Jon 4

Ozozo Ye̱su̱ ki ngaa ci orog ci Samariyo

1Iziyyet ol cik e̱e̱ggi̱n Varacis zoz ci azi ne a̱vvu̱na̱k nuyaha cik meelek Ye̱su̱ kar ka̱gga̱me̱k nogo ba̱ti̱ti̱mo̱ ci ommog ci Joni, 2ming nu̱nu̱n amire ki Ye̱su̱ ci a̱gga̱me̱k ol ba̱ti̱ti̱mo̱, nuyaha ciginnek do̱ cik a̱gga̱me̱k ol ba̱ti̱ti̱mo̱. 3Baling izik Manyi zoz neci, utungek enne lo̱o̱c ci Ju̱de̱ya̱ lo̱o̱c, kar zin kuk lo̱o̱ce̱ ci Ga̱li̱li̱.

4I̱yo̱ko̱ orong enne koto go̱o̱le̱ ci okko ki lo̱o̱c ci een Samariya.#4:4 Samariya: E̱e̱ggi̱n ji̱ji̱ti̱k olli Samariyo uggak Ya̱u̱d, ovvo uggak a̱vvu̱ ngati ol u̱gge̱. Ala nege Ta̱mu̱ta̱dde̱n go̱o̱le̱ ci aave do̱ ngati ol cik e̱e̱ggi̱n Ya̱u̱d biye ci een zara Gerizim. Ikeb2 Alaat 17:27-40; Jon 4:1-42. 5Uk zin rok orog ci een zara Sychar lo̱o̱ce̱ ci een Samariya ke̱, ngati ojongzo ki lo̱o̱c ci da̱ anyik Ya̱ko̱bo̱#4:5 Ya̱ko̱bo̱: Een enne ngerrti do̱le̱c ci Aburahami wa bali anyak dooli cik macik omoto ki rama. Utuhu Ta̱mu̱ta̱dde̱n zar ciginnek kize Israil. Awu ol dooli ciginnek kizeto olli Israilo, imma i̱i̱te̱ne̱ ci Ye̱su̱ awu ol nogo kizeto Ya̱u̱d. IkebKananet 25-50. ngerinne wa een zara Yosevo.#4:5 Yosevo: Een bali enne do̱le̱c wa irez Ya̱ko̱bo̱ oroot. Utek bali gotonoggja nonno Masir kize du̱ca̱i̱t. Aanyik Ta̱mu̱ta̱dde̱n nonno keela ol ciginnek Masira e̱rki̱nya̱i̱ balik e̱e̱ggi̱n turgerem magizo ke̱. IkebKananet 30-50. 6Aave da̱ moro ci Ya̱ko̱bo̱ een iit nginati, baling ize wazin keng, ippira Ye̱su̱ we̱t, a̱vvu̱ zin lo̱o̱ta̱ ngati ojongzo ki iit neci.

7Baling okko ngaa imma ci orog ci een Samariya a̱kku̱ orong kiṯila maam, izek zin Ye̱su̱ nonno ne, “Inya maam u̱gge̱ kuudo.” 8Oot nuyaha ciginnek orgato ovvo uuta da̱i̱ne̱t.

9Izek zin ngaa ci Samariyo ko̱ nonno ne, “E̱e̱ni̱ i̱nna̱ e̱e̱t ci ol wak e̱e̱ggi̱n Ya̱u̱d, okko anna ke̱e̱ni̱ ngaa ci ol cik e̱e̱ggi̱n Samariya, nya ming a̱jji̱nna̱ maam cik audi ko̱?” (Ma̱rri̱t ol cik e̱e̱ggi̱n Ya̱u̱d iróng auddo maam ki ol cik e̱e̱ggi̱n Samariya).

10O̱bo̱de̱k zin Ye̱su̱ nonno, izek ne, “Ming aanyi gi̱i̱ gga̱ mucenet ci Ta̱mu̱ta̱dde̱no̱ ki e̱e̱t ci a̱jji̱nni̱ maam ko̱, a̱jji̱nni̱ wo̱ye̱ i̱nna̱ nonno kar kaanyi maam cik rugeto.”

