ci bali abale ddi̱ki̱ryo̱i̱ti̱ ci gaalau Kurino lo̱o̱c ci een Syria ke̱. 3Oot zin ol do̱o̱k o̱ro̱gjo̱we̱ cik be̱e̱ti̱gge̱k te̱he̱ri̱ne̱t.

4Itinga Yosevo o̱rge̱ ci azi zar ne Nazeret, Ga̱li̱li̱ya̱, uk rok lo̱o̱c ci een Ju̱de̱ya̱, Betelema orog ci Da̱vi̱de̱, eci Yosevo a̱kku̱ tatuge ci Da̱vi̱de̱. 5Okko enne nginati ovvo eher zar ki Ma̱ri̱ya̱, ci arakttek ol nonno kar atin ki̱ti̱k kize ngaa cinne, anyak da̱ Ma̱ri̱ya̱ do̱le̱c kenga. 6Baling ngen nege aavtte nginati, i̱ki̱ya̱ i̱i̱te̱ni̱ ci okko Ma̱ri̱ya̱ a̱rri̱ta̱ do̱le̱c, 7kar zin enne ki̱ti̱ra̱ do̱le̱c ci een a̱bu̱, ci maci. U̱lu̱cce̱k nonno ru̱u̱ma̱ni̱ kar karik i̱bo̱, eci i̱llo̱i̱ ce̱e̱z ci adungne nege.

Tuwayok ki anjilonya

8Aavtte da̱ tuwayowa uggak abanyca, abak boora ebek kaal cigge̱k ba̱a̱l. 9I̱ye̱le̱k zin anjilo ci Manyi nogo ele, kar di̱ngdi̱ngo̱ni̱ ci Manyi ki̱ye̱la̱i̱ ngatinne̱ng, kar nege ko̱to̱ngo̱o̱ltte̱ lo̱o̱c. 10Ma̱i̱je̱ anjilo a̱nne̱k nogo ne, “Ma o̱ngo̱o̱li̱nnu̱ gi̱i̱ imma. Kanyahakung anna i̱ge̱t kaviyak cik abunna anyak talninet ci a̱ppwe̱ ci ollu do̱o̱k. 11Wazin necu o̱rge̱ ci Da̱vi̱de̱ a̱rri̱ta̱i̱ Ti̱ri̱zo̱i̱ti̱ kize cunno̱ng; een enne Ki̱ri̱sto̱#2:11 Ki̱ri̱sto̱: Utuge ci Gi̱ri̱yo̱ azi keng ci zar cik een Ki̱ri̱sto̱ ko̱ ne, wa o̱de̱ atahala Ta̱mu̱ta̱dde̱n kize Alaan. Utuge ci I̱bu̱ru̱ azi keng ci zar cik een Ki̱ri̱sto̱ ko̱ ne Missaya. Manyi. 12Een atin neci baayenit cinno̱ng: Amudannu atin niga do̱le̱c ci maci a̱lu̱ce̱ ru̱u̱ma̱ kar ka̱ta̱ngu̱ i̱bo̱wa̱.”

13Ataman niko i̱ye̱ltta̱i̱ koole ci a̱ppwe̱ a̱vvu̱ ta̱mu̱-kenga ki anjilo, innat Ta̱mu̱ta̱dde̱n azi ne,

14“Anycik di̱ngdi̱ngo̱n Ta̱mu̱ta̱dde̱n, ta̱dde̱na̱,

kar lo̱o̱ta̱ gano ci ol cik diirik cik elemi Ta̱mu̱ta̱dde̱n.”

15Baling utungtek anjilonya nogo lo̱o̱c kar koot ta̱mu̱-kenga, izeto tuwayowa do̱ ne, “Ki̱vi̱ta̱ koo Betelema kar kicinnet kaal cik a̱du̱wa̱kke̱t Manyi ko̱.”

