Lu̱ge̱z 12
12
Kwo̱o̱r ci Va̱rda̱ngi̱nto̱
1Ozozik Manyi Muses ki Aaron Masire, 2a̱nne̱k ne, “Een nyelowi cu nye̱lo̱k cunno̱ng oowu e̱rki̱te̱ cunno̱ng. 3U̱du̱kta̱k olli Israilo do̱o̱k zoz cu, ming okko i̱i̱nya̱ e̱e̱ggi̱n omoto nye̱lo̱we̱ cu, abunna gon e̱e̱ti̱ ki tatug cinne do̱o̱k anyaha nyoon#12:3 Nyoon: Aanyik Ta̱mu̱ta̱dde̱n lo̱ti̱nno̱k Muses kar ku̱du̱wa̱k olli Israilo kapaktek nyoon kar Ta̱mu̱ta̱dde̱n kicin bi̱ye̱ abanyce ci tatuget cik ce̱e̱zi̱ cigge̱k Masire I̱i̱te̱ne̱ wa Va̱rda̱ngi̱nto̱. Azi zoz necu ne okko atin Ye̱su̱ een Nyoon ci Ta̱mu̱ta̱dde̱no̱ ci okko a̱vi̱la̱ mu̱nye̱n cik ol wak elemtta nonno lo̱o̱ta̱ ngatu ko̱ do̱o̱k. IkebLu̱ge̱z 12:13-15; Marko 14:12; Lu̱ka̱ 22:7; Jon 1:29-36; 1 Ko̱ri̱nto̱ 5:7; 1 Peturu 1:19. ci a̱zze̱to̱ icima ci eezo kar kadait ki dooli ciginnek, anyik ol do̱o̱k ce̱e̱zi̱nne̱ kotodongit e̱co̱de̱ e̱co̱de̱. 4Ming idice ol ce̱e̱za̱, anyik gon e̱e̱t kutu olli locariyo kar kozolit da̱i̱ne̱t i̱di̱ng neci nga̱to̱de̱. Abunna gon ming adima e̱e̱ti̱ eez ci a̱gga̱ enne adiye eleno ki ol cik ce̱e̱z cinne. 5Abunna ming ahala e̱e̱ti̱ eez ci abunna ele anyak e̱rki̱t co̱de̱, iróng ele cinne anyak nginti a̱u̱le̱, ahala wo̱ye̱ e̱e̱ti̱ eezai icima azzane. 6Kar abalit zee rok i̱i̱nya̱ omoto ki we̱c nye̱lo̱wa̱, kar yo̱mo̱na̱, anyik booryyok cik Israilo do̱o̱k kettedit eeza ne̱ko̱ do̱o̱k e̱le̱me̱tti̱. 7Kar kidimtta bi̱ye̱ cik eeza ne̱ke̱ u̱gge̱ kar ku̱bu̱lte̱k tatuget abanyoi ki ta̱dde̱na̱ ce̱e̱zi̱nne̱ ne̱k adahe nege i̱di̱ng ke̱. 8Kar ba̱a̱li̱n neci ele kadait i̱di̱ cik eeza ne̱k ivad nege gwo̱o̱ya̱ ke̱, kar kadait kidongtek ki varany cik keet ci ogon ki itata ki umune ci iróng anyak nyigit cik meertak. 9Ma adakku eeza ne̱ko̱ culahak icima aaku maame, abarik ivadit gwo̱o̱ya̱ do̱o̱k zo̱o̱ ki oo ki ulukte bu̱k. 10Ma anyikku i̱di̱ng imma kinyigjai ka̱ta̱ngu̱ kaal, ming anyigzai i̱di̱ngi̱ imma, abunna ming atuzzu gwo̱o̱ya̱ kize bbu̱u̱r. 11Abunna zin ming ovvo adakku I̱i̱te̱n wa Va̱rda̱ngi̱nto̱#12:11 I̱i̱te̱n wa Va̱rda̱ngi̱nto̱: A̱a̱dda̱ olli Ya̱u̱do̱ i̱i̱te̱n bali arike ji̱ji̱ti̱gge̱k bi̱ye̱ tatuget cigge̱k kar Ta̱mu̱ta̱dde̱n ka̱va̱rda̱ng ce̱e̱zi̱ cigge̱k lo̱o̱ce̱ ci Masiro ke̱. Een i̱i̱te̱n cu i̱i̱te̱n bali adahe nege umunet balik iróng amukcari ke̱. Een i̱i̱te̱n cu ci i̱ye̱la̱ i̱i̱te̱n ci a̱kku̱nne̱ atin Ye̱su̱ ki Nyoon ci Ta̱mu̱ta̱dde̱no̱, eci bi̱ye̱ta̱ ciginnek utunyca mu̱nye̱n cigga̱c. IkebLu̱ge̱z 12:17-28; Marko 14:12; Lu̱ka̱ 22:7; Jon 1:9-35; 1 Ko̱ri̱nto̱ 5:7; 1 Peturu 1:19. go̱o̱le̱ cu: i̱ti̱me̱t ru̱u̱ma̱ni̱ ki nyakadinget ki caava zone ki cool wagon owoye e̱e̱ti̱ eci niga a̱vi̱kku̱ we̱t. Adakto ataman eci necu een I̱i̱te̱n wa Va̱rda̱ngi̱nto̱ Manyi.
