Kananet 47

U̱ru̱mto̱ Ya̱ko̱bo̱ ki alaan ci Masiro

1Uk Yosevo kar ku̱du̱wa̱k alaan zoz cu, “I̱ki̱ya̱ baba ki gotonogga ki kaal cigge̱k do̱o̱k, a̱vvu̱ lo̱o̱ce̱ ci Kanaani kar i̱yo̱ko̱ ka̱vvu̱to̱ lo̱o̱ce̱ ci een Goshen.” 2Atahala enne gotonoggi tu̱r kar kuk ki̱ye̱le̱k alaan.

3I̱jji̱n zin alaani gotonoggi Yosevo, “Li̱ngli̱ngo̱n cinno̱ng ni̱i̱?”

O̱bo̱dde̱k nege nonno, “E̱e̱ggi̱n du̱cca̱ha̱ cigunnek tuwayok, ki bali be̱e̱ti̱gga̱k ke̱.” 4A̱nne̱k nege nonno ne, “Ka̱vvu̱nna̱ naga kovvo kabaka arrak ngatu do̱yo̱i̱t, eci a̱ppwa̱ magiz oroot lo̱o̱ce̱ ci Kanaani, kar i̱llo̱i̱ rok arte cik ege kaala. Imma i̱yo̱ko̱, anyik du̱cca̱k cigunnek kabaito lo̱o̱ce̱ ci een Goshen Masira.”

5A̱nne̱k zin alaani Yosevo ne, “I̱vi̱ta̱i̱ ol cigunnek i̱nne̱t baatunne ki gotonoggu ko̱, 6aave zin looci ci Masiro a̱tte̱ cunne; anyik baatunne ki gotonoggu kabaito lo̱o̱ce̱ ci abunna. Anyik kabaito lo̱o̱ce̱ ci Gosheni. Kar ming a̱gga̱ i̱nna̱ ol u̱gge̱ ngatinne̱ng cik anyak arizet ci aave do̱, anyik nogo kabalit kaal cigannik.”

7Anyaha zin Yosevo baatinne Ya̱ko̱bo̱ kar ki̱ye̱le̱k alaan. Imma baling u̱mu̱yu̱k Ya̱ko̱bo̱ nonno, 8i̱jji̱n zin alaani nonno, “Anyai i̱nna̱ e̱rki̱nya̱ izong?”

9Kar Ya̱ko̱bo̱ kizek nonno ne “E̱e̱ggi̱n e̱rki̱nya̱ cik kowoye anna lo̱o̱co̱we̱ o̱bo̱n co̱de̱ ki moten i̱i̱yo̱ (130). Idice annit e̱rki̱nya̱ kar kokkomit, iróng atubo ki e̱rki̱nya̱ cik owoye ciko baba.” 10U̱mu̱yu̱k zin Ya̱ko̱bo̱ alaan ci Masiro kar zin kiyok kuk.

11Aanyik zin Yosevo baatinne ki gotonoggi kabaito Masire, kar kaanyik lo̱o̱c ci a̱zi̱ze̱, ngati ojono ki orog ci a̱ddi̱ki̱re̱ een Rameses#47:11 Orog ci a̱ddi̱ki̱re̱ een Rameses: Een Rameses lo̱o̱c ci Goshen. ki baling a̱du̱wa̱ alaani ke̱. 12Aanyik bo̱do̱k Yosevo da̱i̱ne̱t baatinne ki gotonoggi ki ol wak ce̱e̱z ci baatinne do̱o̱k, ki ming aavtte nege ce̱e̱zi̱nne̱.

Yosevo ki magiz

13I̱llo̱i̱ da̱ da̱i̱ne̱t lo̱o̱co̱we̱ ne̱ke̱ do̱o̱k eci a̱ppwa̱ da̱ magiz oroot; egerzan zin lo̱o̱c ci Masiro ki ci Kanaani zo̱ze̱ ci magizo. 14Uluta zin Yosevo o̱ro̱bi̱ya̱ cik aavtte Masire ki Kanaan balik utene nege labi, kar enne kanyahak ce̱e̱z ci alaano. 15Baling ovvo o̱ro̱bi̱ya̱na̱ cik olli Masiro ki cik olli Kanaani edeccai, i̱vi̱tta̱k zin olli Masiro do̱o̱k Yosevo kar kizettek ne, “Inyet da̱i̱ne̱t! Nya ming kovvo atin naga ka̱da̱i̱ eberene cigunnek ko̱? Edeccai agit o̱ro̱bi̱ya̱na̱ ne lai.”

16Izek Yosevo nogo ne, “Anyaktta zin kaal cuggo̱k, katalakung atin anna i̱ge̱t labi tiine, ming edeccai i̱ge̱t o̱ro̱bi̱ya̱na̱.” 17Anyakttak zin nege kaal cigge̱k Yosevo, kar enne kaanyik nogo labi, atal vartange ngatinne̱ng, ki a̱zza̱ ki eeza, ki tiin ki zi̱gi̱re̱. Kar enne keela nogo e̱rki̱t neci ngati ataline kaal cigge̱k labine.

