Jon 11

Daiz ci Lazaru

1-2Omor da̱ e̱e̱ti̱ ci een zara Lazaru, a̱kku̱ enne o̱rge̱ ci een zara Bethany, abak ciko Ma̱ri̱ya̱#11:1-2 Ma̱ri̱ya̱: Ikeb zoz ci ogonik enne Ye̱su̱,Ma̱te̱yo̱ 26:6-13; Marko 14:1-11; Jon 12:1-12. ki ngooni ci een Marta o̱rge̱ neci bu̱k. E̱e̱ggi̱n nege ngonoggi Lazaru. U̱vu̱d ba̱li̱ye̱ Ma̱ri̱ya̱ zo̱o̱ cik Manyi Ye̱su̱ maale ci ongooli laala, kar zin ki̱ti̱vi̱la̱ maal neci immane ciginnek. 3Baling i̱tto̱nte̱k ngonoggi Lazaru Ye̱su̱ zoz izettek ne, “Manyi, omor goonu wa zinino oroot.”

4Baling izik Ye̱su̱ zoz neci, ize ne, “Iróng atin morizi neci een daiz. Anyike atin morizi neci zar cik Ta̱mu̱ta̱dde̱no̱ ku̱bu̱lte̱, kar ol ki̱di̱ngdi̱nga̱ni̱t Ngerrti Ta̱mu̱ta̱dde̱no̱ morize necu.” 5Irez Ye̱su̱ Lazaru ki ngonoggi Marta ki Ma̱ri̱ya̱. 6Ma̱i̱je̱ baling izik enne ming omor goniya ci een Lazaru nu̱nu̱n, erahek zin ngin bali aave ke̱ i̱i̱nya̱ ram.

7Ma bali vu̱rrta̱, izek zin Ye̱su̱ nuyak waginnek ke̱ ne, “Ki̱mi̱rte̱ koo lo̱o̱ce̱ ci een Ju̱de̱ya̱.”

8Izettek nege nonno ne, “De̱me̱zo̱i̱t, orongnyi wanai jor niko ol cik e̱e̱ggi̱n Ya̱u̱d kovocci biyene. Orongi abarik bo̱do̱k i̱nna̱ mi̱re̱ bit nginati dee?”

9O̱bo̱de̱k zin Ye̱su̱ nogo, izek ne, “Wu̱u̱n wazini, ming owo e̱e̱ti̱ waz i̱llo̱i̱ gi̱i̱ ci adiri. 10Abarik ming owo e̱e̱ti̱ ba̱a̱l, adir zin kaala cik meelek eci i̱llo̱i̱ tukulec ci ataran lo̱o̱c.”

11Baling u̱du̱wa̱ Ye̱su̱ zoz necu, kar zin ku̱du̱wa̱k nogo azi ne, “Adunge gotoneti ci een Lazaru, kokko zin anna nginati kar kuk ki̱ti̱ngka̱ nonno.”

12O̱bo̱dde̱k zin nuyaha ciginnek nonno, izettek ne, “Manyi, ming adunge enne, ingazi atidic labak.” 13Ozoz Ye̱su̱ abarik daiz ci e̱e̱t ci een Lazaru, imma nuyaha ozoz ungnyak wak gon la̱du̱n ko̱.

14U̱du̱wa̱k zin Ye̱su̱ nogo zoz ci een de̱de̱, ize ne, “A̱da̱k Lazaru de̱de̱. 15Katalne zin zo̱ze̱ cunno̱ng eci iróng anna karumena ki nonno, kar atin abunna ming a̱tu̱yyu̱. Abarik koot zin i̱yo̱ko̱ rok nonno.”

16Izek zin e̱e̱ti̱ ci een Tomas een zara uggak ne Didymus, wa bo̱do̱k een cuudenit nuyak u̱gge̱ ne, “Koot naga do̱o̱k bu̱k, icima ka̱da̱i̱ ki nonno.”

