JOHN 17

Jesus Ɔbɔŋ Akam Ɔnɔ Mbet Esie

1JESUS etiŋ mme ikɔ emi; ndien emenere enyin ese enyɔŋ, onyuŋ ɔdɔhɔ ete, Ete, ini emedi; nɔ Eyen Fo ubɔŋ, man Eyen Fo ɔnɔ Fi ubɔŋ; 2kpa nte ama ɔkɔnɔ Enye odudu ndikara kpukpru obukidem, ete akpada nsinsi uwem ɔnɔ owo ekededi eke Afo ayakde ɔnɔ Enye. 3Ndien nsinsi uwem oro edi ndifiɔk Fi, ata Abasi kierakiet, ye Enye emi Afo ɔkɔdɔŋde, kpa Jesus Christ. 4Ami mma nnɔ Fi ubɔŋ ke isɔŋ, ke emi ŋkanamde utom eke Afo ɔkɔnɔde Mi nnam. 5Ndien ke emi, Ete, da ubɔŋ, eke ŋkenyenede ye Afo ndien ererimbot edidu, nɔ Mi. 6Mma nyarare enyiŋ Fo nnɔ mme owo emi okosiode ke ererimbot ɔnɔ Mi; mmɔ ekedi Okuo, Afo okonyuŋ ayak mmɔ ɔnɔ Mi, 7mmɔ ema enyuŋ enim mme ikɔ Fo. Idahaemi mmɔ efiɔk ete kpukpru ŋkpɔ ekededi eke Afo ɔkɔnɔde Mi eto Fi: 8koro mmayak mme ikɔ emi ɔkɔnɔde Mi nnɔ mmɔ: mmɔ ekɔbɔ mme ikɔ oro, enyuŋ eneŋere efiɔk ete ŋkoto ke ɔtɔ Fo ŋwɔrɔ, enyuŋ enim ke akpanikɔ ete edi Afo ɔkɔdɔŋ Mi. 9Mmebeŋe Fi mbaŋa mmɔ, mbeŋeke mbaŋa ererimbot, edi mbeŋe mbaŋa mmɔ oro ɔkɔnɔde Mi: koro mmɔ edi Okuo: 10ndien kpukpru se idide Okim edi Okuo, se idide Okuo onyuŋ edi Okim: mmonyuŋ nnyene ubɔŋ ke mmɔ. 11Ndiduhe aba ke ererimbot, ndien mmɔ edu ke ererimbot, ndien Ami ke nnyɔŋ ntiene Fi. Edisana Ete, da enyiŋ Fo kama mmɔ emi ɔkɔnɔde Mi, man mmɔ edi kiet, kpa nte nnyin idide kiet. 12Ke adaŋemi ŋkodude ye mmɔ, Ami mma nda enyiŋ Fo ŋkama mmɔ emi Afo ɔkɔnɔde Mi; mma nnyuŋ ŋkpeme mmɔ, ndien baba owo mmɔ kiet ikatakke, ke mibɔhɔke eyen nsobo; man se ewetde osu. 13Edi ke emi mmɔŋ nnyɔŋ ntiene Fi; ndien ntiŋ mme ŋkpɔ emi ke ererimbot, man mmɔ enyene idaresit Mi ɔyɔhɔ-ɔyɔhɔ ke esit mmɔ. 14Ami ŋkayak ikɔ Fo nnɔ mmɔ; ndien ererimbot asasua mmɔ, koro mmɔ midige eke ererimbot, kpa nte ami mmendige eke ererimbot. 15Mbeŋeke nte Afo osio mmɔ ke ererimbot efep, edi mmebeŋe nte ekpeme mmɔ ke idiɔk esie. 16Mmɔ idige eke ererimbot, kpa nte Ami mmendige eke ererimbot. 17Da akpanikɔ Fo dianare mmɔ nim nɔ Idem Fo: ikɔ Fo edi akpanikɔ. 18Nte Afo ɔkɔdɔŋde Mi ndi ke ererimbot, kpasuk ntre ke Ami ndɔŋ mmɔ eka ke ererimbot. 19Ndien kabaŋa mmɔ ndianare Idem Mmi nnim nnɔ Fi, man ekpada akpanikɔ edianare mmɔ ŋko enim enɔ Fi. 20Mbeŋeke mbaŋa mmɔ emi ikpɔŋ, edi mbeŋe mbaŋa mmɔ nde eke ebuɔtde idem ye Ami oto ke ikɔ mmɔ, 21man mmɔ kpukpru ekpakam edi kiet, nte Afo, Ete, odude Mi ke idem, Ami nnyuŋ ndude ke Afo; man mmɔ enyuŋ edu ke nnyin: man ererimbot enim ke akpanikɔ ete, edi afo ɔkɔdɔŋ Mi. 22Mmonyuŋ nyak ubɔŋ emi Afo ɔkɔnɔde Mi nnɔ mɔ; man mmɔ edi kiet, kpa nte nnyin idide kiet; 23man Ami ndu ke esit mmɔ, Afo onyuŋ odu ke esit Mi, man mmɔ ekabare efɔn ema edi kiet edehe; man ererimbot efiɔk ete edi Afo okosio Mi ɔdɔŋ, omonyuŋ ama mmɔ, kpa nte akamade Mi. 24Ete, mmoyom nte mmɔ emi Afo ɔkɔnɔde Mi edidu ye ami ke ebiet eke ndude; man mmɔ ekut ubɔŋ Mi emi Afo ɔkɔnɔde Mi: koro Afo akamama Mi, ndien ediwuk adaha ererimbot. 25O edinen Ete, ererimbot ikɔfiɔkke Fi, edi Ami mmɔfiɔk Fi; mmɔ emi enyuŋ efiɔk ete Afo ɔkɔdɔŋ Mi. 26Ndien mmayarare enyiŋ Fo nnɔ mmɔ, nyenyuŋ nyarare: man ima emi Afo akamade Mi odu mmɔ ke esit, Ami nnyuŋ ndu mmɔ ke esit.

Currently Selected:

JOHN 17: ENA

Highlight

Copy