JOHN 9

Jesus Ɔkɔk Owo Emi Ɔkɔdɔŋɔde Nnan Toto Ke Emana

1EKEM nte Jesus asaŋade ebe, Enye okut owo emi edide nnan toto ke emana. 2Ndien mbet Esie ebup Enye ete, Rabbi, anie akanam idiɔk-ŋkpɔ, ndi owo emi ke idem esie, mme edi ete ye eka esie, esin enye amana nnan? 3Jesus ɔbɔrɔ ete, Idige owo emi anam idiɔk-ŋkpɔ, inyuŋ idige ete ye eka esie enam; edi enye amana ntem, man utom Abasi akpayarare enye ke idem. 4Nnyin inyene ndinam utom Andidɔŋ Mi ke ini edide uwemeyo: ŋkut-eyo ke edi, eke baba owo kiet mikemeke ndinam utom ke esit. 5Adaŋa ini nte ndodu ke ererimbot, ndi uŋwana ererimbot. 6Ke ama ɔkɔdɔhɔ ntem, Enye ɔkɔk etap ke isɔŋ, ada etap oro anam mbat, onyuŋ eyet owo oro mbat ke enyin, ete enye, 7Ka keyet mmɔ ke mkpɔdiɔhɔ-mmɔŋ Siloam (emi ɔwɔrɔde ete, Enye emi ekɔdɔŋde). Owo oro aka ekeyet mmɔ, onyuŋ afiak edi okut usuŋ.

8Ntem ke mbɔhiduŋ owo oro, ye mmɔ eke ekebemde iso ekut ete enye edi ebeŋe-ebeŋe, edɔhɔ ete, Nte emi idige owo emi akam etiede ebeŋe ebeŋe? Mmɔ efen ete, Edi enye: mmɔ efen ete, Idige enye, edi ebiet enye. 9Owo oro ke idem esie ete, Ndi owo oro. 10Ntre ke mmɔ edɔhɔ enye ete, Esaŋa didie etat fi enyin? 11Enye ɔbɔrɔ ete, Owo emi ekerede Jesus anam mbat ada eyet mi enyin, onyuŋ ɔdɔhɔ mi ete, Ke ke Siloam keyet mmɔ. Ntre ke ŋka ŋkeyet mmɔ, ŋkabare ŋkut usuŋ. 12Mmɔ ete, Enye odu mmɔŋ? Owo oro ete, mfiɔkke.

13Mmɔ eda owo oro ekedide nnan esɔk mme Pharisee. 14Ekedi ke sabbath ke Jesus anam mbat atat enye enyin. 15Ntem ke mme Pharisee etɔŋɔ ntak ebup owo oro adaŋa nte enye akasaŋade okut usuŋ. Enye ete mmɔ, Jesus akada mbat eyet mi enyin, ŋkonyuŋ nyet mmɔ, nnyuŋ ŋkut usuŋ. 16Mmɔdo ndusuk mme Pharisee edɔhɔ ete, Owo emi itoho Abasi, koro Enye minimke sabbath. Mmɔ efen ete, Owo emi edide anam-idiɔk ekeme didie ndinam oruk idiɔŋɔ eke etiede ntem? Ntre ke ubahare odu ke otu mmɔ. 17Mmɔ etɔŋɔ ntak edɔhɔ owo nnan, ete, Afo ɔdɔhɔ nso abaŋa Enye, sia Enye akatatde fi enyin? Owo oro ɔbɔrɔ ete, Enye edi prophet. 18Edi mme Jew inimke ke akpanikɔ ite owo oro ekedi nnan ndien akabare okut usuŋ, tutu mmɔ ekot ete ye eka owo oro ekenamde enye okut usuŋ edi; 19enyuŋ ebup mmɔ ete, Ndi owo emi edi eyen mbufo, emi mbufo edɔhɔde ete, enye akamana nnan? 20Enye asaŋa didie okut usuŋ ke emi? Ete ye eka esie ebɔrɔ ete, Imɔfiɔk ite emi edi eyen nnyin, enye okonyuŋ amana nnan; 21edi nte enye akasaŋade okut usuŋ ke emi, nnyin ifiɔkke, inyuŋ ifiɔkke owo emi akatatde enye enyin: ebup enye; enye omokpon; enye eyetiŋ abaŋa idem esie. 22Ete ye eka esie edɔhɔ ntem, koro mmɔ efehede mme Jew; koro mme Jew ema ekediomi ete, edieke owo onyimede ete Jesus edi Christ, iyebin owo oro isio ke synagogue. 23Ke ntak oro ete ye eka esie edɔhɔ ete, Enye omokpon, ebup enye.