11Iizek zin ngaa neci Ye̱su̱ ne, “Ddi̱ki̱ryo̱i̱t, i̱llo̱i̱ rok ibala ci kaṯilane maam more ci u̱u̱ni̱ ko̱. Amudak wo̱ye̱ i̱nna̱ maam ne̱k aanyik ol ruget ko̱ i̱ni̱n? 12A̱ddi̱ki̱ri̱ i̱nna̱ ngati be̱e̱ti̱nna̱ng Ya̱ko̱bo̱ bali aanyyet moro cu ko̱, kar enne eliya ki dooli ki kaal ciginnek kuudde more necu?”

13O̱bo̱de̱k Ye̱su̱ nonno, izek ne, “Ming aud e̱e̱ti̱ imma maam cik iit cu, ngen atin a̱ru̱k koor dee. 14Ma̱i̱je̱ e̱e̱ti̱ ci aud maam cik kanyike anna, iróng atin a̱ru̱k koor udut, abarik ovvo maama ne̱ke̱ ogon ki maama cik a̱ri̱ya̱ anyaha ruget ci aave udut.”

15Izek zin ngaa neci nonno ne, “Ddi̱ki̱ryo̱i̱t, inya maam ne̱ko̱ u̱gge̱ kar kalal udut, kar bo̱do̱k kuk ka̱vvu̱ lo̱o̱ta̱ ci iróng bo̱do̱k ka̱kku̱na̱i̱ maam u̱gge̱.”

16Izek zin Ye̱su̱ nonno ne, “Bit tuwa mac cunne, kar zin i̱vi̱ta̱ bu̱k rok ngintu.”

17O̱bo̱de̱k ngaa neci Ye̱su̱, a̱nne̱k ne, “Iróng anna kanyai mac.”

Izek zin Ye̱su̱ nonno ne, “Ilemi i̱nna̱ ming azi ne, i̱llo̱i̱ i̱nne̱t mac ko̱. 18Anyai i̱nna̱ de̱de̱ macwa tu̱r, imma e̱e̱ti̱ ci abakku bu̱k ko̱, iróng een mac cunne. Een zoz ci i̱yo̱ko̱ a̱du̱wa̱ i̱nna̱ ko̱ de̱de̱.”

19Izek zin ngaa neci Ye̱su̱ ne, “Ddi̱ki̱ryo̱i̱t, kacinni e̱e̱ni̱ i̱nna̱ a̱ri̱to̱i̱t ci zoz ci Ta̱mu̱ta̱dde̱no̱. 20I̱di̱ngdi̱nga̱nni̱t be̱e̱ti̱gga̱k Ta̱mu̱ta̱dde̱n biye cu, ma̱i̱je̱ niga ol cik e̱e̱ggi̱nnu̱ Ya̱u̱d a̱nnu̱ ne aave nginti la̱du̱n kalawe Ta̱mu̱ta̱dde̱n Jerusalema.”

21Odola zin Ye̱su̱ izek nonno ne, “Ziyan, ngaa cu, a̱kku̱ atin wazini ci iróng ol ngen a̱di̱ngdi̱nga̱n Baba biye cu, icima Jerusalema. 22A̱di̱ngdi̱nga̱nnu̱ niga ol cik Samariya Ta̱mu̱ta̱dde̱n ci iróng a̱gga̱yyu̱, imma naga ol cik Ya̱u̱do̱, ka̱di̱ngdi̱nga̱na̱ Ta̱mu̱ta̱dde̱n ci ka̱gga̱yya̱, eci ti̱ri̱ze̱ne̱t een ci Ya̱u̱do̱. 23I̱ki̱ya̱ wazini ci ovvo ol cik a̱di̱ngdi̱nga̱n Baba de̱de̱ Vongiza. Orong Baba ol cik ogon ki i̱yo̱ko̱. 24Een Ta̱mu̱ta̱dde̱n Vongiz, anyik ol cik a̱di̱ngdi̱nga̱n nonno ki̱di̱ngdi̱nga̱ni̱t nonno Vongiza ki zoz ci een de̱de̱.”

25Izek zin ngaa neci nonno ne, “Ka̱gga̱ a̱kku̱ atin Missaya wa een Ki̱ri̱sto̱ wa atahalai, ming i̱ki̱ya̱, a̱du̱wa̱kke̱t atin kaal do̱o̱k.”

