Lukas 17

Ba'tu pira-pira pangpangngingaran

17:1-6

(Matius 18:6-7,21-22; Markus 9:42)

1Nakua Puang Isa lako anak gurun-Na, “Nang la den to tossede tau mpugauk dosa. Apa macilaka joo tomassede. 2La'bih melo ia, ke ditoke'ii batu pelullu' gose' to kollongna,#17:2 Jio tondok to-Yahudi batu sigaja tonggo dipake llullu' gose'. naditallanan do' tasik, na ia ke pangkatumanganna nasala mesa'na tee mai pea biccuk na te'damo namatappa' lako Aku'. 3Majaga kamu'!

Pakainga'i to padammi tomatappa', ke mpugaukki dosa lako kalemi. Ia ke menassanni, dampanganni. 4Ia ke mpugaukki dosa lako kalemi pempitu sangngallo, na pempitu too ratu lako kalemi mpenassanni dosana nameta'da didampangan, la midampangan tooi.”

5Nakuamo tuu lako rasulu' lako Puang Isa, “Pamawatangngi to kamatapparanki'!” 6Mebalimi Puang Isa nakua, “Ia ke denni kamatapparanmi moi pada bangra lise' sawi, wa'ding kamu' kumua lako tee garonto' kaju tonggo, ‘Tiangka'ko mutitanan lan tasik’, nang la naturu'i to kadammi.”

Puang na kaunanna

17:7-10

7Nakuapa Puang Isa, “Ia ke nnampui kamu' mesa' kaunan to manengko ba'tu mangrewa, apara mikuanni ke polei mangjama? Mikuanrika, ‘Malemoko madoi' kumande!’? 8Te'da. Sibalikanna mikuara lako joo kaunan, ‘Massa'wak rampa'ko! Mukamajaina', pasadianna' kandeku', kukumande. Kumangkapa, mumane' kumande.’ 9Tantu te'da mipujii to kaunanmi, ke napugaukki to misuanni. 10Susi toomo kamu', danggi' mitajan pangpujian. Apa ia ammimangkamo mpugaukki to nasuan kamu' Puang Allataala, la mikua, ‘Kaunan biasa bangrakan, ia manda kipugauk to disuankan.’ ”

Puang Isa mpamalagah sangpulo tomasolak

17:11-19

11Ia tonna male Puang Isa de' kota Yerusalem nnola jioi paralla'na tana Samaria na Galilea. 12Ia tonna la mentama kampong denmi sangpulo tomasolak ratu ntammuii. Mambela bangngi ke'deh, 13nametamba nakua, “Oo Puang Isa, kamaseikan!” 14Nakitami Puang Isa namangkada nakua, “Malemo kamu' mpangpekitan kalemi lako imang jao kota Yerusalem.” Ia tonna malemo, ta'pa malagahmi. 15Denmi mesa' joo tomasolak pole boko' nnandongngi mangkada mpakala'bih Puang Allataala, sanga ngkitai kalena kumua malagahmi. 16Ia tonna ratumo lako Puang Isa suju'i jiong to' aje-Na mangkurru sumanga'. To-Samaria joo tau. 17Nakuamo Puang Isa, “Tangmalagah ngasanmiraka to tau sangpulo nena'? Umbomira to kasera? 18Ciapari na ia mandara tee mesa' tau, na bangsa tangngia to-Yahudi, pole boko' mpakala'bih Puang Allataala?” 19Nakuanni joo tomasolak, “Ke'dehmoko mumale. Dipasalama'moko, nasaba' mukatappa'ina'.”

La ratu Puang Allataala mangparenta susi Raja

17:20-37

(Matius 24:23-28,36-41)

20Den ba'tu pira-pira to-Farisi mekutana lako Puang Isa nakua, “Piranra nalaratu to Puang Allataala mangparenta susi Raja?” Napebalii Puang Isa nakua, “Te'da nadikita ke mangparentami to Puang Allataala susi Raja. 21Na te'da too tau kumua, ‘Kitari inde'i’, ba'tu ‘Iti'i joo’, nasaba' lanri penawanta' mangparenta to Puang Allataala.”#17:21 nasaba' lanri penawanta' mangparenta to Puang Allataala, iarika: ia to kaparentan-Na Puang Allataala lanmo tangnga-tangngami.

22Nakuamo Puang Isa lako anak gurun-Na, “Den wattunna mimadoang ngkitana' Aku', Anak Mentolino, moi sangngallo, apa te'da milangkitana'. 23Na ia joo wattu den tau la ngkuan kamu', ‘Kitai to Anak Mentolino, iti'i joo. Kitari, inde'i!’ Danggi' miundi lako nturu'i. 24Nasaba' ia to karatuan-Ku' pole', tee Aku', Anak Mentolino, la susi kila' mellepa' jao mai langi', namangngarrang jio mai randan langi' ratu lako randan langi'. 25Apa tee too la gaja parri'na', na te'da too natarimana' tee tau too allo.#17:25 gaja parri'na' battuananna: Ia to Puang Isa dipampang. Mangkai joo too tuo pole'i jio mai kamatean naendek de' suruga. Jao mai suruga la nanii ratu pole'. 26Ia ke wattunnamo' ratu pole' tee Aku', Anak Mentolino, la susi tonna linona Nabi Nuh tonna anu'. 27Ia to tau mangmaroah-roah bang, nakebaine-kemuane. Susi tarruhmi joo ratu lako mentamanna kappala'na Nabi Nuh, anna ratu to wai saba' ssolangngi ngasanni. 28Susi to jaji tonna linona Lot. Mangmaroah-roah bang to tau, mangngalli sola mangbaluk, mantanan sola mpajenjen bola. 29Apa ia tonna salaimi Lot to kota Sodom, ratumi to uran api na colo' jao mai langi', ssolangngi ngasanni joo tau. 30Susi toomi to la jaji, ke ratu pole'na' tee Aku', Anak Mentolino. 31Ia joo wattu ta'pa palai kamu'. Na ia ke susinna denni tau jao bubungan bola, la mellao, natarruh bangmo male, danggi' omo namentama bola nnala apanna. Susi toomi, ia to tojio bara'bah, danggi' omo napole. 32Ingaranni to napugauk bainena Lot!#Kajajian 19:26 33Ia to tonturu' bang pakkaeloran penawanna, te'da nalannampa' katuoan melo te'da cappa'na. Apa ia to tonturu' tarruhna' moi la dibuno, iamo la nnampa' katuoan melo te'da cappa'na. 34La miingaran! Ia joo bongi, den dua tau mamma' jao mesa' katindoan, la dibawa to mesa', na dipatorro to mesa'. 35Den dua baine rumido, la dibawa to mesa', na dipatorro to mesa'. [ 36Ia ke denni dua tau jio bara'bah, la dibawa to mesa', na dipatorro to mesa'.]” 37Mekutanami anak gurun-Na Puang Isa nakua, “Oo Puang, umbora la nanii jaji joo?” Mebalimi nakua, “Ia to nanii batang rabuk, jio too nanii to langkan pekande batang rabuk. Susi toomi to karatuan-Ku' la nakita ngasan tau.”

Currently Selected:

Lukas 17: mvpAD

Highlight

Copy