24Ntre ke mme Jew etɔŋɔ ntak ekot owo oro ekedide nnan, ete enye, Men ubɔŋ nɔ Abasi; nnyin imɔfiɔk ite owo emi edi anam-idiɔk. 25Owo oro ɔbɔrɔ ete, Mfiɔkke mme Enye edi anam-idiɔk. Mmɔfiɔk ŋkpɔ kiet, nte, ŋkedi nnan, edi mmotkut usuŋ ke emi. 26Mmɔ ete enye, Enye akanam fi nso? Enye anam didie atat fi enyin? 27Enye ɔbɔrɔ mmɔ ete, Mmetiŋ nnɔ mbufo idem idaha emi, edi mbufo ikopke: nsinam mbufo eyomde nditɔŋɔ ntak ŋkop? nte mbufo ŋko ke eyom ndikabare ndi mbet Esie? 28Mmɔ esuŋi enye ete, Afo edi owo mbet Esie, edi nnyin idi mbet Moses. 29Nnyin imɔfiɔk ite Abasi ekeneme nneme ye Moses; edi ama edi owo emi, nnyin ifiɔkke ebiet eke Enye otode. 30Owo oro ɔbɔrɔ mmɔ ete, Se utibe ŋkpɔ do ndien. Mbufo ifiɔkke ebiet eke Enye otode, edi Enye ama atat mi enyin. 31Nnyin imɔfiɔk ite Abasi ikopke ebeŋe mme idiɔk owo: edi edieke owo eteŋede Abasi, onyuŋ anamde se Abasi amade, Enye okop ebeŋe owo oro. 32Toto ererimbot ɔkɔtɔŋɔ, akananam nnyin ikopke ite owo atat enyin owo emi amanade nnan. 33Edi nte ededi, edieke owo emi mikpotoho Abasi, Enye ikpekemeke ndinam ndomo ŋkpɔ kiet. 34Mmɔ ebɔrɔ enye ete, Afo akamana ke idiɔk-ŋkpɔ ofuri-ofuri: nte afo ekpekpep nnyin ŋkpɔ ndien? Ntem ke mmɔ ebin enye eduɔk.

35Jesus okop ete mmɔ ema ebin owo oro. Ntre ke ini Jesus okutde enye, Enye ete, Nte afo ɔmɔbuɔtidem ye Eyen Abasi? 36Enye oro ɔbɔrɔ ete, ɔbɔŋ, Eyen Abasi edi anie man mbuɔtidem ye Enye? 37Jesus ete enye, Afo omokut Enye, Enye emi enemede nneme ye afo onyuŋ edi Enye. 38Owo oro ete, Mmɔbuɔt idem, Ɔbɔŋ; onyuŋ atuak ibuot ɔnɔ Jesus. 39Ekem Jesus ɔdɔhɔ ete, Ami mma ndi ke ererimbot emi ndikpe ikpe nnɔ owo, man mmɔ eke mikwe ŋkpɔ ekpekut, mmɔ eke ekutde ŋkpɔ ekponyuŋ ekabare edi nnan. 40Ndusuk mme Pharisee emi edude ye Enye ekop ikɔ emi, enyuŋ edɔhɔ Enye ete, Nte nnyin nde idi nnan? 41Jesus ete mmɔ, Edieke mbufo ekpedide nnan, mbufo ikpenyeneke idiɔk-ŋkpɔ: edi ke emi mbufo edɔhɔ ete, Imokut ŋkpɔ: idiɔk-ŋkpɔ mbufo osuk ododu.

Currently Selected:

JOHN 9: ENA

Highlight

Copy