LUKE 4

Satan Odomo Jesus Idomo

(Mt 4.1-11; Mk 1.12-13)

1EDI Jesus ɔyɔhɔ ye Edisana Spirit afiak ɔkpɔŋ Jordan; Spirit onyuŋ ada Enye asasaŋa ke desert ke usen aba, ndien Satan odomo Enye. 2Enye ikadiaha ŋkpɔ ke mme usen oro: ndien ke ini mmɔ ebede enye okop biɔŋ. 3Edi satan ɔdɔhɔ Enye ete, Edieke Afo edide Eyen Abasi, wuk itiat emi akabare edi uyo. 4Ndien Jesus ɔbɔrɔ enye ete, Ema ewet ete, idige uyo ikpɔŋ ke owo edida odu uwem. 5Ekem Satan ada Enye ɔdɔk, onyuŋ owut Enye kpukpru mme obio ekondo ke idaha kiet. 6Satan onyuŋ ɔdɔhɔ Enye ete, Nyenɔ Fi ofuri odudu emi ye ubɔŋ mme obio emi: koro ema eyak kpukpru enɔ mi, nnyuŋ nda ubɔŋ oro nnɔ owo eke mmade. 7Mmɔdo edieke Afo edituakde ibuot ke iso mi kpukpru eyedi okuo. 8Edi Jesus ɔbɔrɔ enye ete, Ema ewet ete, Tuak ibuot nɔ Jehovah Abasi fo, nyun nam ŋkpɔ nɔ Enye ikpɔŋ-ikpɔŋ. 9Ekem Satan ada Enye oduk ke Jerusalem, odori Enye ke edikoŋ ebiet temple, onyuŋ ɔdɔhɔ Enye ete, Edieke Afo edide Eyen Abasi, sio Idem Fo mi duɔk ke isɔŋ, 10koro ema ewet ete,

Enye eyenɔ mme angel Esie uyo abaŋa Fi, ete ekpeme Fi ŋko,

11Mmɔ eyekama Fi ke ubɔk mmɔ,

Mbak Afo edituak ukot Fo ke itiat.

12Ndien Jesus ɔbɔrɔ enye ete, Ema ewet ete, Kudomo Jehovah Abasi fo. 13Ndien ke ini Satan ama okodomo Enye ama, enye adaha ɔkpɔŋ Enye ke ekpri ini.

Jesus Ɔtɔŋɔ Utom Ke Galilee

(Mt 4.12-17; Mk 1.14-15)

14Ekem Jesus afiak edi ke Galilee ke odudu Spirit: etop Esie onyuŋ asuana akanare ofuri edem oro. 15Ndien Enye ekpep mmɔ ŋkpɔ ke mme synagogue mmɔ, kpukpru owo enyuŋ etoro Enye.

Esin Jesus Ke Nazareth Ebiet Emi Ekebɔkde Enye

(Mt 13.53-58; Mk 6.1-6)

16Ekem Enye edi ke Nazareth, kpa ke ebiet emi ekebɔkde Enye: ndien nte ido Esie edide, Enye oduk ke synagogue ke usen sabbath, onyuŋ adaha ke enyɔŋ ndikot ŋwed. 17Ndien enɔ Enye ŋwed prophet Isaiah. Ndien ke Enye okibɔrede ŋwed, okut itie emi ewetde ete,

18 Spirit Jehovah odoro Mi ke idem,

Koro Enye emeyet Mi aran onim, ete, ŋkwɔrɔ eti mbuk nnɔ nditɔ-ubuene:

