MATTHEW 15

Jesus Ekpep Ŋkpɔ Abaŋa Idiɔk ŋkpɔ Mme Jew

(Mk 7.1-23)

1EKEM mme Pharisee ye mme scribe eto ke Jerusalem etiene Jesus, ete, 2Nsinam mbet Fo ebiatde item mbiowo? koro mmɔ miyetke ubɔk, ndien edidia uyo. 3Edi Jesus ɔbɔrɔ mmɔ ete, Nsinam mbufo nde edade item mbufo ebiat ibet Abasi? 4Koro Abasi ɔkɔdɔhɔ ete, Kpono usɔ ye uka; ŋko, Owo eke etiŋde idiɔk adian ete me eka okutre ndikpa. 5Edi mbufo ete, Owo ama ɔdɔhɔ ete esie mme eka esie ete, Mmayak se ŋkpadade mfɔn fi mfɔn nnɔ Abasi; enye idikponoke ete esie. 6Ntre ke mbufo ema enam ikɔ Abasi akabare edi ikpikpu kabaŋa item mbufo. 7Mbufo mbon mbubik, Isaiah ototim etiŋ nte prophet abaŋa mbufo, ete,

8 Mbio emi ekpono Mi ke mkpɔk-inua mmɔ;

Edi esit mmɔ ada nsan-nsan ye Ami.

9 Edi mmɔ ekpono Mi ikpikpu,

Sia ekpepde item owo ke ukpep-ŋkpɔ mmɔ.

10Ndien Enye okot otu owo, onyuŋ ɔdɔhɔ mmɔ ete, Ekop, enyuŋ etim efiɔk ŋkpɔ. 11Idige se idukde owo ke inua asabare owo, edi se iwɔrɔde owo ke inua, ke edi oro asabare owo. 12Ekem mbet Esie edi edidɔhɔ Enye ete, Nte ɔmɔfiɔk ete mme Pharisee eyat esit, ke ini mmɔ ekopde ikɔ emi? 13Edi Enye ɔbɔrɔ ete, Kpukpru se etɔde, eke midige Ete Mi ke heaven ɔkɔtɔ, eyedibere. Esana mmɔ eyak: mmɔ edi nnan mme ada-usuŋ. 14Ndien nnan ama ada nnan usuŋ, mmɔ mbiba eyeduɔŋɔ ke ukpe. 15Edi Peter ɔbɔrɔ Enye ete, Siak ŋke emi nɔ nnyin. 16Enye ete, Nte mbufo ŋko emanana ifiɔk ntem? 17Nte mbufo ikwe ite, se ededi eke odukde ke inua ebe oduk ke idibi, ndien esio eduɔk ke ufɔk ekwe? 18Edi ŋkpɔ eke ewɔŋɔde owo ke inua eto ke esit; edi mmɔ esabare owo. 19Koro mme idiɔk ekikere eto ke esit ewɔŋɔ, ye obom, ye efibe, ye use, ye inɔ, ye ikɔntiense nsu, ye isuŋi. 20Mmɔ emi edi se isabarede owo; edi ndidia ŋkpɔ ye ubɔk eke miyetke isabakere owo.

Mbuk Abaŋade Mbuɔtidem Aŋwan Canaan Oro

(Mk 7.24-30)

21Ekem Jesus adaha do aka ke ŋkaŋ Tyre ye Sidon. 22Ndien sese, ŋwan Canaan kiet oto ke adaŋa edem oro edi, onyuŋ ofiori ete, Tua mi mbɔm, O Ɔbɔŋ, Afo Eyen David; demon ke ɔtuhɔre eyen mi aŋwan eti-eti. 23Edi Jesus ibɔrɔke ndomo ikɔ kiet inɔ enye. Mbet Esie enyuŋ edi edikpe ye Enye ete, Sio ŋwan emi unyɔŋ; koro enye ke ofiori etiene nnyin ke edem. 24Edi Enye ɔbɔrɔ ete, Ikɔdɔŋke Mi ntiene mmɔ efen, ke mibɔhɔke nsomo erɔŋ ufɔk Israel. 25Edi ŋwan oro edi edituak ibuot ɔnɔ Enye ete, Ɔbɔŋ, ŋwam mi. 26Edi Jesus ɔbɔrɔ ete, Idige se ikemde, ndimen uyo nditɔ nduɔk nnɔ mme ebua. 27Edi ŋwan ete, Emekem, Ɔbɔŋ; koro mme ebua enyuŋ ediade ŋkeŋe udia eke etode ke okpokoro mme andiyene mmɔ eduɔŋɔ. 28Ekem Jesus ɔbɔrɔ enye ete, O ŋwan, mbuɔtidem fo omokpon; yak ɔwɔrɔ ɔnɔ fi nte oyomde. Ndien eyen esie okop nsɔŋidem ɔtɔŋɔde ke ini oro.

29Ekem Jesus adaha ɔkpɔŋ edem oro, asaŋa ekpere Inyaŋ Galilee, onyuŋ ɔdɔk ke akamba obot etetie do. 30Ndien ata ediwak otu owo etiene Enye, eke edade mbuŋɔ, ye nnan, ye imum, ye mmɔ emi edade unan, ye ediwak owo efen, edinim Enye ke ukot; ndien Enye anam udɔŋɔ okure mmɔ; 31esin idem akpa otu owo, ke adaŋemi mmɔ ekutde nte imum etiŋde ikɔ, nte mmɔ emi edade unan enyuŋ ekabarede edi ofuri, mbuŋɔ enyuŋ esaŋade, nnan enyuŋ ekutde usuŋ: ndien mmɔ etoro Abasi Israel.

32Edi Jesus okot mbet Esie edi, ete, Mmatua otu owo mbɔm, koro ke emi mmɔ ema etie ye Ami usen ita, minyuŋ inyeneke se ediade; nnyuŋ mmaŋa ndidɔŋ mmɔ esaŋa ye biɔŋ enyɔŋɔ, mbak mmɔ edikpa mba ke usuŋ. 33Ndien mbet edɔhɔ Enye ete, Ke mmɔŋ ke nnyin idinyene uyo eke awakde ke desert emi ekem ndiyuhɔ adaŋa akwa otu owo emi? 34Edi Jesus ete mmɔ, Enyene uyo ifaŋ? 35Mmɔ ete, Uyo itiaba ye ŋkpri iyak ifaŋ. Ekem Enye ɔnɔ otu owo uyo, ete, Esuhɔre etetie ke isɔŋ; 36onyuŋ emen uyo itiaba ye iyak oro; ndien ke ama ɔkɔnɔ ekɔm, obuŋ, ayak ɔnɔ mbet; mbet enyuŋ enɔ otu owo. 37Mmɔ oro kpukpru edia eyuhɔ; mbet enyuŋ etaŋ mbubek uyo eke ɔsuhɔde, eyɔhɔ akpasa itiaba. 38Mmɔ emi ediade edi thousand owo inaŋ, ekɔrɔ ye iban ye nditɔwɔŋ. 39Enye onyuŋ osio mme otu owo unyɔŋ, onyuŋ ediere ke ubom, ebe edi ke adaŋa Magadan.

Currently Selected:

MATTHEW 15: ENA

Highlight

Copy