Kananet 27

A̱mu̱yu̱k I̱sa̱ko̱ Ya̱ko̱bo̱

1Baling ize I̱sa̱ko̱ ma̱ti̱yo̱c kar bo̱do̱k kize ru̱be̱n, utu zin i̱i̱te̱n imma a̱bu̱ cinne I̱sa̱u̱, “Ngeranni.”

Awe zin azi ne, “Wou baba.”

2Baling okko I̱sa̱u̱ a̱kku̱, a̱nne̱k zin I̱sa̱ko̱ nonno ne, “Kiize anna ma̱ti̱yo̱c, a̱vvu̱ daizi to. 3Dima lanit wagunnek ko̱ kar bit zara, bit kataka gi̱i̱ imma ci kacubani. 4Ming uk anyaha, aak u̱u̱ci̱ cik irez zinin cinanne kar nyahaka kadau, abunna ka̱mu̱yu̱ki̱ ming ngen anna ka̱da̱u̱.”

5I̱yo̱ko̱ azikne da̱ Rebekah baling i̱lo̱t I̱sa̱ko̱ ngerinne I̱sa̱u̱. Baling okko I̱sa̱u̱ okko liyo kuk kanyahak baatinne i̱di̱ng, 6a̱nne̱k zin Rebekah ngerinne wa dici een Ya̱ko̱bo̱ ko̱ ne, “Cinno, kiziya anna yaatunne zoz ci a̱du̱wa̱k baatunne gotonnu I̱sa̱u̱ a̱nne̱k ne, 7‘Bit nyahaka e̱le̱gi̱t imma kar aak ju̱rru̱m kadau, kar anna ka̱mu̱yu̱wi̱n ngu̱me̱ ci Manyi ming ngen anna ka̱da̱u̱.’ 8Ize zin Rebekah ne, i̱yo̱ko̱ zin ngeranni, ziyo ju̱rru̱m kar tu̱gu̱ zoz ci ka̱du̱wa̱ki̱ anna ko̱: 9Bit kaale kar zin nyaha eeza cikidik adiye rama, kar atidic anna kahek baatunne da̱i̱ne̱t cik emede ki ming orong zinin cinne. 10Kar bite ngati baatunne kadak, kar atin enne kaanyi i̱nne̱t ma̱yu̱we̱ne̱t cinne ming ngen enne ka̱da̱k.”

11O̱bo̱de̱k zin Ya̱ko̱bo̱ yaatinne Rebekah a̱nne̱k ne, “Abarik gotona I̱sa̱u̱ anyak ele cinne ima, imma anna kanyai ru̱ce̱ni̱t ci aminkite. 12Ming u̱u̱ma̱ wo̱ye̱ baba ele cinanni, okko enne a̱gga̱ ming ka̱lu̱ti̱ anna nonno, okko abarik otoryan, i̱zzi̱ ma̱yu̱we̱ne̱t to.”

13A̱nne̱k zin yaatinne nonno ne, “Ngeranni, anyik to̱ri̱ne̱t ki̱ki̱ya̱n. Tu̱gu̱ i̱nna̱ gi̱i̱ ci ka̱du̱wa̱ki̱ ko̱; bit nyahaka eeza ne̱ke̱ annita.”

14Uk zin enne kar kanyahak eeza ne̱ke̱ yaatinne, kar zin enne kaak da̱i̱ne̱t cik emede, go̱o̱le̱ ci gon oronge e̱e̱ti̱ cinne. 15Idima zin Rebekah ru̱u̱m ci a̱zi̱ze̱ I̱sa̱u̱ ngerinne wa a̱ddi̱ki̱re̱, bali anyak enne ce̱e̱za̱ ko̱, kar ki̱ti̱me̱k Ya̱ko̱bo̱ ngerinne wa dici. 16Kar zin enne ku̱bu̱ng azzin ciginnek ki i̱i̱nya̱ cinne ceremuane cik eezau. 17Kar zin kanyik ngerinne Ya̱ko̱bo̱ da̱i̱ne̱t cik emede ko̱ ki umune bali idiman enne ke̱.

18Uk zin enne ngati baatinne kar kize ne, “Baba ki̱ki̱ya̱.”

O̱bo̱de̱k zin I̱sa̱ko̱ azi ne, “Wou, ngeranni, ngene necu?”

19A̱nne̱k zin Ya̱ko̱bo̱ baatinne ne, “Ke̱e̱ni̱ anna I̱sa̱u̱ a̱bu̱ waunne. Ku̱tu̱gu̱ anna gi̱i̱ bali a̱du̱wa̱ka̱ i̱nna̱ ke̱. Tinga je̱e̱na̱ kar dak u̱gge̱ cik kanyaha anna zara ko̱, abunna ming a̱mu̱yu̱ka̱n.”

