Jon 5

Angaru Ye̱su̱ e̱e̱t ci ngooli ca̱a̱ba̱

1Bali vu̱rrta̱, uk zin Ye̱su̱ rok Jerusalem, okko adak kwo̱o̱r ci ol cik e̱e̱ggi̱n Ya̱u̱d.

2Imma zin Jerusalema, baling okko enne ojongoz aran ci a̱zza̱nnu̱, anyak ca̱a̱b nginati. Awu nege ca̱a̱b neci utuge cinne̱ng een Aramaik ne Betsaida. Kar bo̱do̱k ce̱e̱zi̱ cik een ti̱te̱t tu̱r aburuk ca̱a̱b ne riu. 3Anyak koole ci ol wak omori adunge ce̱e̱zi̱nne̱ ne̱ke̱, anyak olle ne̱ke̱ cik ngoolik, ki cik ru̱be̱ni̱k, ki cik nganynganyik zoona. 4A̱kku̱ gon anjilo ci Ta̱mu̱ta̱dde̱no̱ i̱i̱te̱n imma kar ki̱ki̱ya̱ kotomowe maam kar e̱e̱ti̱ ci omori i̱i̱zo̱ maam oowa, kar zin kangaru nogo mo̱ri̱zzo̱k cik anyak nege do̱o̱k. 5Aave da̱ e̱e̱ti̱ imma ngatinne̱ng ci omori e̱rki̱nya̱ moten i̱i̱yo̱ ki tu̱rge̱. 6Baling icin Ye̱su̱ e̱e̱t neci ming adunge nginati, kar zin ka̱gga̱ niko ming unuwozik morizi nonno, i̱jji̱n zin enne nonno, a̱nne̱k ne, “Orongi i̱nna̱ bunnat?”

7O̱bo̱de̱k e̱e̱ti̱ wanai omori ko̱ Ye̱su̱, a̱nne̱k ne, “Manyi, iróng kanyai e̱e̱t imma ci eelanna ngatu, ci okkoyya kuk ku̱du̱nye̱ya̱ ca̱a̱b ming aluce maama. Ming katimani kazi ne ja ki̱tto̱, abarik uwante e̱e̱ti̱ imma oowa ngatinanni.”

8A̱nne̱k zin Ye̱su̱ nonno ne, “Tinga je̱e̱na̱! Dima zin kwe̱e̱n cunne, kar too.” 9Ataman niko ubunna e̱e̱ti̱ neci niko, idima kwe̱e̱n cinne, kar zin koto.

Ogone zin da̱ zoz necu I̱i̱te̱ne̱ wa Yu̱bze̱nto̱#5:9 I̱i̱te̱n wa Yu̱bze̱nto̱: Een i̱i̱te̱ni̱ ci a̱yu̱bze̱ olli Ya̱u̱do̱ kar kalac gon Ta̱mu̱ta̱dde̱n. Okko bo̱do̱k gon i̱i̱te̱ne̱ cu a̱a̱dda̱ nege Ta̱mu̱ta̱dde̱n kize Tehenyait ki Ti̱ri̱zo̱i̱t cinne̱ng. Awu olli Ya̱u̱do̱ i̱i̱te̱n necu kize i̱i̱te̱n ci een turgerem biranoca, ma̱i̱je̱ Tenneti awu i̱i̱te̱n necu kize i̱i̱te̱n ci een torkonom biranoca. IkebLu̱ge̱z 20:8-11; Deuteronomy 5:12-16., 10kar zin bo̱do̱k olli Ya̱u̱do̱ izettek e̱e̱t neci ne, “Iróng i̱nna̱ a̱gga̱ ming azi lo̱ti̱nno̱wa̱ ne, ma odongi kwe̱e̱n cunne I̱i̱te̱ne̱ wa Yu̱bze̱nto̱?”

11O̱bo̱de̱k enne nogo a̱nne̱k ne, “Abarik e̱e̱ti̱ wa aanya kubunna ko̱ ci a̱nne̱ka̱ ne, dong kwe̱e̱n cunne kar zin bito.”

12I̱jji̱nne̱t zin nege nonno, a̱nne̱k ne, “E̱e̱t ci een ngene ci a̱du̱wa̱ki̱ zoz ci azi ne, dong kwe̱e̱n cunne kar zin to ko̱?”

13Imma e̱e̱ti̱ ci umuda ngarrinet ko̱, iróng ngen a̱gga̱ e̱e̱t ci angaru nonno kubunna, eci Ye̱su̱ ito koole wainne a̱ppwe̱ ke̱ ne dakdak.

