Kananet 29

Arawa Ya̱ko̱bo̱ Paddan Aram

1Akate zin Ya̱ko̱bo̱ eroni cinne kar kuzuca lo̱o̱c ci olli je̱e̱ni̱. 2Imma nginati icin enne iit, anyak tenyani cik eezau e̱e̱ggi̱n i̱i̱yo̱ eel iit abanyca, eci auduz ol kaal nginati. Okko bee ci aave utuge ci iit neci ke̱ a̱ddi̱ki̱re̱ oroot. 3Baling a̱vvu̱to̱ kaala do̱o̱k nginati, ovvo tuwayowa a̱ju̱k bee neci utuge ci iit neci kar kaala kuudde. Kar atidic kaartik bee neci utug ci iit neci.

4I̱jji̱n zin Ya̱ko̱bo̱ tuwayok, “Gotonogga, a̱vvu̱nnu̱ niga o̱rge̱ jang?”

Izektek nege ne, “Ka̱vvu̱nna̱ naga o̱rge̱ ci een Haran.”

5Izek enne nogo ne, “A̱gga̱yyu̱ e̱e̱t ci een zara Laban wa een ji̱ji̱ti̱ne̱ Nahor?”

O̱bo̱dde̱k nege, “I̱i̱ny ka̱gga̱yya̱ nonno.”

6I̱jji̱n zin bo̱do̱k Ya̱ko̱bo̱, “Abunna enne?”

O̱bo̱dde̱k zin nege nonno, “I̱i̱ny, abunna enne, buweenyinne ci een Rachel neci meer a̱kku̱ angida ki eeza ke̱.”

7Ize zin Ya̱ko̱bo̱ ne, “Icinnet, ngen koor aave ta̱dde̱na̱; ngane i̱i̱ ci kalute kaal. Uuduzet eeza kar o̱o̱tte̱ koot kegec.”

8O̱bo̱dde̱k zin nege Ya̱ko̱bo̱, “I̱llo̱i̱, kereyya arrak eeza kutubte kar kiyotit bee utuge ci iit necu. Kar zin atidic kuuduza eeza.”

9Baling ngen enne ozozo ki nogo niko, i̱ki̱ya̱ Racheli angida ki eeza cik baatinne, eci enne een tuwayoit. 10Baling icin Ya̱ko̱bo̱ Rachel buweenyi Labani, gotoni yaatinne, ki eeza cik Labani, uk zin enne rok iit kar kiyot bee neci utuge ci moru kar zin kuuduz eeza cik malotinne. 11Izza zin Ya̱ko̱bo̱ Rachel kar ku̱tu̱lu̱ oroot. 12U̱du̱wa̱k zin enne Rachel ming een enne boor co baatinne, ngerrti Rebekah. I̱vi̱r zin Racheli kuk ku̱du̱wa̱k baatinne.

13Baling izik Labani kaviyak cik Ya̱ko̱bo̱, ngerrti ngononi, i̱vi̱ra̱ zin enne uk u̱ru̱me̱k nonno gool. Izza enne nonno oroot kar kanyahak ce̱e̱z cinne, kar nginati Ya̱ko̱bo̱ ku̱du̱wa̱k nonno zoz ci anyaha enne do̱o̱k. 14Izek zin Labani nonno ne, “E̱e̱ni̱ i̱nna̱ bi̱ye̱ cigannik ele.”

I̱ti̱k Ya̱ko̱bo̱ Le̱ya̱ ki Rachel

Baling abaito Ya̱ko̱bo̱ ki malotinne nye̱lo̱k co̱de̱, 15izek zin Labani nonno ne, “Eci i̱nna̱ e̱e̱ni̱ boorit cinanni, abunna ming a̱li̱ngli̱ngi̱ i̱nna̱ ngatinanni ollin? Du̱wa̱ kaal cik orongi i̱nna̱.”

16Anyak da̱ Labani dooli cik nga̱a̱ye̱k rama; azi zar cik do̱le̱c wa a̱ddi̱ki̱re̱ ko̱ ne Le̱ya̱, okko cidici azi zar ne Rachel. 17Iróng da̱ ebere cik Le̱ya̱ acine ju̱rru̱m, imma ngooniya cidici een Rachel ko̱ a̱zi̱ze̱, alina da̱ oroot. 18Irez da̱ gon Ya̱ko̱bo̱ Rachel kar kizek Laban ne, “Ka̱li̱ngli̱ngo̱ni̱ki̱ atin anna i̱nne̱t e̱rki̱nya̱ turgerem kar inya Rachel kize ngaa cinanni.”

19A̱nne̱k zin Labani nonno ne, “Maya abarik kaanyi anna i̱nne̱t ti̱k Rachel ngati kanyike e̱e̱t imma. Ka̱vvu̱t ngatu ki annita.” 20I̱li̱ngli̱ng zin Ya̱ko̱bo̱ e̱rki̱nya̱ turgerem kar atin ki̱ti̱k Rachel, u̱tu̱gu̱zzo̱ e̱rki̱nya̱ ne̱ke̱ ngatinne ki ci een gwo̱o̱nya̱ cikidik eci enne irez nonno oroot.

