MATTHEW 12

Jesus Edi Edidem Sabbath; Mme Owo Eyom Idiɔnɔ.

(Mk 2.23-28; Lk 6.1-5)

1KE ini oro Jesus asaŋa ebe ke iŋwaŋ ibokpot ke usen sabbath; edi biɔŋ ɔdɔŋ mbet esie, mmɔ enyuŋ etɔŋɔ ndikibi ibotkpot nta. 2Edi ke ini mme Pharisee ekutde, mmɔ edɔhɔ Enye ete, Sese, mbet Fo ke enam se minenke owo ndinam ke usen sabbath. 3Edi Enye ɔdɔhɔ mmɔ ete, Nte mbufo ikokotke se David akanamde, ke ini biɔŋ ɔdɔŋde enye ye mmɔ emi edude ye enye: 4nte enye odukde ke ufɔk Abasi, onyuŋ adiade uyo-iso-Abasi, emi minenke enye ye mmɔ emi edude ye enye ndidia, ke mibɔhɔke mme oku ikpɔŋ? 5Nte mbufo inyuŋ ikotke ke ibet nte mme oku emi edude ke temple ebiatde sabbath ke usen sabbath, ndien minyeneke ndudue? 6Edi ndɔhɔ mbufo nte, Owo emi okponde akan temple odu mi. 7Edi edieke mbufo ekpɔfiɔkde se ikɔ emi ɔdɔhɔde ete, Edi mbɔm ke nyom, idige uwa, ɔwɔrɔde, mbufo ikpobiomke mmɔ emi miduehe. 8Koro Eyen Owo edi Ɔbɔŋ usen sabbath.

Owo Emi Ubɔk Esie Akpade

(Mk 3.1-6; Lk 6.6-11)

9Ekem enye adaha ke ebiet oro oduk ke synagogue mmɔ; 10ndien sese, owo emi ubɔk esie akpade odu do. Mmɔ ebup Enye ete, Nte enen ndinam udɔŋɔ okure ke usen sabbath? kpaŋ mmɔ ekpe-nyene se edoride Enye. 11Edi Enye ete mmɔ, Anie owo ke otu mbufo, emi enyenede erɔŋ kiet, editre ndimum enye nsio ke obube eke ɔduɔde ke esit ke usen sabbath? 12Owo ɔmɔsɔŋ urua akan erɔŋ adaŋa didie ndien! Mmɔdo enen ndinam ufɔn ke usen sabbath. 13Ekem Enye ɔdɔhɔ owo oro ete, Nyanare ubɔk fo. Ndien enye anyanare ubɔk; ubɔk esie onyuŋ akabare ɔfɔn nte enye eken. 14Edi mme Pharisee ewɔŋɔ ekoduk odu ebaŋa Jesus, eyom usuŋ nte idisaŋade iwot Enye. 15Edi Jesus ɔfiɔk, onyuŋ adaha ke ebiet oro: ndien ediwak owo etiene Enye; 16Enye onyuŋ anam udɔŋɔ mmɔ kpukpru okure, onyuŋ akpan mmɔ ete ekuyarare Imɔ: 17man osu nte prophet Isaiah eketiŋde, ete,

18Sese owo Mi emi ŋkemekde;

Ama Mi emi nnemde esit ye Enye:

Nyedori Enye Spirit Mi ke idem,

Ndien Enye eyenam ikpe ɔwɔrɔ ɔnɔ mme Gentile.

19Enye iditɔhɔke, idinyuŋ ifiorike:

Baba owo kiet idinyuŋ ikopke uyo Esie ke efak.

20Enye idibuŋke nyanyaŋa eke anuahade,

Idinyuŋ inimeke ɔfɔŋ-utuenikaŋ eke osiode nsuŋikaŋ,

Tutu Enye edinam ubiere-ikpe ɔwɔrɔ ada onyuŋ akan.

21Ndien mme Gentile eyedori enyin ke enyiŋ Esie.

