MARK 2

Jesus Ɔkɔk Owo Ɔdɔŋɔde Akpa-Ubeŋ

(Mt 9.1-8; Lk 5.17-26)

1EKEM ke ini Enye ɔtɔŋɔde ntak oduk ke Capernaum ke ndusuk usen ema ekebe, etop asuana ete Enye odu ke ufɔk. 2Ndien ediwak owo edibono ke ɔtɔ Esie, tutu ufaŋ iduhe inɔ mmɔ, kpa ke enyin-usuŋ ufɔk: Enye onyuŋ etiŋ ikɔ ɔnɔ mmɔ. 3Ndien owo edi edida ɔdɔŋɔ-akpa-ubeŋ, emi owo inaŋ ebiomde, esɔk Enye. 4Edi sia mmɔ mikemeke ndida enye ŋkpere Jesus ke ntak otu owo, mmɔ ekibɔre ɔkɔm ufɔk ke ebiet eke Enye etiede: ndien ke mmɔ ema esiak ɔkɔm, mmɔ esuhɔre mbri emi ɔdɔŋɔ-akpa-ubeŋ anade ke esit. 5Ndien ke ini Jesus okutde mbuɔtidem mmɔ, Enye ɔdɔhɔ ɔdɔŋɔ-akpa-ubeŋ ete, Eyen Mi, emefen mme idiɔk-ŋkpɔ fo. 6Edi ndusuk mme scribe etie do eneni ke esit mmɔ ete, 7Nsinam owo emi etiŋde ikɔ ke usuŋ emi? Enye ke osuŋi Abasi: anie ekeme ndifen mme idiɔk-ŋkpɔ ke mibɔhɔke kiet, kpa Abasi? 8Edi idaha oro Jesus ɔfiɔk ke spirit Esie ete mmɔ eneni ntre ke esit mmɔ, onyuŋ ɔdɔhɔ mmɔ ete, Nsinam mbufo enenide ŋkpɔ emi ke esit mbufo? 9Ewe emem akan, mme ndidɔhɔ ɔdɔŋɔ-akpa-ubeŋ ete, Emefen mme idiɔk-ŋkpɔ fo; me ndidɔhɔ enye ete, Daha ke enyɔŋ, men mbri fo, nyɔŋ? 10Edi man mbufo efiɔk ete, Eyen Owo enyene odudu ke isɔŋ ndifen mme idiɔk-ŋkpɔ (Enye ɔdɔhɔ ɔdɔŋɔ-akpa-ubeŋ ete), 11Ndɔhɔ fi nte, Daha ke enyɔŋ, men mbri fo, nyɔŋ ufɔk. 12Ekem owo oro adaha ke enyɔŋ, emen mbri esie ini kiet, onyuŋ asaŋa ɔwɔrɔ ke iso mmɔ kpukpru: esin idem akpa mmɔ kpukpru, mmɔ enyuŋ etoro Abasi ete, Akananam nnyin ikwe oruk ŋkpɔ emi.

Jesus Okot Levi

(Mt 9.9-13; Lk 5.27-32)

13Ekem Jesus ɔtɔŋɔ ntak ɔwɔrɔ aka ke mben inyaŋ: ndien ofuri otu owo etiene Enye, Enye onyuŋ ekpep mmɔ ŋkpɔ. 14Ndien nte Enye asaŋade ebe, Enye okut Levi eyen Alphaeus etiede ke itie ubɔ-utomo, onyuŋ ɔdɔhɔ enye ete, Tiene Mi. Levi onyuŋ adaha ke enyɔŋ etiene Enye.

15Edikem, Jesus ke etie ke itie-udia ke ufɔk Levi, ediwak mme publican ye mme idiɔk-owo enyuŋ esuhɔre etetie ye Enye ye mbet Esie; koro mmɔ ewakde, mmɔ enyuŋ etiene Enye. 16Ndien ke ini mme scribe, emi etode ke otu mme Pharisee, ekutde nte Enye adiade ŋkpɔ ye mme publican ye mme idiɔk-owo, mmɔ edɔhɔ mbet Esie ete, Enye adia onyuŋ; oŋwɔŋ ŋkpɔ ye mme publican ye mme idiɔk-owo. 17Edi ke adaŋemi Jesus okopde, Enye ete mmɔ, Mmɔ emi enyenede nsɔŋidem iyomke abia-ibɔk, edi mmɔ emi edɔŋɔde eyom: ŋkedige ndikot ndinen owo, edi mme idiɔk owo.

18Ndien mbet John ye mme Pharisee ke etre udia: mmɔ enyuŋ etiene Enye, edɔhɔ Enye ete, Nsidi ntak eke mbet John ye eke mme Pharisee etrede udia, edi mbet Fo mitreke? 19Ndien Jesus ɔdɔhɔ mmɔ ete, Nte nditɔ ufɔk-ndɔ ekeme nditre udia ke ini ebendɔ odude ye mmɔ? adaŋa ini nte mmɔ enyenede ebe-ndɔ ye mmɔ, mmɔ ikemeke nditre udia. 20Edi mme usen eyedi eke edibɔde mmɔ ebe-ndɔ; ndien mmɔ eyetre udia ke usen oro. 21Baba owo kiet idaha ubak ɔfɔŋ eke midiɔŋke ikim idian ye akani ɔfɔŋidem: ama anam ntre, se edade esiri nde akani ɔfɔŋ akabare awak enye, obufa awak akani, onyuŋ anam awaha ɔdiɔk akan. 22Baba owo kiet inyuŋ isinke obufa wine ke ŋkani ikpa: ama anam ntre, wine eye-siak ikpa, ɔduɔhɔ, atak, ikpa enyuŋ ebiara ŋko: edi esin obufa wine ke mbufa ikpa.

23Edikem, Enye asaŋa ebe ke iŋwaŋ ibokpot ke usen sabbath; ndien mbet Esie etɔŋɔ ndikibi ibokpot nte mmɔ esaŋade. 24Ndien mme Pharisee ete Enye, Sese, nsidi ntak eke mmɔ enamde se minenke ke usen sabbath? 25Edi Jesus ɔdɔhɔ mmɔ ete, Nte akanam mbufo ikotke se David akanamde, ke ini enye odude ke unana, onyuŋ okopde biɔŋ, kpa enye ye mmɔ emi edude ye enye? 26nte enye odukde ke ufɔk Abasi, ke ini Abiathar edide akwa oku, onyuŋ adiade uyo-iso-Abasi, eke minenke owo ndidia, ke mibɔhɔke mme oku; ye nte emende ɔnɔ mmɔ emi edude ye enye ŋko? 27Ndien Jesus ɔdɔhɔ mmɔ ete, Ekanam usen sabbath enɔ owo, inamke owo inɔ usen sabbath; 28ntre ke Eyen Owo edi Ɔbɔŋ kpa sabbath.

Currently Selected:

MARK 2: ENA

Highlight

Copy