UTOM MME APOSTLE 27

Emen Paul Eka Rome

1KE adaŋemi ebierede ete nnyin isio ika Italy, eyak Paul ye ndusuk mbon-ŋkpɔkɔbi enwen esin ke ubɔk Julius, etubom udim-ekɔŋ emi ekerede udim-ekɔŋ Augustus. 2Ntre ke nnyin idiere ke ubom Adramyttium, emi oyomde ndiwat ke mme obio mben inyaŋ Asia, inyuŋ isio; Aristarchus, eyen Macedonia emi otode ke Thessalonica, etiene odu ye nnyin. 3Ke ndaŋ-nsiere nnyin idian ke Sidon; do Julius owut Paul mfɔn-ido, ayak enye aka ekese mme ufan esie, man idem atara enye. 4Ndien nnyin ikpɔŋ edem oro isio, inyuŋ ikabare iwat ke ŋkaŋ Cyprus emi ekuide nnyin, sia ofim abarade nnyin ke iso. 5Ndien ke ima ikawat ibe inyaŋ Cilicia ye Pamphylia, nnyin idisim Myra, emi edide obio Lycia. 6Do etubom mbio-ekɔŋ okut ubom Alexandria emi oyomde ndisio ŋka Italy, onyuŋ esin nnyin ke esit. 7Nnyin iwat suŋ-suŋ ediwak usen, inyuŋ iŋwana idikem iso ye Cnidus; ndien sia ofim miyakke nnyin ika iso, nnyin ikabare ibe Salmone, idiwat ke ŋkaŋ Crete emi ekuide nnyin; 8Ntre ke nnyin iŋwana iwat mben-mben, tutu nnyin isim ebiet emi ekerede Eti Itie-uduɔk-ukwak; emi obio Lasea ekperede do.

9Ndien ke ini ama ekebe eti-eti, uwat ama okonyuŋ akabare ɔsɔŋɔ ɔdiɔk, 10koro ini Utre-udia ebede, Paul ɔnɔ mmɔ item ete, Mme ete, ŋkut nte uwat emi eyesɔŋɔ ɔdiɔk eti-eti, onyuŋ ada nsobo etiene ubom ye se idude ke esit, ye nnyin ke idem nnyin. 11Edi etubom udim-ekɔŋ akpaŋ utɔŋ ɔnɔ se andikara ubom ye enyene-ubom etiŋde, esin se Paul etiŋde. 12Ndien sia itie-uduɔk-ukwak oro mifɔnke ikem nte ubom anade do ke ukwɔ, akamba ubak mmɔ enɔ uyo ete, edianare do ewɔrɔ akpa, mme mme imɔ iyeŋwana ikeme ndisim Phoenix ikodu do ke ini ukwɔ. Phoenix edi itie-uduɔk-ukwak ke Crete, emi asakde iso ese edem usiaha-utin ke ŋkaŋ edere-edere ye ŋkaŋ usuk-usuk. 13Ndien ke ini ofim usuk ofimede suŋ-suŋ, mmɔ ebat ete mme imɔ imokut se iyomde; ntre ke mmɔ ekot ukwak, enyuŋ ewat ke mben inyaŋ Crete, ekpere isɔŋ. 14Edi ibigike-bigi ofim ɔkpɔsɔŋ oyobio, emi ekerede Euraquilo, oto ke obot abara ɔsuhɔre omum ubom idiɔk-idiɔk; 15ndien sia ubom mikemeke ndiwat ke ubere-ofim, nnyin itre nyaŋa-idem, ofim onyuŋ ada nnyin asaŋa. 16Ndien ke adaŋemi nnyin isɔpde ikosim ke edem ekpri isuo emi ekerede Cauda, nnyin iŋwana ikan iduri ekpri ubom idian ke ubom; 17ndien ke ini mmɔ ema ekekot ekpri ubom esin ke ubom, mmɔ eda uruk ewaŋ ubom ebɔp: mmɔ enyuŋ efehe ndik mbak idika ikabak ke ntan Syrtis; ntre ke mmɔ esuhɔre mkpoduoho ito, ndien ofim emen mmɔ aka ntre. 18Edi koro oyobio ɔsɔŋɔde amia nnyin et-eti, ke ndaŋ-nsiere mmɔ etɔŋɔ ndisioŋo se edɔŋde ke ubom nduɔŋɔ ke mmɔŋ; 19ndien ke ɔyɔhɔ usen ita mmɔ esioŋo ŋkpɔ-utom ubom ke ubɔk idem mmɔ eduɔŋɔ ke inyaŋ. 20Ke ini nnyin mikemeke aba ndikut utin ye ntantafiɔŋ ediwak usen, ata akwa oyobio onyuŋ amiade nnyin, nnyin iduɔk ofuri idori-enyin ubɔhɔ. 21Ndien ke ini mmɔ midiaha ŋkpɔ anyan ini Paul ɔwɔrɔ aka ke ufɔt mmɔ, ete, Mme ete, mbufo ekpekop uyo mi, ikponyuŋ idianakere ikpɔŋ Crete, idibɔ utɔ afanikɔŋ ye ntak-urua emi. 22Edi ke emi mmebeŋe mbufo nte esɔŋ esit; koro uwem mbufo baba kiet iditakke, edi ubom ikpɔŋ eyetak. 23Koro angel Abasi, emi ndide owo Esie, nnyuŋ nnamde ŋkpɔ nnɔ Enye, akada mi ke ŋkaŋ okoneyo mkpɔŋ, onyuŋ ɔdɔhɔ mi ete, Paul, kufehe ndik; 24afo enyene ndika ke iso Caesar: ndien sese, Abasi ayak kpukpru mmɔ emi ewatde ye afo ɔnɔ fi. 25Mmɔdo, mme ete, esɔŋ esit: koro mmonim Abasi ke akpaniko: mmonim nte eyewɔrɔ osu kpa nte etiŋde enɔ mi. 26Edi iyefiɔrɔ ikabak ke isuo kiet.

