MARK 12

Mme ekpeme-iŋwaŋ Vine

(Mt 21.33-46; Lk 20.9-19)

1EKEM Enye ɔtɔŋɔ ndimen ŋke ntiŋ ikɔ ye mmɔ ete,Owo kiet ɔkɔtɔ iŋwaŋ-vine, onyuŋ ɔbɔp ɔkɔ akan enye okuk, onyuŋ otibi obube unyimi-wine, onyuŋ ɔbɔp tower, onyuŋ ayak enye ɔnɔ mme ekpeme-iŋwaŋ, ndien adaha aka idut efen. 2Ekem ke edikem ini enye ɔdɔŋ isuŋutom ke ɔtɔ mme ekpeme-iŋwaŋ, man ɔbɔ ubak mfri iŋwaŋ-vine ke ubɔk mme ekpeme-iŋwaŋ. 3Edi mmɔ oro emum enye, emia enye, enyuŋ enam enye ɔnyɔŋ ubɔk-ubɔk. 4Ete-iŋwaŋ onyuŋ osio isuŋutom eŋwen ɔdɔŋ ke ɔtɔ mmɔ; mmɔ enyuŋ enɔ enye unan ke ibuot, enyuŋ enam enye ido esuene. 5Enye onyuŋ osio eŋwen ɔdɔŋ, ndien mmɔ ewot enye; enyuŋ enam ntre ye ediwak eŋwen; emia ndusuk, ewot ndusuk. 6Enye ke osuk enyene owo kiet, edima eyen. Ndien ke ukperedem ɔdɔŋ enye ke ɔtɔ mmɔ ete, Mmɔ eyeteŋe eyen mi. 7Edi mme ekpeme-iŋwaŋ edɔhɔ ke otu idem mmɔ ete, Emi edi andidia-ufɔk. Ekam eyak iwot enye, ndien ŋkpɔ-akpa eyenyene nnyin. 8Ekem mmɔ emum enye ewot, enyuŋ esio okpo ke iŋwaŋ-vine, etop eduɔk. 9Nso ndien ke ete iŋwaŋ-vine oro edinam? Enye eyedi edisobo mme ekpeme-iŋwaŋ oro, onyuŋ ayak iŋwaŋ-vine ɔnɔ mme ekpeme-iŋwaŋ eŋwen. 10Nte akanam mbufo ikotke kpa ikɔ emi ewetde ete,

Itiat emi mme ɔbɔp-ufɔk esinde

Amakabare edi etubom inuk;

11 Emi oto Jehovah,

Nnyin inyuŋ ise enye ke utibe.

12Ndien mmɔ eyom ndimum Enye, edi mmɔ efehe otu owo; koro mmɔ efiɔkde ete, Enye ama otop ŋke emi adian mme imɔ. Mmɔ enyuŋ ekpɔŋ Enye enyɔŋɔ.

13Ekem mmɔ esio ndusuk mme Pharisee ye mme Herodian edɔŋ ke ɔtɔ Esie, man mmɔ ekpemum Enye ikɔ-inua. 14Ke ini mmɔ edide, edɔhɔ Enye ete, Andikpep, nnyin imɔfiɔk ite Afo edi akpanikɔ, unyuŋ ukereke owo; koro Afo uteŋeke owo enyin, edi ekpep owo usuŋ Abasi ke akpanikɔ. Nte enen ndinɔ Caesar utomo, mme inenke? Nte nnyin inɔ, mme ikunɔ? 15Edi Enye okut mbubik mmɔ, onyuŋ ɔdɔhɔ mmɔ ete, Nsinam mbufo edomode Mi? Eda okuk utomo esɔk Mi nse. 16Mmɔ eda edi. Ekem Enye ɔdɔhɔ mmɔ ete, Mbiet emi ye ŋwed emi enyene anie? Mmɔ ete Enye, Enyene Caesar. 17Jesus ete mmɔ, Enɔ Caesar se inyenede Caesar, enyuŋ enɔ Abasi se inyenede Abasi. Ndien akpa mmɔ idem eti-eti ye Enye.