20I̱jji̱n zin I̱sa̱ko̱ ngerinne, “Ngeranni, amuda i̱nna̱ e̱le̱gi̱t ataman niko ku̱?”

O̱bo̱de̱k zin bo̱do̱k Ya̱ko̱bo̱ nonno, “Eelawa Manyi Ta̱mu̱ta̱dde̱n cunne.”

21Izek zin I̱sa̱ko̱ Ya̱ko̱bo̱ ne, “I̱jja̱ ojonun ngatu kar ku̱u̱mi̱n ngeranni, kar ka̱gga̱ ming e̱e̱ni̱ i̱nna̱ de̱de̱ ngeranni I̱sa̱u̱ icima amire.”

22Uk zin Ya̱ko̱bo̱ ojonun ngati baatinne I̱sa̱ko̱, u̱u̱m zin enne nonno kar kize ne, “Een mului cu muluk ci Ya̱ko̱bo̱, ma̱i̱je̱ azzina e̱e̱ggi̱n azzin cik I̱sa̱u̱.” 23Iróng zin enne ngen a̱gga̱ nonno, eci azzina ciginnek anyak ima ki cik I̱sa̱u̱; u̱mu̱yu̱k zin enne nonno. 24I̱jji̱n zin I̱sa̱ko̱ nonno bo̱do̱k azi ne, “E̱e̱ni̱ i̱nna̱ de̱de̱ ngeranni I̱sa̱u̱?”

O̱bo̱de̱k zin enne, “I̱i̱ny.”

25Ize zin I̱sa̱ko̱ ne, “Ngeranni, nyahaka annit i̱di̱ng cunne ko̱ imma kadau kar kuturei amut.”

Aanyik zin Ya̱ko̱bo̱ baatinne da̱i̱ne̱t, kar enne kadak; anyaha enne bu̱k merte imma kar kaanyik nonno kuud. 26Izek zin baatinne I̱sa̱ko̱ nonno ne, “I̱jja̱ ngatu, ngeranni, kar zawan.”

27Uk zin Ya̱ko̱bo̱ ojonun ngatinne kar kiza nonno. Baling ocowa I̱sa̱ko̱ mu̱yu̱k ci ru̱u̱m cinne, u̱mu̱yu̱k zin enne nonno kar kize ne,

“Oh, mu̱yu̱k ci ngeranni

ongooli ki mu̱yu̱k ci zaro

ci u̱mu̱yu̱k Manyi.

28Anyik bai Ta̱mu̱ta̱dde̱n kaanyi zizi ci ta̱mu̱-kengo

ki i̱to̱kze̱t ci lo̱o̱tu̱

ki labi cik meelek ki merte ci een jor.

29Anyik lo̱o̱cco̱k ki̱li̱ngli̱ngo̱nto̱zi̱n

kar ol kakatei u̱zu̱ngtti̱ ngatunne.

Ize ddi̱ki̱ryo̱i̱t ngati gotonogginnu,

anyik bai logoz cik yaatunne kakatei i̱nne̱t u̱zu̱ngti̱nne̱.

Anyik bai ol cik otoryi i̱nne̱t kotorte

kar anyik bai ol cik a̱mu̱yu̱ki̱ i̱nne̱t ka̱mu̱yu̱kte̱.”

30Baling udut I̱sa̱ko̱ ma̱yu̱we̱nta̱ kar zin Ya̱ko̱bo̱ kinik lo̱mu̱k ngati baatinne, oboda zin gotoniya I̱sa̱u̱ liya. 31Idiman enne bu̱k da̱i̱ne̱t u̱gge̱ cik emede kar kanyahak baatinne. Kar enne kizek nonno ne, “Baba, tinga je̱e̱na̱ kar dak i̱di̱ng ci kanyaha anna ko̱ imma, kar atidic ma̱yu̱wa̱n.”

32I̱jji̱n zin baatinne I̱sa̱ko̱ nonno, “E̱e̱ni̱ i̱nna̱ ngene?”

O̱bo̱de̱k enne azi ne, “Ke̱e̱ni̱ anna I̱sa̱u̱, ngerunne wa een a̱bu̱.”

33A̱bba̱ri̱t zin zinin ci I̱sa̱ko̱ oroot ngati aburne nong, kar kize ne, “Ngene wanai ci anyahaka i̱di̱ng ke̱? Kadaha wanai da̱i̱ne̱t u̱gge̱ ming ngen i̱nna̱ i̱jja̱, kar anna ku̱mu̱yu̱k nonno, u̱mu̱yu̱we̱ zin enne de̱de̱.”

