Kananet 48

Manasseh ki Ephraim

1Kar i̱i̱te̱n imma vu̱rrta̱, u̱du̱kta̱k ol Yosevo zoz cu, “Omori baatunne.” Orkorrit zin Yosevo ki logoz ciginnek rama, Manasseh ki Ephraim koot ki̱vo̱nni̱t Ya̱ko̱bo̱. 2Ma baling u̱du̱kta̱k ol Ya̱ko̱bo̱ zoz a̱nne̱k ne, “I̱ki̱ya̱ ngerunne wa een Yosevo okko i̱vo̱ni̱n.” Ommogek zin Israili i̱ba̱ti̱ne̱ kar kitinga ka̱vvu̱ je̱e̱na̱ kwe̱e̱na̱.

3Izek zin Ya̱ko̱bo̱ Yosevo ne, “I̱ye̱le̱ya̱ Ta̱mu̱ta̱dde̱n wa anyak Komiz do̱o̱k ele cinne ngati een Luz, lo̱o̱ce̱ ci Kanaani, kar enne ku̱mu̱yu̱wa̱ annit nginati, 4kar zin kizeya ne, ‘Kokko atin anna kaanyi ize bo̱to̱ro̱c ci anyai kaal ki dooli cik meelek. Kaanyi i̱nne̱t ize zu̱we̱ ci a̱ppwe̱, kar anna kanyik lo̱o̱c cu dooli cik dooli cigunnek kize cinne̱ng udut.’”

5Izek zin Ya̱ko̱bo̱ Yosevo ne, “I̱yo̱ko̱ zin, ovvo logoz cik a̱rri̱ta̱ i̱nna̱ Masire baling ki̱ki̱ya̱ anna ko̱, ovvo atin nege e̱e̱ggi̱n cigannik; Ephraim ki Manasseh, ki i̱yo̱ko̱ Rubeni ki Si̱mo̱ne̱ ming e̱e̱ggi̱n cigannik ko̱. 6Ma̱i̱je̱ logoz cik a̱rri̱ta̱ i̱nna̱ vu̱rrte̱ cinne̱ng ovvo atin ne̱ke̱ e̱e̱ggi̱n cigunnek; okko lo̱o̱ce̱ ci ovvo nege aragiz, ikebje atin zara cik gotonoggi cigge̱k. 7Ki baling ka̱mi̱re̱ anna o̱rge̱ ci een Paddan, a̱da̱k zin Racheli lo̱o̱ce̱ ci Kanaani ming ngen naga kaavtiya goola, ojono ki orog ci een Ephrath. Kadaweya zin anna nonno gool abanyca ngati okko ki Ephrath.” Okko zin vu̱rrta̱ awu ol Ephrath kize Betelem.

8Baling icin Israili dooli cik Yosevo, i̱jji̱nno̱ ize ne, “Ciko ngene ne̱ko̱?”

9A̱nne̱k Yosevo baatinne ne, “E̱e̱ggi̱n ne̱ko̱ logoz cik aanya Ta̱mu̱ta̱dde̱n ngatu Masire.”

Ize zin Israili ne, “Nyahaka nogo rok annit ngatu kar anna ka̱mu̱yu̱k nogo.”

10Agaranyce zin ba̱li̱ye̱ ebere cik Israili eci enne ize ma̱ti̱yo̱c, iróng ngen acine ju̱rru̱m. Anyahak zin Yosevo dooli ji̱ji̱ti̱nne̱ng ojonun, kar zin baatinne kizza nogo kar bo̱do̱k katabung nogo.

11Izek Israili Yosevo ne, “Iróng ba̱li̱ye̱ anna ka̱gga̱ ming kokko atin kacinni ngu̱m cunne dee, kar zin i̱yo̱ko̱ aanya Ta̱mu̱ta̱dde̱n kicin dooli cigunnek bu̱k.”

