Lu̱ka̱ 17

Mu̱nye̱n ki tu̱we̱ne̱t ki li̱ngli̱ngo̱n

(Ma̱te̱yo̱ 18:6-7,21-22; Marko 9:42)

1A̱nne̱k Ye̱su̱ nuyak ciginnek i̱i̱te̱n imma ne, “Izeto ojontte kaala cik aanyik ol ku̱tu̱gu̱zzo̱ mu̱nye̱n ko̱ kar ki̱vi̱ta̱, abarik o̱lle̱ ci e̱e̱t ci atin ovvo kaala ne̱ko̱ a̱vvu̱ go̱o̱le̱ cinne. 2Maya oroot ming a̱ju̱ko̱ni̱k enne nyatapar ci a̱ddi̱ki̱re̱ ki rabaz ci kecebek i̱nya̱ cinne, eci gerza ming aanyik enne dooli wa kidik ku̱tu̱gu̱zzo̱ mu̱nye̱n. 3I̱yo̱ko̱ zin u̱zu̱tte̱ e̱le̱tti̱ cuggo̱k.

“Ming u̱tu̱gu̱ gotonnu mu̱nye̱n, du̱wa̱k nonno, kar ming utura enne mu̱nye̱n, lalek nonno. 4Ming ogoneki enne i̱nne̱t mu̱nye̱n lak turgerem i̱i̱te̱n co̱de̱, kar kobodai enne i̱nne̱t bo̱do̱k lak turgerem kar kize ne, ‘Kutura anna mu̱nye̱n,’ lalek nonno.”

5A̱nne̱k to̱ni̱a̱ha̱ Manyi ne, “Anyik tu̱we̱ne̱t cinna kize a̱ppwa̱!”

6O̱bo̱de̱k zin enne nogo, “Ming anyakku niga tu̱we̱ne̱t ci dici oroot ku̱tu̱gu̱ ki laziyenti, a̱nne̱kku̱ wo̱ye̱ niga keet ci a̱ddi̱ki̱re̱ ko̱ ne, ‘Duca ele cunne ngatu kar bit rirek ele nyatapar ci a̱ddi̱ki̱re̱,’ kar atin keet neci kizik zoz cunno̱ng.

7“Ming anyak wo̱ye̱ e̱e̱ti̱ imma ngatinno̱ng du̱ca̱i̱t ci ebek eeza ciginnek. A̱nne̱k wo̱ye̱ enne du̱ca̱i̱t ne ming okko enne a̱kku̱ zara, ‘I̱jja̱ ngatu i̱yo̱ko̱ kar a̱vvu̱ lo̱o̱ta̱ kadakto’? 8Iróng wo̱ye̱ enne arrak a̱nne̱k ne, ‘Diman arrak da̱i̱ne̱t cigannik, diman kaal cigunnek ju̱rru̱m kar rewa annit ngen anna kadakce kar kuude; kar vu̱rrta̱ adakce wo̱ye̱ i̱nna̱’? 9Aanyik atin enne du̱ca̱i̱t zany eci u̱tu̱gu̱ enne gi̱i̱ bali a̱du̱wa̱k enne nonno ku̱tu̱gu̱ la̱du̱n? 10Kar niga bu̱k, ming u̱tu̱gu̱zzu̱ niga kaal cik ka̱du̱wa̱kku̱ng anna kar u̱tu̱gu̱z, a̱nnu̱ zin niga ne, ‘Iróng wo̱ye̱ naga du̱cca̱ha̱ kaganona ki inatinet; eci ku̱tu̱gu̱zza̱ naga li̱ngli̱ngo̱n ci gon cinna̱ng la̱du̱n.’”

