Jon 9

Angaru Ye̱su̱ e̱e̱t ci da̱ a̱rri̱ta̱i̱ kize ru̱be̱n

1Ma̱i̱je̱ da̱ i̱i̱te̱n imma owo Ye̱su̱ goola, kar zin kicin e̱e̱t ci da̱ a̱rri̱ta̱i̱ kize ru̱be̱n. 2I̱jji̱nne̱t nuyaha nonno, izettek ne, “De̱me̱zo̱i̱t, a̱rri̱ta̱i̱ dim da̱ e̱e̱ti̱ necu kize ru̱be̱n nya, ngene ci abaci, anyak enne mu̱nye̱n yo icima i̱yo̱ko̱ baatinne ki yaatinne da̱?”

3O̱bo̱de̱k zin Ye̱su̱ nogo, izek ne “Iróng een mu̱nye̱n ciginnek icima mu̱nye̱n cik baatinne ki cik yaatinne cik anyik e̱e̱t necu ki̱ti̱rra̱i̱ kize ru̱be̱n, abarik orong Ta̱mu̱ta̱dde̱n li̱ngli̱ngo̱n cinne ki̱ye̱la̱i̱ baize ci e̱e̱t ci ru̱be̱ni̱ ko̱. 4Abunna ka̱li̱ngli̱ng li̱ngli̱ngo̱n ci e̱e̱t bali i̱tto̱na̱na̱ ke̱ ming een looci wazin ko̱, ming okko ba̱a̱li̱ni̱ a̱kku̱, iróng e̱e̱ti̱ imma ngen a̱li̱ngli̱ngi̱. 5Ming ngen kaave lo̱o̱ta̱ ko̱, ke̱e̱ni̱ urez ci ka̱tu̱ku̱li̱ lo̱o̱c kiwagon gwa̱a̱.”

6Baling u̱du̱wa̱ Ye̱su̱ zoz necu, kar zin kuturek amut lo̱o̱c, ongonya todowac imma amute ne̱ke̱ kar zin kuṯucanek ebere cik e̱e̱t neci ru̱be̱ni̱ ke̱. 7Kar zin kizek nonno ne, “Bit kar tuny ebere nyatapare wa een Siloam.” (Azi ungec ci zoz necu ne, i̱tto̱na̱i̱). Uk zin e̱e̱ti̱ neci utuny ebere kar zin koboda orog ngati icinoi la̱du̱n.

8I̱jji̱nne̱t zin ol wak locaryak ki ol balik icinnet nonno ming een ru̱be̱n kar kala ol o̱ro̱bi̱ya̱, izettek ne, “Iróng e̱e̱ti̱ necu een e̱e̱t wagon aave lo̱o̱ta̱ ru̱be̱ni̱ ala ol kaal ko̱?” 9Azi ol uggak ne, nonno.

Ovvo uggak azi ne, “I̱llo̱i̱, a̱du̱wo̱ enne ki nonno.”

Ma̱i̱je̱ abarik e̱e̱ti̱ neci eliya azi ne, “Ke̱e̱ni̱ anna e̱e̱t neci.”

10I̱jji̱nne̱t zin nege nonno, izettek ne, “O̱o̱ye̱ ebere cigunnek ku̱?”

11O̱bo̱de̱k zin enne nogo, a̱nne̱k ne, “Ongony e̱e̱ti̱ ci een zara Ye̱su̱ todowac kar zin kurubek ebere cigannik, kar kizeya ne bit tuny ebere nyatapare wa een Siloam. Kuwa zin anna rok nyatapar neci bak kunyi ebere, kar zin kicine niko.”

12I̱jji̱nne̱t bo̱do̱k nege nonno, izettek ne, “Aave i̱yo̱ko̱ e̱e̱ti̱ neci nga?”

O̱bo̱de̱k enne nogo, izek ne, “Iróng anna ka̱gga̱ nginti aave.”

Olli Varacisi ki e̱e̱t ci ru̱be̱ni̱

13Anyakttak zin ol e̱e̱t bali ru̱be̱ni̱ ke̱ ol cik e̱e̱ggi̱n Varacis. 14Een zin da̱ wazini bali ongonye Ye̱su̱ todowac kar zin ku̱bu̱le̱k ebere cik e̱e̱t neci ru̱be̱ni̱ ke̱, I̱i̱te̱ne̱ wa Yu̱bze̱nto̱. 15I̱jji̱nne̱t zin ol cik e̱e̱ggi̱n Varacis ko̱ nonno, izettek ne, o̱o̱ye̱ dim da̱ i̱nne̱t ebere ku̱? Obodeke zin enne nogo izek ne, “Arika e̱e̱ti̱ neci todowac ebere, kar zin kutuny ebere niko kar zin kicine.”

