Kananet 46

U̱lu̱g Ya̱ko̱bo̱ uk Masire

1Uwe zin Israili#46:1 Israili: Uhu Ta̱mu̱ta̱dde̱n zar cik Ya̱ko̱bo̱ kize Israil. i̱jjo̱ balik anyak enne ke̱ do̱o̱k, kar baling okko enne arawa Beersheba, apahek zin wawa Ta̱mu̱ta̱dde̱n ci baatinne I̱sa̱ko̱.

2Ozozik zin Ta̱mu̱ta̱dde̱n Israil ba̱a̱l o̱no̱zo̱we̱ a̱nne̱k ne, “Ya̱ko̱bo̱! Ya̱ko̱bo̱!”

Abariz enne, “Annit icu.”

3Izek zin Ta̱mu̱ta̱dde̱n nonno ne, “Ke̱e̱ni̱ anna Ta̱mu̱ta̱dde̱n, Ta̱mu̱ta̱dde̱n ci baatunne, ma o̱ngo̱o̱le̱ gi̱i̱ imma ngati okkoye i̱nna̱ Masire, eci kadimani atin anna i̱nne̱t ize orog ci a̱ddi̱ki̱re̱ nginati. 4Kaluce atin anna rok lo̱o̱c ci Masiro korkor ki i̱nne̱ta̱, kar atin anna de̱de̱ kobodai i̱nne̱t bo̱do̱k rok lo̱o̱c ci Kanaani. Kar atin Yosevo ku̱bu̱ng ebere cigunnek azzine ciginnek.”

5Utungek zin Ya̱ko̱bo̱ Beersheba lo̱o̱c, kar logoz cik Israilo ko̱o̱tte̱ be̱e̱ti̱nne̱ng Ya̱ko̱bo̱ ki dooli cigge̱k ki ngaai toromilete balik i̱tto̱na̱k alaani nonno ke̱. 6O̱o̱tte̱ nege bo̱do̱k ki kaal balik abal nege lo̱o̱ce̱ ci Kanaani ke̱, kar Ya̱ko̱bo̱ ki dooli waginnek do̱o̱k koot Masire. 7Uwe enne ki logoz ki dooli cigge̱k macik ki cik nga̱a̱ye̱k ki dooli cigge̱k do̱o̱k Masira.

Zar cik olli Ya̱ko̱bo̱ a̱lu̱g ovvo Masire

8E̱e̱ggi̱n ne̱ko̱ zar cik logoz cik Israilo balik ovvo Masire ki be̱e̱ti̱nne̱ng:

Een Rubeni a̱bu̱ ci Ya̱ko̱bo̱.

9Iciko logoz cik Reubeni:

Hanoch, ki Pallu, ki Hezron, ki Carmi.

10Iciko logoz cik Si̱mo̱ne̱:

Jemuel, ki Jamin, ki Ohad, ki Jakin, ki Zohar, ki Shaul. Een Shauli ngerrti ngaa ci a̱kku̱ lo̱o̱ce̱ ci Kanaani.

11Iciko logoz cik Le̱vi̱:

Gershon, ki Kohath, ki Merari.

12Iciko logoz cik Ju̱da̱:

Er, ki Onan, ki Shelah, ki Perez, ki Zerah, ma̱i̱je̱ Er ki Onan a̱da̱i̱to̱ nege lo̱o̱ce̱ ci Kanaani.

Iciko logoz cik Perezi:

Hezron ki Hamul.

13Iciko logoz cik Issachari:

Tola, ki Puah, ki Jashub, ki Shimron.

14Iciko logoz cik Zebuluni:

Sered, ki Elon, ki Jahleel.

15E̱e̱ggi̱n ne̱ko̱ dooli balik a̱rri̱ta̱k ngaa ci een Le̱ya̱ Ya̱ko̱bo̱ lo̱o̱ce̱ ci een Paddan Aram, kar bo̱do̱k ki̱ti̱rra̱ buweenyinne co̱de̱ een zara Di̱na̱. E̱e̱ggi̱n logoz ki dooli cik nga̱a̱ye̱k do̱o̱k moten i̱i̱yo̱ ki i̱i̱yo̱.

16Iciko logoz cik Gadi:

Zephon, ki Haggi, ki Shuni, ki Ezbon, ki Eri, ki Arodi, ki Areli.

17Iciko logoz ki do̱le̱c ci nga̱a̱ye̱ cik Asheri:

Imnah, ki Ishvah, ki Ishvi, ki Beriah.

Ki ngooni cinne̱ng een Serah.

Iciko logoz cik Beriah:

Heber ki Malkiel.