Angaru Ye̱su̱ ol omoto cik anyak dhovo

11Baling okko enne Jerusalema, owo Ye̱su̱ lokore ci engerone looci ci Samariya#17:11 Samariya: E̱e̱ggi̱n ji̱ji̱ti̱k olli Samariyo uggak Ya̱u̱d, ovvo uggak a̱vvu̱ ngati ol u̱gge̱. Ala nege Ta̱mu̱ta̱dde̱n go̱o̱le̱ ci aave do̱ ngati ol cik e̱e̱ggi̱n Ya̱u̱d biye ci een zara Gerizim. Ikeb2 Alaat 17:27-40; Jon 4:1-42. ki ci Ga̱li̱li̱. 12Baling okko enne o̱rge̱ emani, i̱vi̱ta̱ zin ol cik een omoto anyak dhovo u̱ru̱mto̱ ki nonno. Ibilet zin nege reena 13kar kutuwet nonno muluwe ci a̱ppwe̱, “Ye̱su̱, Ddi̱ki̱ryo̱i̱t, eelawet agit bai!”

14Baling icin enne nogo, ize zin ne, “Oto, i̱ye̱lte̱k e̱le̱tti̱ cuggo̱k ol wak wawaco.” Baling ovvo nege owo, icinnet abarik i̱zi̱ze̱c e̱le̱tti̱ cigge̱k, i̱zzi̱ dhovo ne dakdak.

15Baling icin e̱e̱ti̱ co̱de̱ ngatinne̱ng i̱zzi̱ dhovo eliye cinne to, obodak zin enne Ye̱su̱, kar kinnat Ta̱mu̱ta̱dde̱n muluwe ci a̱ppwe̱. 16U̱ju̱ke̱k zin enne ele cinne zo̱o̱ cik Ye̱su̱ kar kaanyik nonno zany, een enne e̱e̱t ci Samariyo.

17I̱jji̱nno̱ zin Ye̱su̱, “Ngen ol do̱o̱k wak e̱e̱ggi̱n omoto kubunnta e̱le̱tti̱? I̱go̱k zin ol torkoc? 18I̱llo̱i̱ e̱e̱ti̱ imma ci oboda ki̱ki̱ya̱ kaanyik Ta̱mu̱ta̱dde̱n zany ize i̱do̱ngo̱je̱ni̱t cu do̱ niko?” 19Izek zin enne nonno ne, “Tinga je̱e̱na̱ bito; ubunna i̱nna̱, idimani i̱nne̱t tu̱we̱ne̱t cunne.”

Gool ci a̱kku̱nne̱ ba̱a̱li̱ne̱t ci Ta̱mu̱ta̱dde̱no̱

(Ma̱te̱yo̱ 24:23-28,37-41)

20Imma i̱i̱te̱n imma i̱jji̱nne̱t ol wak een Varacis Ye̱su̱ zoz ci okko atin ba̱a̱li̱ne̱t ci Ta̱mu̱ta̱dde̱no̱ a̱kku̱, abariz zin Ye̱su̱, “Iróng ba̱a̱li̱ne̱t ci Ta̱mu̱ta̱dde̱no̱ a̱kku̱ ngati acinnu niga idic, 21icima ovvo atin ol azi ne, ‘Icu ba̱a̱li̱ne̱t ci Ta̱mu̱ta̱dde̱no̱,’ eci ba̱a̱li̱ne̱t ci Ta̱mu̱ta̱dde̱no̱ aave ngatinno̱ng.”

22Izek zin enne nuyak ciginnek ne, “A̱kku̱ i̱i̱te̱n imma ci orongnyu niga kar icinnet Ngerrti E̱e̱to̱, ma̱i̱je̱ iróng atin acinnu i̱i̱te̱n neci. 23A̱du̱wa̱kku̱ng atin ol, ‘Nonno ici, icima nonno ngatu.’ Ma niga a̱vi̱ryu̱ vu̱rrte̱ zoz cinne̱ng. 24Eci Ngerrti E̱e̱to̱ i̱i̱te̱ne̱ cinne ogon atin enne kiwagon borowoci, ci abadi katalany ta̱mu̱-kenga do̱o̱k. 25Ma̱i̱je̱ arrak enne apirna kaale cik meelek kar kutubure bu̱u̱le̱ cu.

