Popular Bible Verses from Mateu 6

Share

Kpa vande keren nen tartor Na man perapera Na, man akaa ne cii á seer ne a ye.

Nahan yô, asema a̱ de nyian ne sha kwagh u kper ga, gadia kper una gba nôngon sha kwagh na iyol na tsô; hanma iyange zayol u i lu a mi la, kuma i.

Ka nahan man M kaan ne ye Mer, asema, a̱ de nyian ne sha ci u uma, wen, sha kwagh u né ya man sha kwagh u né ma, shin sha ci u iyol yen, sha kwagh u né zer la, ga. Uma hemba kwaghyan gaa, man iyol kpaa i hemba akondo gaa?

Kpa we, shighe u wea eren msen yô, nyôr ken iyou you i ken iuv, u wuhe hunda kera yô, sôn Teru u A lu ken myer la; Una ungwa imo you.

Yô, eren nen msen nahan, ner: Ter wase u Sha, i̱ tsegha iti You, tartor Wou u̱ va, i̱ er ishima You shin tar kpaa vough er i eren i Sha nahan

na se kwaghyan wase nyian u a lu sha ci u ayange ayange la

man de se anzô ase di er se kpaa se deen mba ve gbe anzô hen vese la nahan

man shi de ze a vese hen ape imeen i lu ga, kpa yima se sha ifer. (Gadia tartor ka u Wou kua agee man icivir kpaa, gbem sha won. Amen)

Gadia aluer nea deen ior akaabo a ve yô, Ter wen u Sha di kpaa Una de ne.

Nenge nen inyon i sha, ngi lee ga, ngi sondo kpaa ga, ngi ombon sha iuna kpaa ga; nahan kpaa Ter wen u Sha la koson i. Ne ne hemba i inja tsung je gaa?

De koson nen akaa a injaa sha ci wen shin tar ne hen ape ivina kua nduran ve vihin kwagh kera, mbaiv kpaa ka ve time ve iin ne ga; kpa koson nen akaa a injaa sha ci wen Sha, ape ivina shin nduran ve vihin kwagh ga, mbaiv kpaa ve iin ga la. Gadia ape kwaghinjaa wou a lu yô, ka her man ishima you kpaa ia lu ye.

Or môm môm ngu u nana fatyô u eren uter uhar tom ga; gadia nana kôr ugen ihom, ugen á doo nan ishima, shin nana var ken ugen, nana laha ugen. Ne fatyô u eren Aôndo tom kua inyaregh kpaa ga.

Yô, aluer Aôndo Una wuhan ahu a ken toho iyol doo doo nahan, a a lu uma nyian, kper a haa ken atse la, man hire ne mba ne lu a anjighjigh u nan nee?

Kpa shighe u wea eren iwua yô, de rumun uwegh ough ku imesegh ku̱ fan kwagh u ku yanegh ku eren la ga; sha er iwua you i̱ lu ken myer yô, man Teru u A nengen ken myer la, Una na u injar you yô.

Ver nen ishima sha perapera wen la, de eren nen un sha ishigh ki iorough i̱ lu sha ci u ve̱ nenge ga; á lu nahan yô, ne kera mba a injar hen Ter wen u A lu Sha la ga.

Man shighe u nea hôron kwaghyan yô, de luun nen zunguluu er mbaatsereghev nahan ga; gadia ka ve vihi ishiv vev sha u ior ve̱ nenge er ve her kwaghyan yô. Mimi je, M kaan ne ne, ve ngohol injar ve kera ve. Kpa we yô, shighe u wea hôron kwaghyan la, shighe mkurem sha ityou, ôô ishigh you, sha u ior ve̱ de kaven er u lu hôron kwaghyan ga, saa di Teru u A lu ken myer la; man Teru u A nengen ken myer la, Una na u injar ken igbar.