14Imma bali vu̱rrta̱ umudak Ye̱su̱ nonno Ce̱e̱z wa Ta̱mu̱ta̱dde̱no̱, kar zin kizek ne, “Cinno, i̱yo̱ko̱ ubunna i̱nna̱ bo̱do̱k. Ma ngen ogoni mu̱nye̱n, gerza ming a̱kku̱nna̱ki̱ gi̱i̱ ci gerze.” 15Uk zin e̱e̱ti̱ neci kar ku̱du̱wa̱k ddi̱ki̱ryyo̱k cik Ya̱u̱do̱, a̱nne̱k ne, “Ye̱su̱ ci adimanna kubunna.”

16I̱gi̱dde̱t zin olli Ya̱u̱do̱ Ye̱su̱ ma̱rri̱t enne angaru e̱e̱t ci omori I̱i̱te̱ne̱ wa Yu̱bze̱nto̱. 17Izek zin abarik Ye̱su̱ nogo ne, “Ma̱rri̱t Baba a̱li̱ngli̱ngi̱ rok i̱yo̱ko̱, ka̱li̱ngli̱ngi̱ zin anna bu̱k.” 18Imma abarik zo̱ze̱ necu, utuburtek ol cik Ya̱u̱do̱ nonno nong oroot, bak odolta kar atin ku̱ru̱we̱t nonno ka̱da̱k. Orongit zin ku̱ru̱we̱t nonno zo̱ze̱ ci a̱li̱ngli̱nge̱ enne I̱i̱te̱ne̱ wa Yu̱bze̱nto̱ akaka, abarik zo̱ze̱ ci awenne enne Ta̱mu̱ta̱dde̱n kize Baatinne, kar zin go̱o̱le̱ necu, aanyik enne ele cinne kutubto ki Ta̱mu̱ta̱dde̱n.

19O̱bo̱de̱k zin Ye̱su̱ nogo, a̱nne̱k ne, “Ka̱du̱wa̱kku̱ng zoz ci een de̱de̱, iróng Ngerinne ogon gi̱i̱ imma do̱, ogon gi̱i̱ ci icin enne ogon Baatinne, eci gi̱i̱ ci ogon enne, ogon Ngerinne bu̱k. 20Ireza annit Baba Ngerinne kar zin ki̱ye̱le̱ya̱ kaal ne̱k ogon enne ke̱ do̱o̱k. I̱ye̱le̱ka̱ atin enne annit kaal cik ommog ne̱ko̱. 21Ogon ki i̱yo̱ko̱ ming ingane Baba ol wak a̱tu̱we̱ daiza, kaanyik kuruget, imma zin go̱o̱le̱ necu, aanyik Ngerinne ruget ol wak orong enne kaanyik. 22Iróng zin Baba ettedike e̱e̱t imma lo̱ki̱ko̱, abarik aanya annit Ngerrti Ta̱mu̱ta̱dde̱no̱ ketted lo̱ki̱ko̱ ci ollu. 23Kar zin ol do̱o̱k ko̱to̱ngo̱o̱ltte̱ Ngerinne ki i̱yo̱ko̱ ming o̱ngo̱o̱le̱ nege Baba ko̱. Ming iróng e̱e̱ti̱ o̱ngo̱o̱le̱ Ngerinne, iróng o̱ngo̱o̱le̱ Baba bali i̱tto̱na̱na̱ ke̱.”

24Emena Ye̱su̱ zoza dee, azi ne, “Ka̱du̱wa̱kku̱ng zoz ci een de̱de̱, ming aziye e̱e̱ti̱ zoz cinanni kar ku̱tu̱ Baba bali i̱tto̱na̱na̱ ke̱, amuda atin enne ruget wa aave udut. Iróng atin lo̱ki̱ko̱ ci gerze ettedonik oo cinne. Utungek enne daiz lo̱o̱c uk rugeta. 25Ka̱du̱wa̱kku̱ng zoz ci een de̱de̱, a̱kku̱ i̱i̱te̱ni̱, abarik i̱ki̱ya̱, aziye atin ol wak a̱da̱i̱to̱ muluk ci Ngerrti Ta̱mu̱ta̱dde̱no̱, kar ol ne̱k iziyyet ke̱ ingazi daiza. 26Ki i̱yo̱ko̱ ming anyak Baba ruget ko̱, aanyik zin enne Ngerinne bu̱k kanyak ruget. 27Aanyik zin Ngerinne komiz ci ettede lo̱ki̱ko̱ ci ollu eci enne een Ngerrti E̱e̱to̱.

28“Ma zin a̱ku̱le̱kku̱ je̱e̱n zo̱ze̱ necu, a̱kku̱ atin i̱i̱te̱ni̱ ci ovvo ol wak a̱da̱i̱to̱ aziye muluk cinne, 29kar zin kiyokta ilomete. Ingazi ol wak a̱da̱i̱to̱ u̱tu̱gu̱zzo̱ ju̱rru̱m kuruget udut, imma ol wak u̱tu̱gu̱zzo̱ kaal cik gerzek ingazi daiza kar Ta̱mu̱ta̱dde̱n ketted lo̱ki̱ko̱ cinne̱ng. 30Iróng wo̱ye̱ anna kogonni gi̱i̱ imma do̱ komize cinanni, kettedike e̱e̱t lo̱ki̱ko̱ ming kiziya zoz ngati Baba. Kettedi lo̱ki̱ko̱ cinanni ju̱rru̱m. Iróng kogonni gi̱i̱ ci orong zinin cinanni, abarik kogonni gi̱i̱ ci orong e̱e̱ti̱ bali i̱tto̱na̱na̱ ke̱.

