JOHN 16

Mfuhɔ Mbufo Eyekabare Edi Idara

1 NTIŊ mme ikɔ emi nnɔ mbufo, mbak owo edisin mbufo eduɔ. 2Mmɔ eyebin mbufo esio ke mme synagogue; ini ke onyuŋ edi eke owo ekededi eke ediwotde mbufo eyese ete imɔ inam ŋkpɔ inɔ Abasi. 3Ndien mmɔ eyenam mme ŋkpɔ emi, koro mmɔ mikɔdiɔŋɔke Ete, minyuŋ idiɔŋɔke Mi. 4Edi ntiŋ mme ŋkpɔ emi nnɔ mbufo, man, ke adaŋemi edikemde ini mmɔ, mbufo ekpeti ete mma ŋkasian mbufo. Ŋkasianke mbufo mme ŋkpɔ emi ke eritɔŋɔ, sia nsuk ndodu ye mbufo. 5Edi mmɔŋ ndinyɔŋ ke emi ntiene Enye emi ɔkɔdɔŋde Mi; mbufo baba owo kiet inyuŋ ibupke Mi ite, aka mmɔŋ? 6Edi mfuhɔ ɔyɔhɔ mbufo ke esit koro nnemede mme ŋkpɔ emi nnɔ mbufo. 7Edi ntiŋ akpanikɔ nnɔ mbufo; erinyɔŋ Mi eyefɔn ye mbufo: koro edieke mmenyɔŋke, Iberedem iditieneke mbufo; edi mma nnyɔŋ, nyedɔŋ Enye etiene mbufo. 8Ndien ke ini Enye edidide, Enye eyemen ifiɔk abaŋa idiɔk-ŋkpɔ, ye edinen ido, ye ikpe, otuk ererimbot esit; 9abaŋa idiɔk-ŋkpɔ, koro mmɔ mibuɔtke idem ye Ami; 10abaŋa edinen ido, koro nnyɔŋde ntiene Ete, mbufo midinyuŋ ikwe Mi aba; 11abaŋa ikpe, koro ema ekekpe ikpe ɔbɔŋ ererimbot emi. 12Mmenyene ediwak ŋkpɔ kaŋa ndineme ye mbufo, edi mbufo ikemeke ndiyɔ mmɔ ke emi. 13Edi ke adaŋemi Enye oro edidide, kpa Spirit akpanikɔ, Enye eyeda mbufo oduk ke ofuri akpanikɔ: koro Enye iditiŋke ikɔ Esiemɔ; edi editiŋ kpukpru se Enye okokopde: Enye eyenyuŋ emen se iditibede ayarare ɔnɔ mbufo. 14Enye eyenam nnyene ubɔŋ: koro Enye eyeda se inyenede Mi ayarare ɔnɔ mbufo. 15Kpukpru se Ete enyenede edi okim: ntak edi oro ndɔhɔde nte, Enye eyeda se inyenede Mi ayarare ɔnɔ mbufo. 16Ke ekpri ibio ini mbufo idikwe Mi aba, ke ekpri ibio ini ŋko mbufo eyekut Mi. 17Mmɔdo ndusuk mbet Esie eneme ye kiet eken, ete, Nso ke Enye ɔdɔhɔ nnyin emi ntem, ete, Ke ekpri ibio ini mbufo idikwe Mi; ke ekpri ibio ini ŋko mbufo eyekut Mi; ŋko, Koro nnyɔŋde ntiene Ete? 18Ntem ke mmɔ ebup ete, Nso ke Enye etiŋ ete, Ekpri ibio ini? 19Nnyin ifiɔkke se ikɔ Esie ɔwɔrɔde. Jesus ɔfiɔk ete ɔdɔŋ mmɔ ndibup Imɔ; ntre ke Enye ete mmɔ, Nte ebup mbume ke idem mbufo ebaŋa ikɔ eke ntiŋde, nte, Ke ekpri ibio ini mbufo idikwe Mi, ke ekpri ibio ini ŋko mbufo eyekut Mi? 20Ke akpanikɔ ke ndɔhɔ mbufo nte, mbufo eyetuaŋa enyuŋ eseme, edi ererimbot eyedara: mbufo eyefuhɔ, edi mfuhɔ mbufo eyekabare edi idara. 21Ke ini uman otukde ŋwan, enye odu ke mfuhɔ koro ekemde ini esie: edi ke ini enye ama aman eyen, enye itihi aba ndutuhɔ ɔnɔ idara, emi owo amanade oduk ererimbot. 22Mmɔdo mbufo edude ke mfuhɔ ke emi; edi nyetɔŋɔ ntak ŋkut mbufo, esit eyenyuŋ adat mbufo, ndien baba owo kiet idibɔhɔ mbufo idaresit mbufo. 23Ekem ke usen oro mbufo idibupke Mi baba ŋkpɔ kiet. Ke akpanikɔ ke ndɔhɔ mbufo, ŋkpɔ ekededi eke edibeŋede Ete, Enye eyenɔ mbufo ke enyiŋ Mi. 24Tutu osim ini emi mbufo ikebeŋeke baba ŋkpɔ kiet ke enyiŋ Mi: ebeŋe, ndien mbufo eyebɔ, man idaresit mbufo ɔyɔhɔ.

25 Ŋketiŋ mme ŋkpɔ emi nnɔ mbufo ke ŋke: ini ke edi eke mmenditiŋke ŋkpɔ nnɔ mbufo aba ke ŋke edi nyesian mbufo iŋwaŋ-iŋwaŋ mbaŋa Ete. 26Adaŋoro mbufo eyebeŋe ŋkpɔ ke enyiŋ Mi: ndien ndɔhɔke nte nyekpe Ete ubɔk nnɔ mbufo: 27koro Ete ke Idem Esie amama mbufo, sia mbufo ekamamade Mi, enyuŋ enimde ke akpanikɔ ete Ami ŋkoto ke ɔtɔ Ete ndi. 28Ŋkoto ke ɔtɔ Ete ndi ke ererimbot; nnyuŋ mmɔŋ ŋkpɔŋ ererimbot nnyɔŋ ntiene Ete. 29Mbet Esie ete, Sese, emetiŋ ikɔ ndien iŋwaŋ-iŋwaŋ, unyuŋ utopke aba ŋke. 30Ke emi ke nnyin imokut ite Afo ɔmɔfiɔk kpukpru ŋkpɔ, unyuŋ uyomke owo obobup Fi: imada emi inim ke akpanikɔ ite Afo oto Abasi edi. 31Jesus ɔbɔrɔ mmɔ ete, Nte mbufo emonim ndien ke akpanikɔ? 32Sese, ini ke edi, onyuŋ ededi ama, eke mbufo edisuanade, kpukpru mbufo edinyuŋ enyɔŋde ke ebiet mbufo, edinyuŋ ekpɔŋde Mi ikpɔŋ: edi ntiehe ikpɔŋ, koro Ete odude ye Ami. 33Ntiŋ mme ŋkpɔ emi nnɔ mbufo, man mbufo enyene emem ke Idem Mi. Mbufo eyekut ukut ke ererimbot: edi esɔŋ esit; Ami ŋkakan ererimbot.

Currently Selected:

JOHN 16: ENA

Highlight

Copy