Jon 10

Een Ye̱su̱ Tuwayoit ci ol cik diirik

1A̱nne̱k zin Ye̱su̱ nogo ne, “Ka̱du̱wa̱kku̱ng zoz wa een de̱de̱, ming ottod e̱e̱ti̱ bo̱ngi̱t ci e̱e̱to̱ lo̱mu̱k iróng iyok arana, een e̱e̱ti̱ neci ogoryait. 2Okko e̱e̱ti̱ ci iyok arana icima ottod ilanga, een enne tuwayoit. 3Oowek e̱e̱ti̱ ci ebekce bo̱ngi̱ta̱ tuwayoit eeza, kar zin eezena kiziyet muluk cinne ming awe. Awu enne eeza ciginnek zare, bak aziye, a̱vvu̱na̱k nonno kar zin gon kuuwe geen. 4Ming okko enne okkoye geen, uwante enne arrak oowa kar zin eezena kunuwet nonno eci a̱gga̱ muluk cinne. 5Iróng wo̱ye̱ eezena ne̱ke̱ annu e̱e̱t imma, abarik a̱vi̱r reena eci iróng nege a̱gga̱ muluk ci e̱e̱t neci.” 6U̱du̱wa̱k Ye̱su̱ nogo de̱mzi̱ne̱t cu, iróng zin i̱i̱zo̱ o̱o̱tti̱ cigge̱k.

Ye̱su̱ ci een tuwayoit ci abunna

7A̱nne̱k zin Ye̱su̱ bo̱do̱k nogo ne, “Ka̱du̱wa̱kku̱ng zoz ci een de̱de̱, ke̱e̱ni̱ anna aran ci iyowe eezena. 8E̱e̱ggi̱n ol balik uuwantai o̱o̱we̱ cinanni ke̱ do̱o̱k ogoryak ki u̱gge̱ wak aama ol kaal i̱ba̱ti̱ne̱, iróng zin eezena aziye zoz cinne̱ng. 9Kogonni anna ki arani, ming iyok e̱e̱ti̱ go̱o̱le̱ cinanni, amuda ti̱ri̱ze̱ne̱t. I̱i̱zo̱ enne bo̱ngi̱t kar kiyowa kuk geen. 10A̱kku̱ gon la̱du̱n ogoryaiti ogor ki ru̱we̱ne̱t e̱e̱t ka̱da̱k kar bo̱do̱k kegerzan lo̱o̱c. Imma anna ka̱kku̱ni̱ ko̱ kanyahakung ruget wa aave udut, abunna ming anyakku ruget do̱o̱k.”

11Emena Ye̱su̱ zoza dee kar zin kize ne, “Ke̱e̱ni̱ anna tuwayoit wa kabunna. A̱da̱i̱ tuwayoiti ci abunna zo̱ze̱ ci eeza ciginnek. 12Iróng e̱e̱ti̱ ci uwaye bo̱ngi̱te̱ ci e̱e̱to̱ een manyi bo̱ngi̱t. Ming icin enne maa ci a̱kku̱nna̱k eeza, abarik a̱vi̱r kutungek eeza lo̱o̱c, kar zin maa ki̱li̱bo̱zi̱k eeza kazzan. 13A̱vi̱r e̱e̱ti̱ neci ma̱rri̱t enne ming iróng een tuwayoit, iróng enne een manyi eeza ne̱ke̱.”

14Azi zin bo̱do̱k Ye̱su̱ ne, “Ke̱e̱ni̱ anna tuwayoit ci kabunna; ka̱gga̱ anna eeza cigannik veelek, ovvo eezena cigannik a̱gga̱ya̱ annit bu̱k. 15Ki i̱yo̱ko̱ ming a̱gga̱ya̱ Baba annit ko̱, ka̱gga̱ anna bu̱k nonno. Ka̱da̱i̱ vu̱rrte̱ ci eeza cigannik. 16Kanyai eeza u̱gge̱ cik iróng e̱e̱ggi̱n cik bo̱ngi̱t cu. Korongi kanyaha nogo bu̱k bo̱ngi̱t cu. Aziye atin nege bu̱k muluk cinanni kar kurumte nga̱to̱de̱ kar bo̱do̱k kodowe tuwayoiti. 17Imma zin zo̱ze̱ necu, ireza Baba annit ma̱rri̱t ming ki̱ti̱ri̱wa̱ ele cinanni zo̱ze̱ ci eeza ciginnek, ming ka̱da̱i̱ nu̱nu̱n, kamuda atin ruget bo̱do̱k. 18I̱llo̱i̱ e̱e̱t ci okkoye ruget ngatinanni. Annit do̱ ci kanyike ele cinanni daiz. Kanyike anna ele daiz zinine cinanni. Kanyai doiz ci kanyike ele cinanni, kanyai doiz ci ka̱mi̱re̱ne̱ ele cinanni. Een zin icu zoz ci erecaneka Baba annit kar ku̱tu̱gu̱.”

