ŊWED MBON GALATIA 1

Eti-Mbuk Kiet Kpɔt Odu

1PAUL emi edide apostle (itie emi itoho owo, inyuŋ idige owo enɔ, edi Jesus Christ ɔnɔ, ye Abasi Ete, emi akanamde Enye eset ke mkpa), 2ye kpukpru nditɔ-ete emi edude ye ami, inɔ ŋwed esɔk mme ufɔk Abasi ke Galatia; 3mfɔn ye emem akpakam oto ke ubɔk Abasi Ete nnyin osim mbufo, ye ke ubɔk Ɔbɔŋ nnyin Jesus Christ, 4Emi akayakde Idem Esie ɔnɔ kabaŋa mme idiɔk-ŋkpɔ nnyin, man Enye akpanyaŋa nnyin osio ke idiɔk eyo emi odude ke emi, nte ekemde ye se Abasi ye Ete nnyin aduakde: 5ubɔŋ enyene Enye ke nsinsi-nsinsi. Amen.

6Idem akpa mi, koro mbufo ewarade ntem edianare ekpɔŋ Enye emi okokotde mbufo ke mfɔn Christ, ekabare ebine gospel eke edide isio; 7eke midige gospel eŋwen; edi enyene ndusuk owo eke etimerede mbufo, enyuŋ eyomde ndikwaŋa gospel Christ. 8Edi ekpedi nnyin ke idem nnyin idi idikwɔrɔ, okponyuŋ edi angel edito ke heaven ɔkwɔrɔ gospel ɔnɔ mbufo ɔkpuhɔre ye se nnyin ikɔkwɔrɔde, osukɔdɔdiɔkɔnɔ andikwɔrɔ oro. 9Nte mma mbem iso ndɔhɔ, ntre ke ntɔŋɔ ntak ndɔhɔ ke emi nte, Edieke owo ekededi ɔkwɔrɔde gospel ɔnɔ mbufo ɔkpuhɔre ye se mbufo ekɔbɔde, osuk ɔdɔdiɔkɔnɔ owo oro.

10Koro nte nyoyom owo enen iso ye ami, mme nte nyoyom Abasi enen iso ye ami ke emi? mme nte ŋwaŋwana ndinem owo esit? Edieke ŋkposuk nnemde owo esit, ŋkpedige owo Christ.

11Koro nnam mbufo efiɔk, nditɔ-ete, ebaŋa gospel emi ŋkɔkwɔrɔde nte gospel oro idige nte ekikere owo edide. 12Koro ami ŋkɔbɔhɔ enye ke ubɔk owo, inyuŋ idige owo ekpep mi, edi Jesus Christ akayarare enye ɔnɔ mi. 13Koro mbufo ema ekop ebaŋa oruk uwem eke ŋkenyenede tutuko, ke ini ŋkponode Abasi ke ido mme Jew, nte ŋkesinde ufɔk Abasi enyin ŋkaha, nnyuŋ nsobo enye: 14mma nnyuŋ ndɔdiɔŋ nnim ido eke mme Jew edade ekpono Abasi ŋkan ediwak ŋka mi ke otu ikɔt mi, nnyuŋ mfiop esit eti-eti ndikpeme mme item mme ete mi. 15Edi ke adaŋemi Abasi, emi akadianarede mi onim toto ke idibi eka mi, onyuŋ okotde mi ke mfɔn Esie, 16amade ndiyarare Eyen Esie ke esit mi, man ŋkpɔkwɔrɔ Enye ke otu mme Gentile; ndukke nneme idaha oro ye obuk ye iyip: 17nnyuŋ ndɔkke ŋka Jerusalem ntiene mmɔ emi ekebemde mi iso edi mme apostle: edi ndaha ŋka Arabia; ndien ntɔŋɔ ntak mfiak ndi ke Damascus.

18Ekem ke isua ita ema ekebe, ndɔk ŋka Jerusalem ndise Cephas, nnyuŋ ndaŋ ye enye usen efut. 19Edi ŋkekwe mme apostle eken baba kiet, ke mibɔhɔke James, eyen-eka Ɔbɔŋ. 20Ke mme ŋkpɔ emi ŋwewet nnɔ mbufo, sese, ke iso Abasi, nsuhu nsu. 21Edikem ŋka ke ŋkaŋ Syria ye Cicilia. 22Edi mme ufɔk Abasi Judea eke edude ke Christ idiɔŋɔke mi iso. 23Ukure, mmɔ ke ekokop nte etiŋde ete, Ke emi owo oro ɔkɔkɔbɔde nnyin tutuko eyekwɔrɔ ikɔ mbuɔtidem emi enye akaŋwanade ndisobo; 24ndien mmɔ enɔ Abasi ubɔŋ ebaŋa mi.

Currently Selected:

ŊWED MBON GALATIA 1: ENA

Highlight

Copy