Lu̱ge̱z 11

Zeret ci a̱da̱kne̱ a̱bu̱nya̱ cik Masiro

1A̱nne̱k zin Manyi Muses i̱yo̱ko̱ ne, “Kokko anna ke̱de̱zi̱ alaan ci Masiro ki ol ciginnek kanyike zeret imma co̱de̱. Imma vu̱rrta̱, okko atin enne a̱a̱nyu̱ng i̱ge̱t u̱lu̱ge̱t, ming okko enne elemi, ottokung atin kar u̱lu̱ge̱t niga do̱o̱k. 2Bit zin du̱wa̱k olli Israilo do̱o̱k cik macik ki cik nga̱a̱ye̱k, aanycik ki̱jji̱nne̱t olli Masiro wak e̱e̱ggi̱n locari cigge̱k abunna ming a̱jji̱n nogo ziik cik ataltali ki dhahab.” 3Aanyik Manyi olli Masiro kirezit olli Israilo oroot, kar ol do̱o̱k wak a̱li̱ngli̱ng ki alaan ci Masiro ko̱ ko̱to̱ngo̱o̱ltte̱ Muses kize e̱e̱t ci riili.

4Ize zin Musesi ne, “Icu zoz ci a̱du̱wa̱ Manyi: ‘Ming okko een ba̱a̱li̱n keng, kokko anna kowoye lo̱o̱c ci Masiro do̱o̱k. 5Ovvo dooli cik e̱e̱ggi̱n a̱bu̱nya̱ cik macik a̱da̱i̱ do̱o̱k Masire, akane do̱le̱ce̱ ci een a̱bu̱ ci maci alaano kuk rok a̱bu̱ ci maci ci ngaa ci een du̱ca̱i̱t bu̱k. Ovvo bo̱do̱k a̱bu̱nya̱ cik tiinu bu̱k a̱da̱i̱. 6A̱lu̱ atin ol cik lo̱o̱c ci Masiro do̱o̱k u̱lu̱wa̱ ci ngen nege kicinnet i̱i̱te̱n imma, iróng atin u̱lu̱wa̱ necu obodonik udut. 7Ma̱i̱je̱ olli Israilo, aave atin looci labak i̱llo̱i̱ rok uruz ci ogowek e̱e̱t imma icima e̱le̱gi̱t.’ Ovvo zin atin niga a̱gga̱yyu̱ atahala Manyi olli Israilo ngati olli Masiro. 8A̱vvu̱na̱ka̱ atin lo̱ddi̱ki̱re̱ cigunnek do̱o̱k annita, ovvo atin nege akanneka u̱zu̱ngti̱nne̱ kar kizeto ne, ‘Oto, niga ol do̱o̱k wak annuyi i̱nne̱ta̱!’ Imma atin vu̱rrta̱ kokko anna kowo.” Omoze zin Musesi kar kutungek alaan ci Masiro lo̱o̱c.

9Izek zin Manyi Muses ne, “Emena atin alaani iróng aziye zoz cunne, kar ku̱tu̱gu̱ kaal cik a̱vu̱la̱ a̱vi̱r ol bi̱ye̱ta̱ Masire.” 10U̱tu̱gu̱zzo̱ zin Musesi ki Aaron kaal cik a̱vu̱la̱ kicin enne, ma̱i̱je̱ ngatu Manyi aanyik oo cinne kokkom, ci iróng enne aanyik olli Israilo ku̱lu̱ge̱t lo̱o̱ce̱ ci Masiro.

Currently Selected:

Lu̱ge̱z 11: tex

Highlight

Copy