19Engertto zin ol cik e̱e̱ggi̱n Ya̱u̱d zo̱ze̱ neci a̱du̱wa̱ Ye̱su̱ ko̱. 20Izeto ol cik meelek ngatinne̱ng ne, “Anyak e̱e̱ti̱ necu kuuloc ci lo̱rye̱nto̱, kar bo̱do̱k kadak ngamoni. Ma bai aziknnu zoz cinne ke̱.”

21Ovvo uggak azi ne, “Iróng e̱e̱ti̱ ci anyak kuuloc ozoz ki i̱yo̱ko̱ e̱e̱ti̱ necu. Iróng wo̱ye̱ e̱e̱ti̱ ci anyak kuuloc ci lo̱rye̱nto̱ oo ebere cik ol wak ru̱be̱ni̱k kicinte.”

Utuburet ol wak e̱e̱ggi̱n Ya̱u̱d Ye̱su̱

22Baling ize tagiz#10:22 Tagiz: Een icu i̱i̱te̱n ci e̱rki̱to̱ okkomi kak ming olli Israilo orong keronit eci ngatinne̱ng aṯile ta̱mu̱, alali kar bo̱do̱k a̱ppwa̱ ngooti oroot. Iróng i̱bo̱ ngatu owo. Imma Tenneta e̱rki̱te̱ cu, een ci odoi looci., adait ol Kwo̱o̱r ci Agatane ol Ce̱e̱z wa Ta̱mu̱ta̱dde̱no̱#10:22 Kwo̱o̱r ci Agatane ol Ce̱e̱z wa Ta̱mu̱ta̱dde̱no̱: Kwo̱o̱r ci aadane nege i̱i̱te̱n bali a̱wu̱le̱ alaani wa Gi̱ri̱yo̱ een zara Antiochus Epiphanes Ce̱e̱z ci Ta̱mu̱ta̱dde̱n Jerusalema. I̱ki̱ya̱ zin Judas Maccabees ommog alaan kar zin kidiman Ce̱e̱z wa Ta̱mu̱ta̱dde̱no̱ kubunna dee. Ogon bali zoz necu e̱rki̱nya̱ cik e̱e̱ggi̱n o̱bo̱n co̱de̱ ki moten turgerem bali ngen Ye̱su̱ ki̱ti̱rra̱i̱ ke̱. Jerusalema. 23A̱li̱ngli̱ng da̱ Ye̱su̱ ca̱a̱to̱ Ce̱e̱ze̱ wa Ta̱mu̱ta̱dde̱no̱, ojongoz ngin wa een baali ci Solomoni. 24U̱lu̱tte̱ zin lo̱ddi̱ki̱re̱ cik Ya̱u̱do̱ kar ku̱bu̱rbu̱ra̱nte̱k Ye̱su̱ orgen, kar kizettek ne, “Ijakket atin rok i̱ni̱n? Du̱wa̱kke̱t zoz ci een de̱de̱, e̱e̱ni̱ i̱nna̱ Ki̱ri̱sto̱ wa atahalai?”

