Lu̱ka̱ 15

Tubzenet ci a̱zze̱t ci a̱zze̱

(Ma̱te̱yo̱ 18:12-14)

1Imma i̱i̱te̱n imma u̱lu̱tte̱ ol wak a̱gga̱ma̱ ol mucuru ki olli mu̱nye̱nu̱ do̱o̱k, kar kuburuktek Ye̱su̱ orgen. 2Ma̱i̱je̱ olli Varacisi ki de̱me̱zzo̱k wak lo̱ti̱nno̱u̱ utuburet nong, izeto ne, “Awa e̱e̱ti̱ cu olli mu̱nye̱nu̱ kar enne kadakto ki nogo.”

3U̱du̱wa̱k zin Ye̱su̱ nogo tubzenet cu: 4“Ming wo̱ye̱ anyak e̱e̱ti̱ imma ngatinno̱ng a̱zza̱ o̱bo̱n co̱de̱ kar zin co̱de̱ ki̱zzi̱ zara. Iróng wo̱ye̱ enne ungnek gonoggi bo̱ngi̱t kar zin kuk korong neci o̱de̱ ke̱ zee kuruba? 5Kar ming okko enne aruba a̱zze̱t neci, odongek i̱nya̱ talninta, 6kar kuk ce̱e̱za̱. Kar enne kutu gonoggi ki ol cik locaryak nga̱to̱de̱ kar kize ne, ‘Katalto ki annita; kuruba anna a̱zze̱t cinanni bali a̱zze̱ ke̱.’ 7Ka̱du̱wa̱kku̱ng zin ogon atin talninet niko ta̱mu̱-kenga ngati e̱e̱t co̱de̱ mu̱nye̱nu̱ ming utura mu̱nye̱n ciginnek, ommog ol cik e̱e̱ggi̱n moten torkoc ki torkoc cik abunna iróng anyak mu̱nye̱n.

Tubzenet ci o̱ro̱bi̱ya̱c ci a̱zze̱

8“Icima ming anyak ngaa o̱ro̱bi̱ya̱ cik e̱e̱ggi̱n ziik omoto kar co̱de̱ ki̱zzi̱. Iróng wo̱ye̱ enne atukul urez, a̱vi̱l ce̱e̱z kar korongo idic bak okko enne aruba? 9Kar ming okko enne aruba, okko enne awa gonoggi ki olli locaryak nga̱to̱de̱ kar kize ne, ‘Katalto ki annita; kuruba anna o̱ro̱bi̱ya̱c cinanni bali a̱zze̱ ke̱.’ 10Imma go̱o̱le̱ necu dee, ka̱du̱wa̱kku̱ng anna i̱ge̱ta̱, anyak talninet ngati aavtte anjilonya cik Ta̱mu̱ta̱dde̱no̱ ming utura e̱e̱ti̱ co̱de̱ mu̱nye̱n ciginnek.”

Tubzenet ci lo̱gu̱t ci a̱zze̱

11Ngen Ye̱su̱ ozoz dee: “Anyak e̱e̱t imma ba̱li̱ye̱ ci anyak logoz rama. 12A̱nne̱k zin ngerinne wa dici baatinne ne, ‘Baba, inya kaal cik atin kokko anna karagizi kaale cigunnek ko̱ i̱yo̱ko̱ niko.’ Engerek zin enne kaal do̱o̱k logoz ciginnek.

13“Ataman niko, uluta ngerinne wa dici ko̱ kaal cik anyak enne do̱o̱k, kar kuk lo̱o̱ce̱ emani reena kar kimice o̱ro̱bi̱ya̱ ciginnek. 14Baling edeca enne o̱ro̱bi̱ya̱ do̱o̱k, adak da̱ lo̱o̱c neci magiz ci a̱ddi̱ki̱re̱, atamat zin enne. 15Uk zin orong li̱ngli̱ngo̱n ngati e̱e̱t ci lo̱o̱c neci, kar e̱e̱ti̱ neci ki̱tto̱n nonno kuk kebek batakwa. 16Orong enne kibbizitan keng cinne da̱i̱nte̱ cik adak batakwana ko̱, abarik ngen zin da̱ e̱e̱ti̱ imma kanyik nonno gi̱i̱ imma.