21Izek zin Ya̱ko̱bo̱ Laban ne, “Inya ngaa cinanni. Kedeca anna e̱rki̱nya̱ cigannik, korongi kabakta ki nonno.”

22Utu zin Labani olli o̱rgu̱ do̱o̱k kar zin kidiman kwo̱o̱r. 23Baling ize looci ba̱a̱li̱n, uwe buweenyinne Le̱ya̱ kar kaanyik Ya̱ko̱bo̱, kar zin Ya̱ko̱bo̱ ka̱ta̱gu̱zzo̱ ki nonno. 24Kar Labani kaanyik du̱ca̱i̱t ci nga̱a̱ye̱ een zara Zilpah buweenyinne ki̱li̱ngli̱ngo̱zi̱k nonno.

25Baling ize looci nge̱rre̱t, ize abarik Le̱ya̱! Izek zin Ya̱ko̱bo̱ Laban ne, “Nya ci ogonika i̱nna̱ annit ko̱? Ka̱li̱ngli̱ngo̱ni̱ki̱ anna i̱nne̱t ba̱li̱ye̱ e̱rki̱nya̱ turgerem kar korong ki̱ti̱k Rachel, nya ci a̱lu̱ta̱ niko ko̱?”

26O̱bo̱de̱k zin Labani nonno, “Akaka keere cinna̱ng ming a̱ti̱ye̱ do̱le̱c cidici ko̱ oowa arrak ming ngen ngooniya ci a̱ddi̱ki̱re̱ ko̱ ngen ki̱ti̱ye̱. 27Rewo arrak kedecca i̱i̱nya̱ turgerem ci adahe ol rucenet ci Le̱ya̱ kar kaanyi Rachel bu̱k ming a̱li̱ngli̱ngngo̱ni̱ka̱ bo̱do̱k e̱rki̱nya̱ cik een turgerem dee.”

28Elema zin Ya̱ko̱bo̱ zoz neci. Edeca zin i̱i̱nya̱ turgerem cik rucentak ki Le̱ya̱, kar Labani kaanyik bo̱do̱k Ya̱ko̱bo̱ ki̱ti̱k Rachel bu̱k kize ngaa cinne. 29Kar Labani kaanyik du̱ca̱i̱t cinne nga̱a̱ye̱ een zara Bilhah ko̱ Rachel. 30Abaito zin Ya̱ko̱bo̱ ki Rachel bu̱k, irez zin enne Rachel oroot kommog Le̱ya̱. Kar zin enne ki̱li̱ngli̱nge̱k Laban e̱rki̱nya̱ turgerem.

Dooli cik Ya̱ko̱bo̱

31Baling icin Manyi iróng Ya̱ko̱bo̱ irez Le̱ya̱, oo zin enne keng cinne ki̱ti̱r, ma̱i̱je̱ ngatu ngen Racheli abile. 32Anyaho zin Le̱ya̱ kar ki̱ti̱rra̱ do̱le̱c ci maci. Akatek zar ciginnek kize Reuben,#29:32 Reuben: Utuge ci I̱bu̱ru̱, azi keng cik zar ne̱ko̱ ne, icin Ta̱mu̱ta̱dde̱n pirnanet cinanni. eci enne azi ne, “Eci Manyi icin matiz cinanni. De̱de̱ okko atin e̱e̱ti̱ cinanne ireza annit i̱yo̱ko̱.”

33Anyaho zin bo̱do̱k Le̱ya̱ dee, baling okko enne a̱rri̱ta̱ ngerinne, ize ne, “Eci Manyi iziyan iróng e̱e̱ti̱ imma ireza annita, aanya enne annit do̱le̱c cu bo̱do̱k.” Kar zin enne kakatek zar cik een Si̱mo̱ne̱.#29:33 Si̱mo̱ne̱: Utuge ci I̱bu̱ru̱, azi keng cik zar ne̱ko̱ ne, aziye e̱e̱ti̱ imma.

34Anyaho bo̱do̱k enne dee kar ki̱ti̱rra̱ do̱le̱c ci maci, kar kakatek zar cik een Le̱vi̱#29:34 Le̱vi̱: Utuge ci I̱bu̱ru̱, azi keng cik zar ne̱ko̱ ne, ireza annita. kar kize ne “I̱yo̱ko̱ vu̱rrta̱ okko atin mac cinanne a̱kku̱nna̱ka̱ ojonun ki annita, eci ki̱ti̱rra̱ anna nonno logoz cik macik i̱i̱yo̱.”

35Anyaho bo̱do̱k Le̱ya̱ dee kar ki̱ti̱rra̱ do̱le̱c ci maci kar kize ne, “I̱yo̱ko̱ kinnati atin anna Manyi.” Akatek zin enne do̱le̱c zar cik een Ju̱da̱.#29:35 Ju̱da̱: Utuge ci I̱bu̱ru̱, azi keng cik zar ne̱ko̱ ne, inatit. Ibil zin enne ti̱rra̱.

Currently Selected:

Kananet 29: tex

Highlight

Copy