16Izeto ol ne̱k e̱e̱ggi̱n Varacis uggak ne, “Iróng e̱e̱ti̱ ci a̱ti̱ri̱z ol ko̱ a̱kku̱ Ta̱mu̱ta̱dde̱na̱, ma̱rri̱t enne ming iróng azunne I̱i̱te̱ne̱ wa Yu̱bze̱nto̱.”

Ma̱i̱je̱ uggak i̱jji̱nto̱ izeto ne, “Ogon wo̱ye̱ e̱e̱ti̱ ci mu̱nye̱nu̱ kaal cik a̱vu̱la̱ ki ne̱ko̱ ku̱?” Engertto ol ne̱k e̱e̱ggi̱n Varacis ke̱ orgena.

17Imma bali vu̱rrta̱, i̱mi̱ro̱zi̱k bo̱do̱k e̱e̱t wanai ru̱be̱ni̱ ke̱, kar zin kizettek ne, “Anyak zoz ci ozozi ci obod ki e̱e̱t ci oo ebere cigunnek ko̱, azi i̱nna̱ ne zo̱ze̱ cinne?” O̱bo̱de̱k zin e̱e̱ti̱ neci nogo, izek ne, “Een e̱e̱ti̱ neci a̱ri̱to̱i̱t ci zoz ci Ta̱mu̱ta̱dde̱no̱.”

18Iróng zin ol cik e̱e̱ggi̱n Ya̱u̱d elemi zoz ci azi ne een e̱e̱ti̱ necu ru̱be̱n ti̱ra̱nta̱ kar i̱yo̱ko̱ kicinne. I̱tto̱nni̱t zin zoz rok baatinne ki yaatinne abunna ming a̱vvu̱na̱k nogo. 19Baling i̱vi̱ta̱ ol ne̱ke̱, i̱jji̱nne̱t zin nogo, izettek ne, “Een icu ngerunno̱ng? A̱rri̱ta̱i̱ da̱ kize ru̱be̱n? Kar zin i̱yo̱ko̱ enne kicino ku̱?”

20O̱bo̱dde̱k zin baatinne ki yaatinne nogo, izettek ne, “Ka̱gga̱yya̱ niko een enne do̱le̱c cinna̱ng bali a̱rri̱ta̱i̱ kize ru̱be̱n. 21Ma̱i̱je̱ i̱yo̱ko̱ icinne, iróng zin ka̱gga̱yya̱ e̱e̱t ci oo ebere ciginnek. I̱jji̱nne̱t nonno, i̱ddi̱ki̱r ri̱t enne, anyik kozoz utuge cinne.” 22Ozoz ciko baatinne ki yaatinne niko eci nege o̱ngo̱o̱le̱ lo̱ddi̱ki̱re̱ cik Ya̱u̱do̱ zo̱ze̱ ci azi ne, ming elema e̱e̱ti̱ imma zoz ci Ye̱su̱ een enne Ki̱ri̱sto̱, ottoit ma anyikku ki̱tto̱zzo̱ Ce̱e̱z wa Lawinto. 23Zoz zin ci aziwe baatinne ki yaatinne ne, “I̱ddi̱ki̱r ri̱t enne, i̱jji̱nne̱t nonno.”

24U̱tu̱ya̱ bo̱do̱k lak ram e̱e̱t bali a̱rri̱ta̱i̱ kize ru̱be̱n ke̱, kar zin kizeto ne, “Anyik Ta̱mu̱ta̱dde̱n zany, ka̱gga̱yya̱ een e̱e̱ti̱ ci oo ebere cigunnek ko̱ een e̱e̱t ci mu̱nye̱nu̱.”

25O̱bo̱de̱k zin enne nogo, a̱nne̱k ne, “Ming anyak enne mu̱nye̱n icima iróng anyak, iróng anna ka̱gga̱. Imma i̱yo̱ko̱ ka̱gga̱ gi̱i̱ co̱de̱, ke̱e̱ni̱ ba̱li̱ye̱ ru̱be̱n, i̱yo̱ko̱ kicinne.”

26I̱jji̱nne̱t zin bo̱do̱k nege nonno izettek ne, “Ogoneki dim da̱ e̱e̱ti̱ neci i̱nne̱t nya? Oo dim da̱ enne ebere cigunnek ku̱?”