18Ekem mme Sadducee, emi edɔhɔde ete eriset ke mkpa iduhe, etiene Enye, ebup Enye ete, 19Andikpep, Moses ekewet ɔnɔ nnyin ete, Edieke eyen-ete owo akpade ɔkpɔŋ ŋwan, edi mibonke eyen, yak owo oro emen ŋwan eyen-ete esie ɔdɔ, onyuŋ asiak ubon ɔnɔ eyen-ete esie. 20Nditɔ ete itiaba ekedu. Akpa ada ŋwan ɔdɔ akpa, ibonke eyen. 21Udiana onyuŋ emen enye ɔdɔ, onyuŋ akpa, ibonke eyen, 22Ɔyɔhɔ ita anam kpasuk ntre. Mmɔ mbitiaba inyuŋ ibonke eyen. Ke akpatre ŋwan oro nde akpa. 23Ke eriset ke mkpa enye eyedi ŋwan anie ke otu mmɔ mbitiaba? Ke emi mmɔ mbitiaba ema ekɔdɔ enye. 24Jesus ɔdɔhɔ mmɔ ete, Nte idige ntak emi esinde mbufo edue, emi mbufo mifiɔkke ŋwed Abasi ye odudu Abasi? 25Koro ke adaŋemi owo esetde ke mkpa, mmɔ idɔhɔ ndɔ, inyuŋ idaha mmɔ inɔ ndɔ, edi mmɔ etie nte mme angel emi edude ke heaven. 26Edi kabaŋa mme akpa-mkpa, nte enamde mmɔ eset; nte mbufo ikokotde ke ŋwed Moses, ke itie emi etiŋde abaŋa eto, ite Abasi ɔkɔdɔhɔ enye ete, Ami ndi Abasi Abraham, ye Abasi Isaac, ye Abasi Jacob. 27Enye idige Abasi mme akpa-mkpa, edi eke mme odu-uwem. Mbufo emedue eti-eti.

28Ekem owo kiet ke otu mme scribe edi, onyuŋ okop nte mmɔ enenide eneni ye kiet eken; ndien ke ini enye; ɔfiɔkde ete Jesus ama otim ɔbɔrɔ mmɔ, enye obup Jesus ete, Ewe edi ebe-iso item ke ofuri ibet? 29Jesus ɔbɔrɔ ete, Ebe-iso edi, Ekop O Israel, Jehovah Abasi nnyin, edi Jehovah kiet. 30Afo nyuŋ ma Jehovah Abasi fo ke ofuri esit fo, ye ke ofuri ukpɔŋ fo, ye ke ofuri ekikere fo, ye ke ofuri odudu fo. 31Udiana -akpa edi emi, Ma mbiɔhiduŋ fo nte idem fo. 32Ibet eŋwen eke okponde akan mmɔ emi iduhe. Ndien scribe oro ɔdɔhɔ Enye ete, Ke akpanikɔ, Andikpep, omotim etiŋ ete Abasi edi kiet; efen inyuŋ iduhe ke mibɔhɔke Enye: 33ndien owo ndima Enye ke ofuri esit, ye ke ofuri asian ye ke ofuri odudu, ndinyuŋ mma mbɔhiduŋ esie nte idem esie omotim okpon akan kpukpru erifɔp enɔ ye uwa. 34Ndien ke ini Jesus okutde ete enye ɔbɔrɔ ɔniɔŋ-ɔniɔŋ, ete enye, Afo uyomke usuŋ ye Obio Ubɔŋ Abasi. Ndien ke oro ebede, baba owo kiet idehede ibup Enye aba mbume kiet.

35Ekem nte Jesus ekpepde mmɔ ŋkpɔ ke temple, Enye ɔbɔrɔ ete, Nsinam mme scribe edɔhɔde ete Christ edi eyen David? 36David ke idem esie etiŋ ke Edisana Spirit, ete,

Jehovah ɔdɔhɔ Ɔbɔŋ mi ete,

Tie Mi ke ubɔk nnasia,

Tutu nda mme usua Fo nnim Fi ke udorukot.

37 David ke idem esie okot Enye, ete, Ɔbɔŋ, didie ndien ke Enye edi Eyen esie? Ndien mbio-obio ekop ikɔ Esie ye idaresit.

38Ke ukpep-ŋkpɔ Esie Enye ɔdɔhɔ ete, Ekpeme idem mbufo ye mme scribe, emi emade ndisaŋa ye nduɔ-nduɔ ɔfɔŋidem, ndinyuŋ mbɔ ekɔm ke aŋwa-urua, 39ye ikpɔ itie ke mme synagogue, ye itie ukpono ke udia; 40mmɔ emi ediade ufɔk mme ebe-akpa, enyuŋ ebɔŋde nyan akam ke mbubik: mmɔ eyebɔ ubiom-ikpe eke okponde akan.

41Ekem Enye ɔsuhɔre etetie ekem iso ye usin-etibe, onyuŋ okut nte otu owo esinde okuk ke usin-etibe; ediwak mbon inyene enyuŋ esin ediwak okuk. 42Edi ubuene ebe-akpa kiet edi, esin ŋkpri okudɔk iba, eke edide farthing kiet. 43Ndien Enye okot mbet Esie edi, onyuŋ ɔdɔhɔ mmɔ ete, Ke akpanikɔ ke ndɔhɔ mbufo nte, Ubuene ebe-akpa emi ama esin akan kpukpru mmɔ emi ekesinde okuk ke usin-etibe. 44Koro kpukpru mmɔ ekosiode ŋkpɔ ke nyɔhɔ-nsuhɔ, mmɔ esin; edi enye ama osio kpukpru se enye enyenede ke unana esie ɔnɔ, kpa ofuri se enye akpadade odu uwem.

Currently Selected:

MARK 12: ENA

Highlight

Copy