LUKE 5

Jesus Okot Mme Akpa mbet Esie

(Mt 4.18-22; Mk 1.16-20)

1EDIKEM ke adaŋemi otu owo efihede Enye man ekop ikɔ Abasi, Enye ada ke mben inyaŋ Gennesaret; 2ndien Enye okut ubom iba enade ke mben inyaŋ: edi mme ɔkɔ-iyak ema ewɔŋɔ, ke enyuŋ edarare iyire mmɔ. 3Edi Enye oduk ke ubom kiet emi enyenede Simon, onyuŋ ɔdɔhɔ enye ete onuk ubom ɔkpɔŋ obot esisit. Enye onyuŋ ɔsuhɔre etetie ke ubom ekpep mme otu owo ŋkpɔ. 4Ke Enye ama eketiŋ ikɔ okure, ɔdɔhɔ Simon ete, ewat ewɔrɔ ke udem, enyuŋ eduɔŋɔ iyire man emum iyak. 5Simon ɔbɔrɔ ete, Ɔbɔŋ, nnyin ikakpa utom ofuri okoneyo, inyuŋ imumke baba ŋkpɔ kiet: edi ke uyo Fo nyeduɔk iyire. 6Ndien ke ini mmɔ enamde ntre, mmɔ ekuk ata ediwak iyak emum, ndien iyire mmɔ ɔtɔŋɔ ndiwaha. 7Ndien mmɔ enam idiɔŋɔ ekot mme nsaŋa mmɔ, emi edude ke ubom eken, ete edi edinwam mme imɔ. Mmɔ oro edi, eyɔhɔ ubom mbiba ye iyak, tutu mmɔ etɔŋɔ ndisop. 8Ke Simon Peter okutde emi, ɔduɔ Jesus ke edɔŋ, ofiori ete, Daha kpɔŋ mi, O Ɔbɔŋ, koro ami ndide idiɔk owo. 9Koro idem akpade enye ye mme nsaŋa esie eti-eti, ke utɔ ediwak iyak eke mmɔ ekemumde. 10Onyuŋ edi ntre ɔnɔ James ye John ŋko, nditɔ Zebedee, mme nsaŋa Simon. Ndien Jesus ɔdɔhɔ Simon ete, Kufehe ndik; tɔŋɔ ke emi afo eyekɔ owo. 11Ndien ke mmɔ ewatde ubom ebehe ke esuk, mmɔ ekpɔŋ kpukpru ŋkpɔ, etiene Jesus.

12Edikem, ke Jesus odude ke obio kiet, sese owo emi ɔyɔhɔde ye akpa-mfia ke idem, ke okutde Jesus, ɔduɔ ke isɔŋ okibi iso esie, onyuŋ ekpe Enye ubɔk ete, Ɔbɔŋ, ke Afo onyimede, emekeme ndinam mi nsana. 13Do Enye anyanare ubɔk otuk enye, ete,Mmonyime, sana; ndien ndo-ndo oro akpa-mfia ɔkpɔŋ enye. 14Ndien Jesus owuk enye ete, Kutiŋ unɔ baba owo kiet: edi ka okuo kowut oku idemfo, nyuŋ wa uwa nte Moses eketemede ke erinam fi asana, man edi ŋkpɔ-ntiense ɔnɔ mme owo. 15Edi etop Esie ɔdɔdiɔŋ asuana akan; ndien akwa otu owo edi ndikop Enye, man Enye onyuŋ anam mme udɔŋɔ mmɔ ekure.

16Edi Enye ɔkpɔŋ mmɔ aka ke desert ikpɔŋ onyuŋ ɔbɔŋ akam.

