Jon 13

Utuny Ye̱su̱ zo̱o̱ cik nuyak waginnek

1Ma baling ize ojon I̱i̱te̱ni̱ wa Va̱rda̱ngi̱nto̱, a̱gga̱ Ye̱su̱ niko ming i̱ki̱ya̱ i̱i̱ ci okko enne okko ta̱mu̱-kenga ngati Baatinne. Irez enne odohize ol waginnek lo̱o̱ta̱ ko̱, i̱ye̱le̱k zin enne nogo rezinet cinne oroot.

2Baling anyaktta ol da̱i̱ne̱t cik adak ol yo̱mo̱na̱, i̱tto̱ da̱ lo̱rye̱nti̱ zinin ci Judas Iskariyot wa een ngerrti Si̱mo̱ne̱ ci atin okko adawa Ye̱su̱. 3A̱gga̱ Ye̱su̱ niko ming aarik Baatinne kaal do̱o̱k azzin ciginnek, a̱gga̱ bo̱do̱k a̱kku̱ enne ba̱li̱ye̱ ngati Ta̱mu̱ta̱dde̱no̱, kar bo̱do̱k ki̱mi̱re̱ kuk ngati Ta̱mu̱ta̱dde̱no̱. 4Itinga zin enne je̱e̱na̱ ngati adaine, kar zin kaara ru̱u̱m wa atadizek gooni eliye cinne ko̱, kar zin ku̱lu̱ce̱k ru̱u̱m wa ka̱vu̱cvu̱ca̱ne̱ maam eliya ko̱ arut. 5Bali vu̱rrta̱, u̱ddu̱te̱k zin enne maam u̱gge̱ illac kar zin kutuny nuyak waginnek zo̱o̱, kar zin ku̱vu̱cvu̱ca̱n maam zoone cigge̱k kodoit ru̱u̱me̱ wanai a̱lu̱ce̱k enne barak ke̱.

6Uk zin ngati Si̱mo̱ne̱ Peturu, i̱jji̱n zin nonno, a̱nne̱k ne, “Manyi, okko i̱nna̱ uunyi zo̱o̱ cigannik bu̱k?”

7O̱bo̱de̱k zin Ye̱su̱ nonno, izek ne, “Iróng zoz necu i̱i̱zo̱ oo cunne, okko atin i̱nna̱ a̱gga̱ vu̱rrta̱.”

8O̱bo̱de̱k bo̱do̱k Peturu nonno, a̱nne̱k ne, “A̱zze̱ to, iróng i̱nna̱ uunyi zo̱o̱ cigannik udut.”

O̱bo̱de̱k zin Ye̱su̱ nonno izek ne, “Ming iróng anna kuunyi zo̱o̱ cigunnek, iróng i̱nna̱ e̱e̱ni̱ demezeyait cinanni.”

9Abariz zin bo̱do̱k Si̱mo̱ne̱ Peturu, ize ne, “Manyi, ma zin uunyi zo̱o̱ cigannik do̱, tuny oo ki azzin bu̱k.”

10Izek zin Ye̱su̱ nonno ne, “Ming arane e̱e̱ti̱ ubunna nonno ele, orong kutunyce zoona do̱. A̱zi̱ze̱ ele cinne do̱o̱k, a̱zi̱ze̱ e̱le̱tti̱ cuggo̱k, anyak orgene cunno̱ng e̱e̱t ci iróng ele cinne a̱zi̱ze̱.” 11A̱du̱wa̱ Ye̱su̱ zoz necu niko ko̱ ma̱rri̱t enne a̱gga̱ e̱e̱t ci okko atin adawa nonno ku̱ru̱we̱ ka̱da̱k.

