Mateu 6
6
1 Ver nen ishima sha perapera wen la, de eren nen un sha ishigh ki iorough i̱ lu sha ci u ve̱ nenge ga; á lu nahan yô, ne kera mba a injar hen Ter wen u A lu Sha la ga.
2 Nahan shighe u wea eren iwua yô, de tôngon korough sha hemen wou, er mbaatsereghev ve eren ken ushinagoge kua sha igbenda sha u vea zua a icivir hen ior la nahan ga. Mimi je, M kaan ne ne, ve ngohol injar ve kera ve.
3 Kpa shighe u wea eren iwua yô, de rumun uwegh ough ku imesegh ku̱ fan kwagh u ku yanegh ku eren la ga;
4 sha er iwua you i̱ lu ken myer yô, man Teru u A nengen ken myer la, Una na u injar you yô.
5 Man shighe u wea eren msen yô, de luun er mbaatsereghev nahan ga; gadia ka i doo ve u tilen eren msen ken ushinagoge man sha akahar a akômaigbinda sha u ior ve̱ nenge a ve yô. Mimi je M kaan ne ne, ve ngohol injar ve kera ve.
6 Kpa we, shighe u wea eren msen yô, nyôr ken iyou you i ken iuv, u wuhe hunda kera yô, sôn Teru u A lu ken myer la; Una ungwa imo you.
7 Sha msen u eren la kpaa, de zeren nen kimbir gbilin gbilin er atôatyev a eren nahan la ga, gadia mba henen er ka sha kwaghôron ve yum la man á ungwa ve ye.
8 Yô, de luun nen er ve nahan ga; gadia Ter wen fa kwagh u a gbe ne je er ne lu a sôn Un ga yô.
9 Yô, eren nen msen nahan, ner:
Ter wase u Sha, i̱ tsegha iti You,
10 tartor Wou u̱ va, i̱ er ishima You shin tar kpaa vough er i eren i Sha nahan;
11 na se kwaghyan wase nyian u a lu sha ci u ayange ayange la;
12 man de se anzô ase di er se kpaa se deen mba ve gbe anzô hen vese la nahan;
13 man shi de ze a vese hen ape imeen i lu ga, kpa yima se sha ifer.
(Gadia tartor ka u Wou kua agee man icivir kpaa, gbem sha won. Amen)
14 Gadia aluer nea deen ior akaabo a ve yô, Ter wen u Sha di kpaa Una de ne.
15 Kpa aluer nea deen ior akaabo a ve ga yô, Ter wen di kpaa Una de ne akaabo a en ga.
16 Man shighe u nea hôron kwaghyan yô, de luun nen zunguluu er mbaatsereghev nahan ga; gadia ka ve vihi ishiv vev sha u ior ve̱ nenge er ve her kwaghyan yô. Mimi je, M kaan ne ne, ve ngohol injar ve kera ve.
17 Kpa we yô, shighe u wea hôron kwaghyan la, shighe mkurem sha ityou, ôô ishigh you,
18 sha u ior ve̱ de kaven er u lu hôron kwaghyan ga, saa di Teru u A lu ken myer la; man Teru u A nengen ken myer la, Una na u injar ken igbar.
19 De koson nen akaa a injaa sha ci wen shin tar ne hen ape ivina kua nduran ve vihin kwagh kera, mbaiv kpaa ka ve time ve iin ne ga;
20 kpa koson nen akaa a injaa sha ci wen Sha, ape ivina shin nduran ve vihin kwagh ga, mbaiv kpaa ve iin ga la.
21 Gadia ape kwaghinjaa wou a lu yô, ka her man ishima you kpaa ia lu ye.
22 Imenger i iyolough ka ishe; nahan aluer ishe you ia lu dedoo yô, iyol you cii kpaa ia iv a iwanger.
23 Kpa aluer ishe you ia lu i ifer yô, iyol you cii kpaa ia iv a ime. Nahan yô, aluer iwanger i i lu ken a we la ia lu ime yô, ime la, ia kehe tsô!
24 Or môm môm ngu u nana fatyô u eren uter uhar tom ga; gadia nana kôr ugen ihom, ugen á doo nan ishima, shin nana var ken ugen, nana laha ugen. Ne fatyô u eren Aôndo tom kua inyaregh kpaa ga.
25 Ka nahan man M kaan ne ye Mer, asema, a̱ de nyian ne sha ci u uma, wen, sha kwagh u né ya man sha kwagh u né ma, shin sha ci u iyol yen, sha kwagh u né zer la, ga. Uma hemba kwaghyan gaa, man iyol kpaa i hemba akondo gaa?
26 Nenge nen inyon i sha, ngi lee ga, ngi sondo kpaa ga, ngi ombon sha iuna kpaa ga; nahan kpaa Ter wen u Sha la koson i. Ne ne hemba i inja tsung je gaa?
27 Ka an wen je sha ishima i nyian i nan la, nana fatyô u seer ishiva i môm sha ityaven i nan ase?
28 Inja na nan man asema a nyian ne sha kwagh u akondo? Nenge nen er ityombo i ken toho i vesen yô; ngi eren tom ga, mou kpaa ngi te ga.
29 Kpa M kaan ne ne, Solomon a iengem na cii je kpaa, mayange haa akondo er mô ve môm nahan ga.
30 Yô, aluer Aôndo Una wuhan ahu a ken toho iyol doo doo nahan, a a lu uma nyian, kper a haa ken atse la, man hire ne mba ne lu a anjighjigh u nan nee?
31 Nahan yô, asema a̱ de nyian ne, kaan ner ner: Sé ya nyi? Shin: Sé ma nyi? Shin Sé zer nyi? ga.
32 Gadia akaa ne cii atôatyev nga keren a, kpa Ter wen u Sha fa er kwagh a gbe ne sha akaa ne cii yô.
33 Kpa vande keren nen tartor Na man perapera Na, man akaa ne cii á seer ne a ye.
34 Nahan yô, asema a̱ de nyian ne sha kwagh u kper ga, gadia kper una gba nôngon sha kwagh na iyol na tsô; hanma iyange zayol u i lu a mi la, kuma i.
Currently Selected:
Mateu 6: TOBNR
Highlight
Share
Copy
Want to have your highlights saved across all your devices? Sign up or sign in
TIV OLD BIBLE © The Bible Society of Nigeria, 2014.