A̱gga̱m Ye̱su̱ ngonoggi Lazaru azzin u̱lu̱wa̱na̱

17Baling uzuca Ye̱su̱ ce̱e̱z co Lazaru, amuda ele ci Lazaru abakttek ol ngi̱lo̱m edeca i̱i̱nya̱ we̱c. 18Ojon da̱ orogi ci een Bethany ki Jerusalem, okkoye mailnya rama. 19I̱vi̱ta̱ da̱ ol cik e̱e̱ggi̱n Ya̱u̱d Jerusalema ovvo a̱gga̱ma̱ ciko Marta ki Ma̱ri̱ya̱ azzin u̱lu̱wa̱ne̱ ci gotoni cinne̱ng bali a̱da̱i̱ ke̱.

20Baling izik Marta ming a̱kku̱ Ye̱su̱, uk u̱ru̱me̱k nonno gool, ma̱i̱je̱ Ma̱ri̱ya̱ irahek ce̱e̱za̱. 21Izek zin Marta Ye̱su̱ ne, “Manyi, wo̱ye̱ da̱ ming a̱vvu̱ ngatu, iróng wo̱ye̱ da̱ gotona a̱da̱i̱. 22Ma̱i̱je̱ zin anna ka̱gga̱ i̱yo̱ko̱ niko aanyi atidic Ta̱mu̱ta̱dde̱n gi̱i̱ ci a̱jji̱nni̱ i̱nna̱ ngatinne.”

23Izek zin Ye̱su̱ nonno ne, “Ingazi atidic gotonnu daiza kurug bo̱do̱k.”

24O̱bo̱de̱k zin Marta nonno, izek ne, “Ka̱gga̱ niko ming ingazi atin enne wazin wa ingane ol do̱o̱k daiza.”

25Izek Ye̱su̱ nonno ne, “Annit ci kingane ol daiza kuruget. Ming a̱tu̱ya̱ e̱e̱ti̱ annita, ming a̱da̱k nu̱nu̱n, aruge atin. 26Ming aruge e̱e̱ti̱ kar ku̱tu̱ zoz cinanni, iróng atin a̱da̱i̱ udut. A̱tu̱yyu̱ zoz necu de̱de̱?”

27Izek Marta Ye̱su̱ ne, “I̱i̱ny Manyi, kelemna anna e̱e̱ni̱ i̱nna̱ Ki̱ri̱sto̱ wa bali atahalai, Ngerrti Ta̱mu̱ta̱dde̱no̱ wa bali azi ne a̱kku̱nna̱k atin lo̱o̱c.”

28Baling edeca enne zoz ki Ye̱su̱, kar zin kuk kutu ngooni wa een zara Ma̱ri̱ya̱, uwe abanyca, kar zin kizek ne, “Aave de̱me̱zo̱i̱ti̱ ngatu, a̱jji̱ni̱n, orong kicinin.” 29Baling izik Ma̱ri̱ya̱ zoz necu, itinga je̱e̱na̱ ataman kar zin kuk ngatinne. 30Ngen zin da̱ Ye̱su̱ ki̱tto̱ kuk orgato, ngen abarik da̱ aave ngin bali a̱ru̱me̱ke̱ Marta nonno gool ke̱. 31Baling icinnet ol balik e̱e̱ggi̱n Ya̱u̱d cik ovvo a̱gga̱m nogo azzin u̱lu̱wa̱na̱ ce̱e̱za̱ ke̱ Ma̱ri̱ya̱ ming ingazi ataman, i̱no̱ni̱t nege izeto ne okko i̱yo̱ko̱ enne ngi̱lo̱ma̱ u̱lu̱wa̱, unuwet zin Ma̱ri̱ya̱ vu̱rrta̱.

32Baling uzuca Ma̱ri̱ya̱ ngin bali aave Ye̱su̱ ke̱, kar zin edenya nonno, udduk lo̱o̱c zone cik Ye̱su̱ kar zin kize ne, “Manyi, ming wo̱ye̱ da̱ a̱vvu̱ ngatu, iróng wo̱ye̱ da̱ gotona a̱da̱i̱.”

33Baling icin Ye̱su̱ nonno ming a̱lu̱, kar bo̱do̱k ol balik e̱e̱ggi̱n Ya̱u̱d orkora ki nonno ke̱ bo̱do̱k ming a̱lu̱, u̱u̱c nonno zinin oroot.

34I̱jji̱n zin Ye̱su̱ nogo izek ne, “Abahekku da̱ Lazaru i̱ni̱n?”

