GENESIS 9

Ediomi Emi Abasi Akanamde ye Noah

1NDIEN Abasi ɔdiɔŋ Noah ye nditɔ esie, ete mmɔ, Mbufo etɔt, enyuŋ ewak, enyuŋ eyɔhɔ ke ererimbot. 2Ndien kpukpru unam obot ye kpukpru inuen enyɔŋ, ye kpukpru se inyɔnide ke isɔŋ, ye kpukpru iyak ke mmɔŋ eyebak mbufo, eyenyuŋ eteŋe mbufo: mmɔ esine mbufo ke ubɔk. 3Kpukpru se inyɔnide eke odude uwem eyedi udia mbufo; mmada kpukpru nnɔ mbufo, kpa nte ŋkadade awawa ikɔŋ nnɔ. 4Edi mbufo ekuta unam ye uwem esie, iyip esie. 5Nditreke ndiyom iyip mbufo eke uwem mbufo; nyeyom enye ke ubɔk kpukpru unam, ye ke ubɔk owo; nyeyom uwem owo ke ubɔk eyen-ete esie. 6Ama edi owo eke ɔduɔkde iyip owo, owo eyeduɔk iyip esie: koro ke mbiet Abasi ke enye akanam owo. 7Ndien mbufo etɔt enyuŋ ewak; esiaha ke isɔŋ, enyuŋ ewak ke esit.

8Ndien Abasi ɔdɔhɔ Noah, ye 9nditɔ-iren esie ŋko, ete, Semi ami mmanam ediomi mi ye mbufo ɔsɔŋɔ ada, ye nditɔ mbufo 10ŋko eke editienede mbufo; ye kpukpru se idude uwem nde emi edude ye mbufo, ke inuen, ye ke ufene, ye ke kpukpru unam obot ye mbufo; ɔtɔŋɔde ke kpukpru se itode ke ubom iwɔŋɔ osim kpukpru unam obot. 11Nyenyuŋ ntim nnim ediomi mi ye mbufo: kpukpru obukidem iditakke aba ke mmɔŋ ukwɔ; ukwɔ eke osobode isɔŋ idinyuŋ iduhe aba. 12Ndien Abasi ɔdɔhɔ ete, Emi edi idiɔŋɔ ediomi emi ami nnimde ke ufɔt mi ye mbufo, ye kpukpru mme andidu uwem emi edude ye mbufo ke nsinsi emana: 13mmonim akpara mi ke idiɔk enyɔŋ, enye eyenyuŋ edi idiɔŋɔ ediomi ke ufɔt mi ye ererimbot. 14Ama ekem, ke ini nte nnamde idiɔk enyɔŋ ofuk isɔŋ, eyekut akpara ke idiɔk enyɔŋ: 15nyenyuŋ nti ediomi mi, emi odude ke ufɔt mi ye mbufo, ye kpukpru se idude uwem, ke kpukpru obukidem; ndien mmɔŋ idikabakede aba ukwɔ ndisobo 16kpukpru obukidem. Akpara eyenyuŋ odu ke idiɔk enyɔŋ; nyenyuŋ nse enye, nnyuŋ nti nsinsi ediomi ke ufɔt Abasi, ye kpukpru mme andidu uwem, ke kpukpru obukidem emi odude ke ererimbot. 17Ndien Abasi ɔdɔhɔ Noah ete, Emi edi idiɔŋɔ ediomi, emi nnimde ke ufɔt mi ye kpukpru obukidem emi odude ke ererimbot.

18Ndien nditɔ-iren Noah, emi etode ke ubom ewɔŋɔ edi Shem, ye Ham, ye Japhet: Ham onyuŋ edi ete Canaan. 19Mme mmɔ emi mbita edi nditɔ-iren Noah: ndien oto mmɔ emi ofuri ererimbot asiaha.

20Ekem, Noah ɔtɔŋɔ ndidi owo iŋwaŋ, ndien ɔtɔ iŋwaŋ vine: 21enye onyuŋ ɔŋwɔŋ wine akpa; ndien ana iferi ke ufɔt ataya esiemɔ. 22Ndien Ham, ete Canaan, okut ete esie iferi, onyuŋ etiŋ ɔnɔ nditɔ ete esie iba ke esien. 23Ndien Shem ye Japhet emen ufuhɔ-ŋkpɔ, edori ke afara mmɔ mbiba, esaŋa edem-edem ekefuk ete mmɔ iferi, iso mmɔ onyuŋ ese edem ndien ikwe ete mmɔ iferi.

24Ekem Noah edemere ke wine esie, ndien edifiɔk se ekpri eyen esie akanamde ye enye. 25Ndien enye ɔdɔhɔ ete, Osuk ɔdiɔk ɔnɔ Canaan; enye eyedi ofin ifin nditɔ ete esie.

26Enye onyuŋ ɔdɔhɔ ete, Etoro Jehovah Abasi Shem:

27Canaan eyenyuŋ edi ofin mmɔ. Abasi eyenan Japhet ɔtɔt, enye eyenyuŋ oduŋ ke ataya Shem: Canaan eyenyuŋ edi ofin mmɔ. 28Ndien Noah odu uwem ke ukwo ama okokure, ke isua ikie ita ye aba ye duop. 29Ndien ofuri ini uwem Noah edi isua ikie usukkiet ye aba ye duop: ndien enye akpa.

Currently Selected:

GENESIS 9: ENA

Highlight

Copy