JOHN 10

Jesus Otop Ŋke Abaŋa Ekpeme-Erɔŋ

1 KE akpanikɔ ke ndɔhɔ mbufo, Owo eke misaŋake ibe inua-otop iduk ke ufɔk-erɔŋ, edi ɔdɔkde ke usuŋ efen oduk, owo oro edi inɔ ye owo ŋwo. 2Edi owo eke asaŋade ebe inua-otop oduk edi ekpeme-erɔŋ. 3Etie-usuŋ eberere usuŋ ɔnɔ enye; mme erɔŋ enyuŋ ekop uyo esie: ndien enye okot mme erɔŋ esiemɔ ke enyin ke enyiŋ, onyuŋ ada mmɔ ɔwɔrɔ. 4Ke enye ama okosioŋo kpukpru mme erɔŋ esiemɔ, enye ebem mmɔ iso, merɔŋ enyuŋ etiene enye, koro mmɔ ediɔŋɔde uyo esie. 5Edi mmɔ iditieneke esen owo, edi eyefeŋe ekpɔŋ enye: koro mmɔ midiɔŋɔke uyo isen owo. 6Jesus otop ŋke emi ɔnɔ mmɔ; edi mmɔ ifiɔkke se ikɔ emi Enye etiŋde ye mmɔ ɔwɔrɔde.

7Mmɔdo Jesus ɔtɔŋɔ ntak ɔdɔhɔ mmɔ ete, ke akpanikɔ ke ndɔhɔ mbufo, Ami ndi inua-otop erɔŋ. 8Kpukpru owo eke ekebemde Mi iso edi edi inɔ ye mbon ŋwo: edi mme erɔŋ ikopke mmɔ uyo. 9Ami ndi inua-otop: edieke owo ekededi ebede Mi oduk, enye eyekut erinyaŋa, eyenyuŋ ebe oduk, onyuŋ ebe ɔwɔrɔ, okut se adiade. 10Inɔ idige, ke mibɔhɔke man oyip, onyuŋ owot, onyuŋ osobo: Ami ŋkedi man mmɔ enyene uwem, enyuŋ edɔdiɔŋ enyene ekan. 11Ami ndi eti ekpeme-erɔŋ; eti ekpeme-erɔŋ ayak uwem Esie ɔduɔk kabaŋa mme erɔŋ. 12Owo emi anamde utom ke okuk, emi midige ekpeme-erɔŋ, mme erɔŋ minyuŋ inyeneke enye, okut nte ekpe edide, ɔkpɔŋ mme erɔŋ, efehe esiemɔ, ekpe onyuŋ omum mmɔ asuan: 13enye efehe koro enye anamde utom ke okuk, minyuŋ ikereke mme erɔŋ. 14Ami ndi eti ekpeme-erɔŋ; mmɔfiɔk se inyenede Mi, se inyenede Mi onyuŋ ɔfiɔk Mi kpa nte Ete ɔfiɔkde Mi, 15Ami nnyuŋ mfiɔkde Ete; mmonyuŋ nyak uwem Mi nduɔk ke ibuot mme erɔŋ. 16Mmonyuŋ nnyene mme erɔŋ eŋwen, emi mitoho ke ufɔk-erɔŋ emi; nnyene ndida mmɔ ŋko ndi, ndien mmɔ eyekop uyo Mi; ndien mmɔ eyekabare edi otu-erɔŋ kiet, Ekpeme-erɔŋ kiet eyenyuŋ odu. 17Emi esin Ete ama Mi, koro Ami nyakde uwem Mi nduɔk, man ŋkpɔtɔŋɔ ntak mbɔ nda. 18Owo baba kiet ibɔhɔ Mi uwem, edi Ami ke Idem Mi nyak uwem Mi nduɔk. Mmenyene odudu ndiyak uwem Mi nduɔk, mmonyuŋ nnyene odudu nditɔŋɔ ntak mbɔ uwem mi nda. Ŋkɔbɔ item emi ke ubɔk Ete Mi.