Izettek zin nege nonno ne, “I̱jja̱ kar cin ngi̱lo̱m neci, Manyi.”

35U̱tu̱lu̱ zin Ye̱su̱.

36Izeto zin ol ne̱k e̱e̱ggi̱n Ya̱u̱d ko̱ ne, “Icinnet, irez Ye̱su̱ Lazaru oroot!”

37Abarik uggak ngatinne̱ng azi ne, “Iróng weda e̱e̱ti̱ ci oo ol ebere kicinte ko̱, abiliz daiz ci a̱ru̱k Lazaru ko̱ nya?”

Ingane Ye̱su̱ Lazaru daiza

38U̱u̱c zin bo̱do̱k Ye̱su̱ zinin oroot kar zin kuk ngi̱lo̱ma̱, a̱ri̱ta̱ne̱k da̱ ol ngi̱lo̱m neci bee utug ku̱bu̱ng. 39Izek zin Ye̱su̱ nogo ne, “I̱pi̱ktta̱ bee neci ngi̱lo̱ma̱ utuga ko̱.”

Ize zin Marta ngooni Lazaru ne, “Manyi, edeca ele ci Lazaru i̱i̱nya̱ we̱c ngi̱lo̱ma̱, u̱u̱mu̱ i̱yo̱ko̱ gerzet.”

40Ize zin Ye̱su̱ ne, “Ngen ba̱li̱ye̱ ku̱du̱wa̱i̱n, ming a̱tu̱ zoz cinanni, acinni atin doiz ci Ta̱mu̱ta̱dde̱no̱?”

41I̱pi̱ktta̱ zin ol bee neci ngi̱lo̱ma̱ utuga ke̱, icin zin Ye̱su̱ ta̱mu̱-keng, kar zin kize ne, “Baba kaanyi zany, iziyu i̱nna̱ zoz cinanni. 42Ka̱gga̱ gon niko ming aziknan, ka̱du̱wa̱ zin zoz necu kar kiziyet ol cik abile ngatu ko̱, kar kelemtta ming een i̱nne̱t ci i̱tto̱na̱na̱n.”

43Baling u̱du̱wa̱ Ye̱su̱ zoz necu, utu zin daizoit muluwe ci a̱bu̱le̱, ize ne, “Lazaru, iyowa re̱e̱nu̱n!” 44Iyowa zin e̱e̱ti̱ neci bali a̱da̱k ke̱ re̱e̱nu̱n, a̱lu̱ce̱ azzina ciginnek ki zo̱o̱ ki ngu̱m ru̱u̱ma̱ni̱ne̱ cik voorik. Izek zin Ye̱su̱ nogo ne, “Aarta ru̱u̱ma̱ni̱ ne̱k daizak ko̱ kar zin aanycik nonno kuk.”

A̱da̱yya̱ ol Ye̱su̱ orongit ku̱ru̱we̱t ka̱da̱k

(Ma̱te̱yo̱ 26:1-5; Marko 14:1-2; Lu̱ka̱ 22:1-2)

45Baling icinnet olli Ya̱u̱d balik ovvo a̱gga̱m a̱zzi̱t ci Ma̱ri̱ya̱ u̱lu̱wa̱ne̱ ci gotononi ko̱ kaal cik ogon Ye̱su̱, u̱tu̱we̱t zin nonno. 46Abarik ol uggak ngatinne̱ng oot ngati ol wak een Varacis, u̱du̱ktta̱k kaal balik ogon Ye̱su̱ ke̱.

47U̱tu̱ya̱ zin alaata cik olli wawaco ki Varacis zu̱we̱ ro̱ni̱ ci lo̱ki̱ko̱.#11:47 Lo̱ki̱ko̱: Een necu bali lo̱ki̱ko̱ ci arumo alaani ci a̱ddi̱ki̱re̱ wawaco ki alaat cik olli wawaco kar bo̱do̱k lo̱ddi̱ki̱re̱ cik ollu do̱o̱k kar kodolta kozozit no̱ngi̱tto̱n cik obod ki olli Ya̱u̱do̱. Kar kizeto ne, “Ku̱tu̱gu̱z nya? U̱tu̱gu̱ e̱e̱ti̱ necu kaal cik a̱vu̱la̱ meelek giir. 48Ming kanyik nonno ku̱tu̱gu̱ kaal cik a̱vu̱la̱ niko, ovvo atin ol do̱o̱k a̱tu̱ nonno, kar zin atin bo̱do̱k gaala cik Romi ki̱vi̱ta̱ kegerezanit ngintik a̱li̱le̱ ko̱ ki lo̱o̱c cinna.”