12“Imma zin ba̱a̱li̱n neci ele kokko anna kowo lo̱o̱ce̱ ci Masiro kar ku̱ru̱k a̱bu̱nya̱ cik ol cik diirik ki cik e̱le̱gje̱nnu̱ bu̱k. Kar kettedek lo̱ki̱ko̱ ta̱mu̱ta̱dde̱ne̱t cik Masiro do̱o̱k, ke̱e̱ni̱ anna Manyi. 13Ovvo bi̱ye̱ta̱ e̱e̱ggi̱n baayenit ci ce̱e̱zi̱ cuggo̱k ki ngintik aavtiyyu niga; kar zin ming kokko anna kacinni bi̱ye̱, ka̱va̱rda̱ngi̱ atin anna ce̱e̱zi̱ cuggo̱k. I̱llo̱i̱ atin zeret imma ci i̱na̱ku̱ng ming ka̱ru̱i̱ olli Masiro.
14“Een necu i̱i̱te̱n ci abunna ming a̱a̱da̱nnu̱; anyik bu̱u̱llo̱k do̱o̱k kadait kwo̱o̱r ci Manyi i̱i̱te̱ne̱ necu e̱rki̱ta̱. 15A̱vvu̱t gwo̱o̱nya̱ turgerem, adait umune ci iróng anyak nyigit cik meertak. Imma i̱i̱te̱ne̱ ci een oo i̱i̱nya̱we̱ ne̱k e̱e̱ggi̱n turgerem ko̱, aarta nyigit cik meertak ce̱e̱zi̱nne̱ cuggo̱k. Ming adak e̱e̱ti̱ imma da̱i̱ne̱t cik amukcari anyak ubula gwo̱o̱nya̱ cik e̱e̱ggi̱n turgerem ko̱, ottoit e̱e̱t neci orgene ci olli Israilo. 16I̱i̱te̱ne̱ ci oowu, urumte nga̱to̱de̱ do̱o̱k ngati a̱di̱ngdi̱nga̱nnu̱ Ta̱mu̱ta̱dde̱n lawinta, kar bo̱do̱k i̱i̱te̱n ci een turgerem. Ma a̱li̱ngli̱ngnyu̱ udut gwo̱o̱nya̱ ne̱ko̱, a̱li̱ngli̱ngnyu̱ wo̱ye̱ ngati adimannu da̱i̱ne̱t cik adak ol do̱o̱k do̱ niko, li̱ngli̱ngo̱n ci wo̱ye̱ ogonnu neci.
17“Adait Kwo̱o̱r wa Umunet wak iróng amukcari,#12:17 Kwo̱o̱r wa Umunet wak iróng Amukcari: Adak olli Ya̱u̱do̱ kwo̱o̱r necu gwo̱o̱nya̱ turgerem, aadane nege i̱i̱te̱n bali eelanne Ta̱mu̱ta̱dde̱n ji̱ji̱ti̱gge̱k Masira. Aara nogo ngati e̱e̱ggi̱nne̱ du̱cca̱k. Akane kwo̱o̱r I̱i̱te̱ne̱ wa Va̱rda̱ngi̱nto̱. IkebLu̱ge̱z 12:17-20. eci i̱i̱te̱ne̱ neci ele ci kaarane anna booryyok cik Israilo lo̱o̱ce̱ ci Masiro. Adait Kwo̱o̱r i̱i̱te̱ne̱ necu bu̱u̱llo̱k ki bu̱u̱llo̱k. 18Arrak nye̱lo̱we̱ ci een oo ko̱, abunna ming adakku umune ci iróng amunye kumukcar, yo̱mo̱na̱ ngati een gwo̱o̱nya̱ omoto ki we̱c rok yo̱mo̱n ci izeto gwo̱o̱nya̱ moten rama ki co̱de̱. 19Imma i̱i̱nya̱ cik e̱e̱ggi̱n turgerem ko̱ abunna ming a̱zze̱ ovou ci amukcari ce̱e̱zi̱nne̱ cuggo̱k. Ming adak e̱e̱ti̱ imma umune ci amukcari, ottoit kuk reena orgene ci olli Israilo, ming een enne Israiloc icima i̱do̱ngo̱je̱ni̱t. 20Ma adakku da̱i̱ne̱t cik amukcari, ngati abakku, abunna la̱du̱n ming adakku da̱i̱ne̱t cik iróng amukcari.”