12Baling edeca enne tunyenet nogo zo̱o̱, i̱ti̱me̱k ru̱u̱m kar zin ki̱mi̱re̱ kuk ka̱vvu̱ ngin wanai ninne ke̱. I̱jji̱n zin nogo, izek ne “A̱gga̱yyu̱ ungec ci gi̱i̱ ci kogonikku̱ng ko̱?” 13Kar zin bo̱do̱k kize ne, “Awuyyang a̱nne̱kka̱ng ne ‘De̱me̱zo̱i̱t’ ki ‘Manyi,’ ilemnyyu ming awuyyang niko ko̱. 14Icinnet, ke̱e̱ni̱ De̱me̱zo̱i̱t ki Manyi cunno̱ng kutunya zo̱o̱ cuggo̱k, abunna ming u̱u̱nyyu̱ zo̱o̱ cik gonogginnu ki bali anna ke̱. 15Ki̱ye̱le̱u̱ng zin anna i̱ge̱t gool ci ogonnu kaal, abunna ming ogonnu ki bali anna ke̱. 16Ka̱du̱wa̱kku̱ng zoz wa een de̱de̱, i̱llo̱i̱ du̱ca̱i̱t ci a̱ddi̱ki̱re̱ ngati e̱e̱t wa a̱li̱ngli̱ngngo̱ni̱k enne, iróng bo̱do̱k e̱e̱ti̱ wa een to̱ni̱a̱t ommog e̱e̱t wa i̱tto̱n nonno. 17I̱yo̱ko̱ a̱gga̱yyu̱ zoz necu ko̱, atalninnu atin niga oroot, a̱mu̱yu̱kku̱ng atin Ta̱mu̱ta̱dde̱n ming u̱tu̱gu̱zzu̱ zoz necu.”

U̱du̱wa̱ Ye̱su̱ e̱e̱t ci atin okko adawa nonno

18Izek zin Ye̱su̱ nogo ne, “Iróng zoz necu akati i̱ge̱t do̱o̱k, ka̱gga̱ ol balik katahala ke̱. Ogone zin zoz necu kar zoz bali e̱he̱rye̱ Warage ci Ta̱mu̱ta̱dde̱no̱ ke̱ kakat mo̱o̱le̱t, azi ne, ‘Adawana e̱e̱ti̱ ci kozola da̱i̱ne̱t bu̱k.’#Caliwon 41:9

19“Ka̱du̱wa̱kku̱ng zoz necu i̱yo̱ko̱ ming ngen ki̱tta̱; ming okko i̱i̱na̱ abunna ming elemnannu annit de̱de̱ icu. 20Ka̱du̱wa̱kku̱ng zoz ci een de̱de̱, ming elem e̱e̱ti̱ e̱e̱t ci ki̱tto̱nna̱ anna, elemnya annita, ming elemnya e̱e̱ti̱ imma annita, elemi enne bu̱k e̱e̱t bali i̱tto̱na̱na̱ annita ke̱.”

A̱du̱wa̱ Ye̱su̱ zoz ci okko akati nonno

(Ma̱te̱yo̱ 26:20-25; Marko 14:17-21; Lu̱ka̱ 22:21-23)

21Baling u̱du̱wa̱ Ye̱su̱ zoz necu, icirit nonno zinin oroot kar zin kibborak nogo zoz neci, izek ne, “Ka̱du̱wa̱kku̱ng zoz wa een de̱de̱, okko atidic e̱e̱ti̱ imma ngatinno̱ng adawana annita.”

22Egelemit zin nuyaha ciginnek e̱le̱tti̱, iróng a̱gga̱ ngene ucca ngatinne̱ng ci arruk enne ko̱. 23Aave da̱ nuyaiti co̱de̱ wagon irez Ye̱su̱ oroot ko̱ ojonun ki nonno. 24Uuv Si̱mo̱ne̱ Peturu nuyait neci aave ngati okko ki Ye̱su̱ ke̱, kar zin kizek ne, “Ji̱n da̱ Ye̱su̱ arruk enne ngene?”

25Utuhuwe zin demezyaiti neci kar ki̱jji̱n Ye̱su̱, a̱nne̱k ne, “Manyi, ngene ci atin okko adawanin?”

26O̱bo̱de̱k zin Ye̱su̱ nogo, izek ne, “Een e̱e̱ti̱ neci e̱e̱t ci okko atidic anna kanyike á̱há̱t ci ku̱du̱ta̱ne̱ya̱ balang.” Baling u̱du̱ta̱ne̱k enne á̱há̱t neci, kar zin kanyik Judas Iskariyot wa een ngerrti Si̱mo̱ne̱. 27Baling a̱gga̱ma̱ Judasi á̱há̱t ngati Ye̱su̱, i̱tto̱ zin Sitani#13:27 Sitan: Awu ol nonno azi ne, lo̱rye̱ni̱t wa een alaan ci anjilonyau wak bali abure Ta̱mu̱ta̱dde̱no̱ ta̱mu̱-kenga, kar Ta̱mu̱ta̱dde̱n kottowak nogo lo̱o̱c. I̱vi̱ta̱ zin anjilonya ne̱ko̱ izeto kuulo lo̱o̱ta̱ ngatu. IkebO̱no̱zzo̱k 12:7-9. nonno.