18Ma̱i̱je̱ baling edeccai e̱rki̱t neci, i̱vi̱tta̱k zin nege Yosevo e̱rki̱t ci reng, kar kizeto ne, “Iróng wo̱ye̱ naga kamikzeni zoz ddi̱ki̱ryo̱i̱t, edeccai agit o̱ro̱bi̱ya̱na̱ kar kaala cigga̱k izeto cigunnek do̱o̱k, i̱zzi̱ i̱yo̱ko̱ rok gi̱i̱ imma ci kanyaka bu̱k kize zar e̱le̱tti̱ cigga̱k ko̱ ki lo̱o̱c cinna do̱ niko. 19Nya wo̱ye̱ ka̱da̱i̱ naga magiz eberene cigunnek, agit ki lo̱o̱c cinna do̱o̱k? Tuwait agit ki lo̱o̱c cinna do̱o̱k zo̱ze̱ ci da̱i̱nto̱, kar naga ki lo̱o̱c cinna do̱o̱k kizetta du̱cca̱k cik alaano. Inyet agit i̱nyo̱mo̱ abunna karugna, gerza ming ka̱da̱kna̱, kar iróng looci aave ollin.”

20Utuwak zin Yosevo lo̱o̱c alaan. U̱tu̱yye̱k zin olli Masiro do̱o̱k ma̱ne̱n cigge̱k, eci ize a̱ppwa̱ magiz ngatinne̱ng oroot. Ize looci do̱o̱k ci alaano, 21aanyik zin Yosevo olli Masiro do̱o̱k kizeto du̱cca̱k. 22Ngen zin Yosevo kutuwa lo̱o̱c ci olli wawaco,#47:22 Olli wawaco: Ala nege ta̱mu̱ta̱dde̱ne̱t cik meelek. eci nege amuda da̱i̱ne̱t ngati alaano kar kanyait da̱i̱ne̱t cik meelek aanyik enne nogo ko̱. Zoz zin ci iróng nege utene lo̱o̱c cinne̱ng ko̱ nenen necu.

23Izek Yosevo ol ne, “I̱yo̱ko̱ zin, kutuwaung anna i̱ge̱ta̱ ki lo̱o̱c cunno̱ng do̱o̱k kizeto cik alaano, iciko i̱nyo̱mo̱ oot e̱e̱vi̱t lo̱o̱c. 24Ma̱i̱je̱ ming i̱bbi̱r looci, anycik labi u̱gge̱ cikidik#47:24 Labi u̱gge̱ cikidik: Ming etteda e̱e̱ti̱ labi cuwalit tu̱r, ovvo nege ovvoye cuwal co̱de̱ anyike alaan. ma̱ne̱ne̱ cuggo̱k kize cik alaano. Kar u̱zu̱tte̱ labi cik meelek kize i̱nyo̱mo̱ ki da̱i̱ne̱t cik olli ce̱e̱zu̱.”

25O̱bo̱dde̱k zin nege Yosevo a̱nne̱k ne, “I̱ti̱ri̱zu̱ i̱nna̱ baiz cinna̱ng. Anyik bai manyi cinna kicinnet agit ju̱rru̱m; ke̱e̱ggi̱n atin naga du̱cca̱k cik alaano.”

26Eteherek zin Yosevo zoz neci waraga kize lo̱ti̱nno̱k cik obod ki olli Masiro, azi ne, ming ettedai labina, anycik labi u̱gge̱ cikidik kize cik alaano. Ize lo̱o̱c ci olli wawaco do̱ niko ci iróng een cinne.

27Abaito zin olli Israilo Masire lo̱o̱ce̱ ci een Goshen. U̱tu̱yya̱ zin nege lo̱o̱cco̱k nginati kar kizeto bo̱to̱ro̱ kanyait dooli cik meelek giir.

28Abak Ya̱ko̱bo̱ Masire e̱rki̱nya̱ omoto ki turgerem kar kizeto e̱rki̱nya̱ cik abahe enne do̱o̱k o̱bo̱n co̱de̱ ki moten we̱c ki turgerem (147). 29Baling ize ojon daizi ngati Israilo, utu ngerinne Yosevo kar zin kizek ne, “Ming ireza i̱nna̱ annit, du̱l da̱ keet ize ne, ‘Ki̱ye̱le̱ki̱ atin bunnat ki zoz ci kazunni anna i̱nne̱ta̱.’ Ma adaweka Masir udut ming ka̱da̱ha̱, 30ma̱i̱je̱ ming kuwa anna ungnyak ki be̱e̱ti̱ga̱ni̱k, odongtang Masire zee rok ngin neci kar zin adayang annit ngati adawine nege.”

O̱bo̱de̱k zin enne, “Kogonni atin ki ming a̱du̱wa̱ i̱nna̱ ko̱.”

31A̱nne̱k zin Ya̱ko̱bo̱ nonno ne, “Du̱l da̱ keet ngatinanni.” U̱du̱l zin Yosevo keet zare cik Ta̱mu̱ta̱dde̱no̱, kar zin Israili kala Ta̱mu̱ta̱dde̱n ngati i̱ti̱re̱ne̱ keete wa o̱o̱mti̱ne̱ enne ko̱.

Currently Selected:

Kananet 47: tex

Highlight

Copy