27O̱bo̱de̱k enne nogo, izek ne, “Ku̱du̱wa̱u̱ng wanai anna i̱ge̱t zoz neci, iróng zin bu̱k ngen aziknnang. Orongnyu bo̱do̱k iziyyet nya? Orong ol uggak ngatinno̱ng kizeto nuyak cik e̱e̱t neci?”

28Odomit zin nege nonno izettek ne, “I̱nne̱t abarik ci e̱e̱ni̱ nuyait ci e̱e̱t neci! Ma̱i̱je̱ naga ke̱e̱ggi̱nna̱ nuyak cik Musesi! 29Ka̱gga̱yya̱ niko ozozik ba̱li̱ye̱ Ta̱mu̱ta̱dde̱n Muses, imma e̱e̱ti̱ cu, iróng ka̱gga̱yya̱ nginti a̱kku̱nne̱.”

30O̱bo̱de̱k zin e̱e̱ti̱ neci nogo, izek ne, “Aninna zoz cunno̱ng oroot! Ooya e̱e̱ti̱ neci annit ebere kicinte, kar zin niga izet ne iróng a̱gga̱yyu̱ rok nginti a̱kku̱nne̱ e̱e̱ti̱ necu? 31Ka̱gga̱ ri̱t naga niko iróng Ta̱mu̱ta̱dde̱n aziye zoz ci e̱e̱t ci mu̱nye̱nu̱. Aziye enne zoz ci e̱e̱t ci ala nonno kar bo̱do̱k ku̱tu̱gu̱ kaal cik orong Ta̱mu̱ta̱dde̱n nonno ku̱tu̱gu̱. 32Ngen e̱e̱ti̱ imma kizik zoz ci oowe e̱e̱ti̱ imma ebere cik e̱e̱t ci a̱rri̱ta̱i̱ kize ru̱be̱n ko̱. 33Ming iróng e̱e̱ti̱ necu a̱kku̱ ngati Ta̱mu̱ta̱dde̱no̱, iróng wo̱ye̱ da̱ ogon gi̱i̱ imma.”

34O̱bo̱dde̱k zin nonno, a̱nne̱k ne, “A̱rri̱ta̱i̱ ba̱li̱ye̱ i̱nna̱ mu̱nye̱ne̱, i̱yo̱ko̱ edemezet wo̱ye̱ i̱nna̱ agita?” Kar zin kotoit nonno kuk reena Ce̱e̱z wa Lawinto.

Ru̱be̱n e̱e̱ti̱ ci iróng a̱gga̱ Ta̱mu̱ta̱dde̱n

35Baling izik Ye̱su̱ zoz ci otowe nege nonno re̱e̱nu̱n, uk uruba e̱e̱t neci, izek zin ne, “A̱tu̱ i̱nna̱ Ngerrti E̱e̱to̱?”

36I̱jji̱n zin e̱e̱ti̱ neci nonno izek ne, “Een e̱e̱ti̱ neci ngene ddi̱ki̱ryo̱i̱t? Du̱wa̱ka̱n abunna ka̱tu̱ nonno.”

37Izek Ye̱su̱ nonno ne, “Icinnu nonno, nonno ele nenen ci ozoziki i̱nne̱t ko̱.”

38Izek zin e̱e̱ti̱ neci Ye̱su̱ ne, “Manyi, ka̱tu̱we̱ anna.” Akatek zin u̱zu̱ngtti̱ lo̱o̱c kar zin ki̱di̱ngdi̱nga̱n Ye̱su̱.

39Ize zin Ye̱su̱ ne, “Ka̱kku̱ni̱ la̱du̱n anna lo̱o̱c kar ki̱ki̱ya̱ kapak zoz, kanyik ol wak ru̱be̱ni̱k kicinte, ovvo ol wak acine e̱e̱ggi̱n ru̱be̱ne̱.”

40Iziyyet da̱ ol uggak wak e̱e̱ggi̱n Varacis Ye̱su̱ ming a̱du̱wa̱ zoz neci kar zin ki̱jji̱nne̱t kizettek ne, “Ke̱e̱ggi̱nna̱ naga bu̱k ru̱be̱ne̱?”

41O̱bo̱de̱k Ye̱su̱ nogo, a̱nne̱k ne, “Ma wo̱ye̱ ming e̱e̱ggi̱nnu̱ ru̱be̱ne̱, iróng anyakku ba̱ci̱ ci mu̱nye̱nu̱. Ma̱i̱je̱ i̱yo̱ko̱ a̱nnu̱ niga ne ‘Acinennu’, emena ba̱ci̱no̱wa̱ cuggo̱k mu̱nye̱nu̱ irahek ngatinno̱ng.”

Currently Selected:

Jon 9: tex

Highlight

Copy