16I̱yi̱he̱t zin nege ataman kar kurubta Ma̱ri̱ya̱ ki Yosevo, ki do̱le̱c ci adunge i̱bo̱wa̱. 17Baling icinnet nege do̱le̱c, kar zin ku̱du̱kta̱k ol kaviyak balik a̱du̱wa̱k anjilo nogo zo̱ze̱ ci do̱le̱co̱ ke̱, 18imma ol balik iziyyet zoz neci, u̱ku̱lte̱k nege je̱e̱n zo̱ze̱ bali a̱du̱wa̱k tuwayowa nogo ke̱. 19Ma̱i̱je̱ Ma̱ri̱ya̱ adaz zo̱zzo̱k ne̱ke̱ do̱o̱k zinina kar gon ki̱no̱n. 20I̱mi̱rrte̱ zin tuwayowa, a̱di̱ngdi̱nga̱n Ta̱mu̱ta̱dde̱n kaale cik iziyyet nege ki cik icinnet nege, ogon ki bali ming u̱du̱ya̱i̱ ke̱.

O̱o̱tte̱ ol Ye̱su̱ Ce̱e̱ze̱ wa Ta̱mu̱ta̱dde̱no̱

21Imma i̱i̱te̱ne̱ ci een tu̱rge̱, baling utube i̱i̱ ci ovvo nege ettede vi̱ca̱vi̱ca̱ cinne, a̱ka̱tte̱k zin nege nonno zar cik een Ye̱su̱, zar balik a̱du̱wa̱ anjilo baling ngen yaatinne kanyak nonno kenga.

22Baling utubte i̱i̱nya̱ cik aburuce ol nogo ki ming a̱du̱wa̱ lo̱ti̱nno̱wa̱#2:22 I̱i̱nya̱ cik aburuce ol nogo ki ming a̱du̱wa̱ lo̱ti̱nno̱wa̱ wak Musesi: Azi Lo̱ti̱nno̱wa̱ cik Musesi ne, ming a̱rri̱ta̱ ngaa do̱le̱c ci maci ngoronya ele cinne i̱i̱nya̱ cik een moten we̱c. IkebLeviticus 12:1-4. wak Musesi#2:22 Muses: Baling okko Yosevo a̱da̱i̱, izeto dooli cik Israilo du̱cca̱k Masira, edeca e̱rki̱nya̱ cik e̱e̱ggi̱n obet we̱c (400). Atahala Ta̱mu̱ta̱dde̱n Muses kize e̱e̱t ci a̱lu̱ge̱ olli Israilo ngati e̱e̱ggi̱n du̱cca̱k Masire. Aanyik Ta̱mu̱ta̱dde̱n olli Israilo lo̱ti̱nno̱k ngati Musesi, nonno ci azi ol ne, Lo̱ti̱nno̱k cik Musesi. Abak i̱yo̱ko̱ da̱ Musesi e̱rki̱nya̱ i̱bbo̱ng co̱de̱ ki obet we̱c (1,400) bali ngen Ye̱su̱ ki̱ti̱rra̱i̱ ke̱. Ikeb Lu̱ge̱z 2-24., o̱o̱tte̱ zin Yosevo ki Ma̱ri̱ya̱ nonno Jerusalema koot kaanycik Manyi, 23ki ming e̱he̱rye̱ lo̱ti̱nno̱we̱ cik Manyi, “Aanycik dooli cik macik een a̱bu̱nya̱ do̱o̱k Manyi,”#Lu̱ge̱z 13:2,12 24kar bo̱do̱k kapaktek wawac kar ku̱zu̱tte̱ zoz ci a̱du̱wa̱ lo̱ti̱nno̱wa̱ cik Manyi: “Anyaktta lu̱be̱nya̱ rama icima loberuknya rama cikidik.”#Leviticus 12:8

25Anyak ba̱li̱ye̱ e̱e̱t imma Jerusalema ci een zara Si̱mo̱ne̱, e̱e̱t ci abunna kar karik zinin zoz ci Ta̱mu̱ta̱dde̱no̱. Ere da̱ enne Ti̱ri̱zo̱i̱t ci olli Israilo, aave zin da̱ Vongizi ci A̱li̱le̱ ngatinne. 26I̱ye̱le̱k bali Vongizi ci A̱li̱le̱ nonno zoz cu, iróng atin enne a̱da̱i̱ ming ngen kicin Ki̱ri̱sto̱ ci i̱tto̱na̱ Manyi. 27Uwe zin Vongizi ci A̱li̱le̱ nonno rok a̱lu̱wa̱ ci Ce̱e̱z wa Ta̱mu̱ta̱dde̱no̱. Baling ovvo Ma̱ri̱ya̱ ki Yosevo anyaha Ye̱su̱ kar kidimanit nonno ki ming orong lo̱ti̱nno̱wa̱, 28odong zin Si̱mo̱ne̱ do̱le̱c ka̱vvu̱ azzine ciginnek kar zin enne kinnat Ta̱mu̱ta̱dde̱n, azi ne:

