ŊWED MME PSALM 37

Ikɔ Ndɔŋesit Ɔnɔ Owo Ndinyene Ime Nnyuŋ Mbuɔt Idem ke Abasi

Eke David.

1KUYAT esit ubaŋa mme oburobut owo; kufibe ufup ye mme anam-idiɔk. 2Koro eyewara ndisibe mmɔ nte mbiet, mmɔ eyenyuŋ ekeŋe nte awawa ikɔŋ. 3Buɔt idem ye Jehovah, nyuŋ nam se ifɔnde; duŋ ke isɔŋ, nyuŋ dia akpanikɔ. 4Yak Jehovah onyuŋ adat fi esit; ndien enye eyenɔ fi se esit fo oyomde. 5Kpat usuŋ fo nɔ Jehovah, nyuŋ buɔt idem fo ye enye, ndien enye eyenam. 6Ndien enye eyeda eti ido fo ɔwɔrɔ nte uŋwana, ye ikpe fo nte ufɔt uwemeyo.

7Dop uyo nɔ Jehovah, nyuŋ bet enye, kuyat esit ubaŋa owo eke okutde unen ke usuŋ esie, ubaŋa owo eke anamde idiɔk uduak. 8Tre ifuresit, nyuŋ kpɔŋ ifiopesit: kuyat esit kunyuŋ unam idiɔk baba. 9Koro eyekpok mme idiɔk owo efep: edi mmɔ eke ebetde Jehovah eyeda isɔŋ enyene. 10Koro osuk esisit idiɔk owo ididuhe: ndien ke afo etiŋde enyin ke ebiet esie, enye ididuhe. 11Edi mbon nsukidem eyeda isɔŋ enyene; ediwak emem eyenyuŋ enem mmɔ esit.

12Idiɔk owo aduak idiɔk uduak abaŋa eti owo, onyuŋ ata edet ese enye. 13Ɔbɔŋ asak enye, koro enye okutde ete ke usen esie ɔmɔŋ edi. 14Mme idiɔk owo esio ofut, enyuŋ ekɔk utiga mmɔ, ete iduɔk eyen ukut ye ubuene, inyuŋ iwot mbon esit kiet. 15Ofut mmɔ eyeduk mmɔ esit, ndien utiga mmɔ eyebuŋɔ.

16Ekpri ŋkpɔ eti owo ɔfɔn akan inyene ediwak mme idiɔk owo. 17Koro ubɔk mme idiɔk owo eyebuŋɔ: edi Jehovah omum nti owo akama.

18Jehovah ɔmɔfiɔk mme usen nti owo: ndien udeme mmɔ eyedu ke nsinsi. 19But idinamke mmɔ ke idiɔk ini: edi eyeyuhɔ ke ini akaŋ. 20Koro eyesobo mme idiɔk owo, mme asua Jehovah eyenyuŋ ebiet ikpɔŋ nditɔ erɔŋ: mmɔ emesuana, emesuana nte nsuŋikaŋ. 21Idiɔk owo ɔbɔbuɔt, ndien isioho: edi eti owo atua owo mbɔm, onyuŋ ɔnɔ ŋkpɔ. 22Koro mmɔ eke enye ɔdiɔŋde eda isɔŋ enyene: edi eyesibe mmɔ eke enye osuŋide efep. 23Jehovah otim onim ikpat (eti) owo, onyuŋ amama usuŋ esie. 24Koro enye eyeduɔ, edi idinyanakede ina: koro Jehovah omumde enye ubɔk akama. 25Ŋkedi eyenɔwɔŋ, ndien ndi ebiowo ŋko; Akanam ŋkwe nte ekpɔŋde eti owo, nte ubon esie enyuŋ esaŋade inɔk. 26Kpu-kpru ini enye atua owo mbɔm, onyuŋ ɔnɔ ke ebuɔt; ndien ɔfɔn ɔnɔ ubon esie.

27Wɔŋɔre kpɔŋ idiɔk, nyuŋ nam eti; ndien duŋ ke nsinsi. 28Koro Jehovah amade edinen ikpe, ndien ikpɔŋke mbon-ima esie; eyekpeme mmɔ ke nsinsi: edi eyesibe ubon mme idiɔk owo efep. 29Nti owo eyeda isɔŋ enyene, enyuŋ eduŋ ke esit ke nsinsi.

30Inua eti owo etiŋ ifiɔk, edeme esie onyuŋ ɔdɔhɔ se inende. 31Mbet Abasi esie edu enye ke esit; ikpat esie idiwahake. 32Idiɔk owo etie ekpeme eti, onyuŋ oyom enye ndiwot. 33Jehovah idiyakke enye ikpɔŋ ke ubɔk esie, idinyuŋ inamke ikɔ otip enye ke ini ekpede ikpe esie. 34Bet Jehovah, nyuŋ nim ido esie, ndien enye eyemenere fi onim ke enyɔŋ, man ada isɔŋ enyene.

35Ŋkokut idiɔk owo enyene-ndik, onyuŋ asuan idem esie nte awawa eto, eyen isɔŋ. 36Ekem enye adaha, ndien, sese, enye iduhe: ndien nyom enye, edi idige aba nte ekutde enye. 37Tiŋ enyin ke owo eke ɔfɔnde ama, nyuŋ se edinen owo: koro (eti) utit anade ɔnɔ owo emem. 38Eyenyuŋ esobo mme idiɔk owo ɔtɔ kiet: eyesibe (eti) utit mme idiɔk owo efep. 39Ndien edi Jehovah anyaŋa nti owo: enye edi odudu mmɔ ke ini ukut. 40Jehovah omonyuŋ ɔbɔ mmɔ ubɔk, onyuŋ anam mmɔ ebɔhɔ: enye eyenam mmɔ ebɔhɔ mme idiɔk owo, eyenyuŋ anyaŋa mmɔ, koro mmɔ ebuɔtde idem mmɔ ye enye.

Currently Selected:

ŊWED MME PSALM 37: ENA

Highlight

Copy