19Ubahare ɔtɔŋɔ ntak otibe ke otu mme Jew kabaŋa mme ikɔ emi. 20Ediwak mmɔ ete, Enye enyene demon, idat onyuŋ anam Enye: nsinam mbufo ekopde ikɔ Esie? 21Mmɔ eken ete, Emi idige ikɔ owo eke enyenede demon. Nte demon ekeme nditat owo nnan enyin?

22Ekem osim ini usɔrɔ erinam temple asana ke Jerusalem: edi ini ukwɔ; 23ndien Jesus asasaŋa ke temple, ke etehe Solomon. 24Ntre ke mme Jew edikan Enye ekuk, ete Enye, Adaŋa didie ke Afo edinam nnyin itak ke iyihe? Edieke Afo edide Christ, tiŋ nnɔ nnyin iŋwaŋ-iŋwaŋ. 25Jesus ɔbɔrɔ mmɔ ete, Mma ntiŋ nnɔ mbufo, ndien mbufo inimke ke akpanikɔ: mme utom eke Ami nnamde ke enyiŋ Ete Mi edi ntiense enɔ Mi. 26Edi mbufo inimke ke akpanikɔ koro mbufo midige ke otu mme erɔŋ Mi. 27Mme erɔŋ Mi ekop Mi uyo, Ami mmonyuŋ mfiɔk mmɔ, mmɔ enyuŋ etiene Mi. 28Ami nnyuŋ nnɔ mmɔ nsinsi uwem; ndien mmɔ iditakke ke nsinsi, baba owo kiet idinyuŋ iwamakere mmɔ isio Mi ke ubɔk. 29Ete Mi emi akayakde mmɔ ɔnɔ Mi omokpon akan kpukpru owo; ndien baba owo kiet ikemeke ndiwamare mmɔ nsio Ete Mi ke ubɔk. 30Ami ye Ete Mi idi kiet. 31Mme Jew etɔŋɔ ntak emen itiat ete itɔ Enye. 32Jesus ɔbɔrɔ mmɔ ete, Ŋkowut mbufo ediwak nti utom eke etode Ete; mbufo etɔ Mi ke itiat kabaŋa utom ewe ke otu mmɔ? 33Mme Jew ebɔrɔ Enye ete, Idige kabaŋa eti utom ke nnyin itɔ Fi ke itiat, edi kabaŋa esuene Abasi, ndien koro Afo, emi edide owo, onimde idem ke Abasi. 34Jesus ɔbɔrɔ mmɔ ete, Nte ikewetke ke ibet mbufo, ite, Ami ndɔdɔhɔ nte, Mbufo edi mme abasi? 35Edieke Abasi okokotde mmɔ emi uyo Abasi osimde mmɔ ete, mme abasi (ndien ŋwed Abasi ikemeke ndikpu), 36nte mbufo edɔhɔ ebaŋa Enye emi Ete okonimde, ete isio Enye idɔŋ ke ererimbot, ete, Afo emesuene Abasi, koro ndɔhɔde nte, Ndi Eyen Abasi? 37Edieke mmenamke utom Ete Mi, ekunim Mi ke akpanikɔ. 38Edi edieke nnamde, okposuk edi nte mbufo minimke Mi ke akpanikɔ, enim utom naŋa ke akpanikɔ; man mbufo efiɔk enyuŋ eneŋere ekut ete, Ete odu Mi ke idem, Ami nnyuŋ ndu ke Ete. 39Ntre ke mmɔ etɔŋɔ ntak eyom ndimum Enye: ndien Enye ɔwɔrɔ ke ubɔk mmɔ.

40Ekem Enye ɔtɔŋɔ ntak adaha ebe Jordan aka ke ebiet emi John okonimde owo baptism ke eritɔŋɔ, onyuŋ etie do. 41Ndien ediwak owo etiene Enye, enyuŋ edɔhɔ ete, Ke akpanikɔ John ikanamde idiɔŋɔ; edi kpukpru se John eketiŋde abaŋa owo emi edi akpanikɔ. 42Ndien ediwak owo ebuɔt idem ye Enye do.

Currently Selected:

JOHN 10: ENA

Highlight

Copy