34Baling izik I̱sa̱u̱ zoz ci ozoz baatinne ko̱, u̱tu̱lu̱ zin muluwe ci a̱ppwe̱ kar kizek baatinne ne, “Baba ma̱yu̱wa̱ annit bu̱k.”

35Ma̱i̱je̱ enne a̱nne̱k ne, “I̱ki̱ya̱ gotonnu rok ngintu alaba annita kar kuwe ma̱yu̱we̱ne̱t cunne do̱o̱k.”

36Ize zin I̱sa̱u̱ ne, “Eci zara ciginnek een Ya̱ko̱bo̱ de̱de̱, alabana zin enne annita lak rama: Arrak okkoye a̱bu̱ze̱t cinanni kar i̱yo̱ko̱ kuwe bo̱do̱k ma̱yu̱we̱ne̱t cinanni.” Kar enne kize ne, “Baba, i̱llo̱i̱ ma̱yu̱we̱ne̱t imma ci anyigzai kize cinanni?”

37O̱bo̱de̱k zin I̱sa̱ko̱ I̱sa̱u̱, “Kanyiya anna nonno kize alaan ci abali i̱nne̱ta̱, kar boor cigunnek do̱o̱k kizeto du̱cca̱k ciginnek, kanyiya bo̱do̱k nonno labi ki merte ci een jor. I̱llo̱i̱ gi̱i̱ imma ci kar anna kaanyi i̱nne̱ta̱, ngeranni.”

38A̱nne̱k zin I̱sa̱u̱ baatinne ne, “Baba, anyai i̱nna̱ ma̱yu̱we̱ne̱t co̱de̱ ṯok niko? Ma̱yu̱wa̱ annit bu̱k!” U̱tu̱lu̱ zin I̱sa̱u̱ oroot.

39O̱bo̱de̱k zin baatinne nonno a̱nne̱k ne,

“Okko atin nginti abahe i̱nna̱ ko̱

iróng anyak i̱to̱kze̱t,

aave reena ngati zizi cik ta̱mu̱-kengo.

40Abai atin i̱nna̱ illawa

kar atin i̱nna̱ a̱li̱ngli̱ngo̱ni̱k gotonnu.

Ma̱i̱je̱ ming okko zinin cunne abile je̱e̱na̱,

a̱ju̱ke̱k atin i̱nna̱ li̱ngli̱ngo̱n cinne lo̱o̱c

i̱i̱nya̱we̱ cunne.”

I̱vi̱r Ya̱ko̱bo̱ uk ngati malotinne Laban

41Amaroi zin I̱sa̱u̱ gotoni Ya̱ko̱bo̱ eci enne aama nonno ma̱yu̱we̱ne̱t ci aanyik baatinne nonno. A̱nne̱k zin enne ele cinne ne, “Ize ojon i̱i̱nya̱ cik ovvo naga ka̱lu̱we̱ baba; kar atin anna ku̱ru̱k gotona Ya̱ko̱bo̱ ka̱da̱k.”

42Baling u̱du̱kta̱k ol Rebekah zoz ci a̱du̱wa̱ ngerinne wa a̱ddi̱ki̱re̱ ko̱, utu zin enne Ya̱ko̱bo̱ ngerinne wa dici ko̱ kar kizek nonno ne, “Alalizan gotonnu I̱sa̱u̱ zinin cinne zo̱ze̱ ci atin okko enne amunyi i̱nne̱ta̱. 43I̱yo̱ko̱ zin, ngeranni, tu̱gu̱ zoz ci ka̱du̱wa̱ki̱ ko̱: Lu̱g lak co̱de̱, bit ngati gotononna Laban o̱rge̱ ci een Haran. 44A̱vvu̱t ki nonno arrak do̱yo̱i̱t, kobodai gotonnu zinin. 45Ming iróng gotonnu ngen abure nong ngatunne kar iróng ngen a̱a̱da̱ zoz bali ogonik i̱nna̱ nonno ke̱, ki̱tto̱na̱ki̱ atin zoz kar boda o̱rge̱ neci. Kamuda atin anna nya ming aditannu niga e̱le̱tti̱ ciggo̱k lak co̱de̱?”

46Izek zin Rebekah I̱sa̱ko̱ ne, “Gerza annit baizi zo̱ze̱ ci ngaai cik Hittite ko̱. Ming okko Ya̱ko̱bo̱ a̱ti̱k ngaa ngaane cik lo̱o̱c cu, ngaai cik een Hittites ki i̱yo̱ko̱ ciko, ize gerza atin baizi cinanne niko.”

Currently Selected:

Kananet 27: tex

Highlight

Copy