29“Manyi ci een Alaan ci a̱ddi̱ki̱re̱, ki baling u̱du̱wa̱ i̱nna̱ ke̱,

anyik zin i̱yo̱ko̱ du̱ca̱i̱t cunne kuk labak ngato ji̱jí̱.

30Eci ebere cigannik icinnet ti̱ri̱ze̱ne̱t cunne,

31bali adimanek i̱nna̱ ol do̱o̱k kicinnet,

32tukulec ci i̱ye̱le̱k ol cik iróng een Ya̱u̱d,

ki di̱ngdi̱ngo̱n ci ol cigunnek Israilo.”

33U̱ku̱lte̱k zin yaatinne ki baatinne je̱e̱n zo̱ze̱ ci a̱du̱wa̱ Si̱mo̱ne̱ zo̱ze̱ obod ki do̱le̱c ko̱. 34Kar zin enne ku̱mu̱yu̱k nogo do̱o̱k, kar kizek Ma̱ri̱ya̱ wa een yaatinne ko̱ ne: “Atahalai do̱le̱c necu kar ki̱ki̱ya̱ kaanyik ol cik meelek ku̱yu̱kte̱ kar bo̱do̱k uggak kitingazzo lo̱o̱ce̱ ci Israilo, kar atin enne kize baayenit ci adang ol zoz cinne, 35kar atin kaala cik i̱no̱n ol zi̱nze̱tti̱nne̱ ovvo i̱ye̱la̱i̱. Kar atin illa kakat zinin cunne ele bu̱k.”

36Anyak da̱ bo̱do̱k a̱ri̱to̱i̱t imma ci nga̱a̱ye̱, een zara Anna buweenyi Phanueli, a̱kku̱ boore co Asher. Ize da̱ Anna ma̱ti̱yo̱c oroot; abak ba̱li̱ye̱ enne ki mac cinne e̱rki̱nya̱ turgerem baling edeccai rucenet, 37kar zin kize enne boya kizeto e̱rki̱nya̱ ciginnek moten tu̱rge̱ ki we̱c. Ngen enne kutungek Ce̱e̱z wa Ta̱mu̱ta̱dde̱no̱ lo̱o̱c i̱i̱te̱n imma, abarik ala Ta̱mu̱ta̱dde̱n kaal tu̱p, i̱ya̱ye̱#2:37 I̱ya̱ye̱: Aavtte ol cik Ya̱u̱do̱ gon i̱i̱nya̱ u̱gge̱ ne̱ko̱ cik iróng bu̱k adak rok da̱i̱ne̱t u̱gge̱ abarik orong kar nege kanycik e̱le̱tti̱ cigge̱k kize cik alawe nege Ta̱mu̱ta̱dde̱n. kar kalawo. 38Baling i̱i̱te̱ne̱ neci ele, aanyik enne Ta̱mu̱ta̱dde̱n zany kar kozoz zoz ci do̱le̱co̱ olle balik ere ti̱ri̱ze̱ne̱t ci Jerusalemo ke̱.

39Baling u̱tu̱gu̱zzo̱ Ma̱ri̱ya̱ ki Yosevo kaal cik orong lo̱ti̱nno̱wa̱ cik Manyi ko̱, i̱mi̱rrte̱ zin oot rok Ga̱li̱li̱ o̱rge̱ cinne̱ng, Nazereta. 40Itinga zin do̱le̱c ki̱ddi̱ki̱r kokkom; anyak enne genyiz, kar deteni ci Ta̱mu̱ta̱dde̱no̱ ka̱vvu̱ ngatinne.