22Ekem eda owo kiet emi enyenede demon, emi edide nnan ye imum, esɔk Enye: ndien enye anam udɔŋɔ esie okure, esin owo imum oro etiŋ ikɔ onyuŋ okut usuŋ. 23Ndien idem akpa kpukpru mme otu owo oro, mmɔ enyuŋ edɔhɔ ete, Ndi Enye emi edi Eyen David? 24Edi ke adaŋemi mme Pharisee ekopde, mmɔ edɔhɔ ete, Owo emi ibinke demon iduɔk, ke mitoho Beelzebub, ɔbɔŋ mme demon. 25Edi sia Enye ɔdiɔŋɔde ekikere mmɔ, ɔdɔhɔ mmɔ ete, kpukpru obio edidem eke abaharede ada aŋwana ye idem esie oduk nditaha; kpukpru obio mme ufɔk eke onyuŋ abaharede aŋwana ye idem esie idisɔŋɔke ida. 26Ndien edieke Satan ebinde Satan ɔduɔk, enye abahare ada aŋwana ye idem esie; didie ndien ke obio ubɔŋ esie edisɔŋɔ ida? 27Ndien edieke Ami ndade Beelzebub mbin mme demon nduɔk, nditɔ mbufo eda anie ebin mmɔ eduɔk? Mmɔdo mmɔ edidi mme ebierikpe enɔ mbufo. 28Edi edieke Ami ndade Spirit Abasi mbin mme demon nduɔk, Ubɔŋ Abasi ama osim mbufo. 29Ŋko, owo ekeme didie ndiduk ke ufɔk ɔkpɔsɔŋ owo mbume ŋkpɔ esie, ke enye mibemke iso ibɔp ɔkpɔsɔŋ owo oro? Adaŋoro ndien ke enye edibume ŋkpɔ ufɔk esie. 30Owo eke midaha ye Ami aŋwaŋwana ye Ami; owo eke minyuŋ ibokke ye Ami asasuan. 31Mmɔdo ndɔhɔ mbufo nte, Eyefen mme owo kpukpru idiɔk-ŋkpɔ ye ikɔ isuŋi; edi ikɔ isuŋi eke owo etiŋde adian Edisana Spirit, idifenke enye. 32Ndien owo ekededi eke editiŋde ikɔ adian Eyen Owo, eyefen enye; edi owo ekededi eke editiŋde ikɔ adian Edisana Spirit, idifenke enye, ye edide ke eyo emi ye onyuŋ edide ke eyo emi edidide. 33Enam eto ɔfɔn, enyuŋ enam mfri esie ɔfɔn; midige ntre, enam eto edi mbiara, enyuŋ enam mfri esie edi mbiara ŋko: koro eda mfri efiɔk eto. 34Mbufo ubon urukikɔt, mbufo emi ediɔkde ekeme didie nditiŋ nti ŋkpɔ? Koro oto ke uyɔhɔ esit ke inua osio etiŋ. 35Eti owo osioŋo nti ŋkpɔ ke nti ŋkpɔ eke enye okobonde; idiɔk owo ŋko osioŋo mme idiɔk ŋkpɔ ke mme idiɔk ŋkpɔ eke enye okobonde. 36Mmonyuŋ ndɔhɔ mbufo nte, Ke usen ikpe mme owo eyenɔ mbuk ebaŋa kpukpru ikpikpu ikɔ eke mmɔ etiŋde. 37Koro edito ikɔ fo ke ikpe etebe fi, edinyuŋ oto ikɔ fo ke ikpe obiom fi.

Idiɔk Emana Oyom Idiɔŋɔ

(Mk 8.11-12; Lk 11.29-32)

38Ekem ndusuk mme scribe ye mme Pahrisee ebɔrɔ Enye ete, Andikpep, nnyin iyom ite Afo owut nnyin idiɔnɔ. 39Edi Enye ɔbɔrɔ mmɔ ete, Idiɔk emana eke amade efibe oyom idiɔŋɔ; ndien idinɔŋɔ enye idiɔŋɔ, ibɔhɔke idiɔŋɔ prophet Jonah. 40Koro nte Jonah okodude ke idibi akamba iyak uwemeyo ita ye okoneyo ita, ntre ke Eyen Owo eyedu ke esit isɔŋ uwemeyo ita ye okoneyo ita. 41Mbon Nineveh eyedaha eda ke ikpe ye emana emi, enyuŋ ebiom enye; koro mmɔ ekakabarede esit ke erikwɔrɔ Jonah: ndien sese, Enye emi okponde akan Jonah odu mi. 42Ɔbɔŋ-aŋwan usuk eyedaha ada ke usen ikpe ye emana emi, onyuŋ obiom enye: koro enye okotode ke mme utit isɔŋ edi edikop ɔniɔŋ Solomon: ndien sese, Enye emi okponde akan Solomon odu mi. 43Edi ke ini edidehe spirit ɔwɔrɔde owo ke idem, enye asaŋa oyo ke edisat ebiet, oyom nduɔk-odudu, ndien ikwe. 44Ekem enye ete, Nyefiak nnyɔŋ ufɔk mi emi ŋkotode ke esit ŋwɔrɔ; ndien ke ini enye edide, okut ete ufɔk oro ana ukpɔk, ema ekpɔri enyuŋ ebana enye. 45Ekem enye aka akada spirit itiaba efen eke ediɔkde ekan idem esie adian idem, ndien mmɔ eduk ekoduŋ do: ndien ukperedem itie owo oro akabare ɔdiɔk akan mbemiso. Kpa ntre ke edidi ye idiɔk emana emi.

46Nte Enye osuk eteiŋ ikɔ ye mme otu owo, sese, eka Esie ye nditɔ-eka Esie edida ke aŋwa, eyom nditiŋ ikɔ ye Enye. 47Ndien owo kiet ɔdɔhɔ Enye ete, Sese, uka ye nditɔ-uka ke eda ke aŋwa, eyom Fi, ndineme ye Afo. 48Edi Enye ɔbɔrɔ owo emi ɔdɔhɔde ntem ye Enye, ete, Anie edi eka Mi? mme anie enyuŋ edi nditɔ-eka Mi? 49Ndien Enye anyan ubɔk owut mbet esie, onyuŋ ɔdɔhɔ ete, sese, eka Mi ye nditɔ-eka Mi! 50Koro owo ekededi eke anamde se Ete Mi emi odude ke heaven amade, enye edi eyen-eka Mi eren ye eyen-eka Mi aŋwan, ye eka Mi.

Currently Selected:

MATTHEW 12: ENA

Highlight

Copy