Lu̱ka̱ 16

Tubzenet ci e̱e̱t wa a̱gga̱m kaal zinine ci gerze

1U̱du̱wa̱k Ye̱su̱ nuyak waginnek tubzenet cu: “Anyak ba̱li̱ye̱ e̱e̱t ci een jaitot ci anyak ddi̱ki̱ryo̱i̱t ci a̱li̱ngli̱ng ki nonno ci aminye kaal ciginnek. 2Utu zin i̱to̱i̱ti̱ ddi̱ki̱ryo̱i̱t kar ki̱jji̱n nonno, ‘Nya ci kazii anna zo̱ze̱ cunne ko̱? Teher zin kaal cik a̱li̱ngli̱nge̱ i̱nna̱ do̱o̱k, eci iróng atin i̱nna̱ e̱e̱ni̱ ddi̱ki̱ryo̱i̱t bo̱do̱k.’

3“A̱nne̱k ddi̱ki̱ryo̱i̱ti̱ ele cinne ne, ‘Ku̱tu̱gu̱ i̱yo̱ko̱ anna nya? Okko i̱to̱i̱ti̱ okkoye li̱ngli̱ngo̱n ngatinanni. Iróng anna kuuli e̱e̱vi̱ne̱t, adaka bo̱do̱k a̱li̱ya̱ni̱ ming kokko kala ol. 4Ka̱gga̱ atin anna gi̱i̱ ci kogonni kar ming kottowe li̱ngli̱ngo̱ne̱ cinanni ko̱, ovvo atin ol a̱gga̱ma̱na̱ ce̱e̱zi̱nne̱ cigge̱k.’

5“Utu zin enne ol wak anyak ngabolet cik i̱to̱kta̱k ko̱ e̱co̱de̱ e̱co̱de̱. I̱jji̱n enne e̱e̱t wa een oo, ‘Anyai i̱nna̱ ngabolet izong?’

6“O̱bo̱de̱k zin e̱e̱ti̱ neci nonno, ‘Kanyai anna coviyanya o̱bo̱n co̱de̱ cik maal ci i̱ngi̱ro̱u̱.’

“U̱du̱wa̱k zin ddi̱ki̱ryo̱i̱ti̱ nonno, ‘Dima waraga cunne, a̱vvu̱ lo̱o̱ta̱ ataman, kar teherik waraga necu coviyanya moten tu̱r.’

7“I̱jji̱n zin bo̱do̱k ddi̱ki̱ryo̱i̱ti̱ nga̱bo̱le̱ni̱t imma dee izek ne, ‘Anyai i̱nna̱ ngabolet izong?’

“O̱bo̱de̱k zin enne, ‘Ka̱ru̱we̱k atin anna i̱to̱i̱t labi cuwalit i̱bbo̱ng co̱de̱ (1,000).’

“U̱du̱wa̱k zin enne nonno, ‘Dima waraga cunne nga̱bo̱le̱tu̱ kar teherik cuwalit cik labinu obet tu̱rge̱ (800).’

8“Innat zin i̱to̱i̱ti̱ ddi̱ki̱ryo̱i̱t ci a̱li̱ngli̱ng ki nonno ko̱ eci enne u̱tu̱gu̱ kaal genyize cinne. Eci ol cik lo̱o̱c cu anyak genyiz ci ogon nege ngati owowone ki ol u̱gge̱, kommog ol cik abak zo̱ze̱ ci een de̱de̱. 9Ka̱du̱wa̱kku̱ng anna i̱ge̱ta̱, i̱li̱ngli̱ngte̱ i̱to̱kze̱t ci lo̱o̱tu̱ abunna ming amudannu gonogget, ming okko i̱to̱kze̱t neci edeccai, kar atin ol kelemtaung i̱ge̱ta̱ baize ci abakku udut.