27Ke ini osimde ɔyɔhɔ okoneyo duopenaŋ, nte ofim adade nnyin oduyo ke inyaŋ Adria, ke ini ekperede ufɔt okoneyo, etie mbon-uwat ete mme imɔ imɔŋ idikpere isɔŋ; 28ntre ke mmɔ edomo utuŋɔ mmɔŋ enyuŋ ekut ete edi esit edip: ndien ke mmɔ ekebe eka iso esisit, mmɔ etɔŋɔ ntak edomo, ekut ete edi esit efut. 29Ndien sia ndik anamde mmɔ, ete, ndusuk ubom eyeka okodoro ke esuk itiat, mmɔ eduɔŋɔ ukwak inaŋ ke etak ubom, enyuŋ eyom usiere edi. 30Edi ke ini mbon-uwat eyomde ndifeŋe ŋkpɔŋ ubom, ema ekenyuŋ esuk ekpri ubom ke akpa, ebiaŋa ete, mme imɔ iyom ndiduɔk ukwak ke iso, 31Paul ɔdɔhɔ etubom mbon-ekɔŋ ye mbon-ekɔŋ, ete, Edieke mmɔ emi misɔŋɔke itie ke ubom, mbufo idikemeke ndibɔhɔ. 32Ntre ke mbon-ekɔŋ esibe uruk ekpri ubom, eyak enye ɔfiɔrɔ aka. 33Ke ini eyo oyomde ndisere, Paul ekpe ye mmɔ kpukpru ete, edia udia; enye ete mmɔ, mfin edi ɔyɔhɔ usen duopenaŋ nte mbufo eketie ebet, enyuŋ etre ndidia ŋkpɔ. 34Mmɔdo mme-kpe mbufo ubɔk nte, edia ŋkpɔ; emi eyewɔrɔ erinyaŋa ɔnɔ mbufo: koro baba idet ibuot mbufo kiet idikibeke itak. 35Ndien ke enye ama eketiŋ ntem, enye emen uyo, ɔnɔ Abasi ekɔm ke iso kpukpru mmɔ, onyuŋ obuŋ, ɔtɔŋɔ ndita. 36Ekem kpukpru mmɔ esɔŋ esit, enyuŋ edia ŋkpɔ. 37Kpukpru nnyin emi idude ke ubon idi owo ikie iba ye ata ye efurekiet. 38Ke ini mmɔ ediade eyuhɔ, mmɔ esioŋo ibokpot eduɔŋɔ ke inyaŋ, enam ubom efere. 39Edi ke adaŋemi eyo esierede, mmɔ ifiɔkke isɔŋ oro: edi mmɔ ekut itun inyaŋ emi enyenede esuk; enyuŋ enam ekikere ete, mme iyekeme ndida ubom mme imɔ nduk do. 40Ntre ke mmɔ esibe uruk ukwakubom ekpɔŋ mmɔ ke akpa, enyuŋ etat uruk emi mmɔ ekadade ebɔp ubɔi; ndien mmɔ ekot afara iso ubom enɔ ofim, ewat ebine esuk. 41Edi ke adaŋemi mmɔ esimde ebiet emi inyaŋ iba esobode mmɔ ewat ubom ekedian ke isɔŋ; ndien iso ubom atuak ke isɔŋ ɔsɔŋɔ afaha, edi odudu mbufut ɔtɔŋɔ ndiwuri etak ubom. 42Ndien mbon-ekɔŋ eduak ndiwot mbon-ŋkpɔkɔbi, mbak ndusuk mmɔ ediwɔk ebɔhɔ. 43Edi ɔdɔŋ etubom mbon-ekɔŋ ndinyaŋa Paul; ntre ke enye ɔbiɔŋɔ mmɔ ndinam uduak oro. Enye onyuŋ ɔnɔ uyo ete, mmɔ eke ekemede ndiwɔk ewɔk ebem iso eduɔ ke mmɔŋ ekesim isɔŋ; 44edi ama edi mmɔ eke esuhɔre, yak ndusuk mmɔ efiɔrɔ ke enyɔŋ obukpɔk, ndusuk eken efiɔrɔ ke enyɔŋ ŋkpɔ efen emi etode ke ubom. Ke usuŋ emi mmɔ kpukpru ebɔhɔ ekesim isɔŋ ke ifure.

Currently Selected:

UTOM MME APOSTLE 27: ENA

Highlight

Copy