Zoz ci ibbace Ye̱su̱ ele cinne

31“Ming ka̱du̱wa̱ zoz cinanni anna eliya iróng atin ol elemi kize zoz ci een de̱de̱. 32Aave e̱e̱ti̱ imma ci ibbac zoz cinanni, ka̱gga̱ niko ming een zoz ci a̱du̱wa̱ enne obod ki annit ko̱ een de̱de̱.

33“I̱tto̱nta̱u̱ niga ba̱li̱ye̱ ol koot ki̱jji̱nne̱t Jon zoz ci obod ki annita, kar zin Joni ku̱du̱wa̱u̱ng zoz wa een de̱de̱. 34Iróng kelemi zoz ci a̱du̱wa̱ ol zo̱ze̱ cinanni, abarik, ka̱du̱wa̱kku̱ng zoz necu kar wo̱ye̱ niga urubta ti̱ri̱ze̱ne̱t. 35Ogon ba̱li̱ye̱ Joni ki urez ci ataran lo̱o̱c, kar zin niga elemtau arrak urez neci do̱yo̱i̱t.”

36Ize zin bo̱do̱k Ye̱su̱ ne, “Ke̱e̱ni̱ anna bba̱co̱i̱t ci a̱ddi̱ki̱re̱ kommogi Jon. Aanya Baba li̱ngli̱ngo̱n ci a̱ddi̱ki̱re̱ kar kedecak lo̱o̱ta̱ ngatu, een li̱ngli̱ngo̱n ci kogonni anna ko̱, ci i̱ye̱la̱ zoz ci een de̱de̱ da̱ i̱tto̱na̱na̱ Baba. 37Ibbac zin Baba bali i̱tto̱na̱na̱ ke̱ zoz cinanni. Ngen niga iziyyet muluk cinne icima icinntu guul cinne. 38Iróng bu̱k niga azunnu zoz cinne zi̱nze̱tti̱nne̱, iróng bo̱do̱k elemnyyu rok e̱e̱t wa i̱tto̱na̱ enne. 39Abarik niga ikebju Waraga ci Ta̱mu̱ta̱dde̱no̱ oroot, a̱nnu̱ ne, amudannu ruget ci aave udut. Oob Waraga ci Ta̱mu̱ta̱dde̱no̱ zoz cinanni ele. 40Abarik niga aburnnu iróng a̱vvu̱na̱kka̱ng kar urubta ruget.”

41Ozoz Ye̱su̱ dee, azi ne, “Iróng anna korongi e̱e̱t ci diiri ki̱di̱ngdi̱nga̱na̱n. 42Abarik ka̱gga̱yyu̱ng, iróng niga anyakku rezinet ci Ta̱mu̱ta̱dde̱no̱ zi̱nze̱tti̱nne̱ ciggo̱k. 43Ka̱kku̱na̱ku̱ng komize ci Baba, iróng zin niga elemannang; ma̱i̱je̱ ming a̱kku̱ e̱e̱ti̱ imma doize cinne, elemannu̱ng enne. 44Elemnyyu wo̱ye̱ ku̱ ming a̱di̱ngdi̱nga̱nnu̱ niga e̱le̱tti̱ ciggo̱k ko̱, iróng abarik ngen orongnyu urubta di̱ngdi̱nga̱ni̱ne̱t wa a̱kku̱ ngati Ta̱mu̱ta̱dde̱n, wa o̱de̱ ṯok.

45“Abarik, ma i̱no̱nnu̱ a̱nnu̱ ne kokko atin anna kovolongnyung i̱ge̱ta̱ ngati Baba. Muses ci arikku niga zi̱nze̱tti̱ ko̱ ci atin okko a̱du̱wa̱k Ta̱mu̱ta̱dde̱n gerziten cunno̱ng. 46Ming elemnyyu niga de̱de̱ lo̱ti̱nno̱k wak Musesi, a̱tu̱yya̱ng weete annit bu̱k, ma̱rri̱t Musesi ba̱li̱ye̱ eteher zoz ci obod ki annita. 47Ming iróng niga elemnyyu zoz ci Musesi, a̱tu̱yyu̱ wo̱ye̱ zoz ci ka̱du̱wa̱kku̱ng anna i̱ge̱t ko̱ ku̱?”

Currently Selected:

Jon 5: tex

Highlight

Copy