25O̱bo̱de̱k zin Ye̱su̱ nogo, a̱nne̱k ne, “Ku̱du̱wa̱u̱ng zoz necu ba̱li̱ye̱, abarik iróng niga elemnyyu zoz cinanni. Ozoz kaala cik a̱vu̱la̱ ku̱tu̱gu̱ zare cik Baba ko̱ zoz cinanni. 26Abarik iróng atin niga elemnyyu, eci iróng niga e̱e̱ggi̱nnu̱ eeza cigannik. 27Aziye eezena cigannik muluk cinanni, ka̱gga̱ nogo, kar nege kunuyan. 28Kanyike anna nogo ruget wa aave udut, iróng bo̱do̱k nege ngen a̱da̱i̱. A̱zze̱ e̱e̱ti̱ imma ci aama nogo a̱tte̱ cinanni to. 29Aanya annit Baba wa ommog kaal do̱o̱k nogo; a̱zze̱ e̱e̱ti̱ imma ci aama nogo a̱tte̱ ci Baba. 30Kodowina anna ki Baba.”

31Ebertta lo̱ddi̱ki̱re̱ cik Ya̱u̱do̱ biyen orongit kovvoccit Ye̱su̱ ka̱da̱k. 32Abarik zin enne a̱nne̱k nogo ne, “Ki̱ye̱le̱u̱ng kaal cik meelek a̱vu̱la̱ a̱vvu̱ ngati Baba, ma kaale ne̱k a̱vu̱la̱ icinntu niga ko̱ do̱o̱k, jang ci gerze orongnyu ovoccang annit biyene ko̱?”

33O̱bo̱dde̱k zin ol nonno, a̱nne̱k ne, “Iróng naga kovvocci zo̱ze̱ ci abunna ogoni i̱nna̱ ko̱, abarik korongnya kovvocci zo̱ze̱ ci ibbeze Ta̱mu̱ta̱dde̱n, azi i̱nna̱ e̱e̱ti̱ ci diiri gaganiko ne e̱e̱ni̱ i̱nna̱ bu̱k Ta̱mu̱ta̱dde̱n.”

34O̱bo̱de̱k zin Ye̱su̱ nogo a̱nne̱k ne, “Iróng e̱he̱rye̱ buwe ci lo̱ti̱nno̱we̱ cuggo̱k, azi Ta̱mu̱ta̱dde̱n ne, ‘Kazi anna e̱e̱ggi̱nnu̱ niga ta̱mu̱ta̱dde̱ne̱t’#Caliwon 82:6? 35A̱gga̱yyu̱ iróng e̱e̱ti̱ imma uhu Waraga ci Ta̱mu̱ta̱dde̱no̱, aave zoz ci e̱he̱rye̱ ko̱ een de̱de̱ udut. Awu Ta̱mu̱ta̱dde̱n ol wak elemtta zoz cinne ‘ta̱mu̱ta̱dde̱ne̱t’, 36imma anna, atahala Baba, kar ki̱tto̱na̱ ki̱ki̱ya̱k lo̱o̱c. Nya zin ci a̱du̱wa̱nnu̱ a̱nnu̱ ne odomi anna nonno zo̱ze̱ ci kazi ne, ‘Ke̱e̱ni̱ anna Ngerrti Ta̱mu̱ta̱dde̱no̱’? 37Ma zin elemnyyu zoz cinanni ming iróng anna kogonni zoz ci a̱du̱wa̱ Baba. 38Abarik ming kogonni zoz ci Baba, ming iróng a̱tu̱yyu̱ nu̱nu̱n, elemtta zin kaal cik a̱vu̱la̱ kogonni anna ko̱, kar abunna ming a̱gga̱yyu̱ ming kodowina anna ki Baba nga̱to̱de̱.” 39Orongit bo̱do̱k nege ka̱gga̱mi̱t Ye̱su̱, inik zin enne lo̱mu̱k utungek nogo lo̱o̱c.

40I̱mi̱re̱ zin Ye̱su̱ uk etted ngin bali a̱gga̱me̱k Joni nonno ba̱ti̱ti̱mo̱ ke̱, more ci Jordani, kar kabak nginati. 41I̱vi̱tta̱k zin ol cik meelek nonno, kar kizeto ne, “Ngen Joni ku̱tu̱gu̱ kaal cik a̱vu̱la̱, imma zoz ci a̱du̱wa̱ enne obod ki e̱e̱t cu een de̱de̱.” 42Kar zin ol cik meelek ku̱tu̱we̱t zoz ci Ye̱su̱.

Currently Selected:

Jon 10: tex

Highlight

Copy