26U̱du̱wa̱k zin Ye̱su̱ nonno, azi ne, “Annit ele Ki̱ri̱sto̱ wa atahalai ci kozoziki ko̱.”

Oot nuyaha urumte ki Ye̱su̱

27O̱bo̱dda̱ zin nuyaha cik Ye̱su̱, u̱ku̱lte̱k je̱e̱n ngati amudanne nonno ming ozoz ki ngaa neci. Ngen zin e̱e̱ti̱ imma ki̱jji̱n nonno zoz ci azi ne, “Orongi nya? Ozozonnu ki ngaa necu nya?”

28Utungek zin ngaa neci í̱jjó̱ cinne maamu lo̱o̱c, uk orgato, kar zin kuk kizek ol ne, 29“I̱vi̱ta̱ icinnet e̱e̱t ci a̱du̱wa̱ka̱ kaal balik ku̱tu̱gu̱ anna ke̱. Iróng i̱yo̱ko̱ enne een Ki̱ri̱sto̱?” 30Iyokta ol ne̱ke̱ orgato, kar zin koot kicinnet nonno.

31Ma̱i̱je̱ ngatu nuyaha waginnek ilalttek nonno, “De̱me̱zo̱i̱t, dak gi̱i̱ imma.”

32A̱nne̱k enne nogo ne, “Kanyai anna da̱i̱ne̱t cik kadai cik iróng niga a̱gga̱yyu̱ gi̱i̱ imma ci obod ki da̱i̱ne̱t ne̱ke̱.”

33Ozozzit zin nuyaha do̱, anno ne, “Anyahak bong ette e̱e̱ti̱ imma nonno da̱i̱ne̱t u̱gge̱?”

34Ize Ye̱su̱ ne, “Een da̱i̱ne̱t cigannik li̱ngli̱ngo̱n ci e̱e̱t bali i̱tto̱na̱na̱ ke̱, kar ku̱tu̱gu̱ bak kedeca. 35Iróng wagon ol azi zoz imma ne, ‘Izeto zar nyelowi cik anyigzai we̱c niko, kar zin ol kiciriyanit labi.’ Ka̱du̱wa̱kku̱ng zin ka̱nne̱kku̱ng ne, edevit lo̱o̱c, i̱bbi̱re̱to̱ labina manatoto orongit kettedai. 36A̱ru̱we̱k ol o̱ro̱bi̱ya̱ ol cik aciryanne kar kulutet kize cik ruget wa aave udut; kar ol wak arire ki ol wak aciryanne katalit nege do̱o̱k. 37Een zin zoz wagon azi ne, e̱e̱vye̱ e̱e̱ti̱ co̱de̱, okko imma aciryanne ko̱, een de̱de̱. 38Ki̱tto̱nnu̱ng anna kar oot iciryannit ma̱na̱ ci ngen niga e̱e̱vi̱t. U̱tu̱gu̱zzo̱ ol uggak li̱ngli̱ngo̱n ci okkomi, kar zin niga oot etteddit ma̱na̱ bali eev ol uggak ke̱.”

Elemtta olli Samariyo zoz ci Ta̱mu̱ta̱dde̱no̱

39Elemtta olli Samariyo cik meelek zoz ci Ye̱su̱ baling iziyyet zoz ci a̱du̱wa̱k ngaa nogo zoz ci Ye̱su̱, azi ne, “U̱du̱wa̱ enne kaal cik da̱ kogonni anna do̱o̱k.” 40Baling i̱vi̱tta̱k olli Samariyo nonno, ilalttek nonno ka̱vvu̱ ki nogo arrak ngatu do̱yo̱i̱t, kar zin Ye̱su̱ ka̱vvu̱ nginati i̱i̱nya̱ ram o̱rge̱ neci. 41Elemtta ol cik meelek Ye̱su̱ zo̱ze̱ ci ozoz enne ko̱.

42Izettek zin ol ne̱ke̱ ngaa neci ne, “Iróng naga ka̱tu̱we̱nna̱ zo̱ze̱ wanai a̱du̱wa̱ i̱nna̱ ke̱ do̱. Kizikta zoz cinne naga e̱le̱tti̱ne̱, ka̱gga̱yya̱ niko ming een e̱e̱ti̱ cu de̱de̱ Ti̱ri̱zo̱i̱t ci lo̱o̱tu̱.”

