Lu̱ge̱z 5

Ozozik Musesi ki Aaron alaan

1Bali vu̱rrta̱ oot Musesi ki Aaron rok alaan ci Masiro kar kizettek ne, “Een necu zoz ci a̱du̱wa̱ Manyi, Ta̱mu̱ta̱dde̱n ci Israilo: ‘Anyik ol cigannik koot, kar zin atin kadait kwo̱o̱r cinanni balala.’”

2Ize alaani ne, “Ngene ci een Manyi, kar anna ko̱to̱ngo̱o̱le̱ ko̱, kar kanyik olli Israilo koot ko̱? Iróng anna ka̱gga̱ Manyi iróng zin kanyike olli Israilo koot.”

3Izeto zin nege ne, “I̱ki̱ya̱ Manyi Ta̱mu̱ta̱dde̱n ci olli I̱bu̱ru̱ ku̱ru̱mto̱wa̱ ki agita. I̱yo̱ko̱ inyet keronta i̱i̱nya̱ i̱i̱yo̱ balala kar kapaktek wawa Manyi Ta̱mu̱ta̱dde̱n cinna. Ming iróng kogon niko, okko wo̱ye̱ atidic enne egerzanet zereta icima illawa.”

4Ma̱i̱je̱ alaani ci Masiro ize ne, “Niga, Musesi ki Aaron, nya ming aarannu ol li̱ngli̱ngo̱na̱ ko̱? I̱mi̱rrte̱ oot li̱ngli̱ngo̱ne̱ cunno̱ng!” 5Ize zin bo̱do̱k alaani ci Masiro ne, “Icinnet, izeto ol ne̱ko̱ meele giir, kar abarik niga abilizzu nogo li̱ngli̱ngo̱na̱.”

6Imma i̱i̱te̱ne̱ neci ele, u̱du̱wa̱k zin alaani ci Masiro olli Masiro wak a̱gga̱m du̱cca̱k ki lo̱ddi̱ki̱re̱ cik Israilo ne, 7“I̱yo̱ko̱, ma ngen anyikku ol ne̱ko̱ tabara cik adimane nege tu̱u̱p; aanycik nogo korongtta tabara cik adimane nege tu̱u̱p ma̱ci̱gja̱. 8Abarik du̱wa̱k nogo kidimanit tu̱u̱p ki ba̱li̱ye̱; ma obodanu ki vu̱rru̱t. E̱e̱ggi̱n nege gu̱u̱rwa̱; zoz ci a̱lu̱we̱ nege ko̱ necu, ‘Ja ko̱o̱tta̱ abunna kovvo kapaheka wawac Ta̱mu̱ta̱dde̱n cinna.’ 9Aanycik ol cik macik li̱ngli̱ngo̱n ci a̱di̱ngdi̱nge̱ kar abunna iróng niga edeconiku volongnyok.”

10Kar zin lo̱ddi̱ki̱re̱ cik Masiro wak a̱gga̱m du̱cca̱k ki lo̱ddi̱ki̱re̱ cik olli Israilo wak a̱gga̱m e̱le̱tti̱ cigge̱k ko̱ koot reena ngatinne̱ng, kar kizettek du̱cca̱k ne, “Icu zoz ci a̱du̱wa̱ alaani ci Masiro: ‘Iróng ngen ka̱a̱nyu̱ng tabara cik adimannu niga tu̱u̱p. 11Oot orongtta tabara cuggo̱k adimannu tu̱u̱p ngati amudannu niga, ma̱i̱je̱ tu̱u̱p cik a̱ru̱kku̱ niga i̱i̱te̱n co̱de̱ iróng akilane udut.’” 12Azantozik zin ol lo̱o̱c ci Masiro veelek orongit tabara cik ovvo nege a̱ru̱we̱ tu̱u̱p. 13Adangek zin lo̱ddi̱ki̱re̱ cik Masiro nogo zoz, a̱nne̱k ne, “E̱de̱cca̱ li̱ngli̱ngo̱n ci a̱a̱nyu̱ng ol i̱i̱te̱n co̱de̱ odohize, ki ba̱li̱ye̱ ming a̱a̱nyu̱ng ol tabara cik a̱li̱ngli̱ngnyu̱ a̱ru̱kku̱ tu̱u̱p ke̱.” 14U̱ru̱we̱t zin lo̱ddi̱ki̱re̱ cik olli Masiro balik ahala enne alaani lo̱ddi̱ki̱re̱ cik du̱cca̱k cik Israilo, kar ki̱jji̱nne̱t nogo, “Nya ming iróng a̱ru̱kku̱ tu̱u̱p baliwaz ki wazin necu ki bali gon ke̱?”

15Oot zin lo̱ddi̱ki̱re̱ cik Israilo u̱du̱kta̱k alaan ci Masiro zoz cu: “Nya ming ogonni du̱cca̱k cigunnek niko? 16I̱llo̱i̱ tabara cik anyonik du̱cca̱k kar kidimante tu̱u̱p cigunnek ko̱, abarik a̱du̱wa̱kke̱t ol, ‘Idimanit tu̱u̱p!’ U̱ru̱kte̱ du̱cca̱ha̱ cigunnek, abarik anyak ba̱ci̱ ol cigunnek e̱le̱tti̱.”

17O̱bo̱de̱k zin alaani nogo a̱nne̱k ne, “E̱e̱ggi̱nnu̱ niga gu̱u̱rwa̱, i̱llo̱i̱ gi̱i̱ imma, gu̱u̱rze̱t do̱ niko! Zoz ci a̱jji̱nna̱ng odohize ko̱ ‘Orongnyu oot kar apaktek Manyi wawac ko̱ necu.’ 18I̱yo̱ko̱ oot li̱ngli̱ngo̱n. Iróng atin ka̱a̱nyu̱ng tabara u̱gge̱ cik a̱ru̱we̱ ol tu̱u̱p, u̱ru̱we̱t tu̱u̱p ki ba̱li̱ye̱, iróng akilane.”

19A̱gga̱ lo̱ddi̱ki̱re̱ cik Israilo izeto nonga o̱lle̱ baling u̱du̱wa̱k alaani nogo zoz ci azi ne, “Iróng korongi ming akilane tu̱u̱pa̱ cik a̱ru̱kku̱ i̱i̱te̱n co̱de̱.” 20Baling utungtek nege alaan ci Masiro lo̱o̱c, urubta Muses ki Aaron ming ere nogo, 21kar kizettek ne, “Anyik bai Manyi kedezzung kar kettedung lo̱ki̱ko̱, eci zoz cunno̱ng ci aanyik alaan ci Masiro ki lo̱ddi̱ki̱re̱ ciginnek do̱o̱k kamartoita, ogon ki ci arikku illa azzin cigge̱k abunna ming a̱ru̱ke̱tta̱.”

Angara atin Ta̱mu̱ta̱dde̱n olli Israilo

22Utungek Musesi nogo lo̱o̱c kar kuk kala Manyi, “Manyi, bai, nya ming anyahak no̱ngi̱tto̱n ol ciko ko̱? Zoz ci i̱tto̱na̱na̱ i̱nna̱ annit ngintu ko̱ necu? 23Kozozik gon anna alaan ci Masiro kaviyak cigunnek, abarik i̱gi̱d zin ol cigunnek oroot. Iróng zin i̱nna̱ ngen angara nogo!”

Currently Selected:

Lu̱ge̱z 5: tex

Highlight

Copy