17Ekem ke usen kiet, nte Enye ekpepde owo ŋkpɔ, mme Pharisee ye mme ekpep-ibet, emi ekotode ke kpukpru obio-iŋwaŋ Galilee ye Judaea, ye ke Jerusalem, enyuŋ etie do: odudu Jehovah onyuŋ odu ye Enye ndinam udɔŋɔ okure. 18Ndien sese, mme owo ebiom ɔdɔŋɔ-akpa-ubeŋ kiet ke mbri edi: mmɔ enyuŋ eyom ndida enye nduk ndinim ke iso Jesus. 19Edi adaŋemi mmɔ mikwe usuŋ nte edade enye eduk ke ntak otu owo, mmɔ edɔk ɔkɔm ufɔk, ekibɔre ŋkanya, esuhɔre enye ke mbri esie enim ke ufɔt ke iso Jesus. 20Ke ini Jesus okutde mbuɔtidem mmɔ, ɔdɔhɔ owo oro ete, Owo, emefen mme idiɔk-ŋkpɔ fo. 21Edi mme scribe ye mme Pharisee etɔŋɔ ndineni, ete, Anie edi enye emi osuŋide Abasi? Anie ekeme ndifen mme idiɔk ŋkpɔ ke mibɔhɔke Abasi ikpɔŋ-ikpɔŋ? 22Edi Jesus ɔfiɔk se mmɔ enenide, onyuŋ ɔbɔrɔ mmɔ ete, Nsinam mbufo enenide ke esit Mbufo? 23Ewe emem akan, mme ndidɔhɔ ete, Emefen mme idiɔk ŋkpɔ fo? mme ndidɔhɔ ete, Daha ke enyɔŋ, saŋa? 24Edi man mbufo efiɔk ete Eyen Owo enyene odudu ke isɔŋ ndifen mme idiɔk ŋkpɔ (Enye ɔdɔhɔ ɔdɔŋɔ-akpa-ubeŋ ete), Ndɔhɔ fi nte, Daha ke enyɔŋ, men mbri fo, nyɔŋ ufɔk. 25Ke idaha kiet enye adaha ke enyɔŋ ke iso mmɔ, emen se enye akanade ke esit ɔnyɔŋ ufɔk ɔnɔ Abasi itoro. 26Ndien mkpa-idem omum kpukpru owo, mmɔ enyuŋ etoro Abasi; ndik onyuŋ ɔyɔhɔ mmɔ ke esit, mmɔ enyuŋ edɔhɔ ete, Nnyin imokut mme utibe ŋkpɔ mfin.

27Ekem ke mme ŋkpɔ emi ema ekebe, Jesus ɔwɔrɔ aŋwa, okut publican kiet, emi ekerede Levi, etiede ke itie ubɔ-utomo, onyuŋ ɔdɔhɔ enye ete, Tiene Mi. 28Ndien Levi adaha ɔkpɔŋ kpukpru ŋkpɔ etiene Enye. 29Levi onyuŋ anam akamba udia ke ufɔk esie ɔnɔ Jesus; akwa otu mme publican ye mmɔ efen enyuŋ etetie ke itie-udia ye mmɔ. 30Edi mme Pharisee ye mme scribe mmɔ esuk Enye uyo enɔ mbet Esie, ete, Nsinam mbufo ediade enyuŋ eŋwɔŋde ŋkpɔ ye mme publican ye mme idiɔk owo? 31Edi Jesus ɔbɔrɔ mmɔ ete, Mmɔ emi enyenede nsɔŋidem iyomke abia-ibɔk; edi mmɔ emi edɔŋɔde eyom. 32Ŋkedige ndikot ndinen owo, edi ŋkedi ndikot mme idiɔk owo, nte ekabare esit.

33Mmɔ enyuŋ edɔhɔ Enye ete, Mbet John ewak nditre udia, enyuŋ enam mkpe-ubɔk; ye mbet mme Pharisee ŋko; edi mbet Fo edia enyuŋ eŋwɔŋ ŋkpɔ. 34Edi Jesus ɔdɔhɔ mmɔ ete, Nte mbufo emekeme ndinam nditɔ ufɔk-ndɔ etre udia, ke ini ebe-ndɔ odude ye mmɔ? 35Edi mme usen eyedi eke edibɔde mmɔ ebe-ndɔ; mmɔ eyetre udia ke mme usen oro. 36Enye onyuŋ otop ŋke ɔnɔ mmɔ, ete, Baba owo kiet iwakke ubak obufa ɔfɔŋidem ida ikim idian ke akani ɔfɔŋidem: ama anam ntre, enye awak obufa ɔfɔŋidem, ŋko-ŋko ubak obufa ɔfɔŋ isaŋake ikekem ye akani. 37Baba owo kiet inyuŋ isinke obufa wine ke ŋkani ikpa; ama anam ntre, obufa wine eyesiak ikpa, onyuŋ ɔduɔhɔ, ikpa eyenyuŋ ebiara. 38Edi enyene ndisin obufa wine ke mbufa ikpa.

39 Baba owo kiet emi ɔkɔŋwɔŋde akani wine iyomke obufa idaha oro; koro enye edidɔhɔ ete, Akani ɔfɔn.

Currently Selected:

LUKE 5: ENA

Highlight

Copy