49Ozoz zin alaani ci a̱ddi̱ki̱re̱ wawaco#11:49 Alaan ci a̱ddi̱ki̱re̱ wawaco: Ommog alaani ci a̱ddi̱ki̱re̱ wawaco ko̱ alaat cik olli wawaco eci een nonno do̱ ṯok ci gon i̱i̱zo̱ Ce̱e̱z wa Ta̱mu̱ta̱dde̱no̱ Ngin wa A̱li̱le̱ Oroot e̱rki̱ta̱ lak co̱de̱. Anyaha enne bi̱ye̱ cik kar kutuny mu̱nye̱n cigge̱k. Aave Ta̱mu̱ta̱dde̱n di̱ngdi̱ngo̱nta̱ Ngin wa A̱li̱le̱ Oroot, zoz zin ci iróng alaani ci a̱ddi̱ki̱re̱ wawaco ko̱ i̱i̱zo̱ ngintu i̱i̱te̱n imma e̱rki̱ta̱. IkebLeviticus 16; I̱bu̱ru̱ 9:1-7., een zara Kaipas, ize ne, “Iróng niga a̱gga̱yyu̱ gi̱i̱ imma udut. 50Iróng a̱gga̱yyu̱ abunna ming a̱da̱i̱ e̱e̱ti̱ co̱de̱ ṯok ngati ol do̱o̱k, ngati weete a̱da̱kne̱ olli lo̱o̱c cinna do̱o̱k.”

51Iróng ba̱li̱ye̱ enne a̱du̱wa̱ zoz neci zinine cinne do̱, eci enne een alaan ci a̱ddi̱ki̱re̱ wawaco, aanyik Ta̱mu̱ta̱dde̱n nonno ku̱du̱wa̱ zoz ci okko Ye̱su̱ a̱da̱kne̱ kar atin zu̱we̱ ci Ya̱u̱do̱ kuruget. 52Iróng een zu̱we̱ ci Ya̱u̱do̱ do̱, abarik ki dooli cik Ta̱mu̱ta̱dde̱no̱ azanonnik lo̱o̱cco̱k do̱o̱k, kar kanyahak nogo nginto̱de̱ kize orog co̱de̱. 53Akane zin wazin neci ele, a̱da̱yya̱ zin Ya̱u̱di̱ Ye̱su̱ orong ku̱ru̱we̱t ka̱da̱k.

54Iróng zin Ye̱su̱ ngen owo kicinnet olli Ya̱u̱do̱ do̱o̱k. U̱lu̱g abarik uk lo̱o̱ce̱ ci ojono ki balal, o̱rge̱ ci een Ephraim, kar zin ka̱vvu̱to̱ nginati ki nuyak waginnek.

55Baling ize ojon I̱i̱te̱n wa Va̱rda̱ngi̱nto̱ Ya̱u̱do̱, oot ol cik meelek o̱ro̱gjo̱we̱ rok Jerusalem ovvo aburuc e̱le̱tti̱ ming ngen kwo̱o̱r neci ki̱tta̱.#Nambars 9:10-14 56Orongit olli Ya̱u̱do̱ Ye̱su̱, baling ovvo abile reena Ce̱e̱ze̱ wa Ta̱mu̱ta̱dde̱no̱, i̱jji̱nto̱ nege do̱, izeto ne, “I̱no̱nnu̱ niga a̱kku̱ dim atidic e̱e̱ti̱ wagon ko̱ kwo̱o̱r necu de̱de̱?” 57Arakttek da̱ abarik alaata cik olli wawaco ki Varacis zoz lo̱o̱c, ci azi ne, ming icin e̱e̱ti̱ imma Ye̱su̱, anyik ku̱du̱wa̱k nogo kar kecebe.

Currently Selected:

Jon 11: tex

Highlight

Copy