Enye ɔmɔdɔŋ Mi, ete, ŋkwɔrɔ uwɔrɔ-ufin nnɔ mbuotekɔŋ,

Nnyuŋ ŋkwɔrɔ erikut usuŋ nnɔ mme nnan,

Nnyuŋ nsana mmɔ emi efikde nyak,

19 Nnyuŋ ŋkwɔrɔ isua mfɔn-ido Jehovah.

20Ndien Enye okibi ŋwed, ayak ɔnɔ asaŋutom, onyuŋ ɔsuhɔre etetie: kpukpru mmɔ emi edude ke synagogue enyuŋ ewuk enyin ese Enye. 21Enye ɔtɔŋɔ ndidɔhɔ mmɔ, ete, Ikɔ ŋwed Abasi emi omosu ke utɔŋ mbufo mfin emi. 22Kpukpru mmɔ enyuŋ edi ntiense enɔ Enye, enyuŋ edu ke mkpa-idem ndikop ikɔ mfɔn eke ewɔŋɔde Enye ke inua: mmɔ nyuŋ edɔhɔ ete, Nte Enye emi idige eyen Joseph? 23Ndien Enye ɔdɔhɔ mmɔ ete, Mbufo iditreke nditop ŋke emi nnɔ Mi, ete, Abia-ibɔk, kɔk idemfo: kpukpru se ikokopde ite amanam ke Capernaum, nam mi ŋko ke obio fo. 24Edi Enye ete, Edi akpanikɔ ke ndɔhɔ mbufo nte, Owo idaha baba prophet kiet ke ŋkpɔ ke isɔŋ emana esie. 25Edi ntiŋ akpanikɔ nnɔ mbufo nte, Ediwak mme ebe-akpa ekedu ke Israel ke eyo Elijah, ke ini esiride ikpa-enyɔŋ isua ita ye ɔfiɔŋ itiokiet, akamba akaŋ onyuŋ odude ke ofuri isɔŋ; 26edi idɔŋke Elijah etiene mmɔ baba kiet, ke mibɔhɔke ebe-akpa aŋwan, emi odude ke Zarephath ke isɔŋ Sidon. 27Ediwak medɔŋɔ akpa-mfia ekenyuŋ edu ke Israel ke eyo Elisha prophet; edi inamke baba owo kiet ke otu mmɔ asana, ke mibɔhɔke Naaman, owo Syria. 28Ndien ifuresit ɔyɔhɔ mmɔ kpukpru emi edude ke synagogue, ke adaŋemi mmɔ ekopde ŋkpɔ emi; 29mmɔ enyuŋ ebumere edaha ke enyɔŋ ebin Enye ɔwɔrɔ ke obio, enyuŋ eda Enye edi ke ibuot obot emi ebɔpde obio mmɔ ke esit, man esio Enye eduɔk. 30Edi Enye ebe ke ufɔt mmɔ ɔnyɔŋ Esiemɔ.

31Ekem Enye ɔsuhɔre edi ke Capernaum, emi edide obio Galilee. 32Enye onyuŋ ekpep mmɔ ŋkpɔ ke sabbath: ndien erikpep Esie enyene mmɔ ndyɔ, koro ikɔ Esie asaŋade ye odudu. 33Ndien owo kiet odu ke synagogue, emi enyenede edidehe spirit demon; enye onyuŋ ofiori ke ɔkpɔsɔŋ uyo ete Ah! isaŋa nso ye Afo, 34Jesus eyen Nazareth? Nte emedi ndisobo nnyin? mmɔdiɔŋɔ owo eke Afo edide, Edisana Eyen Abasi. 35Edi Jesus asua ɔnɔ enye ete, Kibi inua; nyuŋ wɔrɔ enye ke idem. Ndien ke ama okosio enye ɔduɔk ke iso mmɔ, ɔwɔrɔ enye ke idem, inamke enye baba ŋkpɔ kiet. 36Mkpa-idem omum mmɔ kpukpru, mmɔ enyuŋ etiŋ ke otu idem mmɔ ete, Nso oruk ikɔ edi emi? koro Enye adade nsɔŋ-uyo ye odudu owuk ndidehe spirit, ndien mmɔ ewɔŋɔ. 37Etop Esie onyuŋ asuana osim kpukpru ebiet ke edem oro akanare okuk.

38Ekem Enye adaha ke enyɔŋ ɔwɔrɔ ke synagogue oduk ke ufɔk Simon. Ndien ɔkpɔsɔŋ ufiop-idem omum eka ŋwan Simon: mmɔ enyuŋ ekpe Jesus ubɔk enɔ enye. 39Ndien Enye ada ekpere enye, asua ɔnɔ ufiop-idem; ndien ufiop-idem ɔkpɔŋ enye: enye onyuŋ adaha ke enyɔŋ ini kiet anam ŋkpɔ ɔnɔ mmɔ.

40Ndien ke ini eyo oyomde ndikut, kpukpru owo eke enyenede mbon emi edɔŋɔde nsio-nsio udɔŋɔ, eda mmɔ esɔk Jesus; Enye onyuŋ odori mmɔ kpukpru ubɔk ndien anam udɔŋɔ okure mmɔ. 41Demon enyuŋ ewɔŋɔ ediwak owo ke idem, efiori ete, Afo edi Eyen Abasi. Edi Enye asua ɔnɔ mmɔ iyakke mmɔ esioro uyo; koro mmɔ efiɔkde ete Enye edi Christ.

42Edi ke adaŋemi eyo esierede, Enye adaha aka ke ebiet desert: ndien mme otu owo eyom Enye, enyuŋ edi edisim Enye, ebɔbiɔŋɔ Enye ete, Okukpɔŋ mme imɔ. 43Ndien Enye ɔdɔhɔ mmɔ ete, Mmenyene ndikwɔrɔ eti mbuk ubɔŋ Abasi nnɔ mme obio eŋwen ŋko: koro ekedɔŋ Mi ete ndinam oro.

44Ndien Enye asaŋa ɔkwɔrɔ ikɔ ke mme synagogue Galilee.

Currently Selected:

LUKE 4: ENA

Highlight

Copy