Do̱le̱c Ye̱su̱ Ce̱e̱ze̱ wa Ta̱mu̱ta̱dde̱no̱

41Ovvo gon ciko baatinne ki yaatinne Jerusalema e̱rki̱ta̱ ovvo adak I̱i̱te̱n wa Va̱rda̱ngi̱nto̱.#2:41 I̱i̱te̱n wa Va̱rda̱ngi̱nto̱: A̱a̱dda̱ olli Ya̱u̱do̱ i̱i̱te̱n bali arike ji̱ji̱ti̱gge̱k bi̱ye̱ tatuget cigge̱k kar Ta̱mu̱ta̱dde̱n ka̱va̱rda̱ng ce̱e̱zi̱ cigge̱k lo̱o̱ce̱ ci Masiro ke̱. Een i̱i̱te̱n cu i̱i̱te̱n bali adahe nege umunet balik iróng amukcari ke̱. Een i̱i̱te̱n cu ci i̱ye̱la̱ i̱i̱te̱n ci a̱kku̱nne̱ atin Ye̱su̱ ki Nyoon ci Ta̱mu̱ta̱dde̱no̱, eci bi̱ye̱ta̱ ciginnek utunyca mu̱nye̱n cigga̱c. IkebLu̱ge̱z 12:17-28; Marko 14:12; Lu̱ka̱ 22:7; Jon 1:9-35; 1 Ko̱ri̱nto̱ 5:7; 1 Peturu 1:19. 42Baling izeto e̱rki̱nya̱ cik Ye̱su̱ omoto ki rama, oot zin nege ki nonno ovvo adak Kwo̱o̱r, ki ming a̱du̱wa̱ keer cinne̱ng. 43Baling edeccai Kwo̱o̱r, imma ciko yaatinne ki baatinne i̱mi̱rrte̱ oot ce̱e̱za̱, erahek do̱le̱c Ye̱su̱ vu̱rrta̱ Jerusalema, ma̱i̱je̱ nege iróng a̱gga̱. 44I̱no̱ni̱t nege azi ne, orkorrit i̱yo̱ko̱ enne ki gonoggi, otozo zin nege i̱i̱te̱n co̱de̱. A̱ka̱tte̱ zin orongit nonno ngati ol cik een boor ki gonogginne. 45Baling iróng nege ngen amuda nonno, i̱mi̱rrte̱ oot Jerusalema ovvo orong nonno. 46Imma baling edeccai i̱i̱nya̱ i̱i̱yo̱, urubtak zin nonno re̱e̱nu̱n ci Ce̱e̱z wa Ta̱mu̱ta̱dde̱no̱ aave orgene ci de̱me̱zzo̱k wak lo̱ti̱nno̱u̱, kar kizik nogo kar gon ki̱jji̱n nogo bu̱k. 47Imma ol ne̱k aziye zoz cinne ke̱, a̱ma̱li̱ltte̱ o̱o̱tti̱ cigge̱k zo̱ze̱ ci a̱gga̱ enne ki go̱o̱le̱ ci abarizek enne ji̱ne̱ne̱t cinne̱ng. 48Baling icinnet ciko yaatinne ki baatinne nonno, u̱ku̱lte̱k zin nege je̱e̱n. Izek zin yaatinne nonno ne, “Ngeranni, nya ming ogonet ki i̱yo̱ko̱ ko̱? Korongnyi, anna ki baatunne i̱nne̱t oroot.”

49I̱jji̱n zin enne yaatinne, “Nya ming orongnyang niga annit ko̱? Iróng niga a̱gga̱yyu̱ ming kaave anna Ce̱e̱ze̱ ci Baatanni?” 50Imma nege iróng a̱gga̱ zoz ci bali ozozek enne nogo ke̱.

51Uk zin enne rok Nazareth ki nogo kar kelema zoz cinne̱ng. Ma̱i̱je̱ yaatinne azunne kaal ne̱ke̱ do̱o̱k zinine cinne. 52Itinga zin Ye̱su̱ ki̱ddi̱ki̱r, anyak genyiz ki ele, irez zin Ta̱mu̱ta̱dde̱n ki ol nonno.

Currently Selected:

Lu̱ka̱ 2: tex

Highlight

Copy