Angaru Ye̱su̱ ngerrti e̱e̱t ci een ddi̱ki̱ryo̱i̱t

(Ma̱te̱yo̱ 8:5-13; Lu̱ka̱ 7:1-10)

43Ma baling edeccai i̱i̱nya̱ ne̱k e̱e̱ggi̱n ram ke̱, uk zin Ye̱su̱ lo̱o̱ce̱ ci een Ga̱li̱li̱. 44U̱du̱wa̱ zin Ye̱su̱ enne eliya ize ne, “Iróng ol o̱ngo̱o̱le̱ a̱ri̱to̱i̱t ci zoz ci Ta̱mu̱ta̱dde̱no̱ o̱rge̱ wanne̱ng.” 45Baling uzuca enne Ga̱li̱li̱, elemtta zin ol cik Ga̱li̱li̱ nonno labak. Icinnet nege ba̱li̱ye̱ kaal cik ogon Ye̱su̱ Jerusalema Kwo̱o̱re̱ ci Va̱rda̱ngi̱nto̱, eci da̱ nege ba̱li̱ye̱ aavtte nginati bu̱k.

46I̱mi̱ro̱zi̱k zin bo̱do̱k Ye̱su̱ orog bali een Kana ngati ingane lo̱o̱ce̱ ci een Ga̱li̱li̱, kar kutuhu maam ba̱li̱ye̱ kize merte. Aave da̱ ba̱li̱ye̱ ddi̱ki̱ryo̱i̱ti̱ ci a̱li̱ngli̱ngngo̱ni̱k alaan bu̱k nginati, anyak ngerinne ci omori o̱rge̱ ci een Kapernaum. 47Ma baling izik e̱e̱ti̱ neci ming oboda Ye̱su̱ lo̱o̱ce̱ ci Ju̱de̱ya̱ uzuca Ga̱li̱li̱, uk i̱jji̱n Ye̱su̱ abunna ming a̱ti̱ri̱z ngerinne ci da̱ omori oroot ize ojon ka̱da̱k.

48Izek Ye̱su̱ nonno ne, “Ming ngen icinnet kaal cik a̱vu̱la̱ ki cik aninung, iróng wo̱ye̱ a̱tu̱we̱nu̱.”

49Izek ddi̱ki̱ryo̱i̱ti̱ ci a̱li̱ngli̱ng ki alaan ko̱ Ye̱su̱ ne, “Alaan, i̱jja̱ ataman ming ngen ngeranni ka̱da̱k.”

50O̱bo̱de̱k zin Ye̱su̱ nonno, a̱nne̱k ne, “Bito, aruge atin ngerunne.”

Izik zin e̱e̱ti̱ neci zoz ci Ye̱su̱, kar zin koto. 51Baling ngen e̱e̱ti̱ neci owo goola, u̱ru̱mtte̱k du̱cca̱ha̱ waginnek nonno gool, kar zin ku̱du̱kta̱k kaviyak cik azi ne, ngen ngerinne aruge. 52Baling i̱jji̱n enne i̱i̱ ci da̱ izewe ngerinne maya, u̱du̱ktta̱k nege nonno izeto ne, “Utunga morizi lo̱gu̱t neci ngati a̱vvu̱ koor orgena.”

53A̱gga̱ zin baatinne niko ming een i̱i̱ bali a̱nne̱ke̱ Ye̱su̱ nonno ne, “Aruge atin ngerunne.” U̱tu̱we̱t zin enne ki ol cik ce̱e̱z cinne do̱o̱k zoz ci Ta̱mu̱ta̱dde̱no̱.

54Een zin ba̱li̱ye̱ necu gi̱i̱ ci a̱vu̱la̱ ogon Ye̱su̱ kize ci anuwonik bali een oo Kanaana ke̱, ngati a̱kku̱nne̱ enne lo̱o̱ce̱ ci Ju̱de̱ya̱, kar kuk lo̱o̱ce̱ ci Ga̱li̱li̱.

Currently Selected:

Jon 4: tex

Highlight

Copy