ZECHARIAH 13
13
Abasi Asua Ɔnɔ Ukpono Ndem
1KE usen oro idim eyesiaha ɔnɔ ufɔk David ye mme andiduŋ Jerusalem, ke eke idiɔk ido ye ke eke ndek. 2Jehovah mme udim onyuŋ ɔdɔhɔ, ete, Ama ekem ke usen oro, nyesibi enyiŋ ndem ke isɔŋ emi mfep, ndien iditihi aba mmɔ: nyenyuŋ nnam mme prophet ye spirit ndek edaŋa ke isɔŋ emi. 3Ndien ama ekem, edieke owo osuk etiŋde prophecy, ndien ete esie ye eka esie emi akamande enye eyedɔhɔ enye, ete, Afo ududuhe uwem, koro afo osude nsu ke enyiŋ Jehovah: ndien ete esie ye eka esie emi akamande enye, eyekim enye ewot, koro enye etiŋde prophecy. 4Ndien ama ekem ke usen oro, but eyenam kpukpru mme prophet abaŋa ŋkukut mmɔ, ke ini mmɔ etiŋde prophecy; ndien mmɔ idisineke ɔfɔŋ-idem idet man ebiaŋa owo. 5Ndien enye eyedɔhɔ ete, Ami ndige prophet, ami ndi ɔtɔ-iŋwaŋ: koro owo ekedepde mi ke uyen mi. 6Ndien owo eyebup enye, ete, Nsidi mme unan emi ke ubɔk fo? Ndien enye eyebɔrɔ ete, Edi se ŋkadade ke ufɔk mme ufan mi.
7Jehovah mme udim ɔdɔhɔ, ete, Ofut, demere yom ekpemerɔŋ mi, yom owo emi edide nsaŋa mi: kpi ekpemerɔŋ, ndien erɔŋ eyesuana: ndien nyekabare ubɔk mi nnam ŋkpri nditɔwɔŋ. 8Jehovan onyuŋ ɔdɔhɔ, ete, Ndien ama ekem, eyesibe mbak iba ke ofuri isɔŋ ewot; edi ɔyɔhɔ ubak ita eyesuhɔ ke esit. 9Ndien nyeda ɔyɔhɔ ubak ita nsin ke ikaŋ, nnyuŋ nduk mmɔ nte edukde silver, nnyuŋ ndomo mmɔ nte edomode gold: mmɔ eyekot mi enyiŋ, ndien ami nyeyere mmɔ: nyenyuŋ ndɔhɔ mmɔ nte, Mmɔ edi ikɔt mi: ndien mmɔ eyedɔhɔ, ete, Jehovah edi Abasi mi.
Currently Selected:
ZECHARIAH 13: ENA
Highlight
Share
Copy
Want to have your highlights saved across all your devices? Sign up or sign in
Efik Old Bible With Sectional Headings © Bible Society of Nigeria, 2013, 2019.
