Ester 4
4
Meta'da tulungngi Mordekhai lako Ester
4:1-17
1Ia tonna sa'dingmi Mordekhai sininna to apa mangka jaji, nca'ceanni pakeanna nasulleii pakean karung, tandana kumua gaja sussai penawanna. Mpessamboranni au de' ulunna nalumingka lan kota, napeandongngii kumillak saba' gaja pa'dik penawanna. 2Kendenni jio olona babangan istana, nasaba' te'da nadieloran to tau mpake pakean karung mentama. 3Susi too lan sininna propinsi, sikumillakan to to-Yahudi tonna dipangpeissenanmo joo parentana raja. Ia to tau puasai nambating, na buda tau mpake kaen karung namamma' jao au.
4Na ia to ana'dara sola tolaen to dipattantumo mparakai Ester mpauanni to apa napugauk Mordekhai. Ia tonna sa'dingmi Ester, gaja massei penawanna. Nakiringanni pakean to Mordekhai, dikua anna sulleii joo kaen karung napake, apa cia'i ntarimai.
5Sitarruhna natambaii Ester to Hatah mesa' tonapattantumo raja mparakaii. Nasuai to Hatah mekutana lako Mordekhai kumua ciapari napugaukki susi joo. 6Ta'pa malei Hatah lako Mordekhai jio tana lapang jio olona babangan istana. 7Nacuritami Mordekhai lako Hatah apa to mangka jaji, na pira budanna pera' napangngakui Haman to la napangben lako kaparalluan karajaan, ke mangkai napatei ngasan to to-Yahudi. 8Napangbengan tooi Mordekhai lako Hatah to sura' dipalembah jio mai sura'na raja, to mangka dipasun jio kota Susan, dinii nnuki' parentana raja kumua, la dipatei to to-Yahudi. Nasuai to Hatah mbenni Ester joo sura' napemanassai tooi to issinna. Napeta'da tooi namangngolo Ester lako raja dennaa upa' namamase raja lako bangsa Yahudi. 9Anna male Hatah lako Ester napauanni to pepasanna Mordekhai.
10Apa nasua pole'i Ester to Hatah pole lako Mordekhai napasanni susi tee: 11“Masussana' la mangngolo, sanga den atoran kumua ia to simesa'-mesa' tau, la muane la baine ke te'dai natambaii raja mangngolo lan rante istana, namale bang, nang la dipatei ia. Iamo joo atoran lan istana naissen ngasan tau mangpamula jio mai tomangpakainga'na raja, iarika tau biasa lan propinsi. Mesa'ra lalan dinii la'pah jio mai joo atoran, iamo ke mpupangjillokki tekken bulawanna raja lako joo tau mangngolo. Apa denmo sangbulan tee, te'da natambaina' raja.” 12Naparatumi Hatah lako Mordekhai joo pepasanna Ester. 13Ngkiring pole' omi pebalinna Mordekhai lako Ester nakua, “Danggi' musangai kumua la salama' mesako, sanga torro lanko istana. 14Moi samatumbanna nang la ditulungna to to-Yahudi. Apa ia ke kamma' bangko cia' mangngolo meta'da tulung lako raja, moi iko mate too, na ia to bati'na ambe'mu la anggemi curitanna. Mbai iamo joo mudiangka' menjaji datu ammuwa'ding ntulung bangsamu tee wattu!”
15Nakiringmi Ester tee kareba lako Mordekhai, nakua, 16“Pasirempunni to sininna to-Yahudi inde' kota Susan anna passambajanganna'. Napuasa, tallung allo tallung bongi. Moi aku' sola to ana'dara mparakaina' la puasa too. Mangkai joo too la mangngolomo' lako raja, moi nate'da nasituru' atoran karajaan. Ia ke nang la kupumatei, ake'mo kumate!” 17Malemi Mordekhai, napugauk ngasanni to napasan Datu Ester.
Currently Selected:
Ester 4: mvpAD
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
