UTOM MME APOSTLE 28

Paul Ke Isuo Ekerede Melita

1KE adaŋemi nnyin ibɔhɔde, nnyin ifiɔk ite isuo oro ekere Melita. 2Nditɔ idut oro efɔn ido ye nnyin eti-eti: koro mmɔ ebara ikaŋ, enyuŋ edara kpukpru nnyin, sia ekedide ini edim ye ini tuep. 3Edi ke adaŋemi Paul ataŋde ebek ifia esin ke ikaŋ ufiop esin ibɔm ɔwɔrɔ ediyire enye ke ubɔk. 4Ndien ke ini nditɔ idut oro ekutde nte anyan unam oro eyirede enye ke ubɔk, mmɔ eneme ye kiet eken ete, Owo emi itreke tre ndidi owot -owo. Okposuk edi nte enye ɔbɔhɔde inyaŋ, Edinen Ikpe inyimeke enye odu uwem. 5Edi enye ekeŋ anyan unam esin ke ikaŋ, ŋkpɔ inyuŋ inamke enye. 6Nditɔ idut oro ese ete enye eyefut, midige, ɔduɔ akpa ini kiet: edi ke ini mmɔ etiede ebet anyan ini, minyuŋ ikwe ite ŋkpɔ anam enye, mmɔ ekpuhɔre ekirere, ete, enye edi abasi.

7Andikara isuo oro, emi ekerede Publius, enyene iŋwaŋ do ŋkpet-ŋkpet. Enye adara ndikut nnyin, onyuŋ otim akama nnyin usen ita. 8Edi ufiopidem ye utɔrɔ-iyip anam ete Publius. Ndien Paul oduk ekese enye, ɔbɔŋ akam, onyuŋ odori enye ubɔk, anam udɔŋɔ okure enye. 9Ndien ke ŋkpɔ emi ama ɔkɔwɔrɔ ntem, mmɔ eken emi edɔŋɔde ke isuo edi, enyuŋ ekop nsɔŋidem. 10Mmɔ enyuŋ ekpono nnyin eti-eti, ndien ke ini iyomde ndisio, mmɔ enɔ nnyin kpukpru se inanade nnyin.

11Ntem ke ɔfiɔŋ ita ema ekebe, nnyin idiere ke ubom Alexandria emi akadiande do ke isuo ke ini ukwɔ; idiɔŋɔ ubom oro edi Amana Iba. 12Nnyin idian ke Syracuse, idu do ke usen ita. 13Nnyin ito do iwaha ikosim Rhegium: ndien ke usen kiet ama ekebe, ofim usuk ɔtɔŋɔ ndifime, onyuŋ ada nnyin okosim Puteoli ke ndaŋ-nsiere. 14Nnyin ikut nditɔ-ete do, ndien mmɔ ekpe ete idaŋ ye mme imɔ usen itiaba. Ntre ke nnyin idisim Rome. 15Ndien kini nditɔ-ete ekopde ebaŋa nnyin, mmɔ ewɔŋɔ edi edisobo ye nnyin ke Aŋwa-urua Appius ye Ufɔk-isen-ita. Ndien ke ini Paul okutde mmɔ, enye ɔkɔm Abasi, onyuŋ okop nsɔŋesit. 16Ke ini nnyin idukde ke Rome, eyak Paul oduŋ ke idem esie ye owo-ekɔŋ emi ekpemede enye.

17Ekem ke usen ita ema ekebe, enye okot ikpɔ owo mme Jew obon: ndien ke ini mmɔ ema ekedi edisobo ɔtɔ kiet enye ɔdɔhɔ mmɔ ete, Nditɔ-ete, okposuk edi nte mmenamke mbio-obio nnyin baba ŋkpɔ kiet, mme nnyuŋ mbiatke ido mme ete nnyin, ikɔt nnyin eda mi nte owo-ŋkpɔkɔbi ke Jerusalem esin ke ubɔk mbon Rome. 18Ke ini mmɔ oro edomode mi, mmɔ eyom ndisana mi nyak, sia ntak miduhe nte ekpewotde mi. 19Edi ke adaŋemi mme Jew efaŋade, ŋkenyene nditomo ubɔk Caesar: idige koro nnyenede se ntiŋde ndian obio nnyin. 20Oro esin mbeŋe mbufo edi edise mi, enyuŋ eneme nneme ye ami: koro nsine ke ŋkpɔkɔbi emi kabaŋa idori-enyin Israel. 21Mmɔ ebɔrɔ enye ete, Nnyin ikɔbɔhɔ ŋwed oto Judaea ibaŋa fi, baba kiet ke otu nditɔ-ete inyuŋ idige ken ndinɔ nnyin idiɔk ntɔt mme mbuk mbaŋa fi. 22Edi iyom ndikop se ekerede ke inua fo: edi ama edi ŋka emi, nnyin imɔfiɔk ite mme owo etiŋ ŋkpɔ ebiat enye ke kpukpru ebiet.

23Ntre ke mmɔ emek usen enim enɔ enye, enyuŋ esaŋa uwak-uwak edi ke ebiet emi enye odude. Ndien tɔŋɔ usenubɔk tutu mbubreyo, enye aŋwaŋade ŋkpɔ ɔnɔ mmɔ, ɔkwɔrɔ Ubɔŋ Abasi, onyuŋ osioŋo ikɔ ke ibet Moses ye mme-prophet, aŋwana ndiwɔŋɔre mmɔ esit mbaŋa Jesus. 24Ndusuk mmɔ enim ikɔ emi enye etiŋde ke akpanikɔ, ndusuk inimke. 25Ndien sia ekikere mmɔ misaŋake ukem, mmɔ esuana, ke ini Paul ama eketiŋ ikɔ kiet emi, ete, Edisana Spirit okototim ɔdɔhɔ mme ete mbufo ke 26inua prophet Isaiah, ete,

Ka ke ɔtɔ mbio emi kɔdɔhɔ mmɔ ete,

Idem erikop mbufo eyekop, edi ifiɔkke se ɔwɔrɔde;

idem erikut mbufo eyekut, edi idifiɔkke:

27Koro esit mmɔ emi amakabare odobi,

Utɔŋ onyuŋ odobi mmɔ ndikop ikɔ,

Mmɔ emenyuŋ ebɔp enyin;

Mbak mmɔ edida enyin mmɔ ekut usuŋ,

Eda utɔŋ mmɔ ekop ikɔ,

Enyuŋ eda esit mmɔ efiɔk ŋkpɔ enyuŋ ekabare,

Ndien Ami ŋkɔk mmɔ.

28Efiɔk emi ndien, ete, enɔ erinyaŋa Abasi emi esɔk mme Gentile: mmɔ eyenyuŋ ekpaŋ utɔŋ ekop.

29Ke enye ama eketiŋ ikɔ esie ntem ama, mme Jew edaŋa eda etɔhɔ enyuŋ eneni ke otu idem mmɔ, ndien enyɔŋɔ ufɔk mmɔ kiet kiet. 30Ekem Paul oduŋ ofuri isua iba ke ufɔk eke ekpede okuk ke esit, onyuŋ adara ndikut kpukpru mmɔ eke ekade ekese enye; 31enye ɔkwɔrɔ Ubɔŋ Abasi, onyuŋ ekpep mme owo abaŋa Ɔbɔŋ Jesus Christ aŋwa-aŋwa, ndomo owo kiet ikpanke enye.

Currently Selected:

UTOM MME APOSTLE 28: ENA

Highlight

Copy