10“Ming azunne e̱e̱ti̱ imma li̱ngli̱ngo̱n cinne kaale cik kidik, anyonik atin nonno li̱ngli̱ngo̱n ci a̱ppwe̱, ming iróng e̱e̱ti̱ imma azunne kaal cikidik iróng atin enne azunne kaal cik meelek bu̱k. 11Ming iróng niga a̱gga̱yyu̱ gga̱mi̱ne̱t i̱to̱kze̱t ci lo̱o̱tu̱ ngatu, ngene atin ci a̱a̱nyu̱ng a̱gga̱mi̱t i̱to̱kze̱t wa een de̱de̱? 12Ming iróng niga ngen a̱gga̱mnyu̱ kaal cik a̱a̱nyu̱ng e̱e̱ti̱ imma ko̱ ju̱rru̱m, ngene ci wo̱ye̱ a̱a̱nyu̱ng kaal kize cunno̱ng?

13“I̱llo̱i̱ du̱ca̱i̱t imma ci a̱li̱ngli̱nge̱k ddi̱ki̱ryyo̱k rama. A̱li̱ngli̱ng atin enne ngati ddi̱ki̱ryo̱i̱t co̱de̱ kar kamaroi co̱de̱, icima a̱li̱ngli̱nge̱k enne co̱de̱ kar kutubur co̱de̱. Iróng wo̱ye̱ niga a̱li̱ngli̱nge̱kku̱ Ta̱mu̱ta̱dde̱n ki o̱ro̱bi̱ya̱.”

Ma odongnyu e̱le̱tti̱ ciggo̱k

(Ma̱te̱yo̱ 11:12-13; 5:31-32; Marko 10:11-12)

14Baling iziyyet ol cik een Varacis wak gon irez o̱ro̱bi̱ya̱ oroot ko̱ zoz neci, kar zin nege kangarunyanit ngu̱mti̱ ngati Ye̱su̱. 15Kar zin enne kizek nogo ne, “Orongnyu niga i̱ye̱lta̱ e̱le̱tti̱ cuggo̱k izet ol cik abunnanu eberene cik ollu, ma̱i̱je̱ Ta̱mu̱ta̱dde̱n a̱gga̱ zi̱nze̱tti̱ ciggo̱k. Imma kaala cik irez ol cik lo̱o̱tu̱ oroot, e̱e̱ggi̱n kaal cik gerzek ngu̱me̱ ci Ta̱mu̱ta̱dde̱no̱.”

16A̱nne̱k zin bo̱do̱k Ye̱su̱ nogo ne, “Uwakte lo̱ti̱nno̱wa̱ cik Musesi ki zoz ci a̱ri̱tto̱u̱ zee rok Jon. Kar zin vu̱rrta̱ i̱i̱te̱ne̱ neci, uwaktozik zin ol kaviyaha cik abunna obod ki ba̱a̱li̱ne̱t ci Ta̱mu̱ta̱dde̱no̱, kar ol do̱o̱k kadangtek e̱le̱tti̱ cigge̱k ba̱a̱li̱ne̱t cinne. 17Obokce wo̱ye̱ ngati ta̱mu̱-kengo ki lo̱o̱c ming a̱zze̱ ne dakdak, i̱llo̱i̱ zin atin gi̱i̱ imma cidici ci a̱zze̱ lo̱ti̱nno̱we̱ cik Musesi.

18“Ming oog e̱e̱ti̱ imma ngaa cinne#16:18 Oog e̱e̱ti̱ imma ngaa cinne: Ozoz Ye̱su̱ zoz ci obod ki rucenet ki ooginnet buwanine ciko:Ma̱te̱yo̱ 5:31-32; Ma̱te̱yo̱ 19:3-9; Marko 10:1-12. Ozoz Pa̱u̱lo̱ zoz ci obod ki rucenet ki ooginnet buwe ci1 Ko̱ri̱nto̱ 7:1-40. kar zin kuruca ngaa imma, a̱wu̱l enne ngaa cinne, kar bo̱do̱k e̱e̱ti̱ ci a̱ti̱k ngaa ci oog mac cinne, a̱wu̱l enne mac cinne.

