MATTHEW 28

Jesus Eset Ke Mkpa

(Mk 16.1-10; Lk 24.1-12; Jn 20.1-10)

1EDI ke utit sabbath, nte eyo ɔtɔŋɔde ndisiere ke akpa usen urua, Mary Magdalene ye Mary eken edi edise udi. 2Ndien sese, akwa unyek -isɔŋ odu: koro angel Jehovah okoto ke Heaven ɔsuhɔre edi edikpat itiat osio, onyuŋ etie ke esit. 3Iso esie ebiet emireŋ-mireŋ, edisine-ŋkpɔ esie onyuŋ afia nte snow: 4ndien oto ndik esie mbon-ukpeme enyek, enyuŋ ekabare etie nte mme akpa-mkpa. 5Edi angel ɔbɔrɔ iban oro, ete, Mbufo ekufehe ndik: koro mmɔfiɔk nte mbufo eyom Jesus emi ekowotde ke cross. 6Enye iduhe mi; Enye emeset kpa nte ɔkɔdɔhɔde. Edi edise ebiet emi Ɔbɔŋ akanade do. 7Enyuŋ esɔp eka ekɔdɔhɔ mbet Esie, ete, Enye emeset ke mkpa; ndien sese, Enye ebem mbufo iso aka Galilee; mbufo edikut Enye do; sese, mmetiŋ do nnɔ mbufo. 8Mmɔ enyuŋ ewara edaha ekpɔŋ udi ye ndik ye akwa idara, enyuŋ efehe edi ndida etop emi nsɔk mbet Esie. 9Ndien sese, Jesus osobo mmɔ, ete mmɔ, Mmɔkɔm mbufo. Mmɔ enyuŋ edi edimum Enye ukot, etuak ibuot enɔ Enye. 10Ndien Jesus ɔdɔhɔ mmɔ ete, Ekufehe ndik: eka ekɔdɔhɔ nditɔ ete Mi, ete, mmɔ enyɔŋɔ eka ke Galilee; mmɔ edinyuŋ ekut Mi do.

11Edi nte mmɔ esaŋade eka, sese, ndusuk mbon-ukpeme eduk obio, enyuŋ emen kpukpru se ikotibede etiŋ enɔ ikpɔ oku. 12Ndien ke ini mmɔ oro ema ekobono ye mbiowo, enyuŋ esobo ibuot ekere, mmɔ enɔ mbon-ekɔŋ ediwak okuk, ete mmɔ oro, Mbufo edɔhɔ ete, 13Mbet Esie ekedi ke okoneyo ediyip Enye, ke adaŋemi nnyin idede idap. 14Ndien edieke ikɔ emi osimde andikara utɔŋ, nnyin iyekpe ye enye, isio mbufo ke ndik. 15Ntre mmɔ oro ebɔ okuk, enam nte etemede mmɔ: ndien ikɔ emi asuana ke otu mme Jew tutu osim mfin emi.

16Edi mbet duopekiet eka ke Galilee ke obot oro Jesus okonimde ɔnɔ mmɔ. 17Ndien ke ini mmɔ ekutde Enye, etuak ibuot enɔ Enye: edi ndusuk mmɔ eyik. 18Edi Jesus asaŋa ekpere mmɔ, onyuŋ ɔdɔhɔ mmɔ ete, Enɔ Mi ofuri odudu ke heaven ye ke isɔŋ. 19Mbufo eka ekanam kpukpru mme idut edi mbet Mi, enim mmɔ baptism esin ke enyiŋ Ete ye Eyen ye Edisana Spirit: 20enyuŋ ekpep mmɔ enam kpukpru ŋkpɔ eke ŋketemede mbufo: ndien sese, Ami ndodu ye mbufo kpukpru ini, tutu osim utit ererimbot. Amen.

Currently Selected:

MATTHEW 28: ENA

Highlight

Copy