12Odonga zin Yosevo dooli onyotoi cik Israili, kar zin Yosevo ku̱lu̱le̱ kicin ngu̱m cinne lo̱o̱c. 13Uwe zin Yosevo nogo do̱o̱k, a̱gga̱m enne Ephraim a̱tte̱ ci a̱zzo̱ ngati enne edevo ki Israil a̱tte̱ ci angeto, kar ka̱gga̱m Manasseh a̱tte̱ ci angeto ngati enne aave edevo ki Israil a̱tte̱ ci a̱zzo̱, kar kanyahak nogo nonno ojonun. 14Abarik Israili i̱tto̱na̱ a̱zzi̱t cinne a̱zzo̱ kar karik oo ci Ephraimi, ming idica enne nu̱nu̱n, kar kabaric azzin ciginnek katadek a̱zzi̱t ci angeto oo ci Manasseh, ming een Manasseh a̱bu̱ nu̱nu̱n.

15U̱mu̱yu̱k zin enne Yosevo kar kize ne,

“Anyik bai Ta̱mu̱ta̱dde̱n ci be̱e̱ti̱ga̱ni̱k

Aburaham ki I̱sa̱ko̱ bali owo ki nonno ke̱,

Ta̱mu̱ta̱dde̱n wa een bali tuwayoit cinanni

i̱i̱nya̱ do̱o̱k baize cinanni rok i̱i̱te̱n cu,

16Anjilo#48:16 Anjilo: Ozoz Ya̱ko̱bo̱ Anjilo ngatu kize Ta̱mu̱ta̱dde̱n. wa eelanna annit kaale cik gerzek do̱o̱k,

anyik bai nonno ka̱mu̱yu̱k logoz ne̱ko̱.

Anyik bai ol kutu nogo zare cigannik

ki zar cik be̱e̱ti̱ga̱ni̱k Aburaham ki I̱sa̱ko̱,

anyik bai nogo ki̱ti̱rre̱t kizeto meele giir

lo̱o̱ta̱ ngatu.”

17Baling icin Yosevo baatinne ming atadek a̱zzi̱t ci a̱zzo̱ oo ci Ephraimi, iróng enne atalne; a̱gga̱m zin enne a̱zzi̱t ci baatinne odong o̱o̱we̱ ci Ephraimi kar karik oo ci Manassehi. 18Izek Yosevo baatinne ne, “Iróng een niko baba, lo̱gu̱t ci een a̱bu̱ icu; tadek a̱zzi̱t cunne a̱zzo̱ oo cinne.”

19Ma̱i̱je̱ baatinne abure kar kize ne, “Ka̱gga̱ anna, ngeranni, ka̱gga̱ anna. Okko atin enne bu̱k anyak dooli cik meelek, okko atin enne bu̱k een e̱e̱t ci a̱ddi̱ki̱re̱. Okko atin gotoniya wa dici ko̱ a̱ddi̱ki̱rne̱ nonno, ovvo ol ciginnek anyak o̱ro̱gjo̱k cik meelek.” 20U̱mu̱yu̱k zin enne nogo wazin neci kar kize ne,

“Abung atin olli Israilo ma̱yu̱we̱ne̱t cu zare cigunnek azi ne,

‘Anyik bai Ta̱mu̱ta̱dde̱n kidimanung ki i̱yo̱ko̱ Ephraim ki Manasseh.’”

Aarik zin enne Ephraim ka̱vvu̱ o̱o̱we̱ ci Manasseh.

21Izek zin Israili Yosevo ne, “Ize ojon annit daizi, eelanni atin Ta̱mu̱ta̱dde̱n kar okkoyyi rok lo̱o̱c ci be̱e̱ti̱gu̱nne̱k. 22Imma ngatunne e̱e̱ti̱ ci abali gotonoggu ko̱, kaanyi zin i̱nne̱t lo̱o̱c ci abunna ka̱gga̱ma̱ ngati olli Amorites illawe cinanni ki laanit cigannik.”

Currently Selected:

Kananet 48: tex

Highlight

Copy