21Utu zin Musesi lo̱ddi̱ki̱re̱ cik olli Israilo do̱o̱k, kar kizek nogo ne, “Oot e̱co̱de̱ kar atahaltta eeza cik otodongeku ol ce̱e̱zi̱nne̱ ngati adahe ol I̱i̱te̱n wa Va̱rda̱ngi̱nto̱. 22Aartik bi̱ye̱ uduc ci a̱ddi̱ki̱re̱ kar idimtta varany cik ke̱e̱tu̱ kar uzuktek bi̱ye̱ ne̱ke̱, kar ubultek tatuget ta̱dde̱na̱ kar bo̱do̱k abanyoi. Iróng e̱e̱ti̱ imma ngatinno̱ng iyowa ce̱e̱za̱ re̱e̱nu̱n zee kiyowa i̱i̱. 23Ming okko Manyi owoye lo̱o̱c ci Masiro, a̱ru̱k olli Masiro, acin atin enne bi̱ye̱ tatugete cik olli Israilo kar enne ka̱va̱rda̱ng ce̱e̱zi̱ cigge̱k, iróng zin enne aanyik zeret ki̱tto̱ ce̱e̱zi̱ ciggo̱k ku̱ru̱k dooli.
24“O̱to̱ngo̱o̱ltte̱ zin niga ki dooli cik dooli cuggo̱k ti̱lo̱wi̱ne̱t necu udut. 25Kar atin ming ovvo ovvoyyu lo̱o̱ce̱ bali u̱du̱wa̱u̱ng Manyi ke̱, u̱zu̱tte̱ Kwo̱o̱r ci Va̱rda̱ngi̱nto̱. 26Kar ming ovvo dooli cuggo̱k a̱jji̱nnu̱ng, ‘Azi ungec ci Kwo̱o̱r ci Va̱rda̱ngi̱nto̱ ko̱ ne ngatinno̱ng?’ 27Du̱wa̱k zin nogo izek ne, ‘Een necu I̱i̱te̱n wa Va̱rda̱ngi̱nto̱ Ta̱mu̱ta̱dde̱no̱, bali avardange enne ce̱e̱zi̱ cik olli Israilo Masire kar ku̱ru̱k ol cik Masiro.’” Kar zin ol kakatek u̱zu̱ngti̱nne̱ kar kalac Manyi. 28U̱tu̱gu̱zzo̱ olli Israilo zoz bali u̱du̱wa̱k Manyi Muses ki Aaron ke̱.
29Imma ba̱a̱li̱n kenga, u̱ru̱k zin Manyi a̱bu̱nya̱ cik Masiro, akane ngati a̱bu̱ ci alaano, ki a̱bu̱nya̱ cik ol wak e̱ce̱bje̱ lagama. Kar bo̱do̱k ku̱ru̱k a̱bu̱nya̱ cik e̱le̱gje̱nnu̱ bu̱k. 30Itingazzo zin alaani ci Masiro ki ol wak a̱li̱ngli̱ng ngatinne ki olli Masiro do̱o̱k je̱e̱na̱ ba̱a̱li̱n kenga, anyak da̱ u̱lu̱wa̱ ci a̱ppwe̱ Masire do̱o̱k, eci i̱llo̱i̱ ce̱e̱z ci iróng a̱bu̱ imma a̱da̱i̱.
Lu̱ge̱z
31Ma̱i̱je̱ ba̱a̱l i̱tto̱na̱ alaani zoz kar ol ku̱tu̱yya̱ Muses ki Aaron kar enne kize ne, “Itingaz je̱e̱na̱, utungtek ol cigannik lo̱o̱c niga olli Israilo! Oot alac Manyi ki bali ming a̱jji̱nnu̱ ke̱. 32U̱lu̱ge̱t ki kaal cuggo̱k do̱o̱k, ki bali ming u̱du̱kta̱u̱ niga ke̱, kar oto. A̱ma̱yu̱kta̱ng annit bu̱k.”
33Orongit olli Masiro olli Israilo abunna ming a̱yi̱k ataman kar kutungttek lo̱o̱c cinne̱ng lo̱o̱c. Kar kizeto ne, “Gerza atidic ming ka̱da̱i̱ naga do̱o̱k!” 34Ataman niko o̱o̱tte̱ zin olli Israilo ovou ci ongonye iróng amukcari, arike tawa kar zin kecebtek ru̱u̱ma̱ni̱ kodongit i̱nya̱ti̱nne̱. 35U̱tu̱gu̱zzo̱ zin olli Israilo zoz neci ki baling a̱du̱wa̱k Musesi nogo ke̱, kar olli Israilo ki̱jji̱nne̱t olli Masiro wak e̱e̱ggi̱n locari cigge̱k ziik cik ataltali ki dhahab ki bo̱do̱k ru̱u̱ma̱ni̱. 36Utuhu zin Manyi olli Masiro zi̱nze̱tti̱ kirezit olli Israilo kar kaanycik nogo kaal cik a̱jji̱n nege ko̱ do̱o̱k. Imma zin go̱o̱le̱ neci, o̱o̱tte̱ zin olli Israilo kaal cik riilik Masire.
