Kananet 28

Okko Ya̱ko̱bo̱ ngati malotinne Laban

1Utu zin I̱sa̱ko̱ Ya̱ko̱bo̱ kar ku̱mu̱yu̱k nonno, kar ki̱ti̱lo̱ kizek ne, “Ma a̱ti̱i̱ dooli cik ol cik een Kanaan. 2Abarik bit lak co̱de̱ lo̱o̱ce̱ ci Paddan Aram, ce̱e̱ze̱ ci Bethuweli be̱e̱ti̱ yaatunne. Ti̱k ngaa cunne nginati, doolinne cik malotunne Labani. 3Anyik Ta̱mu̱ta̱dde̱n wa anyak Komiz do̱o̱k ka̱mu̱yu̱ki̱n kar kaanyi ti̱ra̱ dooli cik meelek kizeto zu̱we̱n cik meelek. 4Aanyi atin Ta̱mu̱ta̱dde̱n eezet ki dooli cik dooli cigunnek ki bali ming a̱mu̱yu̱k enne Aburaham ke̱. Aanyi atin bo̱do̱k Ta̱mu̱ta̱dde̱n lo̱o̱c ci abahe ki i̱yo̱ko̱ i̱do̱ngi̱ ko̱, ki bali aanyik enne Aburaham ke̱.” 5I̱tto̱n zin I̱sa̱ko̱ Ya̱ko̱bo̱ kuk rok Paddan Aram kuk ka̱vvu̱to̱ ki malotinne Laban, ngerrti Bethuweli wa een olli Aramean, gotoni Rebekah, e̱e̱ti̱ Ya̱ko̱bo̱ ki I̱sa̱u̱.

6Baling izik I̱sa̱u̱ zoz ci a̱mu̱yu̱we̱ I̱sa̱ko̱ Ya̱ko̱bo̱ kar ki̱tto̱n nonno kuk ngati malotinne Paddan Arama, abunna okko a̱ti̱k ngaa nginati, kar bo̱do̱k baling a̱mu̱yu̱k nonno ke̱, i̱lo̱t a̱nne̱k ne “Ma a̱ti̱i̱ ngaa ci ol cik een Kanaan,” 7kar zin Ya̱ko̱bo̱ kizik zoz ci baatinne ki yaatinne kar kuk ngati malotinne Paddan Arama. 8A̱gga̱ zin I̱sa̱u̱ ju̱rru̱m ming iróng baatinne I̱sa̱ko̱ elemi ngaai cik olli Kanaani; 9uk zin enne I̱sa̱u̱ ngati malotinne Ismail kar ki̱ti̱k buweenyinne ci een zara Mahalath, ngooni Nebaioth. Otorek zin I̱sa̱u̱ Mahalath ngaai balik a̱ti̱k enne oowa ke̱. Een Ismaili ngerrti Aburahami.

Onoze Ya̱ko̱bo̱ o̱rge̱ ci een Bethel

10Utungek zin Ya̱ko̱bo̱ orog cinne̱ng Beersheba lo̱o̱c kar kuk o̱rge̱ ci een Haran. 11Baling uzuca enne ngin imma, i̱ye̱be̱z nginati eci i̱tto̱ i̱i̱. Idima zin bee imma nginati kar zin katadoi oo cinne kar ka̱ta̱ngu̱. 12Onoze enne ngati acine gool ci anyak le̱ti̱te̱t aave lo̱o̱ta̱ ngatu, kar kuk rok ta̱mu̱-keng. Kar kicin anjilonya cik Ta̱mu̱ta̱dde̱no̱ ming ottod ne̱ke̱, ovvo uggak aluccai go̱o̱le̱ neci. 13Imma go̱o̱le̱ neci ta̱dde̱na̱, abile Manyi nginati, kar enne kize ne, “Ke̱e̱ni̱ anna Manyi, Ta̱mu̱ta̱dde̱n ci baatunne Aburaham ki baatunne I̱sa̱ko̱. Kaanyi atin i̱nne̱t ki dooli cigunnek lo̱o̱c ci oonge i̱nna̱ ko̱. 14Ovvo atin dooli cigunnek atubo ki azac ci lo̱o̱tu̱, azawonik atin dooli cigunnek lo̱o̱cco̱k cik aavtte nyigja ki je̱e̱na̱, ki bo̱do̱k i̱do̱wa̱ ki i̱do̱li̱ya̱. Ovvo olli lo̱o̱tu̱ do̱o̱k amuda ma̱yu̱we̱ne̱t ngatunne ki dooli cigunnek. 15Kaave anna ngatunne kar atin kuzutin odohize ngati okkoye, kanyahanni atin i̱nne̱t kobodani rok lo̱o̱c cu. Iróng atin anna kungneki lo̱o̱c ming ngen anna kedeca zoz bali ka̱du̱wa̱ki̱ ke̱.”

16Baling itinga Ya̱ko̱bo̱ ungnyahe, i̱no̱n enne azi ne, “De̱de̱ aave Manyi ngatu, iróng zin da̱ anna ka̱gga̱.” 17O̱to̱ngo̱o̱le̱ zin enne lo̱o̱c kar kize ne, “A̱vi̱r bi̱ye̱ta̱ ngintu! Ogon ngintu ki ce̱e̱z ci Ta̱mu̱ta̱dde̱no̱; een necu aran ci ta̱mu̱-kengo.”

18Imma nge̱rre̱ti̱n ci reng, idima zin Ya̱ko̱bo̱ bee bali atadane enne oo ke̱ kar kadawek lo̱o̱c kibil, kar ku̱du̱te̱k maal bee neci. 19Akatek zin enne ngin neci kize Bethel,#28:19 Bethel: Utuge ci I̱bu̱ru̱, azi keng cik zar ne̱ko̱ ne, Ce̱e̱z wa Ta̱mu̱ta̱dde̱no̱. ming nu̱nu̱n azi zar cik orog neci arrak ba̱li̱ye̱ ne Luz.

20Idiman zin Ya̱ko̱bo̱ olom, azi ne, “Ming aave Ta̱mu̱ta̱dde̱n ngatinanni kar kicina annit ngati kerone kar kaanya atin da̱i̱ne̱t ki ru̱u̱ma̱ni̱ 21kar atin anna ki̱mi̱re̱ labak kuk ce̱e̱ze̱ ci baba, kar zin Manyi kize Ta̱mu̱ta̱dde̱n cinanni 22kar bee bali karike anna kize lolac ke̱ kize atin Ce̱e̱z wa Ta̱mu̱ta̱dde̱no̱, kar atin kaala cik aanya i̱nna̱ annita ko̱, kokko atin anna kaanyi i̱nne̱t Ta̱mu̱ta̱dde̱n co̱de̱ kaale cik e̱e̱ggi̱n omoto.”

Currently Selected:

Kananet 28: tex

Highlight

Copy