MARK 11

Jesus Oduk Obio Jerusalem Uko Uko

(Mt 21.1-11; Lk 19.28-40; Jn 12.12-19)

1EKEM ke ini mmɔ esaŋade ekpere Jerusalem, edisim Bethphage ye Bethany, ke obot Olive, Enye osio owo iba ke otu mbet Esie ɔdɔŋ, ete mmɔ, 2Eka ekeduk ke obio iŋwaŋ emi asakde iso ese mbufo, ndien idaha oro nte mbufo edukde ke esit, mbufo eyekut eyen ass emi eyiride, emi akanam owo midoroke enye ke edem: etat enye, eda edi. 3Edi owo ekededi ama ɔdɔhɔ mbufo ete, Nsinam mbufo enamde emi? mbufo edɔhɔ ete, Ɔbɔŋ ke oyom enye; ndien eyenɔ enye afiak edi ini kiet. 4Mmɔ eka enyuŋ ekut eyen ass nte eyride enye ke inua-otop ke aŋwa-aŋwa ke enen; enyuŋ etat enye. 5Edi ndusuk mmɔ emi edade do ɔdɔhɔ mmɔ ete, Nso ke mbufo enam oro, etat eyen ass? 6Ndien mmɔ ete mmɔ oro kpa nte Jesus eketemede; mmɔ enyuŋ eyak mmɔ eka. 7Eda eyen ass esɔk Jesus, enyuŋ ebri ɔfɔŋidem mmɔ ke edem esie: Jesus onyuŋ odoro enye ke edem. 8Ndien ediwak mmɔ ebri ɔfɔŋidem mmɔ ke ɔkpɔusuŋ; mmɔ eŋwen enyuŋ ebri ŋkɔk eto, emi ekekpide ke iŋwaŋ. 9Mmɔ emi ebemde iso ye mmɔ emi etienede ke edem enyuŋ efiori ete,

Hosanna

Itoro enyene Enye emi edide ke enyiŋ Jehovah;

10Itoro enyene Ubɔŋ emi edide kpa Ubɔŋ ete nnyin David;

Hosanna ke ata enyɔŋ.

11Ekem Enye edi ke Jerusalem ebe oduk ke temple: ndien ke Enye ama akasuan enyin ese kpukpru ŋkpɔ, sia edide mbubreyo, Enye ɔwɔrɔ aka ke Bethany ye mbet Esie duopeba.

12Ekem ke ndaŋ-nsiere, ke ini ewɔŋɔde ke Bethany, biɔŋ ɔdɔŋ Jesus. 13Ndien ke ini Enye okutde eto fig nsan-nsan ye ikɔŋ, Enye asaŋa ekpere, ete, mme iyekut ŋkpɔ ke esit: ndien ke ini osimde eto oro, ikwe ŋkpɔ ke mibɔhɔke ikɔŋ-ikɔŋ, koro mikemke ini fig. 14Ekem Enye ɔbɔrɔ eto oro ete, Owo okudia aba mfri eke otode fi tutu amana. Mbet Esie enyuŋ ekop.

15Mmɔ edi ke Jerusalem; ndien Enye oduk ke temple, ɔtɔŋɔ ndibin mmɔ eke enyamde ŋkpɔ ye mmɔ eke edepde ŋkpɔ ke temple mfep, onyuŋ onuk mme okpokoro mme ɔkpuhɔ-okuk ɔduɔk, ye mme itie mme anyam ibiom; 16Enye inyuŋ inyemeke owo ekededi emen ŋkpɔ asaŋa ke temple ebe. 17Ndien Enye ekpep onyuŋ ɔdɔhɔ mmɔ ete, Nte iwetke ite, ufɔk Mi eyekere ete, ufɔk akam kpukpru mme idut? Edi mbufo emanam enye akabare edi itie mbon-ŋwo. 18Ndien ikpɔ oku ye mme scribe ekop, enyuŋ eyom usuŋ nte mmɔ ediwotde Enye; koro mmɔ efehede Enye, koro kpukpru owo edu ke mkpa -idem kabaŋa ukpep-ŋkpɔ Esie.

19Ndien ke ini edide mbubreyo, Enye ɔwɔrɔ ke obio.

20Edi nte mmɔ esaŋade ebe ke usenubɔk, mmɔ ekut nte eto fig ama eyemere akpa ɔtɔŋɔde ke oruŋ. 21Ndien ke ini Peter etide, enye ɔdɔhɔ Jesus ete, Rabbi, sese, eto fig emi Afo okosuŋide ama eyemere akpa. 22Jesus ɔbɔrɔ mmɔ ete, Enyene mbuɔtidem ye Abasi. 23Ke akpanikɔ ke ndɔhɔ mbufo, owo ekededi eke edidɔhɔde akamba obot emi ete, Wuhɔre, kɔduɔ sine ke akwa inyaŋ; midinyuŋ iyikke ke esit esie, edi onimde ke akpanikɔ ete se imɔ itiŋde eyesu, eyewɔrɔ ɔnɔ enye. 24Mmɔdo ndɔhɔ mbufo nte, Kpukpru ŋkpɔ ekededi eke mbufo ebɔŋde akam ebeŋe, enim ete mme imɔ ima ibɔ inyene, ndien eyewɔrɔ ɔnɔ mbufo.

25 Ndien ini ekededi eke mbufo edade ebɔŋ akam, edieke mbufo enyenede ikɔ ye owo, edahado enɔ enye; 26man Ete mbufo emi odude ke Heaven okponyuŋ adahado ɔnɔ mbufo ke ndudue mbufo.

27Ekem mmɔ efiak edi ke Jerusalem: ndien nte Jesus asaŋade ke temple, ikpɔ oku ye mme scribe ye mbiowo etiene Enye, enyuŋ edɔhɔ Enye ete, 28Afo ada odudu ewe anam mme ŋkpɔ emi? mme, anie ɔkɔnɔ Fi odudu ndinam mme ŋkpɔ emi 29Edi Jesus ete mmɔ Nyebup mbufo mbume kiet: mbufo ema ebɔrɔ Mi, nyesian mbufo odudu eke ndade nnam mme ŋkpɔ emi. 30Baptism John, mme oto heaven, mme oto owo? Ebɔrɔ Mi. 31Ndien mmɔ eneni ke otu idem mmɔ ete, Nnyin ima idɔhɔ ite, Oto heaven, Enye eyedɔhɔ ete, Nsinam mbufo mikonimke enye ke akpanikɔ ndien? 32Edi ima idɔhɔ ite, Oto owo mmɔ efehe mbio-obio; koro kpukpru owo edade John ke prophet ke ata akpanikɔ. 33Ntre ke mmɔ ebɔrɔ Jesus ete, Nnyin ifiɔkke. Ekem Jesus ete mmɔ, Ami nde nsianke mbufo odudu eke ndade nnam mme ŋkpɔ emi.

Currently Selected:

MARK 11: ENA

Highlight

Copy