17“Baling uk enne i̱no̱n do̱, ize enne ne, ‘E̱e̱ggi̱n du̱cca̱ha̱ cik a̱li̱ngli̱ng ki baba anyak da̱i̱ne̱t cik ungnek lo̱o̱c, kar ngatu anna ka̱da̱i̱ magiz! 18Kokko atin anna ka̱mi̱re̱ kokko ngati baba kar kizek nonno ne, baba, ku̱tu̱gu̱ anna mu̱nye̱n ngati ta̱mu̱-kengo ki i̱nne̱t bu̱k. 19Iróng zin anna ngen kaganona ming awuya ol kize ngerunne; tu̱gu̱ annit ki i̱yo̱ko̱ du̱ca̱i̱ti̱ co̱de̱ ci a̱li̱ngli̱ng ki i̱nne̱t ko̱.’ 20Itinga zin enne je̱e̱na̱ kar ki̱mi̱re̱ kuk ngati baatinne.

“Ma̱i̱je̱ baling ngen enne aave reena many, edenya da̱ baatinne nonno ming a̱kku̱ kar zinin cinne kibbit rezinet nonno; i̱vi̱r enne uk ngati ngerinne, a̱gga̱m nonno azzine kar kizza nonno oroot.

21“A̱nne̱k zin ngerinne nonno ne, ‘Baba, ku̱tu̱gu̱ anna mu̱nye̱n ngati ta̱mu̱-kengo ki ngatunne bu̱k. Iróng anna kaganona ming ke̱e̱ni̱ ngerunne.’

22“Ma̱i̱je̱ baatinne izek du̱cca̱k waginnek ne, ‘Itingaz ataman! Oot anyaktta ru̱u̱m ci een jor, kar kuburuc ngeranni. I̱ti̱mte̱k nonno zu̱rte̱ni̱t va̱lla̱i̱t, kar zin bo̱do̱k i̱ti̱mte̱k nonno caava zo̱o̱. 23Anyaktta mo̱o̱le̱t ci adiye kar otodongit. Kadait kwo̱o̱r kar kurugumet. 24Eci ngeranni cu a̱da̱k ba̱li̱ye̱; imma i̱yo̱ko̱ urug bo̱do̱k.’ A̱ka̱tte̱ zin nege kwo̱o̱r.

25“Imma da̱ ngerinne wa a̱ddi̱ki̱re̱ ngen aave manato mu̱u̱ra̱. Baling i̱ki̱ya̱ enne kar kojongoz ce̱e̱z, aziye lo̱ng ki rugumon. 26Utu zin enne du̱ca̱i̱t co̱de̱ kar ki̱jji̱n nonno nya ci ogone ko̱. 27O̱bo̱de̱k zin du̱ca̱i̱ti̱ nonno, a̱nne̱k ne, ‘Oboda gotonnu, kar baatunne kotodongek nonno mo̱o̱le̱t ci adiye eci oboda enne ce̱e̱z labak.’

28“Utubur zin gotoniya wa a̱ddi̱ki̱re̱ nong kar kutubur ki̱tto̱ ce̱e̱z. Kar baatinne kuk reena kuk kilalek nonno. 29Ma̱i̱je̱ enne abarizek baatinne, a̱nne̱k ne, ‘Cinno! E̱rki̱nya̱ ciko do̱o̱k ka̱li̱ngli̱ngngo̱ni̱ki̱ anna i̱nne̱ta̱ kiwagon du̱ca̱i̱ti̱, ngen i̱i̱te̱n imma anna kutubur zoz cunne. Ngen zin i̱nna̱ inya annit rok nyoon cidici kar anna kadakta ki gonogga. 30Ma̱i̱je̱ ming okko ngerunne wa egerzan kaal cigunnek ngaane cik e̱e̱ggi̱n a̱li̱ya̱k ko̱ oboda ce̱e̱z, otodongeu zin i̱nna̱ nonno mo̱o̱le̱t ci adiye!’

31“Izek zin baatinne nonno ne, ‘Ngeranni, aave i̱nna̱ odohize ki annit ngatu, kar kaala cik kanyai anna ko̱ een do̱o̱k cigunnek. 32Abarik abunna kadak naga kwo̱o̱r kar katalit, eci gotonnu icu a̱da̱k ba̱li̱ye̱ kar i̱yo̱ko̱ urug bo̱do̱k; i̱zzi̱ enne ba̱li̱ye̱ umudai zin.’”

Currently Selected:

Lu̱ka̱ 15: tex

Highlight

Copy