Izek zin Ye̱su̱ nonno ne, “Tu̱gu̱ zoz ci okko i̱nna̱ ogoni ko̱ ataman.” 28I̱llo̱i̱ e̱e̱t imma olle ne̱k adakce ki Ye̱su̱ ci a̱gga̱ nya ming a̱du̱wa̱k enne Judas zoz necu ko̱. 29I̱no̱n uggak ngatinne̱ng eci Judasi a̱gga̱m o̱bo̱n ci o̱ro̱bi̱ya̱u̱, a̱nne̱k i̱yo̱ko̱ Ye̱su̱ nonno ne, “Tuwa da̱i̱ne̱t cik kwo̱o̱ra̱k,” icima anyik kanyik o̱ro̱bi̱ya̱ u̱gge̱ ol cik amati. 30Baling a̱gga̱ma̱ Judasi á̱há̱t ngati Ye̱su̱, uk zin reena, imma da̱ looci ize ba̱a̱li̱n.

U̱du̱wa̱ Ye̱su̱ zoz ci okko atin Peturu amikzene nonno

31Baling uk Judasi reena, ize zin Ye̱su̱ ne, “U̱bu̱lte̱ zara cik Ngerrti E̱e̱to̱, kar zin bo̱do̱k di̱ngdi̱ngo̱ni̱ ci Ta̱mu̱ta̱dde̱no̱ ki̱ye̱la̱i̱ ngatinne. 32Ming i̱ye̱la̱i̱ di̱ngdi̱ngo̱ni̱ ci Ta̱mu̱ta̱dde̱no̱ ngatinanni, okko atin Ta̱mu̱ta̱dde̱n i̱ye̱la̱ di̱ngdi̱ngo̱n ci Ngerinne eliye cinne e̱co̱de̱ niko.”

33Emena Ye̱su̱ zoza dee kar kizek nogo ne, “Dooli, kaave arrak anna ki i̱ge̱t do̱yo̱i̱t. Orongnyang atin, ki bali ming ka̱du̱wa̱k olli Ya̱u̱do̱ ke̱, ka̱du̱wa̱kku̱ng i̱ge̱t bu̱k: ‘Iróng niga azucannu nginti kokkoye anna.’”

34Kar bo̱do̱k Ye̱su̱ kize ne, “Ka̱a̱nyu̱ng i̱yo̱ko̱ ti̱lo̱wi̱ne̱t ci een jor ci azi ne, irezto e̱le̱tti̱ niga do̱o̱k, ki baling kirezzung anna i̱ge̱t ke̱. 35Ming irezonnu niga do̱o̱k e̱le̱tti̱, ovvo atin ol a̱gga̱ ming e̱e̱ggi̱nnu̱ niga nuyak cigannik.”

U̱du̱wa̱ Peturu zoz cinne

(Ma̱te̱yo̱ 26:31-35; Marko 14:27-31; Lu̱ka̱ 22:31-34)

36I̱jji̱n zin Si̱mo̱ne̱ Peturu nonno, izek ne, “Manyi, okko dim i̱nna̱ nga?”

O̱bo̱de̱k zin Ye̱su̱ nonno, izek ne, “Iróng atin i̱nna̱ anuwanna annit rok nginti kokkoye ko̱ i̱yo̱ko̱ niko, okko atin i̱nna̱ a̱kku̱nni̱ vu̱rrta̱.”

37I̱jji̱n zin bo̱do̱k Peturu Ye̱su̱ dee, “Manyi, nya ming iróng kanuyi i̱yo̱ko̱ niko? Ka̱da̱i̱ atin zo̱ze̱ cunne.”

38O̱bo̱de̱k zin Ye̱su̱ nonno, “A̱da̱i̱ wo̱ye̱ atin i̱nna̱ de̱de̱ zo̱ze̱ cinanni? Ka̱du̱wa̱ki̱ zoz ci een de̱de̱, ming a̱jji̱nni̱ atin ol i̱nne̱ta̱ zoz cinanni amikzena atin i̱nna̱ annit lak i̱i̱yo̱ ming ngen tuulici korok!”

Currently Selected:

Jon 13: tex

Highlight

Copy