MATTHEW 14

Mkpa John

(Mk 6.14-29; Lk 9.7-9)

1KE iduɔk ini oro Herod tetrarch okop etop Jesus. 2Enye onyuŋ ɔdɔhɔ ikɔt esie ete, Emi edi John Baptist; enye ama eset ke mkpa; mmɔdo mme odudu emi enamde utom enye ke idem. 3Koro Herod okomum John, esin ke ebuka, otop ɔduɔk ke ufɔk-ŋkpɔkɔbi, kabaŋa Herodias, ŋwan eyen-ete esie Philip. 4Koro John ɔkɔdɔhɔ enye ete, inenke afo ndida enye ndɔ. 5Ndien ke ini Herod oyomde ndiwot enye, efehe mbio-obio, koro mmɔ edade John ke prophet. 6Edi ke adaŋemi osimde usen emana Herod, eyen Herodias aŋwan enek unek ke ufɔt mmɔ kpukpru, onyuŋ enem Herod esit: 7ntre ke enye otomo ŋkpɔ, onyuŋ ɔŋwɔŋɔ ete, iyenɔ eyen-aŋwan oro se ededi eke enye edibeŋede. 8Ndien nte eka esie eketemede enye, eyen-aŋwan ete, Sin ibuot John Baptist ke usan nɔ mi. 9Ndien edidem ayat esit; edi ke ntak uŋwɔŋɔ esie, ye mmɔ emi etiede ke itie-udia ye enye, enye ɔnɔ uyo ete eda esɔk enye: 10onyuŋ ɔdɔŋ eka ekebigi John ke ufɔk-ŋkpɔkɔbi. 11Ndien eda ibuot esie ke usan edi edinɔ eyen-aŋwan oro; ndien enye emen ɔsɔk eka esie. 12Ekem mbet John edi, emen okpo esie ekebuk, enyuŋ edaha eketiŋ enɔ Jesus.

Jesus Ɔnɔ Akwa Otu Owo Udia

(Mk 6.30-44; Lk 9.10-17; Jn 6.1-14)

13Edi ke ini Jesus okopde ŋkpɔ emi, Enye ediere ke ubom, adaha ke ɔtɔ oro, aka ke ebiet eke edide desert ye mbet Esie ikpɔŋ; ndien ke adaŋemi mme otu owo ekopde, mmɔ eto ke mme obio esaŋa ukot-ukot etiene Enye. 14Ndien Enye ɔwɔrɔ ke ubom okut akamba otu owo, onyuŋ atua mmɔ mbɔm, onyuŋ anam mbon-udɔŋɔ mmɔ ekop nsɔŋidem. 15Edi ke ini osimde mbubreyo, mbet etiene Enye edɔhɔ Enye ete, Ebiet emi edi desert, ini ama onyuŋ ebe; dɔŋ mme otu owo enyɔŋɔ, man mmɔ eka ke obio-iŋwaŋ ekedep udia enɔ idem mmɔ. 16Edi Jesus ɔdɔhɔ mmɔ ete, Mmɔ ekukpa ndinyɔŋɔ; mbufo enɔ mmɔ ŋkpɔ edia. 17Edi mmɔ ete Enye, Nnyin inyene mi uyo ition ye iyak iba ikpɔŋ. 18Enye ete mmɔ, Eda mmɔ esɔk Mi mi. 19Ndien Enye ɔnɔ mme otu owo uyo, ete, esuhɔre etetie ke mbiet; onyuŋ emen uyo ition ye iyak iba oro, emenere enyin ese enyɔŋ, ɔdiɔŋ mmɔ, onyuŋ obuŋ uyo, ayak ɔnɔ mbet, mbet enyuŋ eyak enɔ mme otu owo. 20Ndien mmɔ kpukpru edia eyuhɔ, mmɔ enyuŋ etaŋ mbubek uyo eke esuhɔde, edɔŋ ke akpan duopeba eyɔhɔ. 21Ibat mmɔ emi ediade ŋkpɔ ekpere thousand owo ition, isinke iban ye nditɔwɔŋ.

22Ekem Enye enyik mbet Esie ediere ke ubom, ete, ebem Imɔ iso eka ke edem eken, tutu Imɔ idɔŋ mme otu owo enyɔŋɔ. 23Ekem ke ini Enye ama ɔkɔdɔŋ mbio-obio enyɔŋɔ, Enye ɔdɔk ke edikoŋ obot ke Idem Esie ikpɔŋ ndibɔŋ akam: edi ke ini osimde mbubreyo, Enye odu do ikpɔŋ. 24Edi ubom odu ke emi ke ufɔt inyaŋ, mbufut onyuŋ esiŋere enye; koro ofim ɔbiɔŋɔde mmɔ ke iso. 25Ekem ke ɔyɔhɔ efen inaŋ ke okoneyo, Jesus asaŋa ke enyɔŋ inyaŋ etiene mmɔ. 26Edi ke ini mbet ekutde Enye asaŋade ke enyɔŋ inyaŋ, esit otimere mmɔ, ete, Edi ekpo: ndien mmɔ esio mkpo ɔnɔ ndik. 27Edi idaha oro Jesus etiŋ ikɔ ye mmɔ ete, Esɔŋ esit; edi Ami; ekufehe ndik. 28Edi Peter ɔbɔrɔ Enye ete, Ɔbɔŋ, edieke edide Afo, kot mi nsaŋa ke enyɔŋ mmɔŋ ntiene Fi. 29Jesus ete enye, Di. Ndien Peter ɔsuhɔre ke ubom, onyuŋ asaŋa ke enyɔŋ mmɔŋ, ete itiene Jesus. 30Edi ke ini enye esede ofim, ndik anam enye: enye onyuŋ ɔtɔŋɔ ndideŋ, onyuŋ ofiori ete, Ɔbɔŋ, nyaŋa mi. 31Edi idaha oro Jesus anyanare ubɔk omum enye, onyuŋ ɔdɔhɔ enye ete, O afo owo ekpri mbuɔtidem, nsidi ntak afo eyikde? 32Ndien ke ini mmɔ edukde ke esit ubom, ofim odobo. 33Edi mmɔ emi edude ke ubom etuak ibuot enɔ enye, ete, Ke akpanikɔ Afo edi Eyen Abasi.

34Ekem ke ini mmɔ ebede inyaŋ esim obot, mmɔ ebehe ke isɔŋ Gennesaret. 35Ndien ke adaŋemi mbon edem oro ediɔŋɔde Enye, mmɔ edɔŋ eka ke kpukpru ŋkan ŋkuk itie ekada kpukpru mmɔ emi edɔŋɔde esɔk Enye; 36enyuŋ ekpe Enye ubɔk ete mmɔ oro etuk ekpedi nnyeriye ɔfɔŋidem Esie ikpɔŋ: ndien adaŋa ibat owo nte etukde ekop nsɔŋidem.

Currently Selected:

MATTHEW 14: ENA

Highlight

Copy