Lu̱ge̱z 4

Aanyik Ta̱mu̱ta̱dde̱n Muses ku̱tu̱gu̱ kaal cik a̱vu̱la̱

1O̱bo̱de̱k zin Musesi Manyi a̱nne̱k ne, “Ma atidic ming iróng olli Israilo aziknan, icima iróng elemi ming i̱ye̱la̱ Manyi annit ele de̱de̱?”

2Izek zin Manyi nonno ne, “Nya ci anyai a̱tta̱ ko̱?”

O̱bo̱de̱k zin enne, “Kanyai cool ci komtine.”

3A̱nne̱k Manyi nonno ne, “Ju̱ke̱k lo̱o̱c.” U̱ju̱ke̱k zin Musesi keet neci lo̱o̱c kar kutuhuwe keet neci kize uwat, kar enne ko̱to̱ngo̱o̱le̱. 4Izek zin Manyi nonno ne, “Gga̱m uwat neci ku̱u̱la̱.” A̱gga̱m zin Musesi uwat neci kar kutuhuwe kize keet a̱tte̱ cinne. 5Ize zin Manyi ne, “Tu̱gu̱ zoz necu ki i̱yo̱ko̱ kar olli Israilo kelemtta zoz ci Manyi Ta̱mu̱ta̱dde̱n ci be̱e̱ti̱gge̱k ki Aburaham ki I̱sa̱ko̱ ki Ya̱ko̱bo̱, i̱ye̱le̱i̱ Manyi i̱nne̱t ele de̱de̱.”

6Izek zin Manyi nonno ne, “Zu̱we̱k a̱zzi̱t ru̱u̱m cunne ecito.” Arik zin Musesi a̱zzi̱t ru̱u̱m cinne ecito, kar baling okko enne aara a̱zzi̱t re̱e̱nu̱n, ize voor per u̱tu̱gu̱ kiwagon i̱ra̱na̱.

7Ize bo̱do̱k ne, “I̱yo̱ko̱ bodek a̱zzi̱t ru̱u̱m ecito. O̱bo̱de̱k zin Musesi a̱zzi̱t ru̱u̱m cinne ecito, baling okko enne iyowane a̱zzi̱t cinne, ubunna zin a̱zzi̱ti̱ neci u̱tu̱gu̱ ki ele do̱o̱k.”

8Ize zin Manyi ne, “Ming iróng nege a̱tu̱ zoz cunne icima iróng elemi baayenit ci a̱vu̱la̱ ogoni i̱nna̱ oowa ko̱, ovvo atin nege a̱tu̱ gi̱i̱ ci a̱vu̱la̱ ogoni i̱nna̱ vu̱rrta̱ ko̱. 9Ma̱i̱je̱ ming iróng nege elemi baayen cik e̱e̱ggi̱n rama a̱vu̱la̱ ko̱, icima iróng aziye zoz cunne, ṯila maam u̱gge̱ more ci een Nail kar du̱te̱k lo̱o̱c ci odoi ko̱. Ovvo maama ne̱k a̱ddu̱te̱k i̱nna̱ lo̱o̱c ko̱ ukce kizeto bi̱ye̱ lo̱o̱ta̱.”

10Iizek Musesi Manyi ne, “Eeh Manyi, iróng anna kaganik zoz baize cinanni ba̱li̱ye̱ rok i̱yo̱ko̱ baling i̱ye̱le̱ya̱ i̱nna̱ annit du̱ca̱i̱t cunne ele nu̱nu̱n. Adala gon annit zoz iróng ka̱gga̱ zoz ci kozozi.”

11A̱nne̱k zin Manyi nonno ne, “Ngene ci aanyik e̱e̱t ci diiri utug? Ngene ci aanyik e̱e̱t ci diiri kidite iina icima okkomnek zoz? Ngene ci aanyik e̱e̱t ci diiri kicino icima kize ru̱be̱n? Iróng een Annita, Manyi? 12I̱yo̱ko̱ bito; keelani atin anna i̱nne̱t kar abunna ozozi kar ke̱de̱me̱zi̱ zoz ci okko atin i̱nna̱ a̱du̱wa̱.”

13Ma̱i̱je̱ Musesi ize ne, “Eeh Manyi, i̱tto̱n e̱e̱t imma do̱ ku̱tu̱gu̱ zoz cu.”

14Omoze zin Manyi ngati zoz ci Musesi kar kizek ne, “Ma wo̱ye̱ gotonnu Aaron e̱e̱t ci een boor ci een Le̱vi̱ ko̱? Ka̱gga̱ ozoz wo̱ye̱ enne ju̱rru̱m. A̱kku̱ enne ovvo arumonu ki i̱nne̱ta̱, atali atin enne ming okko acinnin. 15Abunna ming ozozik nonno zoz ci okko enne a̱du̱wa̱; keelannung atin anna i̱ge̱t do̱o̱k kar atin kedemezteung gi̱i̱ ci ovvo niga ogonnu. 16Ozozik atin enne ol zoz cunne, ozoz enne ogon ki ci een utug cunne ci ozozi, ogoni i̱nna̱ ki i̱yo̱ko̱ Ta̱mu̱ta̱dde̱n ngatinne. 17Abarik dima keet ci omtine a̱tte̱ cunne ko̱ kar diman baayen cik a̱vu̱la̱ keete necu.”