E̱e̱t ci een i̱to̱i̱t ki Lazaru

19“Anyak da̱ ba̱li̱ye̱ e̱e̱t imma ci een i̱to̱i̱t aburuc ru̱u̱m ci een lo̱ddi̱ng adak o̱ro̱bi̱ya̱ cik meelek, abak enne odohize baiz ci e̱e̱t ci een bo̱to̱ro̱c. 20Okko arane cinne aave e̱e̱ti̱ ci amati ala ol o̱ro̱bi̱ya̱ een zara Lazaru, een da̱ ele cinne do̱o̱k ngoddocet. 21Orong enne kadak da̱i̱ne̱t ne̱k i̱i̱na̱ ngati e̱e̱t ci een i̱to̱i̱t ko̱. A̱vvu̱ gon rok urzi ovvo alakad ngoddocet ciginnek.

22“I̱ki̱ya̱ zin i̱i̱te̱ni̱ imma, a̱da̱k zin e̱e̱ti̱ ci gon alaye ko̱ kar zin anjilonya cik Ta̱mu̱ta̱dde̱no̱ kodongit nonno koot kaarttek abanyit ci Aburahami ta̱mu̱-kenga. A̱da̱k zin bo̱do̱k e̱e̱ti̱ wa bali een i̱to̱i̱t ko̱, a̱da̱ye̱k zin ol nonno lo̱o̱k. 23Kar ngati atuzene ol gwo̱o̱ye̱ ci apadpadi udut ko̱, ngati amuda enne gi̱de̱ne̱t, egelem zin enne ta̱dde̱n kar kicin Aburaham meer reena, ki Lazaru ming aave abanyce cinne. 24Utu zin enne nonno, ‘Baba, Aburaham, eelawa annita kar i̱tto̱n Lazaru ku̱du̱nye̱k va̱lla̱i̱t maam kar ki̱ki̱ya̱ kalalizan a̱ha̱t cinanni, eci anna kutuze gwo̱o̱ye̱ cu!’

25“Ma̱i̱je̱ Aburahami abarizek nonno, ‘Ngeranni, i̱no̱n da̱ ba̱li̱ye̱ baize cunne uruba i̱nna̱ kaal cik abunna, imma Lazaru uruba kaal cik gerzek, ma̱i̱je̱ i̱yo̱ko̱ ubunna enne ngatu kar i̱nna̱ a̱vvu̱ ngati apirnane. 26Kar bo̱do̱k kaale ne̱ko̱ do̱o̱k, anyak gi̱i̱ ci a̱ddi̱ki̱re̱ aronik ci engeryet agit ki i̱nne̱ta̱, kar ol cik orong ovvo ngatu rok i̱nne̱ta̱, iróng aruba gool, icima i̱nne̱t ci a̱kku̱nni̱ meer nginati rok agit ngatu.’

27“Abariz zin enne, ‘Baba Aburaham, kilaleki i̱nne̱ta̱, i̱tto̱n Lazaru kuk ce̱e̱ze̱ ci baba, 28eci anna kanyai gotonogga tu̱r. Anyik nonno ku̱du̱wa̱k nogo gerza nege bo̱do̱k ming a̱vvu̱ nginti apirnane ol ko̱.’

29“Abariz zin bo̱do̱k Aburahami, ‘Anyak nege nginati Muses ki a̱ri̱tto̱k; anyik nogo kiziyet zoz cinne̱ng.’

30“Azi enne ne, ‘Iróng een niko, baba Aburaham! Abarik ming okko e̱e̱ti̱ imma ngati daizo ngatu rok nogo, ovvo atin nege urta ba̱ci̱nno̱k cigge̱k.’

31“A̱nne̱k zin enne nonno ne, ‘Ming iróng nege aziye zoz ci Musesi ki a̱ri̱tto̱k, iróng atin nege elemi zoz ci e̱e̱t imma ci ingazi daiza.’”

Currently Selected:

Lu̱ka̱ 16: tex

Highlight

Copy