18E̱e̱ggi̱n ne̱ko̱ dooli cik a̱rri̱ta̱k ngaa ci een Zilpah Ya̱ko̱bo̱, aanyik ba̱li̱ye̱ Labani buweenyinne Le̱ya̱ kize du̱ca̱i̱t kar dooli cigge̱k do̱o̱k kizeto omoto ki torkonom.

19Iciko logoz cik a̱rri̱ta̱k Racheli Ya̱ko̱bo̱:

Yosevo, ki Benjamin. 20Ma̱i̱je̱ Masire, i̱ti̱rra̱k Asenathi buweenyi Potiphera e̱e̱t ci wawaco o̱rge̱ ci een On ko̱ Yosevo logoz rama Manasseh, ki Ephraim.

21Iciko logoz cik Benjamini:

Bela, ki Beker, ki Ashbel, ki Gera, ki Naaman, ki Ehi, ki Rosh, ki Muppim, ki Huppim, ki Ard.

22E̱e̱ggi̱n ne̱ko̱ logoz cik Racheli a̱rri̱ta̱k Ya̱ko̱bo̱, e̱e̱ggi̱n nege do̱o̱k omoto ki we̱c.

23Icu ngerrti Dani:

Hushim.

24Iciko logoz cik Naphtali:

Jahziel, ki Guni, ki Jezer, ki Shillem.

25E̱e̱ggi̱n ne̱ko̱ logoz cik Ya̱ko̱bo̱ a̱rri̱ta̱ ngaa ci een Bilhah, aanyik Labani buweenyinne Rachel kize du̱ca̱i̱t, e̱e̱ggi̱n dooli cigge̱k do̱o̱k turgerem.

26Orkorrit Ya̱ko̱bo̱ ki dooli ciginnek ki dooli cigge̱k rok Masir, iróng kikeb ngaai cik dooli ciginnek, e̱e̱ggi̱n olli ce̱e̱z cinne do̱o̱k moten torkonom ki torkonom. 27Ovvo logoz cik e̱e̱ggi̱n rama balik a̱rri̱ta̱ Yosevo Masire ke̱, izeto olli ce̱e̱z ci Ya̱ko̱bo̱ balik ovvo Masire ke̱ do̱o̱k moten turgerem.

U̱zu̱cca̱ Ya̱ko̱bo̱ ki logoz ciginnek Masir

28I̱yo̱ko̱ i̱tto̱n Ya̱ko̱bo̱ Ju̱da̱ kuk o̱o̱we̱ cinne ngati Yosevo, kar kuruba o̱to̱n ci aave lo̱o̱ce̱ ci een Goshen. Baling u̱zu̱cca̱ nege Goshen, 29ottod Yosevo toromile wa a̱gu̱ru̱t zi̱gi̱re̱ ko̱ kar zin kuk arrak oowa lo̱o̱ce̱ ci Gosheni kuk ku̱ru̱me̱k baatinne Israil gool. Baling okko Yosevo i̱ye̱le̱k nonno ele, a̱gga̱m zin enne baatinne kar ku̱tu̱lu̱ u̱u̱mu̱c.

30Iizek zin Israili Yosevo ne, “I̱yo̱ko̱ korongi ka̱da̱k labak, eci anna kicini i̱nne̱t eliya ming ngen i̱nna̱ arugi.”

31Izek zin Yosevo gotonoggi ki olli ce̱e̱z ci baatinne do̱o̱k ne, “Kokko anna ta̱dde̱na̱ kokko kozozik alaan ka̱nne̱k ne, ‘I̱vi̱ta̱ annit gotonogga ki ol cik ce̱e̱z ci baba balik abak lo̱o̱ce̱ ci Kanaani. 32E̱e̱ggi̱n ol ne̱ke̱ ol cik abal kaal; anyaktta nege ki kaal cik anyak nege do̱o̱k.’ 33Ming okko alaani awuyung okko a̱jji̱nne̱ azi ne, ‘Li̱ngli̱ngo̱n cunno̱ng ni̱i̱?’ 34Izettek ne ‘Ke̱e̱ggi̱nna̱ naga du̱cca̱k cigunnek cik kabala kaal baling ngen ke̱e̱ggi̱nna̱ dooli rok i̱yo̱ko̱ niko, ki baling ogon ji̱ji̱ti̱gga̱c ke̱.’ Kar atin enne ka̱a̱nyu̱ng abait lo̱o̱ce̱ ci Gosheni, eci akaka ming abak tuwayowa ojonun ki ol cik Masiro.”

Currently Selected:

Kananet 46: tex

Highlight

Copy