26“Ki baling ogone kaala i̱i̱nya̱we̱ balik Nowa#17:26 Nowa: Aave ba̱li̱ye̱ enne i̱i̱te̱ne̱ bali ogone ol mu̱nye̱n cik meelek ke̱. Utu zin Ta̱mu̱ta̱dde̱n nonno kar kidiman i̱bo̱ ci a̱ddi̱ki̱re̱ kar abunna ming a̱ti̱ri̱z enne tatug cinne ki elegje u̱gge̱. Idita zin Ta̱mu̱ta̱dde̱n elegje u̱gge̱ ki ol tawane ci a̱ppwa̱ oroot. IkebKananet 5-9. ke̱, ogone atin bo̱do̱k kaala niko i̱i̱nya̱we̱ cik Ngerrti E̱e̱to̱. 27Imma i̱i̱nya̱we̱ ne̱ke̱ ba̱li̱ye̱ adakce ol, aude, a̱ti̱k ngaai zee rok i̱i̱te̱n ci i̱zo̱we̱ Nowa i̱bo̱. Kar zin tawani ki̱ki̱ya̱ kidita nogo do̱o̱k.

28“Ogon zin bo̱do̱k niko i̱i̱nya̱we̱ cik Loti. Adakce ol, aude, atala kar utene kaal, arire kar bo̱do̱k keteehenyco. 29Ma̱i̱je̱ i̱i̱te̱ne̱ bali ungnek Loti orog ci een Sodom lo̱o̱c, kar ki̱ta̱k gwa̱a̱ ki gi̱i̱ ci aanyik gwo̱o̱ katalany oroot ci a̱kku̱ meer ta̱mu̱-kenga rok lo̱o̱c kar kidita nogo do̱o̱k.

30“Ogon zin atin looci bu̱k niko i̱i̱te̱ne̱ ci okko Ngerrti E̱e̱to̱ i̱ye̱la̱i̱. 31Imma zin i̱i̱te̱ne̱ neci, iróng e̱e̱ti̱ ci aave loruhuna ta̱dde̱na̱#17:31 Loruhun ta̱dde̱n: Imma bali i̱i̱nya̱ ne̱ke̱ adiman ol ce̱e̱zi̱ cigge̱k cik anyak loruhun ci ogon ki le̱be̱le̱ ta̱dde̱na̱ kar gon nege koot ta̱dde̱na̱ loruhuna kar ku̱tu̱gu̱zzo̱ kaal cigge̱k. ki i̱jjó̱ ciginnek ca̱a̱to̱, kuluce kuk ngatinne̱ng. Ogon zin bo̱do̱k niko, i̱llo̱i̱ e̱e̱t imma ci aave manato a̱mi̱re̱ kuwek gi̱i̱ imma ce̱e̱za̱. 32A̱a̱dda̱ da̱ ngaa bali Loti!#17:32 Ngaa bali Loti: Ikeb zoz ci obod ki nonno buwe ci Kananto 19:23-26. 33Ming atiman e̱e̱ti̱ orong kuzute ruget cinne, okoloz atin ruget cinne, kar ming okoloz e̱e̱ti̱ ruget cinne, amuda atin ruget neci. 34Ka̱du̱wa̱kku̱ng anna i̱ge̱ta̱, imma ba̱a̱li̱n neci, ming adunge ol cik een ram kwe̱e̱ne̱ co̱de̱, odongnyai co̱de̱ imma co̱de̱ ungnonik lo̱o̱c. 35-36Ming erekce ngaai cik een ram rabaza, odongnyai co̱de̱, okko co̱de̱ ungnonik lo̱o̱c.”

37I̱jji̱nne̱t zin nuyaha Ye̱su̱, “Okko zoz necu akane nga, Manyi?”

O̱bo̱de̱k zin enne nogo a̱nne̱k ne, “Ngati aavtte e̱le̱tti̱ cik ol cik a̱da̱i̱to̱, ovvo atin u̱du̱va̱na̱ alute nginati.”

Currently Selected:

Lu̱ka̱ 17: tex

Highlight

Copy