MATTHEW 11

John Ɔdɔŋ Mbet Esie Eka Ekebup Jesus Mbume

(Lk 7.18-35)

1EDIKEM, ke ini Jesus ama ɔkɔnɔ mbet esie duopeba item ama, Enye adaha ɔkpɔŋ edem oro, aka ndikpep ndiyuŋ ŋkwɔrɔ ikɔ Abasi ke mme obio mmɔ.

2Edi John etie ke ufɔk-ŋkpɔkɔbi okop abaŋa mme utom Christ, enye onyuŋ ɔdɔŋ mbet esie eka ekedɔhɔ Jesus ete, 3Nte Afo edi Enye emi enyenede ndidi, mme nnyin ikpodori enyin ke owo eŋwen? 4Ndien Jesus ɔbɔrɔ mmɔ ete, Eka ekebuk enɔ John ŋkpɔ oro mbufo ekopde enyuŋ ekutde: 5mme nnan ekut usuŋ, mbon mbuŋɔ esana, enam mbon akpa-mfia esana, mme inan ekop ikɔ, enam mme akpa-mkpa eset, enyuŋ ekwɔrɔ eti mbuk enɔ mme ubuene. 6Ndien ɔfɔfɔn ye owo ekededi eke midikwe ntak iduɔ ye Ami.

7Edi nte mmɔ enyɔŋɔde, Jesus ɔtɔŋɔ ndidɔhɔ ye mme otu owo mbaŋa John, ete, Mbufo ekewɔŋɔ eka ke desert ndise nso? ndi nyanyaŋa eke ofim enyeŋede? 8Edi ekɔwɔŋɔ eka ndise nso? ndi owo eke esinede eti ɔfɔŋidem? Sese, mme esine eti ɔfɔŋidem edu ke ufɔk mbɔŋ. 9Edi ekewɔŋɔ eka ke ntak ewe? eka ekese prophet? Ke akpanikɔ ke ndɔhɔ mbufo nte, enye onyuŋ ɔsɔŋɔ okpon akan prophet. 10Emi edi enye emi ewetde ebaŋa enye ete,

Sese, mmɔdɔŋ isuŋ Mi ebem fi iso,

Emi edidiɔŋde usuŋ inim inɔ Fi.

11 Ke akpanikɔ ke ndɔhɔ mbufo, Ke otu mmɔ eke iban emande, akananam owo idahake ida emi okponde akan John baptist: edi owo emi ekpride akan ke Obio Ubɔŋ Heaven okpon akan enye. 12Edi ɔtɔŋɔde ke mme usen John Baptist tutu osim emi, Obio Ubɔŋ Heaven akpa unyaŋa, mbom unyaŋa enyuŋ eda enye ke nsɔŋubɔk enyene. 13Koro kpukpru mme prophet ye ibet eketiŋ prophecy tutu osim John. 14Ndien edieke mbufo enyimede ndikop, emi edi Elijah emi enyenede ndidi. 15Owo eke enyenede utɔŋ ndikop, yak okop. 16Edi ndida emana emi ndomo ye nso? ebiet nditɔwɔŋ emi etiede ke aŋwa-urua ekot 17ŋka mmɔ, ete,

Imefri ifiom inɔ mbufo, edi mbufo inekkeunek:

Imoyorore eyet, edi mbufo ifuhɔke.

18 Koro John ekedi, idiaha ŋkpɔ inyuŋ iŋwɔŋke; ndien mmɔ ete, Enye enyene demon. 19Eyen Owo emedi, adia ŋkpɔ onyuŋ ɔŋwɔŋ; ndien mmɔ ete, Sese, owo udia ye amammin, ufan mme publican ye mme idiɔk owo. Edi ubɔkutom Eti ibuot ewut ete Eti ibuot enen.

20Ekem Jesus ɔtɔŋɔ ndisɔŋɔ nsua nnɔ mme obio eke Enye akanamde ediwak utom odudu Esie ke esit, koro mmɔ mikabakere esit. 21Eyedɔdiɔk ɔnɔ fi Chorazin! Eyedɔdiɔk ɔnɔ fi Bethsaida! Koro edieke ekpekenamde ke Tyre ye Sidon mme utom odudu eke ekanamde ke esit mbufo, mmɔ ekpakabare esit anyan ini ke ɔfɔŋ-ikpo ye ntɔŋ-ukut. 22Edi ndɔhɔ mbufo nte, Ŋkpɔ eyefɔn ye Tyre ye sidon ke usen ikpe akan ye mbufo. 23Ndien afo Capernaum, nte eyemenere okoŋ osim ikpa-enyɔŋ? Eyesuhɔre fi osim obio ekpo: koro edieke ekpekenamde ke Sodom mme utom odudu eke ekanamde ke esit fo, enye okposuk odu osim mfin emi. 24Edi ndɔhɔ mbufo nte, Nkpɔ eyefɔn ye isɔŋ Sodom ke usen ikpe akan ye afo.

25Ke ini oro Jesus ɔbɔrɔ ete, Mmɔkɔm Fi, O Ete, Ɔbɔn enyɔŋ ye isɔŋ, koro Afo okodipde mbon eti ibuot ye mme asian mme ŋkpɔ emi, onyuŋ ayararede mmɔ ɔnɔ nsek nditɔ. 26Edi ntre, Ete, koro enemde Fi ntem ke enyin. 27Ete Mi amayak kpukpru ŋkpɔ ɔnɔ Mi: ndien baba owo kiet ifiɔkke Eyen ke mibɔhɔke Ete; baba owo kiet inyuŋ ifiɔkke Ete ke mibɔhɔke Eyen, ye owo ekededi eke Eyen amade ndiyarare Enye nnɔ. 28Etiene Mi, kpukpru mbufo emi ekpade mba enyuŋ ebiomde edidobi mbiomo, ndien Ami nyenɔ mbufo nduɔk-odudu. 29Emen ɔkpɔnɔ Mi ekɔŋɔ ke itɔŋ mbufo, enyuŋ ekpebe Mi; koro mme-nyene ifure-ifure ido nnyuŋ nsuhɔre idem ke esit; ndien mbufo eyekut nduɔk-odudu enɔ ukpɔŋ mbufo. 30Koro ɔkpɔnɔ Mi ememem, mbiomo Mi onyuŋ efefere.

Currently Selected:

MATTHEW 11: ENA

Highlight

Copy