I̱mi̱re̱ Musesi uk Masire

18Uk Musesi ngati i̱nyi̱k cinne maci Jethro kar ki̱jji̱n kize ne, “Ja kuk ngati ol cigannik Masire kuk kicin ming ngen e̱e̱ti̱ imma ngatinne̱ng aruge.”

Ize Jethro ne, “Bito, abunna, to labak.”

19I̱yo̱ko̱ iizek Manyi Muses Midianikte ne, “Mi̱re̱ bit Masire, eci ol balik orong ku̱ru̱kti̱ ke̱ a̱da̱i̱to̱ veelek.” 20Idima zin Musesi ngaa cinne ki dooli, aanyik nogo ko̱tto̱di̱t zi̱gi̱r kar kakate we̱t ci okkoye Masire. Kar enne kanyak keet ci Ta̱mu̱ta̱dde̱no̱ a̱tte̱ cinne.

21Izek Manyi Muses ne, “Ming i̱mi̱re̱ uuwu Masire, abunna ming ogoni kaal cik a̱vu̱la̱ kicin alaani ci Masiro kaal balik aanyi komiz kar tu̱gu̱ ke̱. Ma̱i̱je̱ ngatu kokko anna kanyike zinin cinne kokkom, kar iróng enne aanyik ol kiyokta Masire. 22Kar zin du̱wa̱k alaan ci Masiro ize ne, ‘Een necu zoz ci a̱du̱wa̱ Manyi: E̱e̱ggi̱n olli Israilo do̱le̱c cinanni wa een a̱bu̱,#4:22 Israilo do̱le̱c cinanni wa een a̱bu̱: Ming azi Ta̱mu̱ta̱dde̱n ne, Israil do̱le̱c cinanni een a̱bu̱, ozoz zoz ci obod ki dooli cik Israilo do̱o̱k. 23kar anna ku̱du̱wa̱i̱n, “Anyik ngeranni kuk, kar enne atin kalawan.” Abarik i̱nna̱ a̱ju̱ra̱ne̱ iróng anyik nonno kuk; i̱yo̱ko̱ zin kokko atin anna ka̱ru̱i̱ a̱bu̱nya̱ cuggo̱k macik.’”

24Imma bali ovvo nege ooginne goola ngati ovvoye nege Masire, i̱ki̱ya̱k Manyi Muses orong kar ku̱ru̱k nonno. 25Idima zin ngaa cinne Zipporah abaz ci lehedi kar ketteda bi̱ye̱ eliye ci ngerinne kar ku̱u̱m zo̱o̱ cik Musesi. Ize zin Zipporah ne, “De̱de̱, e̱e̱ni̱ i̱nna̱ mac cinanni bi̱ye̱tu̱.” 26Kar zin Manyi kutungek nonno do̱. (Azi ne mac ci bi̱ye̱tu̱, a̱du̱wa̱ zoz ci ettede ol wucic vi̱ca̱vi̱ca̱.)#4:26 Etted vi̱ca̱vi̱ca̱: A̱du̱wa̱k bali Ta̱mu̱ta̱dde̱n Aburaham a̱nne̱k ne, ming anyait dooli cigunnek macik i̱i̱nya̱ tu̱rge̱, anyik kettedit ol wucic vi̱ca̱vi̱cce̱t kar ki̱ye̱la̱ azi ne, e̱e̱ggi̱n nege dooli cik Ta̱mu̱ta̱dde̱no̱. IkebKananet 17:9-14.

27Izek zin Manyi Aaron ne, “Bit balala oot u̱ru̱mto̱ ki Muses.” U̱ru̱mto̱ zin enne ki Muses biye ci Ta̱mu̱ta̱dde̱no̱ kar zin kiza nonno. 28U̱du̱wa̱k Musesi Aaron do̱o̱k zoz ci i̱tto̱na̱ne̱ nonno Manyi abunna ming a̱du̱wa̱k nonno, ki bo̱do̱k baayen balik a̱vu̱la̱ orong nonno ku̱tu̱gu̱ ko̱.

29U̱lu̱tta̱ zin Musesi ki Aaron lo̱ddi̱ki̱re̱ cik Israilo do̱o̱k, 30a̱du̱wa̱k zin Aaroni nogo do̱o̱k zoz ci u̱du̱wa̱k Manyi Muses. U̱tu̱gu̱ zin enne bu̱k baayen cik a̱vu̱la̱ kicinnet ol do̱o̱k, 31elemtta zin nege zoz neci. Baling iziyyet nege zoz neci, icin Manyi matiz cinne̱ng orong enne kidiman nogo kubunnta, a̱ka̱tte̱k zin nege u̱zu̱ngtti̱ lo̱o̱c kar kalac Ta̱mu̱ta̱dde̱n.

Currently Selected:

Lu̱ge̱z 4: tex

Highlight

Copy