37Baling u̱lu̱ge̱t olli Israilo Masire, owo zone ingazi Ramesesa rok nginti een zara Succoth. E̱e̱ggi̱n nege i̱bbo̱nge̱t obet torkonom (600,000) ol cik macik do̱, iróng ka̱gi̱l ngaai ki dooli. 38Oot zin ol cik meelek iróng e̱e̱ggi̱n Israil bu̱k ki nogo, ovvoye kaal cik meelek, eeza ki a̱zza̱ ki tiin. 39A̱lu̱g nege Masire ataman ci iróng adiman da̱i̱ne̱t u̱gge̱, kar zin kupuranit umunet cik iróng adimanai kumukcarit do̱ niko, eci ottok ol nogo Masire, iróng anyak gool ci wo̱ye̱ adimane nege da̱i̱ne̱t cigge̱k.
40Abak ba̱li̱ye̱ olli Israilo Masire e̱rki̱to̱k obet we̱c ki moten i̱i̱yo̱ (430). 41Kar baling utubte e̱rki̱nya̱ cik e̱e̱ggi̱n obet we̱c ki moten i̱i̱yo̱, u̱lu̱ge̱t zin olli Manyi utungtek Masir lo̱o̱c. 42Eci ba̱a̱li̱n ci okko Manyi iyowane olli Israilo Masire, acine da̱ enne kaal, abunna zin olli Israilo bu̱k ming a̱a̱da̱ ba̱a̱li̱n necu ngati o̱ngo̱o̱li̱nne̱ nege Manyi e̱rki̱ta̱ ci iróng nege adunge bu̱k, bu̱u̱llo̱k ki bu̱u̱llo̱k.
Lo̱ti̱nno̱k cik Kwo̱o̱r ci Va̱rda̱ngi̱nto̱
43A̱nne̱k Manyi Muses ki Aaron ne, “Karecanekung zo̱zzo̱k cik I̱i̱te̱n wa Va̱rda̱ngi̱nto̱ iciko:
“Ma anyike e̱e̱t ci een i̱do̱ngo̱je̱ni̱t kozol ki i̱ge̱t kwo̱o̱r necu. 44Adak wo̱ye̱ e̱e̱ti̱ ci uuta i̱nna̱ een du̱ca̱i̱t cunne kwo̱o̱r necu labak ming ettede vi̱ca̱vi̱ca̱ cinne, 45ma̱i̱je̱ e̱re̱nno̱wa̱ ki ol cik a̱li̱ngli̱ng ce̱e̱zi̱nne̱ cuggo̱k do̱yo̱i̱t, ma ozolu ki nogo kwo̱o̱r neci udut.”
46“Abunna ming adakku kwo̱o̱r necu ce̱e̱zi̱nne̱ ecito; ma anyikku e̱e̱t imma kuwe i̱di̱ng reena. Ma a̱du̱llu̱ emme cik Kwo̱o̱r ci Va̱rda̱ngi̱nto̱ ko̱. 47Aanycik la̱du̱n olli Israilo do̱o̱k kadait kwo̱o̱r necu.
48“Ming anyak e̱e̱t imma ci iróng een Israiloc kar orong kadak I̱i̱te̱n wa Va̱rda̱ngi̱nto̱ Manyi ki i̱ge̱ta̱, anyik logoz cik macik ce̱e̱ze̱ cinne do̱o̱k kettedit vi̱ca̱vi̱cce̱t, kar enne bu̱k ki olli ce̱e̱z cinne kadait kwo̱o̱r necu labak ki e̱e̱ti̱ ci a̱rri̱ta̱i̱ lo̱o̱ce̱ ci Israilo. Ma anyikku e̱e̱t ci ngen ketted vi̱ca̱vi̱ca̱ da̱i̱ne̱t cik Kwo̱o̱r necu udut. 49A̱gga̱m ti̱lo̱wi̱ne̱t cu olli Israilo ki i̱do̱ngi̱ do̱o̱k wak abak orgene cunno̱ng.”
50O̱to̱ngo̱o̱ltte̱ zin olli Israilo kaal cik u̱du̱wa̱k Manyi Muses ki Aaron. 51Imma i̱i̱te̱n neci ele, aanyik zin Manyi olli Israilo ku̱lu̱ge̱t Masire ngati owoye nege booryowe.
Currently Selected:
Lu̱ge̱z 12: tex
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
